འོས་བསྡུའི་ལམ་ལུགས་གཞན་དང་ཅུང་མི་འདྲ་བའི་ཨོ་སི་ཁྲི་ལི་ཡའི་འོས་བསྡུ་བྱེད་ལ་ཉེ།

ཟླ་འདིའི་ཚེས་༢༦ ཉིན་བྷི་བྷི་གསར་ཁང་གིས་གནས་ཚུལ་སྤེལ་གསལ་ལྟར་ན། ལོ་འདིའི་ནང་དུ་ཨོ་སི་ཁྲི་ལི་ཡའི་འོས་བསྡུ་ ཆེན་མོ་དེ་འགོ་འཛུགས་བྱེད་རྒྱུ་ཡིན་པ་དང་།  ཨོ་སི་ཁྲི་ལི་ཡའི་འོས་བསྡུ་ནི་མང་གཙོའི་རྒྱལ་ཁབ་གཞན་དང་མི་འདྲ་བར་མི་ ལོ་བཅོ་བརྒྱད་ཟིན་པའི་ཨོ་སི་ཁྲི་ལི་ཡའིི་མི་སེར་ཡོངས་འོས་བསྡུའི་ནང་དུ་མཉམ་ཞུགས་ངེས་པར་དུ་བྱེད་དགོས་ཀྱི་ཡོད་པ་རེད། 

མི་མང་པོས་ཨོ་སི་ཁྲི་ལི་ཡའི་འོས་བསྡུའི་ལམ་ལུགས་དེ་ནི་མང་གཙོའི་ལམ་ལུགས་ཤིག་ཏུ་ངོས་འཛིན་མི་བྱེད་ཀྱང་། ཨོ་སི་ཁྲི་ལི་ཡས་དེ་ནི་མང་གཙོའི་ལམ་ལུགས་ཤིག་ཏུ་ངོས་འཛིན་བྱེད་བཞིན་ཡོད་འདུག

ཨོ་སི་ཁྲི་ལི་ཡའི་མི་སེར་ཆགས་ནས་འོས་བསྡུའི་ནང་དུ་མཉམ་ཞུགས་བྱེད་རྒྱུ་དེ་ནི་རང་ཉིད་ཀྱི་འགན་འཁྲི་ཞིག་ཏུ་བརྩི་བཞིན་འདུག་ལ། འོས་བསྡུའི་ལས་རིམ་ནང་དུ་མཉམ་ཞུགས་མ་བྱས་ཚེ་ཨ་སྒོར་$༢༠/$༡༥ ཡིས་ཆད་པ་གཅོད་ཀྱི་ཡོད་པར་བརྟེན། ཨོ་སི་ཁྲི་ལི་ཡའི་འོས་བསྡུའི་ལས་རིམ་ནང་དུ་མི་མང་མཉམ་ཞུགས་བྱེད་མཁན་གྱི་བརྒྱ་ཆ་༩༠% ཟིན་གྱི་ཡོད་པའི་གནས་ཚུལ་བཀོད་འདུག

ལོ་རྒྱུས་རིག་པ་བ་Judith  Brett ཡིས་ཨོ་སོ་ཁྲི་ལི་ཡིའི་འོས་བསྡུའི་ལམ་ལུགས་དེ་ནི་ཨ་རི་དང་དབྱིན་ཇི་སོགས་དང་ མི་འདྲ་བར་ཐུན་མོང་མ་ཡིན་པ་ཞིག་ཡིན་པ་དང་། ཕྱི་ལོ་༡༩༢༤ ལོ་ཁྲིམས་འཆར་དེ་གཏན་འབེབས་བྱས་ཡོད་པའི་སྐོར་ དང་། ལམ་ལུགས་དེས་ཕྱོགས་ལྷུང་མེད་པའི་འགྲན་སྡུར་གྱི་རྣམ་པ་ཞིག་སྟོན་གྱི་ཡོད་པ་མ་ཟད། འོས་བསྡུའི་ལས་རིམ་ནང་དུ་མཉམ་ཞུགས་བྱེད་མིན་སོ་སོའི་འདོད་པ་བསྟུན་ན་འོས་བསྡུའི་ལས་རིམ་ནང་དུ་མཉམ་ཞུགས་མི་བྱེད་མཁན་མང་ཆེ་བ་ནི་མི་མང་དཀྱུས་མ་དང་། སློབ་སྦྱོང་མེད་མཁན། དེ་བཞིན་ལུང་པ་གཞན་ནས་འབྱོར་བའི་གནས་སྤོ་པ་སོགས་ཡིན་པས་ཨོ་སི་ཁྲི་ལི་ཡི་འོས་བསྡུའི་ལམ་ལུགས་ནང་མི་མང་དེ་དག་ཀྱང་འོས་བསྡུའི་ནང་མཉམ་ཞུགས་བྱེད་ཐུབ་པའི་ཕན་ཐོགས་ཡོད་པ་རེད་ཅེས་འགྲེལ་བརྗོད་བྱས་འདུག

ད་ལྟའི་ཆར་ཨོ་སི་ཁྲི་ལི་ཡའི་འོས་བསྡུའི་ལམ་ལུགས་དེ་ལ་དགག་བྱ་དང་གླེང་སློང་བྱེད་མཁན་ཡོང་གི་ཡོད་ཀྱང་། མི་མང་ཆེ་བས་དེ་ལ་རྒྱབ་སྐྱོར་བྱེད་ཀྱི་ཡོད་པ་རེད།

གཞན་ཡང་ཟླ་འདིའི་ནང་དུ་སཱོ་ལོ་མོན་གླིང་ཚོམས་དང་། རྒྱ་ནག་བར་བདེ་འཇགས་སྲུང་སྐྱོབ་ཀྱི་ཐོག་ལ་ཆིངས་ཡིག་ཅིག་བཞག་ཡོད་བར་བརྟེན། ཨ་རི་དང་ཨོ་སི་ཁྲི་ལི་ཡ་བཅས་ཀྱིས་ཞི་བདེ་རྒྱ་མཚོ་ཁུལ་གྱི་བདེ་འཇགས་ཐོག་ལ་སེམས་འཚབ་བྱེད་ཀྱི་ཡོད་པ་བཞིན། ཐེངས་འདི་ཨོ་སི་ཁྲི་ལི་ཡའི་འོས་བསྡུའི་ལས་རིམ་ཁྲོད་དུ་གླེང་སློང་ཆེ་ཤོས་དེ་ནི་རྒྱལ་ཁབ་ཀྱི་བདེ་འཇགས་དང་སྲུང་སྐྱོབ་ཐོག་ལ་ཡིན་པ་རེད།།

གསར་འགོད་པ་བློ་བཟང་རྒྱ་མཚོ།