ཞི་ཅིན་ཕིང་གི་དམིགས་བསལ་སྐུ་ཚབ་མིང་ཐོག་ནས་ཏཱ་ལའི་བླ་མ་མགོ་གཡོགས།

ཟླ་འདིའི་ཕྱི་ཚེས་༣ ཉིན་ཕྱི་ཕྱོགས་སུ་ཡོད་པའི་རྒྱ་ཡིག་བརྒྱུད་ལམ་མཱིང་ཅིན་གསར་འགྱུར་དྲ་བའི་ཐོག་རྒྱ་ནག་འཐབ་ཕྱོགས་གཅིག་གྱུར་ལས་ཁུངས་ཀྱི་མི་སྣ་ཞིག་གི་སྐད་ཆ་ལུང་འདྲེན་བྱས་ཏེ། མི་ཁ་ཤས་ཀྱིས་རྒྱ་ནག་སྲིད་འཛིན་ཞི་ཅིན་ཕིང་གི་དམིགས་བསལ་སྐུ་ཚབ་ཀྱི་མིང་རྫུན་མ་ཁུར་ཏེ་༧ གོང་ས་སྐྱབས་མགོན་ཆེན་པོ་མཆོག་ལ་མཇལ་འཕྲད་བྱས་པ་སོགས་ཀྱི་གནས་ཚུལ་ཐོན་པ་ལྟར། འདི་གའི་གསར་འགོད་པས་རྒྱ་ཡིག་གི་ཚིག་འགྲོས་ཇི་བཞིན་ཕབ་བསྒྱུར་བྱས་ཏེ་བཀོད།

རྒྱ་ནག་དམར་ཤོག་འཐབ་ཕྱོགས་གཅིག་གྱུར་ལས་ཁུངས་ཀྱི་བདེ་སྲུང་ཚན་པའི་མི་སྣ་ཞིག་གིས་ཕྱི་ཕྱོགས་སུ་ཡོད་པའི་རྒྱ་ཡིག་བརྒྱུད་ལམ་<<མཱིང་ཅིན་གསར་ཁང་>> ལ་བརྗོད་དོན། ཉེ་བའི་ཆར་མི་ཁ་ཤས་ཀྱིས་སྤྱི་ཁྱབ་དྲུང་ཆེ་ཞི་ཅིན་ཕིང་གི་དམིགས་བསལ་སྐུ་ཚབ་ཀྱི་མིང་ཁུར་ཏེ་ཏཱ་ལའི་བླ་མ་ལ་ཐུག་འཕྲད་དང་། ཡི་ཤུ་བླ་ཆེན་པོབ་ཀྱི་གདན་ས་ཝེ་ཊི་ཀན་(Vatican) དུ་འཚམས་འདྲིར་བསྐྱོད་པ་མ་ཟད། ནུབ་ཕྱོགས་ཀྱི་བརྒྱུད་ལམ་ཁག་ཏུ་རྒྱ་ནག་གིས་བོད་དང་ཆོས་ལུགས་ཐོག་འཛིན་པའི་སྲིད་ཇུས་བསྒྱུར་བཅོས་གཏོང་འཆར་ཡོད་སྐོར་གྱི་བརྡ་བསྟན་པ་སོགས། རྒྱ་ནག་གིས་གཏན་འབེབས་བྱས་པའི་སྲིད་བྱུས་ལ་ཐེ་བྱུས་བྱས་སྟབས། འབྲེལ་ཡོད་སྡེ་ཚན་ནས་རྫུན་མ་དེའི་རིགས་སྒོ་བརྒྱབ་ཡོད།

ཉེ་བའི་ལོ་ཤས་རིང་ལས་རིགས་སྣ་ཚོགས་ཀྱི་མི་སྣས་ཏཱ་ལའི་བླ་མ་ལ་ཐུག་འཕྲད་བྱས་པ་དང་། པར་སྒྲོན་པ། བརྙན་བླངས་པ་ནི་དཔེ་གསར་ཞིག་ཏུ་གྱུར་ཡོད་ཅིང་། དོན་དངོས་སུའང་སྒྲུབ་དཀའ་བ་ཞིག་མ་ཡིན་པར། ཏཱ་ལའི་བླ་མ་མི་སྣ་འདྲ་མིན་དང་འབྲེལ་འདྲིས་བྱེེད་རྒྱུར་ཐུགས་གཉེས་པོ་ཡོད། ཡིན་ནའང་མི་ཁ་ཤས་ཀྱིས་གོ་སྐབས་དེ་བཟུང་ནས་རང་ཉིད་ཀྱི་ཆབ་སྲིད་གོ་གནས་མཐོར་འདེགས་དང་། རྒྱ་ནག་དམར་ཤོག་དང་ཞི་ཅིན་ཕིང་གི་དམིགས་བསལ་སྐུ་ཚབ་ཡིན་ཞེས་གཡོ་སྒྱུ་བཤད་དེ། བོད་མི་མགོ་གཡོགས་པའི་རྗེས། བསྐྱར་དུ་ཏཱ་ལའི་བླ་མ་དང་ཐུག་འཕྲད་བེད་སྤྱད་དེ་རྒྱ་ནག་གཞུང་ནས་བྱས་རྗེས་བླངས་ཐབས་བྱས་པ་དང་། ད་དུང་ཐ་ན་དངོས་ཡོད་གནས་ཚུལ་ཤེས་རྟོགས་མེད་པའི་མི་འགའ་ཡི་སྒོར་མོའང་བསླུ་བྲིད་བྱས་ཡོད།

རྒྱ་ནག་དམར་ཤོག་འཐབ་ཕྱོགས་གཅིག་གྱུར་ལས་ཁུངས་ཀྱི་མི་སྣས་མཱིང་ཅིན་གསར་ཁང་ལ་བརྗོད་དོན། འདས་པའི་ལོ་ཤས་རིང་། མི་རྫུན་མ་འགའ་ཤས་ མཉམ་སྦྲེལ་རྒྱལ་ཚོགས་དང་འཛམ་གླིང་དང་རྒྱལ་སྤྱི་རང་བཞིན་གྱི་མཐུན་ཚོགས་དང་། ཐེབས་རྩ་ཁང་། སློབ་གྲྭ་ཆེན་མོའི་དགེ་རྒན། གསང་བའི་ལས་ཁུངས་སོགས་ཀྱི་མིང་ཁུར་རྒྱུར་ཧ་ཅང་དགའ་བ་དང་། ད་དུང་མི་སྣ་གྲགས་ཅན་འདྲ་མིན་དང་མཉམ་དུ་པར་སྒྲོན་པ་སོགས། དངུལ་རྩ་ཁྲོམ་རའི་གཡོ་སྒྱུའི་བསླུ་ཐབས་དང་ཆ་མཚུངས་པ་མ་ཟད། སྒྲིག་འཛུགས་དེའི་རིགས་ཀྱི་མང་ཤོས་ནི་རྫུན་བཟོ་ཡིན་པ་དང་། གལ་སྲིད་མི་སྣ་གྲགས་ཅན་རེ་ཟུང་དེའི་ཁྲོད་དུ་ཡོད་སྲིད་ཀྱང་། གྲགས་ཅན་མི་སྣ་དེ་དག་མི་གཞན་གྱི་མགོ་སྐོར་འོག་ཚུད་པའམ། ཡང་ན་གནོད་འཚེ་ཕོག་མཁན་གྲས་རེད།

པེ་ཅིང་གི་གནས་ཚུལ་ལ་རྒྱུས་མངའ་ཅན་ཞིག་གིས་<<མཱིང་ཅིན་གསར་ཁང་>> ལ་བརྗོད་པ་ལྟར་ན། འདས་པའི་ལོ་ཤས་རིང་མི་གཡོ་སྒྱུ་ཅན་འགས་ཕྱི་རྒྱལ་གྱི་འཛམ་གླིང་རིམ་པའི་མིང་ཆེན་པོ་ཁུར་ཏེ་རྒྱལ་ནང་དུ་ལོག་པའི་རྗེས། མཛད་སྒོ་གལ་ཆེན་ཁག་གི་ཐོག་ཏུ་ཐོན་པ་དང་། ཁ་ཤས་སྲིད་གྲོས་ཀྱི་ཚོགས་འདུའི་སྟེང་དུའང་ཞུགས་ཏེ་མི་གཞན་གྱི་རྒྱུ་ནོར་བསླུ་བྲིད་བྱས་ཡོད། ད་ལྟ་དེ་ལས་ཀྱང་མི་ཁ་ཤས་ཀྱིས་ཞི་ཅིན་ཕིང་གི་ཁྱིམ་རྒྱུད་ཀྱི་འབྲེལ་བ་དང་། དམིགས་བསལ་སྐུ་ཚབ་ཀྱི་མིང་རྫུན་འོག་ནས། རྒྱ་ནག་གི་བོད་དང་ཆོས་ལུགས་ཀྱི་སྲིད་བྱུས་ལ་ཐེ་གཏོགས་བྱེད་པའི་ཚད་ལ་སླེབས་ཡོད།

ཞི་ཅིན་ཕིང་ལ་རྒྱུས་མངའ་ཡོད་མཁན་གྱི་མིས་<<མཱིང་ཅིན་གསར་ཁང་>> ལ་བརྗོད་དོན། དོན་དངོས་ཐོག་ཞི་ཅིན་ཕིང་ལ་ངོ་མ་ཧུ་ཅིན་ཐའོ་དང་བསྡུར་ན་བོད་དང་། ཝེ་ཊི་ཀན་གྱི་གནད་དོན་མདུན་སྐྱོད་དང་ཐོལ་བརྒལ་ཞིག་ཡོང་རྒྱུའི་སེམས་ཁུར་ཡོད་ཀྱང་། རུལ་སུངས་འགོག་རྒོལ་དང་། དབང་ཆ་བསྐྱར་སྒྲིག དཔལ་འབྱོར་སོགས་ཀྱི་ལས་དོན་ཆེས་ཛ་དྲག་ཆགས་ཡོད་སྟབས། ཉེ་བའི་ཆར་གནད་དོན་གཞན་དག་རྣམས་ལས་འཆར་ཐོག་ཏུ་ཕབ་རྒྱུར་དཀའ་ངལ་ཡོད་པ་རེད།།

གསར་འགོད་པ་ཏྲེ་ཧོར་ཐུབ་བསྟན་གྱིས་བསྒྱུར།