ཞེ་ཅིན་ཕིང་ལ་བྱ་དགའ་གསུམ་ལ་སྤྲད་སོང།

ཟླ་འདིའི་ཚེས་༡ ཉིན་ཏེ་འཛམ་གླིང་གང་སར་མི་ཕན་ཚུན་མགོ་སྐོར་གཏོང་རེས་བྱེད་པའི་ཉིན་མོ་སྟབས་བསྟུན། དྷ་ས་མེག་གྷན་དུ་རྒྱ་གར་བོད་རང་བཙན་སློབ་ཕྲུག་ཚོགས་པས། ཟུར་ཟའི་འཁྲབ་སྟོན་ཞིག་བྱས་ཏེ་རྒྱ་ནག་གི་སྲིད་འཛིན་ཞེ་ཅིན་ཕིང་ལ་བྱ་དགའ་མི་འདྲ་བ་གསུམ་སྤྲད་སོང་།

དེ་ཡང་བོད་རང་བཙན་སློབ་ཕྲུག་ཚོགས་པའི་ལས་བྱེད་རིན་འཛིན་ཆོས་སྒྲོན་གྱིས། ཉིན་ཤས་རིང་བོད་མི་གསུམ་མགོ་ལོག་ཏུ་བཙན་བྱོལ་བོད་མིའི་འོས་བསྡུའི་བགྲོ་གླེང་ལ་སྐད་འཕྲིན་ནང་མཉམ་ཞུགས་བྱས་རྐྱེན་འཇུ་བཟུང་བྱས་པ་དང། དེ་བཞིན་ཁམས་དཀར་མཛེས་ཁུལ་གསེར་རྟ་རྫོང་དུ་གཡག་བདག་ལ་རྒྱ་མིའི་ཉེན་རྟོག་པས་མེ་མདའ་བརྒྱབ་ནས་བོད་མི་གཉིས་ཀྱི་ཚེ་སྲོག་ཤོར་ཡོད་པ། དེ་བཞིན་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལ་རྒྱལ་ཁབ་ཁ་བྲལ་བའི་ཉེས་མིང་འོག་འཛིན་བཟུང་བྱས་པ་སོགས་ཉིན་ཁ་ཤས་ནང་བསྟུད་མར་གནས་ཚུལ་ཛ་དྲག་བྱུང་བས། རྒྱལ་སྤྱིའི་ཐོག་ལ་དེ་ལ་ངོ་རྒོལ་དང་གོ་རྟོགས་སྤེལ་ཆེད་ལས་འགུལ་དེ་སྤེལ་བ་ཡིན་སྐོར་འགྲེལ་བརྗོད་བྱས་སོང།

ཟུར་ཟའི་འཁྲབ་སྟོན་ནང་ཞེ་ཅིན་ཕིང་ལ་བྱ་དགའ་གསུམ་སྤྲད་པ་དང་རྗེས་སུ་ཞེ་ཅིན་ཕིང་གིས་གཏམ་བཤད་བྱེད་པའི་ལེ་ཚན་ཞིག་ཀྱང་འཁྲབ་སྟོན་བྱས་སོང་།
གསར་འགོད་པ་སྐལ་བཟང་དོན་གྲུབ།