འབྲས་ལྗོངས་གྲོས་ཚོགས་འཐུས་མིས་རྒྱ་གར་དང་བོད་ཀྱི་ས་མཚམས་ཞེས་འབོད་དགོས་པར་རྒྱ་གར་གྲོས་ཚོགས་ནང་ནན་བརྗོད་བྱས།

ཟླ་འདིའི་ཚེས་༣༡ ་ཉིན་(India Today) ་ཞེས་པའི་གསར་ཁང་གིས་གནས་ཚུལ་སྤེལ་གསལ་ལྟར་ན། འབྲས་ལྗོངས་ཀྱི་གྲོས་ཚོགས་འཐུས་མི་རྡོ་རྗེ་ཚེ་རིང་ལེབ་ཆ་(Dorjee Tshering Lepcha) ་ཡིས་རྒྱ་གར་དབུས་གཞུང་ལ་རྒྱ་ནག་གི་ས་མཚམས་ཞེས་པའི་ཐ་སྙད་ལ་བསྐྱར་ཞིབ་དང་དེའི་ཚབ་ཏུ་བོད་ཀྱི་ས་མཚམས་ཞེས་པའི་ཐ་སྙད་བེད་སྤྱོད་བྱེད་དགོས་པའི་རེ་འདུན་བཏོན་ཡོད་འདུག

ཟླ་འདིའི་ཚེས་༣༠ ་ཉིན་འབྲས་ལྗོངས་ཀྱི་གྲོས་ཚོགས་འཐུས་མི་རྡོ་རྗེ་ཚེ་རིང་ལེབ་ཆས་རྒྱ་གར་གྱི་གྲོས་ཚོགས་གོང་མའི་ནང་གཏམ་བཤད་གནང་བའི་སྐབས། རྒྱ་གར་གྱི་དབུས་གཞུང་ལ་རྒྱ་ནག་གི་ས་མཚམས་ཞེས་པའི་ཐ་སྙད་ལ་བསྐྱར་ཞིབ་བྱེད་དགོས་པའི་རེ་འདུན་བཏོན་པ་དང་། ཐ་སྙད་དེའི་ཚབ་ཏུ་བོད་ཀྱི་ས་མཚམས་ཞེས་པའི་ཐ་སྙད་བེད་སྤྱོད་བྱེད་དགོས་པའི་རེ་འདུན་བཏོན་ཡོད་འདུག དེ་བཞིན་ཁོང་གིས་ལ་དྭགས་ཀྱི་སླེ་ནས་ཨ་རུ་ན་ཅལ་དང་འབྲས་ལྗོངས་བར་གྱི་ས་མཚམས་རིང་ཚད་ཀི་ལོ་མི་ཊར་༡༤༠༠ ་ཡོད་པ་ནི་བོད་ཀྱི་ས་མཚམས་ལས་རྒྱ་ནག་གི་ས་མཚམས་ཞེས་བརྗོད་ན་ཏག་ཏག་མིན་པར་ནན་བརྗོད་དང་། རྒྱ་གར་གཞུང་དང་རྒྱ་གར་གྱི་དམག་དཔུང་གཙོས་པའི་དམག་དོན་ལས་ཁུངས་(Military agency) དེ་བཞིན་ས་མཚམས་ལམ་ཁའི་ཚོགས་པ་(Border Roads Organization) ་བཅས་ཀྱིས་དེའི་ཁྱད་པར་གཞུང་འབྲེལ་ཐོག་ངོས་འཛིན་བྱེད་དགོས་པའི་འབོད་སྐུལ་ཞུས་ཡོད་འདུག

དེ་བཞིན་ཁོང་གིས་རྒྱ་ནག་ཕྱོགས་ནས་ས་མཚམས་སུ་གྲོང་གསེབ་དང་འཛུགས་སྐྲུན་གྱི་ལས་གཞི་རྒྱ་ཆེན་སྤེལ་བཞིན་ཡོད་པ་དང་རྒྱ་གར་གྱིས་ས་མཚམས་སུ་གཙོ་བོ་ནགས་ཚལ་དང་རི་དྭགས་གསོ་སྐྱོང་ས་ཁུལ་བཟོས་ནས་མི་འགྲོ་བར་བཀག་འགོག་བྱས་ཡོད་པ་བཅས་ཕྱོགས་གཉིས་ཀྱི་ས་མཚམས་ཁུལ་གྱི་འཛུགས་སྐྲུན་ལ་ཁྱད་པར་ཆེན་པོ་ཡོད་པར་བརྗོད་ནས། རྒྱ་གར་གཞུང་ལ་ཞིབ་ཚགས་ཀྱིས་བསྐྱར་ཞིབ་དང་འཛུགས་སྐྲུན་གྱི་ཁྱད་པར་སེལ་བའི་ཐབས་ལམ་འཚོལ་དགོས་པའི་རེ་འདུན་བཏོན་ཡོད་འདུག།

གསར་འགོད་པ། བློ་བཟང་རྒྱ་མཚོ།