ཞི་ཅིང་ཕིང་གིས་གནས་ཚུལ་ཕྱིར་གྱར་བྱས་པ་དེ་ཚུལ་མཐུན་མིན་རབས་བརྗོད་འདུག
ཟླ་འདིའི་ཚེས་༡༧ ཉིན་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཁེ་ན་ཌ་སྲིད་བློན་གྱིས་རྒྱ་ནག་གི་སྲིད་འཛིན་ཞི་ཅིང་ཕིང་དང་གྲོས་མོལ་བྱས་པའི་བཀའ་མོལ་དག་གསར་ཁང་ཁག་ལ་བཤད་ཡོད་པ་དང་། རྒྱ་ནག་གི་སྲིད་འཛིན་ཞི་ཅིན་ཕིང་གིས་བཀའ་མོལ་གང་གནང་པ་དག་ཕྱིར་གྱར་བྱས་པ་ནི་ཚུལ་མཐུན་དང་འབྲེལ་བ་བྱེད་སྟངས་ཤིག་མ་རེད་ཅེས་བརྗོད་ཡོད་པའི་གནས་ཚུལ་ཐོན་འདུག
ཟླ་འདིའི་ཚེས་༡༥ ནས་ཉིན་གཉིས་རིང་སྟོབས་ཆེན་རྒྱལ་ཁབ་༢༠ ཡིན་ཆེས་མཐོའི་ལྷན་ཚོགས་དེ་ཉིད་ཧིན་རྡུ་ནི་ཤི་ཡ་ལ་ཚོགས་ཡོད་པ་དང་། ཚོགས་འདུའི་ཉིན་མཐར་མའི་བར་གསེང་ཞིག་གི་སྐབས་སུ། ཁེ་ན་ཌའི་སྲིད་བློན་དང་རྒྱ་ནག་གི་སྲིད་འཛིན་ཕན་ཚུན་བཀའ་མོལ་གནང་བཞིན་པའི་བརྙན་ཞིག་ལ་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་དོ་སྣང་ཆེན་མོ་བྱས་ཡོད་འདུག
བརྙན་ཐུང་དེའི་ནང་། རྒྱ་ནག་གི་སྲིད་འཛིན་ཞི་ཅིང་ཕིང་གིས་ངེད་གཉིས་ཕན་ཚུན་གྲོས་མོལ་བྱས་པའི་གནས་ཚུལ་དག་གསར་ལམ་ཁག་ཏུ་ཕྱིར་གྱར་བྱས་བ་ནི་མི་འཚམ་པ་ཞིག་རེད། ཚུལ་མཐུན་མ་རེད། དེ་ནི་རྒྱ་ནག་དང་ཕྱི་འབྲེལ་གྱི་འབྲེལ་ལམ་བྱེད་སྟངས་ཤིག་མ་རེད། གལ་ཏེ་ལྷག་བསམ་རྣམ་དག་ཡིན་ན་ང་ཚོ་ཕན་ཚུན་བར་གུས་ཞབས་ལྡན་པའི་ཐོག་འབྲེལ་ལམ་བྱེད་དགོས་རེད། དེ་ལྟར་མ་བྱས་ན་སྔོན་དཔག་བྱེད་ཐབས་བྲལ་བའི་མཇུག་འབྲས་འབྱུང་སྲིད་པ་རེད་ཅེས་བཤད་འདུག མཐའ་ཞི་ཅིང་ཕིང་གིས་ང་ཚོས་སྔོན་ལ་ཆ་རྐྱེན་བསྐྲུན་དགོས་ཞེས་བརྗོད་ནས། ཁེ་ན་ཌའི་སྲིད་བློན་ལ་ལག་པ་བཏང་ནས་ཕྱིན་ཡོད་འདུག
གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་གསལ་ལྟར་ན། ཟླ་འདིའི་ཚེས་༡༥ ཉིན་ཁེ་ཎ་ཌའི་སྲིད་བློན་དང་རྒྱ་ནག་གི་སྲིད་འཛིན་ཐུག་འཕྲད་བྱས་ནས་ཡུག་རེན་གྱི་དམག་འཁྲུག་དང་གནམ་གཤིས་འགྱུར་ལྡོག རྒྱ་ནག་གིས་ཁེ་ཎ་ཌའི་ནང་གི་འོས་བསྡུ་གཙོས་པའི་ལས་དོན་ཁག་ཅིག་གི་ཐོག་ལ་ཐེ་གཏོགས་བྱས་ཡོད་པ་སོགས་ཀྱི་གནད་དོན་ཐོག་ལ་བཀའ་མོལ་གནང་ཡོད་རབས་བརྗོད་འདུག
འདས་པའི་ལོ་ངོ་གསུམ་གྱི་ནང་རྒྱ་ནག་གི་སྲིད་འཛིན་དང་ཁེ་ཎ་ཌའི་སྲིད་བློན་གཉིས་ཐུག་འཕྲད་བྱས་པ་ཐོག་མ་དེ་ཆགས་ཡོད་འདུག ཕྱི་ལོ་༢༠༡༨ ལོར་ཁེ་ཎ་ཌ་གཞུང་གིས་རྒྱ་ནག་གི་ཧོ་ཝེ(Huawei) བཟོ་ལས་ཁང་གི་འགན་འཛིན་གཉིས་འཇུ་བཟུང་བྱས་ཡོད་པ་དང་ལོ་འདིའི་ཟླ་བ་༥ པའི་ནང་ཁེ་ན་ཌས་རྒྱ་ནག་གི་ཁ་པར་ཚོང་ལས་ཁང་ཧུ་ཝེ་(Huawei) དང་ཛེ་ཀྲི་ཨེ་(ZTE) གཉིས་ཀྱི་འཕྲུལ་ཆས་རྣམས། ཁེ་ན་ཌའི་ཁ་པར་དང་དྲ་རྒྱའི་བརྡ་རྟགས་ཚད་རིམས་༥ ཅན་གྱི་ལས་དོན་ནང་དུ་བེད་སྤྱོད་གཏོང་མི་ཆོག་པའི་ཐག་གཅོད་བྱས་ཡོད་པ་སོགས་ཕྱོགས་གཉིས་ཀྱི་འབྲེལ་བ་ཡག་པོ་མེད་པ་རེད་འདུག།།
གསར་འགོད་པ། བློ་བཟང་རྒྱ་མཚོ།
