འདས་པའི་བདུན་ཕྲག་ནང་བོད་མི་༡༡ པ་ཏོག་ནད་ཐོན་ཡོད་འདུག

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་བོད་མི་གྲངས་༡༡ ལ་ནད་གཞི་ཕོག་པ་ར་འཕྲོད་བྱུང་ཡོད་པ་ལས་སྐྱེས་པ་གྲངས་༦ དང་། བུད་མེད་གྲངས་༥། དེའི་ནང་ནས་དགུང་ན་མཐོ་ཤོས་དེ་ལོ་༨༥ དང་ཆུང་ཤོས་དེ་ལོ་༢༠ ཡིན་སྐོར་དང་། བྱིས་པ་དག་ལ་འགོག་སྨན་རྒྱག་འགོ་མ་ཚུགས་སྔོན་ཡིག་ཆ་ཕྱོགས་བསྒྲིགས་དང་གྲངས་ཐོ་བསྡུ་རུབ་བྱེད་རྒྱུ་གལ་ཆེར་མཐོང་བ་མ་ཟད། རྒྱ་གར་གཞུང་ནས་རང་ལོ་༡༨ མན་གྱི་བྱིས་པ་དག་ལ་ཏོག་དབྱིབས་འགོག་སྨན་རྒྱག་རྒྱུ་འགོ་འཛུགས་དང་གྲངས་ཐོ་འབུལ་རྒྱུ་ཡོད་པ་དང་། མ་འོངས་པར་བྱིས་པ་དང་འབྲེལ་བའི་ལས་གཞི་སྤེལ་དགོས་བྱུང་ན་གྲངས་ཐོ་འདི་ལ་གཞི་བཅོལ་ནས་ལས་གཞི་སྤེལ་རྒྱུར་ཕན་ཐོགས་ཡོད་པས། གྲངས་ཐོ་བསྡུ་བའི་སྐབས་ཚང་མས་མཐུན་འགྱུར་གནང་རོགས་ཞེས་འབོད་སྐུལ་བྱས་སོང་།

ཟླ་༡༢ པའི་ཚེས་ ༡༦ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་༩༠ པ་དེ་སྤེལ་བ་དང་། འཕྲོད་བསྟེན་དྲུང་གཞོན་བསྟན་འཛིན་ཀུན་བཟང་གིས་གསུང་དོན། འདས་པའི་བདུན་ཕྲག་ཁ་ཤས་ནང་ཛ་དྲག་ཚོགས་ཆུང་ནས་སྐབས་བབ་ཀྱི་གནས་སྟངས་ལ་གཞིག་པའི་ཚོགས་འདུ་དེ་འདྲ་ཚོགས་ཡོད། ལྷག་པར་ས་གནས་འགོ་འཛིན་རྣམ་པ་དང་། སློབ་གྲྭ་ཁག་གི་འགན་འཛིན། སྨན་ཁང་འགན་འཛིན་བཅས་དང་ལྷན་དྲ་ལམ་བརྒྱུད་ཚོགས་འདུ་ཚོགས་ཏེ་རང་ལོ་༡༨ མན་གྱི་བྱིས་པ་དག་ལ་ཏོག་དབྱིབས་འགོག་སྨན་བརྒྱག་རྒྱུའི་སྐོར་དང་། དེ་བཞིན་དགུན་ཚོང་བ་རྣམས་རང་ཁྱིམ་དུ་ལོག་གྲབས་ཡོད་སྟབས་གནད་དོན་དེ་གཉིས་ཀྱི་ཐོག་བཀའ་བསྡུར་གནང་ཡོད། འདས་པའི་ཉམས་མྱོང་ལས་བྱིས་པ་དག་ལ་འགོག་སྨན་རྒྱག་འགོ་མ་ཚུགས་སྔོན་ཡིག་ཆ་ཕྱོགས་བསྒྲིགས་དང་གྲངས་ཐོ་བསྡུ་རུབ་བྱེད་རྒྱུ་གལ་ཆེར་མཐོང་བ་མ་ཟད། རྒྱ་གར་གཞུང་ནས་རང་ལོ་༡༨ མན་གྱི་བྱིས་པ་དག་ལ་ཏོག་དབྱིབས་འགོག་སྨན་རྒྱག་རྒྱུ་འགོ་འཛུགས་བྱས་པ་དང་གྲངས་ཐོ་འབུལ་རྒྱུ་ཡོད་པ་དང་། མ་འོངས་པར་བྱིས་པ་དང་འབྲེལ་བའི་ལས་གཞི་སྤེལ་དགོས་བྱུང་ན་གྲངས་ཐོ་འདི་ལ་གཞི་བཅོལ་ནས་ལས་གཞི་སྤེལ་རྒྱུར་ཕན་ཐོགས་ཡོད། དེར་བརྟེན་གྲངས་ཐོ་བསྡུ་བའི་སྐབས་ཚང་མས་མཐུན་འགྱུར་གནང་རོགས། དེ་བཞིན་སུད་ཚོང་བ་རྣམས་དགུན་ཚོང་གྲུབ་མཚམས་ནང་དུ་མ་ལོག་སྔོན་ཏོག་དབྱིབས་བརྟག་དཔྱད་དང་རང་ཁྱིམ་དུ་འབྱོར་རྗེས་ས་གནས་སོ་སོའི་ཁྲིམས་སྒྲིག་ཁག་ངེས་པར་དུ་ལག་བསྟར་གནང་རོགས། ཞེས་སོགས་གསུངས།

ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་༧ ནང་གི་བོད་མི་རང་ཁྱིམ་དུ་མི་གྲངས་༡༠༠ དང་། ཚོགས་སྡེ་ཁག་གི་མཐུན་འགྱུར་འོག་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་༩ བཅས་ཁྱོན་བསྡོམས་བོད་མི་གྲངས་༡༠༩ འགོག་དབྱེ་ཟུར་བཀག་ཐོག་ཡོད། ད་བར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་བོད་ཀྱི་སྨན་རྩིས་ཁང་ནས་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་མི་གྲངས་༥༧༠༥༦ ལ་རིན་མེད་བགོ་འགྲེམས་གནང་། གཞན་ཡང་ནད་ཡམས་ཁྱབ་བརྡལ་སྔོན་འགོག་སླད་འདས་པའི་བདུན་ཕྲག་ནང་རྒྱ་གར་ནང་གི་ས་གནས་གྲངས་༡༤ ཡི་བོད་མི་གྲངས་༡༨༨ ལ་ནད་གཞི་ཕོག་ཡོད་མེད་བརྟག་དཔྱད་ཐུབ་པ་བྱུང་ཡོད། དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་གི་བོད་མི་ལོ་ན་༡༨ ཡན་གྲངས་༤༦༤༨༢ ལ་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀ་བརྒྱབ་ཟིན་པ་དང་། མི་གྲངས་༣༧༢༥ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན།  ཕྱོགས་མཚུངས་བལ་ཡུལ་ནང་གི་བོད་མི་གྲངས་༤༨ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན་པ་དང་མི་གྲངས་༦༩༨༠ ལ་སྔོན་འགོག་སྨན་ཁབ་ཆ་ཚང་ཐོབ་ཡོད། དབུས་དང་ས་གནས་ཛ་དྲག་ཚོགས་ཆུང་གི་ཚོགས་མི་རྣམས་ཚོགས་འདུ་འཚོགས་རྒྱུ་དང་གནད་དོན་ལ་དཔག་པའི་ལམ་སྟོན་གནང་རྒྱུ། ལྷག་པར་སློབ་གྲྭ་ཁག་དང་། འབྲེལ་ཡོད་སྨན་ཁང་འགན་འཛིན་དང་སྨན་ཞབས་པ་བཅས་ལ་དུས་ནས་དུས་སུ་ཟབ་སྦྱོང་གནང་རྒྱུ་སོགས་མུ་མཐུད་འགྲོ་བཞིན་ཡོད་པ་རེད།

འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་བོད་མི་གྲངས་༡༡ ལ་ནད་གཞི་ཕོག་པ་ར་འཕྲོད་བྱུང་ཡོད་པ་ལས་སྐྱེས་པ་གྲངས་༦ དང་། བུད་མེད་གྲངས་༥། དེའི་ནང་ནས་དགུང་ན་མཐོ་ཤོས་དེ་ལོ་༨༥ དང་ཆུང་ཤོས་དེ་ལོ་༢༠ ཡིན། ད་བར་རྒྱ་གར་དང་བལ་ཡུལ་ནང་གི་བོད་མི་ནད་གཞི་ཕོག་པ་ཁྱོན་མི་གྲངས་༦༩༦༩ དང་། དྲག་སྐྱེད་བྱུང་བ་མི་གྲངས་༦༧༩༢། འདས་གྲོངས་སུ་གྱུར་བ་མི་གྲངས་༡༦༢། ད་ལྟ་གསོ་བཅོས་བྱེད་བཞིན་པ་མི་གྲངས་༡༥ ཡོད་པ་རེད།

རྡ་ས་བདེ་ལེགས་སྨན་ཁང་གི་སྨན་པ་བསྟན་འཛིན་རྣམ་སྒྲོལ་གྱིས་ལམ་སྟོན་གནང་དོན་ལྟར་ན། ཨོ་མི་ཀྲོན་ (Omicron) ཞེས་པའི་ནད་ཡམས་འདི་ཉིད་དུས་ཡུན་ཐུང་ངུའི་ནང་འཛམ་གླིང་རྒྱལ་ཁབ་༧༧ ཁྱབ་བརྡལ་བྱུང་ཡོད་པ་མ་ཟད། ཡུ་རོབ་ནང་ནད་པའི་གྲངས་འབོར་འཕར་ཏེ་དཀའ་ངལ་ཤུགས་ཆེ་འཕྲད་བཞིན་ཡོད། སྤྱིར་རྒྱ་གར་ནང་ཏོག་དབྱིབས་གཉན་རིམས་ཀྱི་གནས་སྟངས་བཟང་དུ་འགྲོ་བཞིན་ཡོད་པ་དང་། འདས་པའི་ཆུ་ཚོད་༢༤ ནང་རྒྱ་གར་དུ་ནད་གཞི་གསར་པ་ཕོག་མཁན་མི་གྲངས་སྟོང་ཕྲག་བདུན་དང་དགུ་བརྒྱ་བདུན་ཅུ་དོན་བཞི་བྱུང་ཡོད་པ་དང་། མི་གྲངས་གསུམ་བརྒྱ་བཞི་བཅུ་ཞེ་གསུམ་འདས་གྲོངས་སུ་གྱུར། འོན་ཀྱང་ཨོ་མི་ཀྲོན་ནད་ཡམས་ཕོག་མཁན་གྱི་གྲངས་འབོར་རིམ་བཞིན་མང་དུ་འགྲོ་གི་ཡོད་པ་དང་། རྒྱ་གར་ནང་ད་བར་མི་གྲངས་༧༨ ལ་ནད་ཡམས་འདི་ཕོག་ཡོད། རིང་མིན་ཡེ་ཤུའི་འཁྲུངས་སྐར་དང་ཕྱི་ལོ་གསར་ཚེས་སླེབ་ཀྱི་ཡོད་སྟབས་ཚང་མས་ལག་པ་ཡང་ཡང་བཀྲུ་རྒྱུ་དང་། ཁ་རས་གྱོན་རྒྱུ། རྒྱང་ཐག་འཇོག་རྒྱུ་སོགས་སྔོན་འགོག་གི་ཐབས་ལམ་ཁག་མུ་མཐུད་བསྟེན་དགོས་སྐོར་ལམ་སྟོན་གནང་སོང་།།

གསར་འགོད་པ་སྐལ་བཟང་དོན་གྲུབ།