ཝཱ་ཎ་གཙུག་ལག་སློབ་གཉེར་ཁང་དུ་སློབ་མའི་ངོ་རྒོལ།

ཟླ་འདིའི་ཚེས་༡༥ ཉིན་རྒྱ་གར་གྱི་ཧིན་དྷི་གསར་ཁང་amarujalaདྲ་གནས་ཐོག་ཝཱ་ཎ་གཙུག་ལག་སློབ་གཉེར་ཁང་དུ་སློབ་མས་མཐོ་སློབ་ཀྱི་ངེས་སྟོན་པ་དགེ་བཤེས་ངག་དབང་བསམ་གཏན་གྱི་ལས་དུས་རྫོགས་ནས་ལོ་གཅིག་ཕར་འགྱངས་བྱས་པར་ངོ་རྒོལ་སྐད་འབོད་ཀྱི་ལས་འགུལ་སྤེལ་བའི་གནས་ཚུལ་བཀོད་འདུག

ངོ་རྒོལ་ལས་འགུལ་དེ་ཕྱི་ཟླ་༤ ཚེས་༡༥ ནས་ཉིན་ཤས་རིང་སྤེལ་ཡོད་པ་དང་། མཐོ་སློབ་ཀྱི་སློབ་མ་འབྲེལ་ཡོད་ཁག་ཅིག་ལ་གནས་ཚུལ་དེའི་སྐོར་དྲིས་པར། སློབ་གྲྭའི་ནང་དུ་ལས་འགུལ་སྤེལ་བ་ལས་ཕྱི་ལ་ཡོངས་ཁྱབ་བྱེད་བདེ་མི་འདུག་སྐོར་བརྗོད་ཀྱི་འདུག ངེས་སྟོན་པ་དགེ་བཤེས་ངག་དབང་བསམ་གཏན་ལ་ཁ་པར་ཐེངས་ཁ་ཤས་ཕུལ་ཡང་འབྲེལ་གཏུག་མ་ཐུབ་པ་དང་། ཁོང་གི་ཝ་ཚབ་ཐོག་(WhatsApp) བཀའ་འདྲི་ཞུ་རྒྱུ་ཡོད་པའི་ཡིག་ཐུང་ཞིག་ཕུལ་སྐབས། “ད་ལྟ་དུས་ཁོམ་མི་འདུག”ཅེས་ལན་བསླེབས་སོང་བས། གནས་ཚུལ་ཞིབ་ཕྲ་འདྲི་ས་རག་མ་སོང་།

ངེས་སྟོན་པ་དགེ་བཤེས་ངག་དབང་བསམ་གཏན་གྱིས་ལོ་ལྔ་ཚན་བཞི་སྟེ། ལོ་ཉི་ཤུ་རིང་ལས་འགན་དེ་ཁུར་ཡོད་པ་དང་། ཉེ་ཆར་ལས་ཡུན་རྫོགས་ནས་རྒས་ཡོལ་དུས་ཚོད་ཟིན་ཡོད་ནའང་། བསྐྱར་དུ་ལོ་གཅིག་རིང་ལས་འགན་ཕར་འགྱངས་བྱས་པ་ཡིན་པའི་གནས་ཚུལ་འདུག

གནས་ཚུལ་ཤེས་རྟོགས་བྱུང་བ་ལྟར་ན། ༢༠༢༢ ལོའི་ཕྱི་ཟླ་༢ པའི་ནང་ཝཱ་ཎ་སློབ་ཕྲུག་མཐུན་ཚོགས་ཞེས་པའི་མིང་ཐོག་ནས་ངེས་སྟོན་པ་དགེ་བཤེས་ངག་དབང་བསམ་གཏན་བསྐྱར་དུ་བསྐོས་ན་མི་འགྲིག་སྐོར་གྱི་སྙན་ཞུ་ཞིག་གོང་རིམ་ལ་ཕུལ་ཡོད་འདུག་ལ། ངེས་སྟོན་པ་དགེ་བཤེས་ངག་དབང་བསམ་གཏན་གྱི་ལས་དུས་ཐེངས་བཞི་རྫོགས་ནས་ད་ལྟ་ཁོང་རྒས་ཡོལ་ཡིན་པས། ལས་གནས་ཕར་འགྱངས་བྱས་ན་མི་འགྲིག་སྐོར་དང་། དེ་སྔོན་ཁོང་གིས་འགན་ཁུར་རིང་སློབ་གྲྭའི་འཛིན་སྐྱོང་དང་། སློབ་མའི་ཤེས་ཡོན་འཐུས་ཤོར་སོང་ཡོད་སྐོར་ངོ་རྒོལ་བས་བརྗོད་ཀྱི་ཡོད་འདུག ༢༠༡༥ ལོར་ཝཱ་ཎ་མཐོ་སློབ་སློབ་ཟུར་སྐྱོབ་སྲུང་སྟངས་འཛིན་ཚོགས་ཆུང་གི་འཐུས་མི་ཁག་ཅིག་ཅེས་པའི་མིང་ཐོག་ནས་ཀྱང་དགེ་བཤེས་ངག་དབང་བསམ་གཏན་གྱི་ལས་དོན་བྱེད་ཕྱོགས་འགྲིག་གི་མེད་པའི་སྙན་ཞུ་ཞིག་ཀྱང་བཀྲམ་ཡོད་པའི་གནས་ཚུལ་འདུག །

གསར་འགོད་པ་ཆོས་ཉིད་འོད་ཟེར།