འདི་ལོའི་ས་རཱ་བོད་རིག་པའི་བགྲོ་གླེང་ཐེངས་༡༧ པ་དབུ་འཛུགས་གནང་སོང་།

འདི་ལོའི་ས་རཱ་བོད་རིག་པའི་བགྲོ་གླེང་ཐེངས་༡༧ པའི་ཐོག་མཁས་དབང་གདན་ཞུས་ཀྱིས་བོད་རིག་པའི་ཞིབ་འཇུག་ཐབས་ལམ་ཞེས་པའི་བརྗོད་གཞིའི་ཐོག་བགྲོ་གླེང་གནང་རྒྱུ་རེད་འདུག

ཕྱི་ལོ་༢༠༢༤ཟླ་བ་༨ཚེས་༢༠་ཉིན་བཞུགས་སྒར་གྱི་ཉེ་འདབས་སུ་ཡོད་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བོད་རིག་པའི་བགྲོ་གླེང་ཐེངས་ ༡༧ པ་དེ་དབུ་འབྱེད་གནང་སོང།སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་དང་དམིགས་བསལ་གྱི་སྐུ་མགྲོན་ལ་ཝཱ་ཎ་བོད་ཀྱི་མཐོ་རིམ་སློབ་གཉེར་ཁང་གི་དགེ་རྒན་ཆེན་མོ་འབུམ་རམས་པ་བྱམས་པ་བསམ་གཏན། དེ་བཞིན་དབུས་གཞོན་ནུའི་ཚོགས་གཙོ་མགོན་པོ་དོན་གྲུབ་དང་། ས་རཱ་མཐོ་སློབ་ཀྱི་སློབ་སྤྱི་དང་དགེ་རྒན་གཙོས་པའི་ཕྱོགས་མཐའ་ཁག་ནས་ཕེབས་པའི་སློབ་ཕྲུག་དང་མཁས་དབང་བཅས་ཚོགས་བཅར་བ་༦༠ ཡས་མས་ཤིག་ཚོགས་བཞུགས་གནང་འདུག བོད་རིག་པའི་བགྲོ་གླེང་དེ་བཞིན་ཞིབ་འཇུག་ཐབས་ལམ་ཞེས་པའི་བརྗོད་གཞིའི་ཐོག་མཁས་དབང་རྣམས་ཀྱིས་དུས་ཡུན་ཉིན་བཞིའི་རིང་བགྲོ་གླེང་གནང་རྒྱུ་རེད་འདུག

མཛད་སྒོའི་ཐོག་དམིགས་བསལ་སྐུ་མགྲོན་ཝར་ཎ་མཐོ་སློབ་ཀྱི་དགེ་རྒན་ཆེན་མོ་འབུམ་རམས་པ་བྱམས་པ་བསམ་གཏན་གྱིས་བོད་རིག་པའི་བྱུང་རིམ་དང་འབྲེལ་གསུང་བཤད་ཟབ་རྒྱས་གནང་སོང་ལ། དེ་བཞིན་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་ནས་སློབ་ཕྲུག་རྣམས་ལ་བོད་ཀྱི་བྱུང་རབས་སྐོར་དོ་སྣང་དམིགས་བསལ་དང་། བག་མེད་ལོངས་སྤྱོད་མ་བཏང་བར་གང་ལ་དམིགས་པ་དེ་ལ་འབད་དགོས་གལ་ཆེ་བར་གསུངས་པ་དང་། དེ་བཞིན་ཁོང་གིས་ཕྱི་རྒྱལ་མི་རིགས་ཀྱིས་བོད་ཀྱི་བྱུང་རབས་དང་འབྲེལ་ནས་བྲིས་གནང་བའི་དཔེ་དེབ་ཁག་གཅིག་ངོ་སྤྲོད་གནང་སོང་། ས་རཱ་བོད་རིག་པ་ནི་ཕྱི་ལོ་༢༠༠༧ ལོར་ཐོག་མར་འགོ་བཙུགས་ཤིང་། ཐོག་མའི་མཚན་ལ་བོད་ཀྱི་རིག་གནས་བགྲོ་གླེང་ཞེས་བཏགས་ཡོད་འདུག་ཀྱང་། ཕྱི་ལོ་༢༠༡༥ ལོ་ནས་ས་རཱ་བོད་རིག་པ་ཞེས་པར་འགྱུར་བ་བཏང་ཡོད་འདུག

དེ་ཡང་ཡུལ་དུས་ཀྱི་དབང་གིས་སྤྱིར་བོད་མི་རིགས་ཀྱི་གནས་སྟངས་དང་། ཡང་སྒོས་སུ་བོད་ཀྱི་རིག་གཞུང་གི་གནས་བབ་ཧ་ཅང་ཛ་དྲག་གི་གནས་སུ་གྱུར་པ་སྲུང་སྐྱོབ་ཆེད། བོད་ཀྱི་རྩ་ཆེའི་རིག་གནས་རྒྱུན་འཛིན་དང་། སྤེལ་རེས། གོང་སྤེལ་བཅས་ལ་བརྟེན་ནས་མི་རབས་བརྗེས་ཀྱང་བོད་ཀྱི་རིག་གནས་སྲ་བརྟན་ངང་གནས་ཐུབ་རྒྱུ་དང་། གཞན་ཡང་བོད་ཀྱི་ན་གཞོན་ཤེས་ཡོན་ཅན་ཕན་ཚུན་ངོ་ཤེས་ཤིང་རིག་གནས་བརྒྱུད་སྤེལ། ལྷག་པར་དུ་བོད་པ་བོད་རིག་པའི་གཙུག་ལག་མཁས་པའི་མདུན་ནས་སྐུལ་ལྕག་དང་། ཉམས་མྱོང་། ཞིབ་འཇུག་ཐབས་ལམ་སོགས་གོང་སྤེལ་སླད་དུ། མཁས་དབང་གདན་ཞུས་ཀྱིས་ད་བར་ལོ་ངོ་བཅུ་དྲུག་རིང་ལོ་ལྟར་བརྗོད་བྱ་འདྲ་མིན་ཐོག་འཚོགས་ཡོད་འདུག་ལ། འདི་ལོར་བོད་རིག་པའི་བགྲོ་གླེང་ཐེངས་བཅུ་བདུན་པ་དེ་སྔར་རྒྱུན་བཞིན་ས་རཱ་གཞོན་ནུའི་སློབ་སྟོན་གནང་མཁན་སློབ་དཔོན་ཆེན་མོ་འབུམ་རམས་པ་གཙང་ཕྲུག་སྟོབས་ལགས་ཀྱི་ལམ་སྟོན་བཞིན། བོད་རིག་པའི་ཞིབ་འཇུག་ཐབས་ལམ་ཞེས་པའི་བརྗོད་གཞིའི་ཐོག་ལོ་མང་བོད་ཀྱི་རིག་གནས་སློབ་ཁྲིད་དང་ཞིབ་འཇུག་གནང་མྱོང་བའི་དགེ་རྒན་ཆེན་མོ་དང་ཉེ་བའི་དགེ་རྒན་ཆེན་མོ་སྐོར་ཞིག་གདན་ཞུས་ཀྱིས། ཉིན་བཞིའི་རིང་གི་བགྲོ་གླེང་ཚོགས་འདུ་འདི་གོ་སྒྲིག་ཞུས་པ་ཞིག་ཆགས་འདུག

གསར་འགོད་པ། བསྟན་འཛིན་ཆོས་དབྱངས།