འཛམ་གླིང་འཕྲོད་བསྟེན་ལྷན་ཚོགས་ནས་རྒྱ་གར་ནས་ཐོན་པའི་གློ་སྨན་བཞི་ལ་ཉེན་བརྡ་བཏང་འདུག 

ཨ་ཧྥེ་རི་ཀའི་རྒྱལ་ཁབ་ཞིག་ནང་དུ་ཕྲུ་གུ་༦༦ གི་ཚེ་སྲོག་ཤོར་བའི་གནད་དོན་དང་འབྲེལ་ནས། འཛམ་གླིང་འཕྲོད་བསྟེན་ལྷན་ཚོགས་ཀྱིས་རྒྱ་གར་ནས་ཐོན་པའི་གློ་སྨན་བཞི་གསལ་སྟོན་གྱིས་དེ་དག་བེད་སྤྱོད་གཏོང་མི་རུང་བའི་ཉེན་བརྡ་བཏང་འདུག 

ཟླ་༡༠ པའི་ཚེས་༦ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཨ་ཧྥེ་རི་ཀའི་རྒྱལ་ཁབ་གྷམ་བྷི་ཡ་ནང་དུ། ཕྲུ་གུ་༦༦ ཡི་ཚེ་སྲོག་ཤོར་འདུག་པ་དང་། རྒྱལ་ཁབ་དེའི་གཞུང་དང་འཛམ་གླིང་འཕྲོད་བསྟེན་ལྷན་ཚོགས་གཉིས་ཀྱིས་གནད་དོན་དེ་ནི་རྒྱ་གར་ནས་ཐོན་པའི་གློ་སྨན་བཞི་དང་འབྲེལ་བ་ཡོད་སྐོར་བརྗོད་འདུག རྒྱལ་ཁབ་དེས་གློ་སྨན་བཞི་པོ་དེ་དག་སྔོན་ཚུད་ནས་བཀག་སྡོམ་བྱས་ཟིན་པས། ཕྲུ་གུ་ཚེ་སྲོག་ཤོར་མཁན་གྱི་གྲངས་ཀ་ཉུང་དུ་འགྲོ་བཞིན་ཡོད་ཀྱང་། ཉེ་ཆར་བར་དུ་སྒེར་གྱི་སྨན་ཁང་ཁག་ཅིག་ཏུ་གློ་སྨན་བཞི་པོ་དེ་དག་བཙོང་མཁན་བྱུང་ཡོད་སྐོར་བརྗོད་འདུག 

དེ་ཡང་འཛམ་གླིང་འཕྲོད་བསྟེན་ལྷན་ཚོགས་ཀྱིས་རྒྱ་གར་གྱི་བྱང་ཕྱོགས་མངའ་སྡེ་ཧཱ་རི་ཡ་ནཱར་རྟེན་གཞི་བྱས་པའི་སྨན་བཟོ་སྐྲུན་གྱི་ཚོང་ལས་ཁང་(Maiden Pharmaceuticals)གིས་བཟོ་སྐྲུན་བྱས་པའི་གློ་སྨན་བཞི་ལ་བརྟག་དཔྱད་བྱས་པ་བརྒྱུད། དེ་དག་ནང་དུ་རྫས་རིགས་གཉིས་མང་དྲགས་ནས་གློ་བར་རྨས་སྐྱོན་བཟོ་ཡི་ཡོད་པའི་གྲུབ་འབྲས་ཐོན་འདུག་པ་དང་། ཚེ་སྲོག་ཤོར་མཁན་གྱི་ཕྲུ་གུ་ཚོ་ཡང་གློ་བར་རྨས་སྐྱོན་བྱུང་ནས་གྲོངས་བ་ཡིན་འདུག 

ད་ལྟའི་ཆར་རྒྱ་གར་གྱི་སྨན་སྟངས་འཛིན་ལས་ཁང་གིས་གནད་དོན་དེར་བརྟག་དཔྱད་བྱེད་མུས་ཡིན་པ་རེད་འདུག འཛམ་གླིང་འཕྲོད་བསྟེན་ལྷན་ཚོགས་ཀྱིས་བརྗོད་དོན་ལྟར་ན། གློ་སྨན་བཞི་པོ་དེ་དག་ཨ་ཧྥེ་རི་ཀའི་རྒྱལ་ཁབ་གྷམ་བྷི་ཡ་ནང་དུ་ཡོད་པ་གསལ་པོ་ཆགས་ཡོད་ཀྱང་། རྒྱལ་ཁབ་གཞན་གྱི་ནང་དུ་གཞུང་འབྲེལ་མིན་པའི་ཁྲོམ་ར་བརྒྱུད་ནས་སླེབས་ཡོད་སྲིད་སྐོར་བརྗོད་འདུག 

སྤྱིར་བཏང་རྒྱ་གར་གྱི་སྨན་བཟོ་སྐྲུན་ཚོང་ལས་ཁང་དེར་གློ་སྨན་རིགས་བཟོ་སྐྲུན་ཆོག་པའི་ཆོག་མཆན་ཡོད་འདུག་པ་དང་། ད་ལྟ་བར་དུ་ཚོང་ལས་ཁང་དེས་གློ་སྨན་དེ་རིགས་གྷམ་བྷི་ཡ་མ་གཏོགས་རྒྱལ་ཁབ་གཞན་ལ་ཕྱིར་འདྲེན་བྱས་མེད་འདུག དེ་བཞིན་རྒྱལ་ཁབ་གཅིག་གིས་རྒྱལ་ཁབ་གཞན་ནས་སྨན་རིགས་ནང་འདྲེན་མ་བྱས་པའི་སྔོན་དུ། སྨན་དེ་དག་ལ་ཐོག་མར་བརྟག་དཔྱད་བྱེད་དགོས་ཀྱི་ཡོད་འདུག་ཀྱང་། བརྟག་དཔྱད་བྱུང་ཡོད་མེད་དང་བརྟག་དཔྱད་བྱས་ཡོད་ཚེ་གློ་སྨན་དེ་རིགས་ཁྲོམ་ར་ནང་དུ་གང་འདྲ་སླེབས་མིན་གྱི་དྲི་བ་མང་པོ་ཞིག་ཡོད་པ་རེད་འདུག 

རྒྱ་གར་ནང་དུ་ཡར་རྒྱས་གོང་འཕེལ་མྱུར་བོ་འགྲོ་བཞིན་པའི་སྨན་བཟོ་སྐྲུན་གྱི་ཚོང་ལས་ཁང་མང་པོ་ཞིག་ཡོད་ཁར། རྒྱ་གར་ལ་འཛམ་གླིང་གི་སྨན་རིགས་ཚོང་ཁང་ཞེས་ཀྱང་འབོད་ཀྱི་ཡོད་འདུག དེ་བཞིན་ཨ་ཧྥེ་རི་ཀའི་རྒྱལ་ཁབ་མང་པོ་ཞིག་གི་སྨན་རྒྱ་གར་ནས་ཐོན་གྱི་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།