འབོད་སྐུལ་གསལ་བསྒྲགས།

འདི་ག་བོད་ཀྱི་བང་ཆེན་གསར་ཁང་ནས། དྲ་བརྙན་ལེ་ཚན་ཞིག་འགོ་འཛུགས་བྱེད་གཏན་ཁེལ་ཡོད་པས། ཐུགས་སྣང་ཅན་རྣམས་ཀྱིས་གསན་གཟིགས་དང་ལེགས་བཅོས་ཀྱི་དགོངས་འཆར་དུས་ནས་དུས་སུ་ངེས་གནང་ཡོང་བ་ཞུ་རྒྱུ་དང་། ལས་དོན་འདི་འགོ་འཛུགས་དང་མཇུག་སྐྱོང་ཆེད་དཔལ་འབྱོར་འདུ་འགོད་ཀྱི་ལས་འགུལ་ཞིག་སྤེལ་བཞིན་ཡོད་པས། འཛམ་གླིང་ཤར་ནུབ་ཀྱི་ཡུལ་གྲུ་ཁག་ཅིག་ཏུ་འབྲེལ་མཐུད་ཚོགས་ཆུང་ཡང་ཡོད་པ་བཞིན། ལྷག་བསམ་དང་གཏོང་ཕོད་ཅན་རྣམས་ཀྱིས་རྒྱ་མཚོ་ཆུ་ཐིགས་ཀྱི་དཔེ་བཞིན་ཞལ་འདེབས་གནང་སྐྱོང་ཡོང་བའི་འབོད་སྐུལ་ཞུ་བཞིན་ཡོད།

འདི་ག་གསར་ཁང་ལ་མཚོན་ན་ད་བར་མི་ལོ་ཧྲིལ་པོ་༡༩ ལ་ཉེ་བའི་རིང་གི་ཉམས་མྱོང་ལ་བརྟེན། མ་འོངས་པར་དྲ་བརྙན་འདི་ཡང་མགོ་འཛུགས་ཐུབ་ཙམ་མ་ཡིན་པར། རྒྱུན་རིང་གཉེར་སྐྱོང་བྱ་རྒྱུ་དང་། གསན་གཟིགས་གནང་མཁན་རྣམས་ལ་ཕན་ཐོགས་ཆེན་པོ་ཡོང་བའི་གདེང་ཚོད་ཡོད།

མང་གཙོའི་སྤྱི་ཚོགས་ནང་བརྒྱུད་ལམ་མི་འདྲ་བ་ཁག་ནས་བསམ་ཚུལ་འདྲ་མིན་ཐོན་དགོས་པ་དེ་གལ་ཆེན་པོ་ཡིན་པ་བཞིན། བཙན་བྱོལ་བོད་མི་རྣམས་༧གོང་ས་མཆོག་གི་དགོངས་གཞི་བཞིན་མང་གཙོའི་ལམ་དུ་མུ་མཐུད་བསྐྱོད་དགོས་པ་དང་། མ་འོངས་པར་བོད་གསར་པ་འཛུགས་སྐྲུན་བྱ་རྒྱུ་ནི་དེ་བས་ཀྱང་གལ་ཆེ་བས། དེ་ལུགས་ཚང་མས་འགན་ཁུར་དང་ནུས་པ་གང་ཡོད་འདོན་དགོས་པ་བཞིན། བོད་ཀྱི་བང་ཆེན་གསར་ཁང་ནས་གསར་འགྱུར་གལ་གནད་ཆེ་ཁག་དང་། བགྲོ་གླེང་གི་ལེ་ཚན་བཅས་བོད་ཀྱི་བང་ཆེན་གསར་ཤོག་དང་། དྲ་རྒྱ་གཉིས་གཞི་རྩར་བཟུང་ནས་དྲ་བརྙན་གྱི་ལེ་ཚན་ཞིག་གསར་འཛུགས་བྱ་རྒྱུ་ཡིན།

ཞེས་བདུན་རེའི་གསར་ཤོག་བོད་ཀྱི་བང་ཆེན་ནས་ཕྱི་ལོ་༢༠༢༡ ཟླ་༡༢ ཚེས་༡༠ ནོ་སྦེལ་ཞི་བདེའི་གཟེངས་རྟགས་དུས་ཆེན་ཉིན་སྤེལ།

www.tibet express.net