ཟླ་༦ པའི་ནང་རྒྱལ་ཡུམ་ཆེན་མོའི་རྐང་སྤོལ་འགྲན་སྡུར་འཚོག་འཆར་འདུག 

བོད་རྒྱལ་ཡོངས་རྩེད་རིགས་ཚོགས་པས་ཟླ་༣ པའི་ཚེས་༢༨ ཉིན་ངོ་དེབ་ཐོག་ཏུ་གསལ་བསྒྲགས་ཤིག་སྤེལ་ཏེ། ཕྱི་ལོ་༢༠༢༢ ལོའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་རྟགས་མའི་རྐང་སྤོལ་འགྲན་སྡུར་ཐེངས་༢༧ པ་དེ་འཆར་གཞི་ལྟར་ན་ཟླ་༦ པའི་ཚེས་༡༡ ནས་༢༤ བར་སྤོན་ཊ་ཆོལ་གསུམ་བོད་མིའི་གཞིས་ཆགས་སུ་གོ་སྒྲིག་བྱེད་རྒྱུ་ཡིན་སྐོར་བསྒྲགས་འདུག 

དེ་བཞིན་རྩེད་འགྲན་ནང་མཉམ་ཞུགས་བྱེད་འདོད་ཡོད་མཁན་ཚོས་ཟླ་༤ པའི་ཚེས་༡༥ ཡི་སྔོན་ལ་བོད་རྒྱལ་ཡོངས་རྩེད་རིགས་ཚོགས་པར་དེབ་སྐྱེལ་བྱས་ཟིན་པ་དགོས་སྐོར་བརྗོད་འདུག་ལ། འདི་ལོར་རྩེད་འགྲན་ནང་ཁྱོན་བསྡོམས་རུ་ཁག་༡༦ གི་ས་མིག་ཡོད་འདུག

ཕྱི་ལོ་༢༠༢༡ ལོའི་རྒྱལ་ཡུམ་ཆེན་མོའི་རྐང་སྤོལ་འགྲན་སྡུར་དེའི་མཐའ་མའི་རྒྱལ་ཁ་དེ་སིམ་ལ་རུ་ཁག་གིས་བླངས་ཡོད་པ་དང་། རྒྱལ་ཡུམ་ཆེན་མོའི་དྲན་རྟེན་གྱི་རྐང་སྤོལ་རྩེད་འགྲན་དེ་ནི་༧གོང་ས་མཆོག་གི་མ་ཡུམ་བདེ་སྐྱིད་ཚེ་རིང་གི་དྲན་རྟེན་ཆེད་དུ། ཕྱི་ལོ་༡༩༨༡ ལོ་ནས་འགོ་བཙུགས་ཡོད་པ་དང་། བཙན་བྱོལ་བོད་མིའི་སྤྱི་ཚོགས་ནང་གི་རྩེད་འགྲན་ཀྱི་ཚད་གཞི་མཐོ་ཤོས་དང་གཞི་རྒྱ་ཆེ་ཤོས་དེ་ཡིན་པ་རེད། རྩེད་འགྲན་དེའི་སྐབས་སུ་བོད་རྒྱལ་ཡོངས་རྐང་སྤོལ་རུ་ཁག་གི་རྩེད་མོ་བ་ཡང་འདེམས་སྒྲུག་བྱེད་ཀྱི་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།