འབར་མའི་དམངས་གཙོ་དོན་གཉེར་བ་བཞི་སྲོག་ཐོག་བཏང་འདུག
ཟླ་འདིའི་ཚེས་ ༢༥ ཉིན་འབར་མའི་དམངས་གཙོ་དོན་གཉེར་བ་གྲོས་ཚོགས་འཐུས་མི་ཟུར་པ་སྐུ་ཞབས་ཧྥ་ཡ་ཛི་ཡ་ཐ་ (Phyo Zeya Thaw)དང་། དེ་བཞིན་རྩོམ་པ་པོ་དང་ལས་འགུལ་བ་སྐུ་ཞབས་ཀའོ་ཇེ་མིལ་ (Ko Jimmy)དང་། སྐུ་ཞབས་མ་ཡོ་ཨང་(Hla Myo Aung) སྐུ་ཞབས་ཨང་ཐེར་ར་ཛ་(Aung Thura Zawor)བཅས་མི་སྣ་བཞི་ལ་འཇིགས་སྐུལ་དྲག་སྤྱོད་སྤེལ་བའི་ཉེས་མིང་འོག་འབར་མའི་དྲག་དམག་སྲིད་གཞུང་གིས་སྲོག་ཐོག་བཏང་ཡོད་འདུག
དེ་རིང་རྒྱལ་སྤྱིའི་གསར་ཁང་ཁག་གིས་ནང་གནས་ཚུལ་སྤེལ་བ་ལྟར་ན། སྲོག་ཁྲིམས་བཅད་པའི་མི་སྣ་བཞི་པོ་དེ་དག་གིས་ལམ་སྟོན་འོག་འབར་མའི་ནང་གདུག་རྩུབ་དང་མི་ཆོས་ལ་འདས་པའི་འཇིགས་སྐུལ་བྱ་སྤྱོད་སྤེལ་རྩིས་ཡོད་པས། ཕྱི་ཟླ་ ༦ པའི་ནང་འབར་མའི་དྲག་དམག་སྲིད་གཞུང་གི་གོང་གི་དམངས་གཙོ་དོན་གཉེར་བ་བཞི་པོ་སྲོག་ཐོག་གཏོང་རྒྱུའི་ཁྱབ་བསྒྲགས་བྱས་པར་བརྟེན། རྒྱལ་སྤྱིའི་སྤྱི་ཚོགས་ཁྲོད་འབར་མའི་དྲག་དམག་སྲིད་གཞུང་གིས་ཉེས་མེད་མི་སེར་ལ་གདུག་རྩུབ་དང་དམར་གསོད་བྱ་སྤྱོད་ལ་ཉེས་ཆད་གཏོང་དགོས་པའི་སྐུལ་མ་བྱེད་ཡོད་འདུག
ཐེངས་འདིའི་སྲོག་ཁྲིམས་བཅད་པའི་མི་སྣའི་ཁྲོད་ལོ་ན་ ༥༣ ཡིན་པའི་སྐུ་ཞབས་ཀའོ་ཇེ་མིལ་(Ko Jimmy) ནི་ལོ་རབས་ ༨༠ ནང་གི་སློབ་མ་ཚོགས་པའི་དམག་མི་རྒན་གྲས་ཤིག་དང་དམངས་གཙོ་ལས་འགུལ་བ་ཞིག་ཀྱང་ཡིན་པ་མ་ཟད། ཕྱི་ལོ་ ༡༩༨༨ ལོར་སློབ་མའི་གྱེན་ལངས་ཁྲོད་འབར་མའི་དྲག་དམག་སྲིད་གཞུང་ལ་ངོ་རྒོལ་བྱས་པའི་རྐྱེན་གྱིས་ཁོང་ལོ་མང་རིང་བཙོན་འཇུག་བྱས་ཡོད་པ་མ་ཟད། ཕྱི་ལོ་ ༢༠༡༢ ལོར་གློད་གྲོལ་བཏང་ཡོད་ཀྱང་། ན་ནིང་ཕྱི་ལོ་ ༢༠༢༡ ཟླ་ ༡༠ པའི་ནང་རྒྱལ་ཡོངས་ཆིག་སྒྲིལ་སྲིད་གཞུང་གི་སློབ་སྟོན་པ་ཞིག་གིས་སྡོད་ཁྱིམ་དུ་གོ་མཚོན་སྦས་སྐུང་བྱས་པའི་ཉེས་མིང་འོག་དྲག་དམག་སྲིད་གཞུང་གིས་འཛིན་བཟུང་བྱས་ཡོད་པ་དང་། དེ་བཞིན་རང་ལོ་ ༤༣ ཡིན་པའི་སྐུ་ཞབས་ཧྥ་ཡ་ཛི་ཡ་ཐ་ (Phyo Zeya ThaW) ནི་དམངས་གཙོ་ཡར་ཐོན་ཚོགས་པའི་གྲོས་ཚོགས་འཐུས་མི་ཟུར་པ་དང་ལྕམ་ཨང་སན་སུ་ཅཱིའི་བློ་ཐག་ཉེ་བའི་འཐབ་གྲོགས་ཞིག་ཡིན་པ་མ་ཟད། གཞས་མ་གཏམ་གྱི་སྒྱུ་རྩལ་བ་ཞིག་ཡིན་པས། ཁོང་གི་དུས་རྒྱུན་དྲག་དམག་སྲིད་གཞུང་ལ་གཞས་ཚིག་གིས་ལམ་ནས་རྒོལ་གཏམ་བྱས་བཞིན་པར་བརྟེན། དྲག་དམག་སྲིད་གཞུང་གིས་དྲག་སྤྱོད་པའི་ཉེས་མིང་འོག་ཁོང་ཕྱི་ཟླ་ ༡༠ ནང་འཛིན་བཟུང་བྱས་ཡོད་པ་དང་། གཞན་དམངས་གཙོ་དོན་གཉེར་བ་སྐུ་ཞབས་མ་ཡོ་ཨང་ (Hla Myo Aung) དང་སྐུ་ཞབས་ཨང་ཐེར་ར་ཛ་ (Aung Thura Zaw) གཉིས་ཀྱིས་དྲག་དམག་སྲིད་གཞུང་གིས་བུད་མེད་གསང་བའི་མི་སྣ་ཞིག་བསད་པའི་ཉེས་མིང་འོག་སྲོག་ཁྲིམས་བཅད་སྐོར་བརྗོད་འདུག
དེ་བཞིན་གནད་དོན་དེ་དང་འབྲེལ་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་དྲུང་ཆེ་སྐུ་ཞབས་ཨན་ཀྲོ་ནེའོ་(Antonio Guterres) ཡིས་དྲག་དམག་སྲིད་གཞུང་གིས་དམངས་གཙོ་དོན་གཉེར་བ་བཞི་པོ་དེ་དག་མངོན་སུམ་འཛེམ་མེད་ཀྱི་སྲོག་ཁྲིམས་གཅོད་པ་དེ་ནི་འགྲོ་བ་མིའི་ཐོབ་ཐང་གི་རྩ་ཁྲིམས་ལས་འགལ་བཞིན་ཡོད་པ་མ་ཟད། ཚེ་སྲོག་གི་རང་དབང་དང་། ཆབ་སྲིད་ཀྱི་རང་དབང། གང་ཟག་གི་བདེ་འཇགས་བཅས་ལ་གནོད་འཚེ་གཏོང་ཡོད་པ་བརྗོད་འདུག
དེ་ཡང་འབར་མའི་དྲག་དམག་སྲིད་གཞུང་གིས་ཕྱི་ལོ་ ༢༠༢༡ ལོའི་ཟླ་ ༢ པའི་ནང་ལྕམ་ཨང་སན་སུ་ཅཱི་ཡི་དམངས་གཙོ་ཡར་ཐོན་ཚོགས་པར་རྒྱལ་ཡོངས་འོས་བསྡུའི་ཁྲོད་རྒྱལ་ཁ་ཐོབ་ཡོད་ཀྱང་། སྐབས་དེར་འབར་མའི་དྲག་དམག་སྲིད་གཞུང་གིས་དམངས་གཙོ་ཡར་ཐོན་ཚོགས་པས་འོས་བསྡུའི་གྲུབ་འབྲས་རྫུན་བཟོ་བྱས་ཚུལ་བརྗོད་དེ། ལྕམ་ཨང་སན་སུ་ཅཱི་གཙོས་པའི་དམངས་གཙོ་ཡར་ཐོན་ཚོགས་པའི་གནད་ཡོད་མི་སྣ་མང་དག་ཞིག་འཛིན་བཟུང་བཀག་ཉར་བྱས་ནས། རྒྱལ་ཁབ་ཀྱི་སྲིད་དབང་དྲག་དམག་སྲིད་གཞུང་གིས་འཛིན་པ་ནས་བཟུང་སྲིད་གཞུང་ལ་ངོ་རྒོལ་བྱེད་མཁན་ཡུལ་དམག་དང་ཆབ་སྲིད་ཚོགས་པ་ཁག་ལ་དྲག་གནོན་བྱེད་ཤུགས་ཆེ་རུ་བཏང་ཡོད་པ་མ་ཟད། འབར་མའི་ཆབ་སྲིད་བཙོན་ཟུར་ཚོགས་པས་དྲག་དམག་སྲིད་གཞུང་གིས་དྲག་གནོན་འོག་ཚེ་སྲོག་ཤོར་བ་དང་འཛིན་བཟུང་བྱས་པའི་ལས་འགུལ་བ་བཅས་ཀྱི་ཐོག་སྙན་ཐོ་ཞིག་བཀོད་པའི་ནང་ཆབ་སྲིད་ལས་འགུལ་བ་མི་གྲངས་ ༡༤༨༤༧ འཛིན་བཟུང་བྱས་ཡོད་པ་དང་། མི་གྲངས་ ༢༡༡༤ ལྷག་དྲག་དམག་སྲིད་གཞུང་གིས་དམར་གསོད་བཏང་ཡོད་སྐོར་བརྗོད་འདུག
ཕྱི་ལོ་༢༠༡༥ ལོར་ལྕམ་ཨང་སང་སུ་ཅི་ཡི་དམངས་གཙོ་ཡར་ཐོན་ཚོགས་པར་རྒྱལ་ཡོངས་འོས་བསྡུའི་ཁྲོད་རྒྱལ་ཁ་ཆེན་པོ་ཐོབ་སྟེ། ལོ་ངོ་ལྔ་བཅུ་ལྷག་གི་རིང་ལ་དྲག་དམག་གི་དབང་སྒྱུར་འོག་ཡོད་པའི་གཞུང་དེ་ད་ཆ་མི་མང་གིས་འོས་འདེམས་བྱས་པའི་ཕྱེད་མང་གཙོའི་གཞུང་ཞིག་ལ་བསྒྱུར་ཡོད་པ་མ་ཟད། ལྕམ་ཨང་སང་སུ་ཅཱི་ཡང་འབར་མའི་རྒྱལ་ཁབ་ཀྱི་མགོ་ཁྲིད་དང་སློབ་སྟོན་པ་བྱས་ཡོད། འོན་ཀྱང་ཕྱི་ལོ་༢༠༡༧ ནང་འབར་མའི་ནང་པ་དང་རོན་གྷ་ཁ་ཆེའི་བར་རྩོད་རྙོག་བྱུང་ཏེ། རོན་གྷ་ཁ་ཆེ་གྲངས་ཉུང་མི་རིགས་ལ་འབར་མའི་སྲིད་གཞུང་དམག་གིས་དྲག་རྒོལ་བྱས་པའི་གྱོད་དོན་དང་འབྲེལ་ནས། སྐབས་དེར་ལྕམ་ཨང་སང་སུ་ཅིའི་གཞུང་ལ་རྒྱལ་སྤྱིའི་ངོས་ནས་སྐྱོན་བརྗོད་ཤུགས་ཆེན་བྱས་པ་མ་ཟད། ཕྱི་ལོ་༢༠༡༩ རྒྱལ་སྤྱིའི་ཉེས་ཡངས་ཚོགས་པས་ལྕམ་ཁོང་ལ་ཕུལ་བའི་དཔྱོད་ཤེས་ཀྱི་བཙོན་པ་ཞེས་པའི་གཟེངས་རྟགས་དེ་ཕྱིར་བསྡུ་བྱས་ཡོད་པ་དང་། དེ་བཞིན་ནོར་སྦེལ་ཞི་བདེའི་གཟེངས་རྟགས་དང་ཨ་རིའི་གྲོས་ཚོགས་ཀྱི་གཟེངས་རྟགས་སོགས་ཀྱང་ཕྱིར་བསྡུ་དགོས་པའི་འབོད་སྐུལ་བྱས་ཡོད་པ་རེད་འདུག །
གསར་འགོད་པ། ཆོས་གྲགས།
