ཞི་བའི་གྲོས་མོལ་གྱི་ཚོགས་འདུའི་བརྒྱུད་ནས་དམག་མཚམས་འཇོག་རྒྱུའི་གྲུབ་འབྲས་གང་ཡང་བྱུང་ཡོད་མི་འདུག

ཉེ་ཆར་སུད་ཛི་ལན་ཌིའི་ནང་འཛམ་གླིང་གི་རྒྱལ་ཁབ་མང་པོ་ཞིག་མཉམ་དུ་ཞི་བའི་གྲོས་མོལ་གྱི་ཚོགས་འདུ་ཞིག་འཚོགས་ཡོད་ཀྱང་། ཚོགས་འདུ་དེའི་བརྒྱུད་ནས་ཡུག་རེན་དང་ཨུ་རུ་སུ་གཉིས་བར་གྱི་དམག་འཁྲུག་མཚམས་བཞག་ནས་ཞི་འཇམ་ཞིག་ཡོང་རྒྱུའི་ཐད་ནུས་པ་ཐོན་ཐུབ་ཡོད་མི་འདུག 

ཕྱི་ཚེས་༡༩ ཉིན་ཨེ་ཤེ་ཡའི་དུས་བབ་ཀྱིས་གནས་ཚུལ་སྤེལ་གསལ་ལྟར་ན། ཉེ་ཆར་སུད་ཛི་ལན་ཌིའི་ནང་འཛམ་གླིང་གི་རྒྱལ་ཁབ་མང་པོ་ཞིག་ལྷན་དུ་ཞི་བའི་གྲོས་མོལ་ཚོགས་འདུ་ཞིག་འཚོགས་ཡོད་ཀྱང་། ཨུ་རུ་སུ་དང་ཡུག་རེན་གཉིས་བར་གྱི་དམག་འཁྲུག་མཚམས་བཞག་ནས་རྒྱལ་ཁབ་གཉིས་བར་ཞི་འཇམ་ཡོང་རྒྱུའི་ཚོགས་འདུའི་དགོས་དམིགས་ཇི་བཞིན་བྱུང་ཡོད་མི་འདུག ཚོགས་འདུའི་ཐོག་འཛམ་གླིང་གི་རྒྱལ་ཁབ་༡༦༢ ཙམ་མགྲོན་འབོད་བྱས་ཡོད་འདུག་ཀྱང་མཐར་རྒྱལ་ཁབ་༩༢ ལས་མཉམ་ཞུགས་བྱས་ཡོད་མི་འདུག་ལ། དམིགས་བསལ་ཨུ་རུ་སུ་དང་རྒྱ་ནག་གཉིས་མཉམ་ཞུགས་བྱས་ཡོད་མི་འདུག ད་དུང་གནད་དོན་གཅིག་ནི་རྒྱ་གར་དང་། ཧིན་རྡུ་ནི་ཤི་ཡ། བྷིར་ཛིལ། ལྷོ་ཨ་ཧྥི་རི་ཀ དཀྱིལ་ཤར་ཡུལ་གྲུ་ཁག་གི་རྒྱལ་ཁབ་ཚོ་ཚོགས་འདུའི་ནང་མཉམ་ཞུགས་བྱས་ཡོད་འདུག་ཀྱང་། མཐའ་མའི་གྲོས་ཆོད་འཇོག་དུས་མཚན་རྟགས་བཀོད་ཡོད་མི་འདུག ཕྱི་ལོ་༢༠༢༢ ནས་ཡུག་རེན་གྱི་སྲིད་འཛིན་གྱིས་ཞི་བའི་དོན་ཚན་གསུམ་བཤད་ཡོད་འདུག་པ་དང་། དོན་ཚན་དེ་དག་ནི་རྡུལ་ཕྲན་མཚོན་ཆའི་ཉེན་ཁ་ལས་བསྐྱབ་དགོས་པ་དང་། བཟའ་འབྲུའི་བདེ་འཇགས། འགྲོ་བ་མིའི་བདེ་དོན་སྲུང་སྐྱོབ་བཅས་ཡིན་འདུག གནད་དོན་དེ་དག་ལ་བརྟེན་ནས་ཡུག་རེན་ནང་ད་ལྟ་འགྲོ་བཞིན་པའི་ཨུ་རུ་སུའི་བཙན་འཛུལ་དེ་མཚམས་བཞག་ནས་བཙན་བཟུང་ཟིན་པའི་ས་ཆ་རྣམས་ཚུར་ཡུག་རེན་ལ་སྤྲོད་དགོས་པ་དང་། ས་ཆ་དེ་དག་ཚུར་སྤྲད་ན་སང་ཉིན་ནས་ཨུ་རུ་སུ་དང་ཡུག་རེན་བར་ཞི་བའི་གྲོས་མོལ་བྱེད་རྒྱུ་ཡིན་ཞེས་ཡུག་རེན་སྲིད་འཛིན(Zelensky)ཡིས་བརྗོད་ཡོད་འདུག འོན་ཀྱང་། ཡུག་རེན་སྲིད་འཛིན་གྱིས་བཤད་པའི་དོན་ཚན་དེ་དག་ལ་ད་བར་གྲོས་མཐུན་གང་ཡང་བཞག་ཐུབ་ཡོད་མི་འདུག་ལ། དེ་ལས་ལྡོག་སྟེ། ཡུག་རེན་གྱི་སྲིད་འཛིན་གྱིས་བཤད་པའི་དོན་ཚན་དེ་དག་གིས་ལོ་སྔོན་མའི་ཕྱི་ཟླ་༦ ནང་ལྷོ་ཨ་ཧྥི་རི་ཀས་སྣེ་ཁྲིད་པའི་ཨ་ཧྥི་རི་ཀའི་རྒྱལ་ཁབ་ཁག་ཅིག་གིས་ཞི་བའི་གྲོས་མོལ་ཡོང་ཐབས་བྱས་ཡོད་འདུག་ཀྱང་། གོང་གསལ་ཡུག་རེན་སྲིད་འཛིན་གྱིས་བརྗོད་པའི་དོན་ཚན་དེ་དག་གིས་རྐྱེན་པས་ལེགས་གྲུབ་བྱུང་ཡོད་མི་འདུག དེ་བཞིན་རྒྱ་ནག་དང་བྷིར་ཛིལ་གཉིས་ཀྱིས་སྣེ་ཁྲིད་པ་དང་སོ་དྷི་ཨ་རབ་ཀྱིས་རྒྱབ་སྐྱོར་བྱས་ནས་ཞི་བའི་གྲོས་མོལ་ཡོང་ཐབས་བྱས་ཡོད་ཀྱང་མཇུག་འབྲས་གང་ཡང་བྱུང་ཡོད་མི་འདུག ཉེ་ཆར་ཞི་བའི་གྲོས་མོལ་ཚོགས་འདུའི་སྐབས་སུ་ཡང་རྒྱལ་ཁབ་མང་པོ་ཞིག་ནས་རྒྱབ་སྐྱོར་ཐོབ་ཡོད་མི་འདུག དེ་ལས་ནུབ་ཕྱོགས་རྒྱལ་ཁབ་མ་ཡིན་པའི་རྒྱལ་ཁབ་གཞན་དག་གིས་ད་ལྟའི་གནས་སྐབས་ཡུག་རེན་དང་ཨུ་རུ་སུ་གཉིས་བར་དམག་འཁྲུག་མཚམས་འཇོག་ཐུབ་ཆེད་དུ་འབད་དགོས་པའི་དགོས་འདུན་འདོན་གྱི་ཡོད་འདུག འོན་ཀྱང་། གནད་དོན་དེ་ནི་ཡུག་རེན་གྱིས་ཁས་ལེན་བྱེད་ཀྱི་ཡོད་མི་འདུག རྒྱུ་མཚན་ནི་ད་ཆར་ཨུ་རུ་སུ་ཡིས་ཡུག་རེན་གྱི་ས་ཆ་མང་པོ་ཞིག་བཙན་བཟུང་བྱེད་ཀྱི་ཡོད་པ་དང་། དེ་སྔོན་ཕྱི་ལོ་༢༠༢༤ ལོར་ཨུ་རུ་སུས་ཁེར་མེ་ཡའི་ས་ཆ་བཙན་བཟུང་བྱས་རྗེས་ཡུག་རེན་གྱི་ས་ཆ་གཞན་དག་བཙན་བཟུང་བྱེད་འགོ་བཙུགས་ཡོད་པར་བརྟེན། མ་འོངས་པར་ཨུ་རུ་སུ་ཡིས་བཙན་བཟུང་བྱེད་རྒྱུ་མཚམས་འཇོག་གི་མ་རེད་ཅེས་ཡུག་རེན་གྱིས་རྗོད་ཀྱི་ཡོད་འདུག ཨུ་རུ་སུའི་ངོས་ནས་ཉེ་ཆར་ཞི་བའི་གྲོས་མོལ་ཚོགས་འདུའི་སྐབས་སུ་དགོས་འདུན་ཞིག་བཏོན་ཡོད་འདུག་པ་དང་། དགོས་འདུན་དེའི་ནང་ད་བར་ཨུ་རུ་སུས་བཙན་བཟུང་ཟིན་པ་དག་ཨུ་རུ་སུ་ལ་སྤྲོད་དགོས་པ་དང་། དེའི་ཐོག་ཏུ་ཕྱི་ལོ་༢༠༢༢ ཟླ་བ་༡༠ ནང་ཨུ་རུ་སུས་ཡུག་རེན་གྱི་ས་ཆ་བཙན་བཟུང་བྱས་པའི་ས་ཆ་བཞི་སྟེ། (Donetsk) (Luhansk) (Kherson )(Zaporizhzhia)དེ་དག་ནང་དུ་(Referendum)ཟེར་བའི་འོས་ཤོག་བླུགས་པའི་ཐོག་ནས་མི་མང་ལ་རང་དབང་སྤྲད་དེ་ཨུ་རུ་སུའི་ཕྱོགས་སུ་ཡོང་རྒྱུ་ཡིན་ནམ། ཡང་ན་ཡུག་རེན་ནང་སྡོད་རྒྱུ་ཡིན་ཞེས་འོས་ཤོག་བསྡུ་རྒྱུའི་ཐོབ་ཐང་སྤྲོད་དགོས་པའི་དགོས་འདུན་བཏོན་ཡོད་འདུག གནད་དོན་དེ་དག་ནི་ཡུག་རེན་གྱི་སྲིད་འཛིན་གྱིས་བཏོན་པའི་དགོས་འདུན་ལས་ལྡོག་ཕྱོགས་ཆགས་ཀྱི་ཡོད་འདུག མཐར་མའི་ཞི་བའི་གྲོས་མོལ་ཚོགས་འདུའི་ཐོག་ཨུ་རུ་སུ་དང་ཡུག་རེན་གཉིས་ཀའི་རང་རང་གི་འདོད་མོལ་ཐོག་གྲུབ་འབྲས་གང་ཡང་བྱུང་ཡོད་མི་འདུག་ལ། དེ་ལས་འཛམ་གླིང་མཉམ་འབྲེལ་རྒྱལ་ཚོགས་ཀྱི་རྩ་འཛིན་གཞིར་བཟུང་གཞན་གྱི་མངའ་ཁུལ་བདག་དབང་ལ་བཙན་འཛུལ་དང་བཙན་བཟུང་བྱེད་མི་ཆོག་པ་དང་། ཨུ་རུ་སུའི་ངོས་ནས་ཡུག་རེན་གྱི་ས་ཆ་བདག་བཟུང་བྱེད་མི་ཆོག་པ་སོགས་བརྗོད་ཡོད་འདུག ཐེངས་འདིའི་ཞི་བའི་གྲོས་མོལ་དེའི་བརྒྱུད་ནས་ཡུག་རེན་ལ་བཟང་སྤྱོད་ཐོག་རྒྱབ་སྐྱོར་ཐོབ་པ་ལས་གཞན་དམག་མཚམས་འཇོག་རྒྱུའི་ཐད་གྲུབ་འབྲས་གང་ཡང་ཐོན་ཡོད་མི་འདུག །

གསར་འགོད་པ། བསོད་ནམས་ཕུན་ཚོགས།