འཛམ་གླིང་གི་ཟ་ཆས་ཀྱི་རིན་གོང་འཕར་བས་རྒྱལ་ཁབ་སོ་སོའི་གནས་བབས་ལ་འགྱུར་ལྡོག་བྱུང་སྲིད།

ཟླ་འདིའི་ཚེས་༣ ཉིན་WION ཞེས་པའི་གསར་ཁང་གིས་གནས་ཚུལ་སྤེལ་གསལ་ལྟར་ན། ད་ལྟའི་ཆར་འཛམ་བུ་གླིང་ཁྱོན་ཡོངས་ལ་ཟ་ཆས་ཀྱི་རིན་གོང་འཕར་བཞིན་པས་རྒྱལ་ཁབ་སོ་སོའི་ཆབ་སྲིད་དང་སྲིད་བྱུས། སྤྱི་ཚོགས་དང་གོ་ལ་ཁྱོན་ཡོངས་ཀྱི་ཁོར་ཡུག་སོགས་ཀྱི་ཐོག་ལ་ཤུགས་རྐྱེན་སྤྲད་རྒྱུ་ཡིན་པའི་གནས་ཚུལ་ཐོན་འདུག

དཔལ་འབྱོར་ལམ་ལུགས་ནང་རིན་གོང་དང་གླ་ཕོགས་སོགས་འཕར་ཏེ་དངུལ་གྱི་འཛའ་ཐང་ཆག་པའི་སྐབས་སུ། རྒྱལ་ཁབ་དེའི་ཆབ་སྲིད་དང་སྲིད་བྱུས་ལ་ཤུགས་རྐྱེན་ཐེེབས་ཀྱི་ཡོད་པ་མ་ཟད། རྒྱལ་སྤྱིའི་ཐོག་ལ་ཡང་ཤུགས་རྐྱེན་ཆེན་མོ་ཐེབས་ཀྱི་ཡོད་འདུག དཔེར་ན་ཕྱི་ལོ་༡༩༣༣ ལོར་འཇར་མན་ནི་དམག་འཁྲུག་ལས་ཕམ་པ་སོགས་ཀྱི་རྐྱེན་པས་ཡུལ་དུ་ལས་མེད་མང་བ་དང་སྤྱི་ཚོགས་ནང་ཟང་ཟིང་ཆེ་བ་སོགས་དཔལ་འབྱོར་ཉམས་ཉེས་ཀྱི་དཀའ་ངལ་བྱུང་ཡོད་པ་དང་། དེ་སེལ་བའི་ཕྱིར་རྒྱལ་ཁབ་ཀྱི་འགོ་ཁྲིད་དུ་ཧི་ཊི་ལར་(Adolf Hitler) བདམས་ཡོད་པ་དང་། ཁོང་གིས་འགོ་ཁྲིད་ལ་བརྟེན་ནས་འཛམ་བུ་གླིང་གི་ལོ་རྒྱུས་ལ་འགྱུར་བ་ཆེན་མོ་བྱུང་ཡོད།

གཞན་ཡང་རྗེམ་མིག་(Jimmy carter) ཨ་རིའི་སྲིད་འཛིན་ཡིན་པའི་སྐབས་སུ་སྣུམ་དང་ཟ་ཆས་ཀྱི་རིན་གོང་འཕར་ཡོད་པ་མ་ཟད། ལས་མེད་ཀྱི་གྲངས་འབོར་ཇེ་མང་དུ་ཕྱིན་ཡོད་པ་སོགས་ལ་བརྟེན་ནས་ཁོང་ཉིད་རྗེས་སུ་སྲིད་འཛིན་གྱི་འོས་མི་ནང་མཉམ་ཞུགས་བྱེད་དུས་ཁོང་ལ་རྒྱལ་ཁ་ཐོབ་མེད། ད་ལྟའི་ཆར་ཨ་རིའི་ནང་དུ་ཟ་ཆས་ཀྱི་རིན་གོང་བརྒྱ་ཆ་༡༠% དང་སྣུམ་གྱི་རིང་གོང་༨% འཕར་བཞིན་ཡོད་པ་དང་། ལོ་འདིའི་ཕྱི་ཟླ་༡༡ པའི་ནང་དུ་ཨ་རིའི་སྲིད་འཛིན་གྱི་བར་མའི་འོས་བསྡུ་ཡོང་གི་ཡོད་པས་ཡུལ་ཐང་འཕར་ཆག་གི་གནས་སྟངས་དེས་ཨ་རིའི་ཆབ་སྲིད་ཀྱི་བྱ་གཞག་ལ་འགྱུར་ལྡོག་གཏོང་སྲིད་པའི་གནས་ཚུལ་འདུག

རྒྱ་གར་གྱི་ཆབ་སྲིད་འགོ་ཁྲིད་ཚོས་ཡུལ་ཐང་འཕར་ཆག་གི་གནས་སྟངས་དང་འོས་བསྡུའི་བར་དུ་འབྲེལ་བ་ཆེན་པོ་ཡོད་པ་ཤེས་ཀྱི་ཡོད་པ་དང་། དེ་ཡང་ཕྱི་ལོ་༢༠༡༤ ལོར་མན་མའོ་ཧན་སིན་གཞུང་འཛིན་ཚོགས་པ་འོས་བསྡུའི་ཁྲོད་ཕམ་ཁ་བྱུང་ཡོད་པ་དང་། དེའི་རྒྱུ་མཚན་གཙོ་བོ་ཞིག་ནི་ཡུལ་ཐང་ཆག་པའི་ཡིན་རབས་བརྗོད་འདུག

ད་ལྟའི་ཆར་རྒྱལ་སྤྱི་ཁྱོན་ཡོངས་ལ་ཟ་ཆས་ཀྱི་རིན་གོང་བརྒྱ་ཆ་༧% འཕར་ཡོད་པའི་ཐོག་རྒྱལ་སྤྱིའི་ནང་དུ་ལོ་འདི་དང་རྗེས་མའི་ནང་དུ་རྒྱལ་ཁབ་ཁྱོན་བསྡོམ་༥༠ ལྷག་གི་འོས་བསྡུ་འགྲོོ་རྒྱུ་ཡིན་པ་དང་། གལ་སྲིད་ཟ་ཆས་ཀྱི་རིན་གོང་མུ་མཐུད་ནས་འཕར་ན་ད་ལྟའི་ལས་གནས་སུ་ཡོད་པའི་རྒྱལ་ཁབ་དེ་དག་གི་དབུ་ཁྲིད་ཚོའི་རྐུབ་བཀྱག་ཤོར་སྲིད་པ་འགྲེལ་བརྗོད་བྱེད་བཞིན་འདུག

གཞན་ཡང་ཝན་ནི་རྫི་ལ་(Venezuela) ཞེས་པའི་རྒྱལ་ཁབ་ལ་མཚོན་ན། འཛམ་གླིང་ཐོག་རྡོ་སྣུམ་གསོག་འཇོག་བྱེད་མཁན་ཆེ་ཤོས་དེ་ཆགས་ཡོད་ཀྱང་། ཕྱི་ལོ་༡༩༧༣ ནས་ད་ལྟའི་བར་དུ་ཡུལ་ཐང་ཆག་ཚད་ནི་བརྒྱ་ཆ་༣༧༢༩% ཟིན་ཡོད་མ་ཟད། ཕྱིི་ལོ་༢༠༡༩ ལོར་ཡུལ་ཐང་ཆག་ཚད་ནི་༣༤༤,༥༠༩% ཟིན་ཡོད་པས་ཡུལ་དེའི་གཙང་ཤོག་གི་ཚབ་ཏུ་དངུལ་སྒོར་བེད་སྤྱོད་གཏོང་ན་ཁེ་བཟང་ཆེ་བའི་གནས་སྟངས་སུ་གྱུར་ཡོད་པ་དང་། དུས་དེར་རྒྱལ་ཁབ་དེའི་ཡུལ་མི་བརྒྱ་ཆ་ཉི་ཤུ་ལྷག་རྒྱལ་ཁབ་གཞན་དུ་སྐྱབས་བཅོལ་དུ་འགྲོ་དགོས་པ་བྱུང་ཡོད་འདུག གང་ལྟར་ཡུལ་ཐང་ཆག་པ་དང་ཆབ་སྲིད་ཀྱི་དཀའ་རྙོག་ལ་བརྟེན་ནས། དུས་སྐབས་ཤིག་ལ་ལེ་ཊིན་ཨ་མེ་རི་ཀའི་ནང་གི་རྒྱལ་ཁབ་ཕྱུག་ཤོས་ཤིག་ད་ལྟ་གནས་སྟངས་སྡུག་ཤོས་ཀྱི་ནང་དུ་ལྷུང་ཡོད་པས། ཡུལ་ཐང་ཆག་པ་དེའི་རྒྱལ་ཁབ་གཅིག་གི་ལས་དབང་ལ་ཡང་འགྱུར་ལྡོག་གཏོང་ནུས་ཡོད་པའི་སྐོར་བཀོད་འདུག

རྒྱལ་ཁབ་སུ་ཡང་གནས་སྟངས་དེ་འདྲའི་གནས་སུ་འགྱུར་འདོད་མེད་པས་རྒྱལ་ཁབ་སོ་སོས་སྲིད་བྱུས་ལ་འགྱུར་བ་གཏོང་དགོས་ཁེལ་གྱི་ཡོད་འདུག ལོ་འདིའི་ནང་ཡུག་རེན་དང་ཨུ་རུ་སུ་བར་དུ་དམག་འཁྲུག་བྱུང་ནས་བཟུང་རྒྱ་གར་གཙོས་པའི་རྒྱལ་ཁབ་མང་པོ་སྣུམ་དང་ཟ་ཆས་རིགས་དུ་མ་ཞིག་རྒྱལ་ཁབ་གཞན་ལ་བཙོང་རྒྱུ་མཚམས་འཇོག་བྱས་ཡོད་པ་དང་། རྒྱལ་སྤྱིའི་ཐོག་དེ་དག་གི་རིན་གོང་འཕར་བཞིན་ཡོད་པས་རྒྱལ་ཁབ་སོ་སོའི་བདམ་ཁ་དང་པོ་དེ་རང་ཉིད་སྲུང་སྐྱོབ་བྱེད་རྒྱུའི་ཐབས་ལམ་སྤྱོད་བཞིན་ཡོད་འདུག་ལ། ཡུ་རོབ་ཀྱི་ནང་དུ་ཡང་ཕྱི་ལོ་༡༩༩༩ ནས་ད་ལྟའི་བར་དུ་ཡུལ་ཐང་ཆག་ཚད་ཆེ་ཤོས་ཀྱི་གནས་སུ་བསླེབས་ཡོད་པ་དང་ཡུ་རོབ་བ་མང་པོས་ཡུག་རེན་དང་ཨུ་རུ་སུའི་བར་གྱི་དམག་འཁྲུག་དེ་གང་མགྱོགས་མཚམས་འཇོག་བྱས་ན་བསམ་གྱི་ཡོད་འདུག

སྣུམ་དང་སོལ་རླངས་ཀྱི་གོང་ཚད་འཕར་བར་བརྟེན་ད་ལྟའི་ཆར་རྒྱལ་ཁབ་མང་པོའི་ཁ་ཕྱོགས་དེ་རྡོ་སོལ་གྱི་ཕྱོགས་སུ་སྒྱུར་བཞིན་ཡོད་པ་དང། རྡོ་སོལ་ནི་ནུས་པའི་འབྱུང་ཁུངས་རིན་གོང་ཁེ་ཤོས་དེ་ཡིན་ཡང་། གནམ་གཤིས་འགྱུར་ལྡོག་དང་གོ་ལའི་ཚ་དྲོད་འཕེལ་བར་གནོད་ཀྱི་ཡོད་པས་རྒྱལ་ཁབ་མང་པོས་ཁོར་ཡུག་དང་གནམ་གཤིས་འགྱུར་ལྡོག་གི་དཀའ་ངལ་ལ་བསམས་ནས་རྡོ་སོལ་བེད་སྤྱོད་བྱེད་རྒྱུ་བཀག་འགོག་བྱས་ཡོད་ཀྱང་། ད་ལྟའི་ཆར་ནུས་པའི་འབྱུང་ཁུངས་གཞན་རྣམས་རིན་གོང་ཆེ་ཐག་ཆོད་ནས་རྒྱལ་ཁབ་མང་པོས་རྡོ་སོལ་བེད་སྤྱོད་བྱེད་འགོ་བཙུགས་ཡོད་འདུག

ད་ལྟའི་ཆར་འཛམ་བུ་གླིང་ཁྱོན་ཡོངས་ལ་མི་མང་ཐེར་འབུམ་༡.༡ དབུལ་ཕོངས་དབྱེ་མཚམས་Poverty line ཀྱི་འོག་ཏུ་ཡོད་པ་དང་ད་ལྟའི་དངོས་ཟོག་གི་རིན་གོང་འཕར་བ་དེས་དབུལ་ཕོངས་ཀྱི་གནས་སུ་གྱུར་མཁན་ཇེ་མང་ནས་ཇེ་མང་དུ་འགྲོ་བཞིན་ཡོད་པ་མ་ཟད། སྤྱི་ཚོགས་ཀྱི་ཁྲོད་དུ་ཟས་བཅུད་མ་འདང་བ་དང་མངལ་ཤོར་བ། ཕྲུ་གུ་མ་འབྱར་གྱི་འཆི་ཚད་དང་ལས་མེད་ཀྱི་གྲངས་ཀ་འཕར་བ་སོགས་ཡུལ་ཐང་ཆག་པའི་དབང་གིས་དཀའ་ངལ་མང་དག་ཅིག་འཕྲད་དང་འཕྲད་རྒྱུ་ཡིན་པའི་གནས་ཚུལ་ཐོན་འདུག

གསར་འགོད་པ་བློ་བཟང་རྒྱ་མཚོ།