འཇར་མན་གཞུང་གིས་རྒྱ་ནག་གི་ཁ་པར་ལ་རྟོག་ཞིབ་བྱེད་བཞིན་ཡོད་འདུག 

དེ་སྔོན་ལཱི་ཐུ་ནི་ཡཱ་ཡིས་རྒྱ་ནག་གི་ཁ་པར་བེད་སྤྱོད་གཏོང་མི་ཉན་པའི་སྐུལ་མ་བྱས་ཡོད་པ་དང་། ཐེངས་འདིར་འཇར་མན་གྱི་དྲ་རྒྱ་བདེ་འཇགས་རྟོག་ཞིབ་ཁང་གིས་རྒྱ་ནག་གི་ཁ་པར་དེར་རྟོག་ཞིབ་བྱེད་བཞིན་ཡོད་པའི་གནས་ཚུལ་ཐོན་འདུག 

ཟླ་༩ པའི་ཚེས་༣༠ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཉེ་ཆར་འཇར་མན་གྱི་ནང་སྲིད་ལས་ཁང་གི་མགྲིན་ཚབ་པས་བརྗོད་དོན་ལྟར་ན། རྒྱལ་ཁབ་དེའི་དྲ་རྒྱ་བདེ་འཇགས་རྟོག་ཞིབ་ལས་ཁང་གིས་རྒྱ་ནག་གི་ཁ་པར་ཚོང་ལས་ཁང་ཞའོ་མཱི་(Xiaomi) ཡིས་བཟོ་སྐྲུན་བྱས་པའི་ཁ་པར་ལ་རྟོག་ཞིབ་བྱེད་བཞིན་ཡོད་པ་འགྲེལ་བརྗོད་བྱས་འདུག་ཀྱང་། གནད་དོན་དེའི་ཐོག་གནས་ཚུལ་ཞིབ་ཕྲ་གསལ་བཤད་བྱས་མི་འདུག 

དེ་སྔོན་ལཱི་ཐུ་ནི་ཡཱ་གཞུང་གི་དྲ་རྒྱ་བདེ་འཇགས་ལས་ཁང་གིས་བརྗོད་དོན་ལ། ཡུ་རོབ་ཁུལ་དུ་རྒྱ་ནག་གི་ཁ་པར་ཚོང་ལས་ཁང་ཆེན་མོ་ཞའོ་མཱི་ཡི་ཁ་པར་ཁག་གི་ནང་དུ། བོད་ལ་རང་དབང་དགོས། ཐའེ་ཝན་རང་བཙན་རྒྱལ་ལོ། མང་གཙོའི་ལས་འགུལ་ལྟ་བུའི་ཐ་སྙད་རྩད་གཅོད་བྱས་ཏེ་ཞིབ་བཤེར་བྱེད་པའི་རང་བཞིན་གྱི་ནུས་པ་ཡོད་པ། ཚོང་ལས་ཁང་དེའི་ཁ་པར་(Mi 10T 5G) ཡི་ནང་དུ་ཡུ་རོབ་མངའ་ཁུལ་དུ་ནུས་པ་དེ་བཀག་ཡོད་འདུག་ཀྱང་། རྒྱང་རིང་ནས་ནུས་པ་དེ་བེད་སྤྱོད་གཏོང་ཐུབ་པ་བཟོ་རྒྱུ་ཡོད་པ་དང་། དེ་བཞིན་ཚོང་ལས་ཁང་དེའི་ཁ་པར་དེས་ཁ་པར་ནང་དུ་གནས་ཚུལ་མང་པོ་ཞིག་གསང་ཚིག་ཐོག་ནས་སིང་གྷ་པུར་ཡོད་པའི་གནས་ཚུལ་གསོག་ཉར་བྱེད་ཡུལ་ཞིག་ལ་གཏོང་གི་ཡོད་པ་ར་འཕྲོད་བྱུང་བས། གནས་ཚུལ་དེ་ནི་ལཱི་ཐུ་ནི་ཡ་གཅིག་པུར་གལ་ཆེན་མིན་ཁར། ཞའོ་མཱི་ཚོང་ལས་ཁང་གི་ཁ་པར་དང་འཕྲུལ་ཆས་སོགས་བེད་སྤྱོད་གཏོང་མཁན་རྒྱལ་ཁབ་ཚང་མར་གལ་ཆེན་ཆགས་ཡོད་པ། ད་ལྟའི་ཆར་ཚོང་ལས་ཁང་དེའི་ཁ་པར་ནང་དུ་ཞིབ་བཤེར་བྱེད་པའི་རྒྱ་ཡིག་གི་ཐ་སྙད་༤༤༩ ཡོད་འདུག་པ་དང་། དེ་དག་ཁོངས་སུ་ཐ་སྙད་གསར་སྣོན་བསྟུད་མར་བྱེད་བཞིན་ཡོད་སྐོར་བརྗོད་འདུག 

གནས་ཚུལ་དེ་གསལ་བསྒྲགས་བྱས་རྗེས་རྒྱལ་སྤྱིའི་བརྒྱུད་ལམ་ཁག་ཏུ་གླེང་སློང་ཆེན་པོ་ཆགས་ཡོད་པས། རྒྱ་ནག་གི་ཚོང་ལས་ཁང་དེས་ཚེས་༢༧ ཉིན་ལཱི་ཐུ་ནི་ཡཱ་གཞུང་གི་ཉེས་འཛུགས་དེ་དག་ལ་རང་དབང་ལྡན་པའི་རྟོག་ཞིབ་ཡོང་ཆེད་དུ། ཕྱོགས་གཉིས་ཀར་འབྲེལ་བ་མེད་པའི་ཆེད་ལས་པ་གླས་ནས་རྟོག་ཞིབ་བྱེད་པའི་ལས་དོན་འགྲོ་བཞིན་ཡོད་སྐོར་བརྗོད་འདུག 

ཨ་རིས་རྒྱ་ནག་གི་ཁ་པར་ཚོང་ལས་ཁང་ཆེ་ཤོས་ཧུ་ཝེ་བཀག་སྡོམ་གྱི་ལས་འགུལ་སྣ་མང་སྤེལ་རྐྱེན། རྒྱལ་སྤྱིའི་ཁ་པར་ཁྲོམ་རར་ཞའོ་མཱི་ཡི་ཆ་ཤས་ཆེ་རུ་སོང་ཡོད་འདུག་པ་དང་། ཕྱི་ལོ་༢༠༢༡ ལོའི་ལོ་དཀྱིལ་ནས་ཐེངས་དང་པོར་ཡུ་རོབ་ནང་དུ་ཁ་པར་བཙོང་མཁན་ཆེ་ཤོས་དེ་ཆགས་ཡོད་ཁར། ཁ་པར་ས་ཡ་༡༢.༧ ཡུ་རོབ་ཏུ་ཕྱིར་འདྲེན་བྱས་ཡོད་འདུག 

ཨ་རི་དང་ཡུ་རོབ་ཀྱི་རྒྱལ་ཁབ་མང་པོ་ཞིག་གིས་རྒྱ་ནག་གི་ཁ་པར་ཚོང་ལས་ཁང་ཧུ་ཝེ་གཙོས་པའི་ཁ་པར་ཚོང་ལས་ཁང་མང་པོ་ཞིག་ནི། རྒྱ་ནག་དམར་ཤོག་གཞུང་དང་འབྲེལ་བ་ཡོད་རྐྱེན་སོ་ཉུལ་སོགས་ཀྱི་ལས་དོན་ལ་མཐུན་རྐྱེན་བྱེད་ཀྱི་ཡོད་པའི་དོགས་པ་བྱེད་ཀྱི་ཡོད་པ་དང་། བརྡ་ཐག་རིམ་པ་༥ ཅན་གྱི་འཕྲུལ་རིགས་ཐད་རྒྱལ་སྤྱིའི་ནང་རྒྱ་ནག་གི་ཚོང་ལས་ཁང་ཧུ་ཝེ་ཡི་ལས་དོན་ལ་ཐོག་མར་རྒྱབ་སྐྱོར་བྱས་ཡོད་ཀྱང་། ཕྱིས་སུ་ཨ་རི་གཙོས་པའི་ཡུ་རོབ་རྒྱལ་ཁབ་མང་པོར་ཕྱིར་བཤིག་བྱས་ཏེ་བཀག་སྡོམ་ཆེན་པོ་བྱས་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།