འཇར་མན་ནིའི་སྲིད་བློན་རྒྱ་ནག་ཏུ་ཕེབས་འདུག

ཟླ་འདིའི་ཚེས་༤ ཉིན་རྒྱལ་སྤྱིའི་ཐོག་གི་གསར་འགྱུར་བརྒྱུད་ལམ་མང་པོའི་ནང་གནས་ཚུལ་སྤེལ་གསལ་ལྟར་ན། འཇར་མན་ནི་ཡིས་སྲིད་བློན་རྒྱ་ནག་ལ་ཕེབས་པ་དེ་ལ་མི་མང་པོས་སྐྱོན་བརྗོད་བྱེད་བཞིན་ཡོད་པའི་གནས་ཚུལ་ཐོན་འདུག

ཟླ་འདིའི་ཚེས་༣ ཉིན་འཇར་མན་ནི་ཡིས་སྲིད་བློན་རྒྱ་ནག་གི་རྒྱལ་ས་པེ་ཅིང་དུ་ཕེབས་ནས་རྒྱ་ནག་གི་སྲིད་འཛིན་ཞི་ཅིང་ཕིང་དང་མཇལ་འཕྲད་གནང་ཡོད་པ་དང་འདས་པའི་ལོ་ངོ་གསུམ་གྱི་རིང་ཨ་རི་དང་ཉིན་ཧོང་། དབྱིན་ཇི་དང་ཨི་ཊ་ལི། ཁེ་ན་ཌ་དང་ཧྥི་རན་སི་སོགས་སྟོབས་ཆེན་རྒྱལ་ཁབ་བདུན་(G7) གྱི་དབུ་ཁྲིད་ཅིག་རྒྱ་ནག་ཏུ་ཕེབས་པ་ཐོག་མ་དེ་ཆགས་ཡོད་འདུག

འཇར་མན་ནི་ཡི་སྲིད་བློན་ཨོ་ལ་ཕོ་ཤུ་ཚེ (Olaf Scholz) རྒྱ་ནག་ཏུ་ཕེབས་ནས་གཙོ་བོ་གནམ་གཤིས་འགྱུར་ལྡོག་དང་ཚོང་ལས། རྒྱ་ནག་དང་ཡུ་རོབ་བར་གྱི་འབྲེལ་བ་དང་ཡུག་རེན་གྱི་དམག་འཁྲུག དེ་བཞིན་རྒྱ་ནག་དང་འཇར་མན་ནི་བར་གྱི་འབྲེལ་བ་སོགས་ཀྱི་གནད་དོན་ཐོག་ལ་གླེང་མོལ་བྱས་ཡོད་པ་དང་། ལོ་འདིའི་ཟླ་བ་གཉིས་པའི་ནང་དུ་ཡུག་རེན་གྱི་དམག་འཁྲུག་འགོ་བཙུགས་པ་ནས་བཟུང་རྒྱ་ནག་ཏུ་འགྲོ་མཁན་ཡུ་རོབ་ཀྱི་འགོ་ཁྲིད་ཐོག་མ་དེ་ཆགས་ཡོད་འདུག

ཞི་ཅིང་ཕིང་བསྐྱར་དུ་རྒྱ་ནག་གི་སྲིད་འཛིན་ཆགས་པ་དང་རྒྱ་ནག་ནི་མི་གཅིག་དབང་སྒྱུར་རིང་ལུགས་ཀྱི་ཕྱོགས་སུ་འགྲོ་བཞིན་ཡོད་པར་བརྟེན། འཇར་མན་ནི་ཡི་ནང་དུ་ཡོད་པའི་ལྗང་ཁུ་ཚོགས་པ་དང་ཆབ་སྲིད་ཚོགས་པ་ཁག་ཅིག་གིས་འཇར་མན་ནིའི་སྲིད་བློན་རྒྱ་ནག་ཏུ་ཕེབས་པར་སྐྱོན་བརྗོད་བྱས་ཡོད་འདུག་ལ། ལྷག་པར་དུ་ཨེ་སི་ཏོ་ནི་ཡ་དང་ལ་ཏི་ཝི་ཡ་དང་ལི་ཐུ་ནི་ཡ་བཅས་ནི་དེ་སྔ་ཨུ་རུ་སུ་མཉམ་འབྲེལ་རྒྱལ་ཁབ་ཀྱི་ཁོངས་གཏོགས་དང་ལོ་རབས་དགུ་བཅུའི་ནང་དུ་རང་བཙན་ཐོབ་ནས་ད་ལྟའི་ཆར་ཨུ་རུ་སུའི་ཁྱིམ་མཚེས་རྒྱལ་ཁབ་ཡིན་པ་དང་། ཨུ་རུ་སུ་དང་རྒྱ་ནག་བར་གྱི་འབྲེལ་བ་ཡག་ཏུ་འགྲོ་བཞིན་པའི་སྐབས་སུ། རྒྱལ་ཁབ་དེ་དག་གིས་ཡུ་རོབ་ཁུལ་དུ་རྒྱ་ནག་གི་དཔལ་འབྱོར་དང་ཚོང་གི་ཤུགས་རྐྱེན་ཇེ་ཆེ་འགྲོ་བཞིན་པ་ལ་སེམས་འཚབ་བྱེད་བཞིན་ཡོད་འདུག

རྒྱ་ནག་ནི་འཇར་མན་ནི་ཡི་ཚོང་ཤག་ཆེ་ཤོས་ཀྱི་གྲས་ཤིག་ཡིན་པ་དང་ལྷག་པར་དུ་ཉེ་བའི་ཟླ་བ་ཁ་ཤས་ཀྱི་ནང་དུ་འཇར་མན་ནིའི་བཟོ་ཚོང་ཁང་ཆེ་ཤོས་ཁག་ཅིག་གིས་རྒྱ་ནག་གི་ནང་དུ་ཨ་སྒོར་སྟོང་ཕྲག་མང་པོས་མ་རྩ་བཙུགས་ཡོད་པ་རེད་འདུག

འདས་པའི་ལོ་ངོ་བཅུ་ཕྲག་ཁ་ཤས་ཀྱི་རིང་འཇར་མན་ནི་ཡིས་ཨུ་རུ་སུའི་རྩ་ནས་སྣུམ་དང་སོལ་རླངས་རིན་གོང་ཆུང་ངུའི་ཐོག་ནས་ཉོས་ནས་འཇར་མན་ནིའི་དཔལ་འབྱོར་འཕེལ་རྒྱས་ཆེན་མོ་ཕྱིན་ཡོད་ན་ཡང་། ད་ལྟའི་ཆར་ཨུ་རུ་སུས་སོལ་རླངས་སོགས་བཀག་པར་བརྟེན་འཇར་མན་ནི་ལ་དཀའ་ངལ་ཆེན་མོ་ཞིག་འཕྲད་བཞིན་ཡོད་པ་ལྟར། འཇར་མན་ནི་ཡིས་རྒྱ་ནག་ལ་བརྟེན་རྒྱུ་མང་དྲགས་པ་ནས་མ་འོངས་པ་དཀའ་ངལ་དེ་བཞིན་འཕྲད་སྲིད་པ་བརྗོད་བཞིན་འདུག

གནས་ཚུལ་དབྱེ་ཞིབ་པ་ཚོས་འཇར་མན་ནི་ཡིས་རྒྱ་ནག་གི་ནང་དུ་མ་རྩ་འཛུགས་རྒྱུའི་ཐོག་ལ་འདོད་བློ་མ་ཁེངས་པ་བྱེད་མཁན་ཨ་རི་གཅིག་པུ་མ་ཡིན་པ། ཧྥ་རན་སི་དང་བྷེལ་ཇམ་སོགས་ཀྱིས་ཀྱང་གནད་དོན་དེའི་ཐོག་ལ་འདོད་པ་ཡོད་མ་རེད་ཅེས་བརྗོད་འདུག

འཇར་མན་ནི་ཡིས་སྲིད་བློན་གྱིས་ཐོག་མ་གཞུང་འཛིན་པའི་སྐབས་སུ་རྒྱ་ནག་གི་ཐོག་ལ་ལམ་ཕྱོགས་མཁྲེགས་པོ་འཛིན་རྒྱུ་ཡིན་རབས་བརྗོད་ཡོད་ཀྱང་། ད་ལྟའི་ཆར་འཇར་མན་སྲིད་བློན་གྱིས་ལྡོག་ཕྱོགས་ཀྱི་བརྡ་ཞིག་གཏོང་གི་ཡོད་པར་བརྟེན། འཇར་མན་ནི་ཡིས་རྒྱ་ནག་གི་ཐོག་ལ་འཛིན་གྱི་ལམ་ཕྱོགས་ཀྱི་ཐོག་ལ་དྲི་བ་ཆེན་མོ་ཞིག་བསླེབ་བཞིན་ཡོད་འདུག །

གསར་འགོད་པ། བློ་བཟང་རྒྱ་མཚོ།