འབྲས་སྤུངས་བཀྲ་ཤིས་སྒོ་མང་གྲྭ་ཚང་གི་ཆོས་ར་གསར་པ་དབུ་འབྱེད།
ཟླ་འདིའི་ཚེས་༡༤ ཉིན་༸གོང་ས་མཆོག་གིས་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་འབྲས་སྤུངས་བཀྲ་ཤིས་སྒོ་མང་གྲྭ་ཚང་གི་ཆོས་ར་གསར་པ་དབུ་འབྱེད་དང་། ཨེ་མོ་རི་དང་བོད་ཀྱི་ཚན་རིག་ལས་རིམ་དངོས་གཞི་ལག་བསྟར་རིམ་པ་མཇུག་སྒྲིལ་སྟེ་རྒྱུན་འཁྱོང་རིམ་པར་འཇུག་པའི་མཚམས་སྦྱོར་མཛད་སྒོར་དབུ་བཞུགས་ཀྱིས་དཔལ་ནཱ་ལེནྜའི་པཎ་ཆེན་བཅུ་བདུན་གྱི་གསོལ་འདེབས་དང་། ལྕང་སྐྱ་རོལ་བའི་རྡོ་རྗེའི་ལྟ་བའི་གསུང་མགུར་ཟབ་མོ་བཅས་ཀྱི་ཆོས་འབྲེལ་གནང་ཡོད་པ་རེད།
ཟླ་འདིའི་ཚེས་༡༤ ཉིན་༸གོང་ས་མཆོག་གིས་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་འབྲས་སྤུངས་བཀྲ་ཤིས་སྒོ་མང་གྲྭ་ཚང་གི་ཆོས་ར་གསར་པ་དབུ་འབྱེད་དང་། ཨེ་མོ་རི་དང་བོད་ཀྱི་ཚན་རིག་ལས་རིམ་དངོས་གཞི་ལག་བསྟར་རིམ་པ་མཇུག་སྒྲིལ་སྟེ་རྒྱུན་འཁྱོང་རིམ་པར་འཇུག་པའི་མཚམས་སྦྱོར་མཛད་སྒོར་དབུ་བཞུགས་ཀྱིས་དཔལ་ནཱ་ལེནྜའི་པཎ་ཆེན་བཅུ་བདུན་གྱི་གསོལ་འདེབས་དང་། ལྕང་སྐྱ་རོལ་བའི་རྡོ་རྗེའི་ལྟ་བའི་གསུང་མགུར་ཟབ་མོ་བཅས་ཀྱི་ཆོས་འབྲེལ་གནང་ཡོད་པ་རེད།
དེ་ཡང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བ་ལྟར་ཧ། ཕྱི་ཟླ་༡༢ པའི་ཚེས་༡༤ ཉིན་གྱི་སྔ་དྲོ་༧གོང་ས་མཆོག་འབྲས་སྤུངས་བཀྲ་ཤིས་སྒོ་མང་གྲྭ་ཚང་གི་གཟིམ་ཆུང་ཕོ་བྲང་ནས་ཆོས་ར་གསར་པར་ཆིབས་སྒྱུར་གནང་བ་དང་། སྐུ་གསུང་ཐུགས་རྟེན་ལ་རབ་གནས་བྱིན་འབེབས་མཛད་གྲུབ་མཚམས། གྲྭ་ཚང་གི་མཁན་རིན་པོ་ཆེ་བློ་བཟང་རྒྱལ་མཚན་གྱིས་མཎྜལ་རྟེན་གསུམ་འདེགས་འབུལ་དང་། སྦྱིན་བདག་གཙོ་བོ་དང་གནད་ཡོད་མི་སྣ་ཁག་ཅིག་ལ་མཇལ་ཁ་བསྩལ།
དེ་ནས་གྲྭ་ཚང་གི་མཁན་རིན་པོ་ཆེས་ཆོས་ར་གསར་པའི་དབུ་འབྱེད་དང་འབྲེལ་བའི་ལས་བསྡོམས་སྙན་སྒྲོན་ཞུས་པ་དང་། དེ་རྗེས་ཨེ་མོ་རི་དང་བོད་ཀྱི་ཚན་རིག་ལས་རིམ་དངོས་གཞི་ལག་བསྟར་རིམ་པ་མཇུག་བསྒྲིལ་ཏེ་རྒྱུན་འཁྱོང་རིམ་པར་འཇུག་པའི་མཚམས་སྦྱོར་མཛད་སྒོ་དབུ་འཛུགས་ཀྱིས་ཐོག་མར་དགེ་བཤེས་བློ་བཟང་བསྟན་འཛིན་གྱིས་ངོ་སྤྲོད་གསུང་བཤད་དང་། འབུམ་རམས་པ་ཚེ་བརྟན་སྒྲོལ་དཀར་གྱིས་བྱུང་བ་གལ་ཆེན་ཁག་ངོ་སྤྲོད། འབུམ་རམས་པ་ཨ་རི་ཨ་ཡེ་སན་དང་འབུམ་རམས་པ་ཁེ་རོལ་ཝོཐ་མེན་གཉིས་ཀྱིས་སྒེར་གྱི་མྱོང་བ་ངོ་སྤྲོད། དགེ་བཤེས་ལྷག་རྡོར་གྱིས་མཐུན་འགྱུར་གནང་མཁན་གལ་ཆེ་བ་ཁག་ངོ་སྤྲོད་ཞུས་འདུག
༸གོང་ས་མཆོག་གིས། འབྲས་དཀར་སྤུངས་པའི་ནང་ཚན་འབྲས་སྤུངས་བཀྲ་ཤིས་སྒོ་མང་གྲྭ་ཚང་གི་ཆོས་ར་གསར་པའི་དབུ་འབྱེད་ཀྱི་རྟེན་འབྲེལ་མཛད་སྒོར་མཚམས་འདྲི་གནང་བ་དང་འབྲེལ། ཚན་རིག་དང་འབྲེལ་བའི་ཐོག་བཀའ་སློབ་གནང་དོན། “དེ་སྔ་ཚན་རིག་ཟེར་དུས་ང་ཚོའི་མཁན་པོ་དང་བླ་མ་དེ་ཚོས་ཕྲན་བུ་ཐག་རིང་པོ་བཞག་གནང་བ་དང་། ངོས་ཀྱི་ངོ་ཤེས་པ་ཁ་ཤས་ཀྱིས་ཚན་རིག་ཟེར་ན་ཆོས་ལ་དད་པ་མེད་པ་བཟོ་མཁན་རེད། དེར་གཟབ་གཟབ་བྱེད་དགོས་ཞེས་བརྗོད་མཁན་ཡང་བྱུང་མྱོང་། འོན་ཀྱང་དངོས་ཡོད་གནས་ཚུལ་ནི་བོད་ཀྱི་སངས་རྒྱས་པའི་ཆོས་ནི་ལེགས་སྦྱར་གྱི་ཆོས་བརྒྱུད་སངས་རྒྱས་པའི་ཆོས་གཙོ་བོ་ཆགས་ཡོད། པཱ་ལིའི་ཆོས་བརྒྱུད་ནི་སངས་རྒྱས་ཀྱི་ཆོས་འཁོར་དང་པོ་གསུང་པའི་སྐབས་བསླབ་པ་གསུམ་དང་འབྲེལ་ནས་སྡེ་སྣོད་གསུམ་ཞེས་པཱ་ལིའི་གཞུང་ནང་ཡོད་པ་འདི་སངས་རྒྱས་པའི་ཆོས་ཀྱི་རྨང་གཞི་ཆགས་ཡོད། དེ་ནས་དེའི་ཚེ་དེའི་དུས་རྒྱ་གར་ལ་ཤེས་ཡོན་ཅན་ཚོས་ལེགས་སྦྱར་གྱི་སྐད་ཐོག་ནས་རྒྱ་གར་གྱི་ཤེས་ཡོན་སྐོར་དེ་དག་འཛིན་བཞིན་པ་གཙོ་བོ་ཆགས་ཡོད། དེ་ནས་བཅོམ་ལྡན་འདས་ཀྱིས་བྱ་རྒོད་ཕུང་པོའི་རིར་འཁོར་ལོ་བར་པ་གསུང་བའི་སྐབས་ཤེས་ཡོན་གཙོ་བོ་བྱས་ནས་ཤེར་ཕྱིན་གྱི་གཞུང་གསུང་པ་དེ་དག་ལེགས་སྦྱར་སྐད་ནང་ཡོད་པ་རེད། དེ་ནས་རིམ་པས་ནཱ་ལེནྜར་ལེགས་སྦྱར་གྱི་ཆོས་བརྒྱུད་གཙོ་བོ་བྱས་ནས་དར་བ་རེད། དེའི་ཚེ་དེའི་དུས་རྒྱ་གར་གྱི་ཤེས་ཡོན་ཆ་ཚང་ཡོད་པ་ལྟ་བུ་འདུག དེའི་ཚེ་དེའི་དུས་ཚན་རིག་དར་མེད། གལ་ཏེ་དེང་དུས་ཀྱི་ཚན་རིག་སྐབས་དེར་ཡོད་ན། ནཱ་ལེནྜའི་མཁས་པ་ཚོས་ངེས་པར་སློབ་སྦྱོང་བྱེད་ཀྱི་རེད། དེར་བརྟེན་དུས་ཚོད་འདི་ལྟར་ཕྱིན་པའི་སྐབས་འཛམ་གླིང་ནུབ་ཕྱོགས་ནས་དངོས་ཁམས་རིག་པ་གཙོ་བོར་གྱུར་པའི་ཚན་རིག་གི་རིག་ལམ་རིམ་པས་ཐོན་ཡོད། ཕྱི་དངོས་པོ་དང་འབྲེལ་བའི་ཚན་རིག་གི་རིག་གནས་འདི་ཧ་ཅང་གལ་ཆེན་པོ་རེད་འདུག གང་ལྟར་མཐོང་བ་མངོན་གྱུར། ཅུང་ཟད་ལྐོག་གྱུར། ཤིན་ཏུ་ལྐོག་གྱུར་བཅས་བཤད་བཞིན་པའི་མཐོང་བ་མངོན་གྱུར་ནི་ཚན་རིག་པས་བརྟག་དཔྱད་བྱེད་ས་གཙོ་བོ་ནི་མཐོང་བ་མངོན་གྱུར་དང་། ཅུང་ཟད་ལྐོག་གྱུར་དེ་དག་ནི་རྗེས་དཔག་ལོང་བ་སྐྱེས་པ་བརྗོད་པ་རེད། མཐར་མངོན་གྱུར་ལ་ཡར་གཏུག་དགོས་ཀྱི་ཡོད། དེར་བརྟེན་ཚད་མའི་གཞུང་སྦྱོང་བཞིན་པའི་མི་ཞིག་གིས་མཐོང་བ་མངོན་གྱུར་སྐོར་སྔོན་ལ་ཤེས་དགོས། མཐོང་བ་མངོན་གྱུར་སྐོར་ཤེས་པར་ཚན་རིག་པ་དང་ལྷན་བསྡེབས་ནས་ཕྱིན་པ་ཡིན་ན། མཐོང་བ་མངོན་གྱུར་གྱི་གནས་ཚུལ་ཞིབ་ཚགས་པོ་ཤེས་རྒྱུར་ཏན་ཏན་ཕན་ཐོགས་ཡོད་པ་རེད། གཉིས་ནས་དེང་དུས་ཚན་རིག་སྐོར་དེ་དག་ཕྱི་དངོས་ཁམས་ལ་གཙོ་བོར་བསྟེན་ཡོད། དངོས་པོ་ཡར་རྒྱས་ཁོ་ནར་དམིགས་པ་ཆགས་སྟབས། ཁོས་སེམས་ལ་ཞི་བདེ་བཟོ་ཐུབ་ཀྱི་མི་འདུག དེར་བརྟེན་ཚན་རིག་གི་སྡེ་ཚན་ནང་རིམ་པས་ཚན་རིག་གི་ཉམས་ཞིབ་བྱེད་སའི་སྡེ་ཚན་འདི་གཟུགས་ཅན་གྱི་ཆོས་ཁོ་ན་མིན་པར་ནང་ཤེས་པར་ཉམས་ཞིབ་བམ་ཞིབ་འཇུག་བྱེད་ཐུབ་ན་ཡག་པོ་འདུག་”ཅེས་བཀའ་སློབ་གནང་།
༧གོང་ས་མཆོག་གིས་སངས་རྒྱས་ཆོས་ལུགས་དང་ཚན་རིག་འབྲེལ་བའི་སྐོར་ལ་བཀའ་སློབ་གནང་དོན། “གང་ལྟར་ཚན་རིག་པས་དངོས་ཁམས་རིག་པ་གཙོ་བོར་བཤད་པ་དེ་དང་། ང་ཚོ་སངས་རྒྱས་པའི་གཞུང་ནང་ནས་སེམས་ཁམས་རིག་པ་གཙོ་བོ་བྱས་ནས་གསུང་པ་དེ་གཉིས་ཕན་ཚུན་བསྡེབ་ནས་འགྲོ་ཐུབ་ན། ཚན་རིག་ཐོག་ལ་ཡིན་ནའང་ཕན་པ། ད་བར་ཚན་རིག་པས་ཞིབ་འཇུག་བྱེད་ས་ནི་དངོས་ཁམས་གཙོ་བོ་ཆགས་ཡོད། དཔེར་ན། ཚད་རྡུལ་དངོས་ཁམས་རིག་པ་ quantum physics སྐོར་བཤད་ཡོང་སྐབས་ཧ་ལས་པ་རེད། དབུ་སེམས་ཀྱི་གཞུང་ནས་སྣང་བ་ལྟར་གྲུབ་མེད་ཅེས་པ་འདི་ཚད་རྡུལ་དངོས་ཁམས་རིག་པའི་ཐོག་ནས་ཏག་ཏག་བཤད་ཡོང་གི་འདུག ངོས་ཀྱི་ངོ་ཤེས་པ་རྒྱ་གར་དངོས་ཁམས་རིག་པའི་ཚན་རིག་པ་སྐུ་ཞབས་རཱ་ཇ་ར་མན་ན་(Raja Ramana) ལགས་ཀྱིས་ཚད་རྡུལ་དངོས་ཁམས་རིག་པའི་རྣམ་གཞག་འདི་འཛམ་གླིང་ནུབ་ཕྱོགས་ལ་རིག་གནས་གསར་པ་ཆགས་ཡོད། རྒྱ་གར་ནང་ལོ་ངོ་ཉིས་སྟོང་ལྔ་བརྒྱ་གོང་ནས་ལྟ་གྲུབ་འདི་བྱུང་ཟིན་པ་རེད། ཅེས་ཕལ་ཆེར་ལོ་ཉི་ཤུ་གོང་ལ་བརྗོད་བྱུང་། ང་ཚོ་ཟུང་དུ་སྦྲེལ་ནས་དེང་དུས་ཚན་རིག་ཤེས་ཡོན་གྱི་སྡེ་ཚན་ནང་སེམས་ཁམས་རིག་པ་སྣོན་ཐུབ་པར་སྔོན་ལ་སེམས་ཁམས་རིག་པའི་སྐོར་སློབ་སྦྱོང་ཡོད་པ་ཙམ་དུ་མ་ཟད། ཉམས་མྱོང་གང་ཙམ་ཡོད་པ་ཚོས་ཚན་རིག་གི་གནས་སྟངས་ཡག་པོ་ཤེས་དགོས། དཔེར་ན། ཚད་མ་རྣམ་འགྲེལ་ལ་སོགས་པ་དེ་ཚོའི་ནང་མུ་སྟེགས་པའི་འདོད་པ་དེ་ཚོ་ཆ་ཚང་བཀོད་ཡོང་གི་འདུག སྤྱི་ཡོངས་ཀྱི་ཤེས་ཡོན་ཆ་ཚང་བ་ཞིག་ཡོང་བར་དེའི་ཚེ་དེའི་དུས་རྒྱ་གར་ནང་ཡོད་པའི་ལྟ་གྲུབ་འདྲ་མིན་དེ་དག་ཚང་མར་སློབ་སྦྱོང་བྱེད་ཀྱི་ཡོད་པ་རེད། དེང་སྐབས་ང་ཚོ་དུས་རབས་ཉི་ཤུ་རྩ་གཅིག་ནང་སླེབ་ཡོད། ཚན་རིག་ཡར་རྒྱས་ཆེན་པོ་ཕྱིན་ཡོད་པ་འདི་ང་ཚོས་སློབ་སྦྱོང་བྱེད་རྒྱུ་བྱུང་ནས་དེ་གཉིས་ཟུང་དུ་སྦྲེལ་ཐུབ་ན་གཉིས་ཕན་རེད། ཚན་རིག་པ་ཚོ་ལའང་སེམས་ཁམས་རིག་པའི་སྐོར་གཙོ་བོ་བཤད་ཡོང་དུས་ཕན་ཐོགས་ཧ་ཅང་ཡོང་བ་དང་། ང་ཚོར་ཡིན་ནའང་ཤེས་ཡོན་གྱི་སྡེ་ཚན་ཆ་ཚང་བ་ཞིག་ཡོང་བཞིན་ཡོད་”ཅེས་བཀའ་སློབ་བསྩལ་ཡོད་པ་རེད།
༧གོང་ས་མཆོག་གིས་དཔལ་ནཱ་ལེནྜའི་པཎ་ཆེན་བཅུ་བདུན་གྱི་གསོལ་འདེབས་དང་། ལྕང་སྐྱ་རོལ་བའི་རྡོ་རྗེའི་ལྟ་བའི་གསུང་མགུར་ཟབ་མོ་བཅས་ཀྱི་ཆོས་འབྲེལ་བསྩལ་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།