ཞི་ཅིན་ཕིང་སྐུ་མགྲོན་གཙོ་བོར་ཕེབས་རྒྱུའི་རེ་བ།

ཕྱི་ཟླ་༣ པའི་ཚེས་༢༣ ཉིན་པ་ཀི་སི་ཐན་གྱི་རང་བཙན་ཉིན་མོར་རྒྱ་ནག་གི་སྲིད་འཛིན་ཞི་ཅིན་ཕིང་སྐུ་མགྲོན་གཙོ་བོར་ཕེབས་ཐུབ་པའི་རེ་བ་བྱེད་ཀྱི་ཡོད་པ་དང། ཐེངས་འདིའི་དམག་རྩེད་རུ་སྒྲིག་འགྲེམ་སྟོན་དེ་ལོ་བདུན་རྗེས་གོ་སྒྲིག་བྱེད་པ་ཞིག་ཡིན་འདུག

ཟླ་འདིའི་ཕྱི་ཚེས་༣ ཉིན་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། རྒྱ་གར་གྱི་ཁྱིམ་མཚེས་རྒྱལ་ཁབ་པ་ཀི་སི་ཐན་གྱི་རང་བཙན་ཉིན་མོ་སླེབས་ལ་ཉེ་བ་དང་། ཕྱི་ཟླ་༡ པོའི་ཚེས་༢༦ ཉིན་རྒྱ་གར་དམངས་གཙོའི་ཉིན་མོར་སྐུ་མགྲོན་གཙོ་བོར་ཨ་རིའི་སྲིད་འཛིན་ཨོ་བྷ་མ་ཕེབས་པར། པ་ཀི་སི་ཐན་དང་རྒྱ་ནག་གཉིས་ལ་ཕོག་ཐུག་བཏང་ཡོད་སྟབས། པ་ཀི་སི་ཐན་གྱི་རང་བཙན་ཉིན་མོ་ལའང་རྒྱ་ནག་གི་སྲིད་འཛིན་ཞི་ཅིང་ཕིང་སྐུ་མགྲོན་གཙོ་བོར་ཕེབས་ཐུབ་རྒྱུའི་རེ་བ་བྱེད་ཀྱི་སྐོར་པ་ཀི་སི་ཐན་གཞུང་གི་འབྲེལ་ཡོད་ཅིག་གིས་བརྗོད་འདུག

པ་ཀི་སི་ཐན་གྱི་སྐམ་མཚོ་མཁའ་གསུམ་གྱི་དམག་རྩེད་རུ་སྒྲིག་ཁྲོམ་སྐོར་དང། རིག་གཞུང་འགྲེམ་སྟོན་གྱི་མཛད་སྒོ་དེ་ལོ་བདུན་རྗེས་སྲུང་བརྩི་ཞུ་ཡི་ཡོད་པ་དང། མཛད་སྒོ་མཐའ་མ་དེ་ཕྱི་ལོ་༢༠༠༨ ཟླ་༣ ཚེས་༢༣ ཉིན་གྱི་སྲིད་འཛིན་པཱར་ཝཛ་མུ་ཤཱ་རཕ་(Pervez Musharraf) སྲིད་སྐྱོང་སྐབས་སྲུང་བརྩི་བྱས་ཡོད་འདུག

དེ་བཞིན་པ་ཀི་སི་ཐན་རྒྱལ་སྲུང་སྡེ་ཚན་གྱི་ལས་བྱེད་ཞིག་གིས་ད་ལྟའི་ཆར་དམག་གི་རུ་སྒྲིག་བྱེད་སའི་ཚོགས་གནས་ངེས་བརྟན་མེད་ཀྱང་། སྔ་རྒྱུན་ལྟར་རྒྱལ་ས་ཨིས་ལ་མ་བྷཌ་(Islamabad) རུ་ཚོགས་འཆར་ཡོད་སྐོར་བརྗོད་འདུག

དཔྱད་ཞིབ་པ་མང་པོ་ཞིག་གིས་ཐེངས་འདིར་ཨ་རིའི་སྲིད་འཛིན་རྒྱ་གར་དུ་ཕེབས་པ་དེ་རྒྱ་ནག་ལ་ཁ་གཏད་གཅོག་ཆེད་དང། ཨེ་ཤེ་ཡའི་མངའ་ཁོངས་སུ་འབྲེལ་བ་གོང་མཐོར་གཏོང་སླད་ཡིན་སྐོར་མཐོང་བཞིན་ཡོད་པས། རྒྱ་གར་གྱི་ཕྱི་སྲིད་བློན་ཆེན་སུ་ཞི་མཱ་(Sushma Swaraj) གཟའ་འཁོར་འདིའི་ནང་རྒྱ་ནག་ཏུ་རྒྱལ་དོན་འཚམས་འདྲིར་ཕེབས་ཡོད་པ་དང་། བྱ་སྤྱོད་དེའང་ཕྱོགས་གཉིས་བར་གྱི་དོགས་པ་ཞི་ཐབས་ཞིག་ལ་ངོས་འཛིན་བྱེད་ཀྱི་ཡོད་འདུག

རྒྱ་ནག་གི་ཕྱོགས་ནས་ཕྱི་སྲིད་བློན་ཆེན་ལྕམ་སཱོ་རཱ་ཇ་ལ་འབྲེལ་བ་བྱེད་པའི་སྐབས། རྒྱ་གར་དང་རྒྱ་ནག་གི་འབྲེལ་བའི་བར་ཡིད་ཆེས་བརྟན་པོ་ཡོད་ཚུལ་དང། འདས་ལོའི་ཕྱི་ཟླ་༩ པའི་ནང་སྲིད་འཛིན་ཞི་ཅིན་ཕིང་རྒྱ་གར་དུ་ཕེབས་པ་དེས་རྒྱལ་ཁབ་གཉིས་ཀྱི་མཐུན་འབྲེལ་དང་ཕྱོགས་གང་ཅིའི་ཐོག་ཡར་རྒྱས་ཀྱི་སྡིངས་ཆ་གསར་པ་ཞིག་བསྐྲུན་ཡོད་སྐོར་བརྗོད་འདུག དེ་བཞིན་སྲིད་བློན་མཱོ་ཏི་སྲིད་བློན་ཆགས་ནས་ལོ་གཅིག་མ་རྫོགས་གོང་རྒྱ་ནག་ཏུ་བསྐྱོད་རྒྱུ་ཡིན་སྐོར་ལྕམ་སཱོ་རཱ་ཇ་ཡིས་འགྲེལ་བརྗོད་བྱས་ཡོད་འདུག།

གསར་འགོད་པ་བསྟན་འཛིན་ཟླ་བ།