ཡང་ཚོང་ལས་ཁང་ཞིག་གིས་རྒྱ་ནག་ལ་དགོངས་སེལ་ཞུས་འདུག

རྒྱལ་སྤྱིའི་ཚོང་ལས་ཁང་ཆེ་གྲས་ཤིག་གིས། སླར་ཡང་རྒྱ་ནག་གི་སེམས་ཚོར་ལ་ཕོག་ཐུག་བཏང་ནས་དགོངས་སེལ་ཞུ་དགོས་ཁེལ་འདུག དེ་ཡང་ཚོང་ལས་ཁང་དེའི་ལས་བྱེད་གཅིག་གིས་ཐའེ་ཝན་རྒྱ་ནག་གི་ས་ཁྲའི་ཁོངས་སུ་བཅུག་མེད་པས་ཡིན་འདུག

ཟླ་༡༠ པའི་ཚེས་༡༧ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཧྥ་རན་སིའི་གྱོན་ཆས་དང་བྱུག་རྫས་སོགས་བཟོ་སྐྲུན་བྱེད་མཁན་རྒྱལ་སྤྱིའི་ནང་གྲགས་ཆེ་བའི་ཚོང་ལས་ཁང་ཌེ་འུར་(Christian Dior)ཡིས། གཙུག་ལག་སློབ་གཉེར་ཁང་ཞིག་ཏུ་སློབ་མ་ཚོར་ཚོང་ལས་ཁང་དེའི་ངོ་སྤྲོད་གཏམ་བཤད་བྱེད་བཞིན་པའི་སྐབས་སུ། རྒྱ་ནག་ནང་ལ་ཡང་ཚོང་ལས་ཁང་དེའི་ཁྲོམ་ར་སྐོར་འགྲེལ་བརྗོད་བྱེད་བཞིན་པའི་སྐབས་སུ། རྒྱ་ནག་གི་ས་ཁྲ་ཞིག་བསྟན་ཡོད་པ་དང་། དེའི་ནང་ཐའེ་ཝན་ཚུད་མེད་པ་རེད་འདུག སྐབས་དེར་སློབ་མ་ཞིག་གིས་ཐའེ་ཝན་ཚུད་མེད་པའི་སྐོར་དྲིས་སྐབས། གཏམ་བཤད་པ་དེས་ཐོག་མར་ཐའེ་ཝན་ནི་ཤིན་ཏུ་ཆུང་ཆུང་ཡིན་པས། ས་ཁྲའི་ནང་འཇུག་ཐབས་བྲལ་བ་ཡིན་སྐོར་འགྲེལ་བརྗོད་བྱས་འདུག འོན་ཀྱང་སློབ་མ་དེས་ཐའེ་ཝན་ལས་ཆུང་བའི་ཧཱེ་ནན་གླིང་ཕྲན་རྒྱ་ནག་གི་ས་ཁྲའི་ནང་བཅུག་ཡོད་པ་དྲིས་སྐབས། གཏམ་བཤད་པ་དེས་ཐའེ་ཝན་དང་ཧོང་ཀོང་གཉིས་ཚོང་ལས་ཁང་དེའི་རྒྱ་ནག་ཆེན་མོའི་གཏམ་བཤད་ལེ་ཚན་ནང་བཅུག་ཡོད་པ་འགྲེལ་བརྗོད་བྱས་འདུག གནས་ཚུལ་དེའི་བརྙན་ཐུང་ཞིག་རྒྱ་ནག་གི་སྤྱི་ཚོགས་དྲ་ལམ་ཁག་ཏུ་ཁྱབ་སྤེལ་ཆེན་པོ་སོང་ཡོད་པས། དྲ་ལམ་བཀོལ་སྤྱོད་པ་ཚོས་ཚོང་ལས་ཁང་དེར་སྐྱོན་བརྗོད་ཆེན་པོ་བྱས་འདུག

རྒྱ་ནག་ནི་རྒྱལ་སྤྱིའི་ཚོང་ལས་ཁང་གི་ཐོན་རྫས་ཀྱི་ཁྲོམ་ར་ཆེ་ཤོས་གྲས་ཤིག་ཡིན་པས། རྒྱ་ནག་གི་འདོད་པ་མེད་པའི་ལས་དོན་སྤེལ་བར་དགོངས་སེལ་ཞུ་མཁན་མང་པོ་བྱུང་ཡོད་པ་ལྟར། རྒྱ་ནག་ཏུ་ཡོད་པའི་ཚོང་ལས་ཁང་དེའི་ཡན་ལག་ལས་ཁུངས་ཀྱིས་རྒྱ་ནག་གི་སྤྱི་ཚོགས་དྲ་ལམ་ཝི་བྷོའི་ཐོག་ཏུ། རྒྱ་ནག་ལ་དགོངས་སེལ་ཞུས་ཏེ་རྗེས་ནས་དེ་འདྲ་མི་ཡོང་བ་བྱེད་རྒྱུའི་ཁས་ལེན་བྱས་འདུག

དེ་ཡང་ཟླ་༡༠ པའི་ཚེས་༡༧ ཉིན་གྱི་སྔ་དྲོའི་ཆུ་ཚོད་༢ དང་སྐར་མ་༡༥ ལ། ཚོང་ལས་དེས་བསྒྲགས་གཏམ་ཞིག་སྤེལ་ནས། ཚོང་ལས་ཁང་དེའི་ལས་བྱེད་གཅིག་གིས་ཐའེ་ཝན་རྒྱ་ནག་གི་ས་ཁྲའི་ནང་ཡོད་མེད་ཐོག་འགྲེལ་བཤད་ནོར་བ་བརྒྱབ་ཡོད་པས། ཞིབ་འཇུག་བྱེད་བཞིན་ཡོད་པ་དང་མ་འོངས་པར་སླར་ཡང་ནོར་འཁྲུལ་དེ་བྱེད་རྒྱུ་མིན་པའི་ཁས་ལེན་བྱས་ཏེ། ཚོང་ལས་ཁང་དེས་དུས་རྟག་ཏུ་རྒྱ་ནག་གཅིག་གྱུར་གྱི་སྲིད་བྱུས་ལ་གུས་བརྩི་བྱེད་བཞིན་ཡོད་པ་དང་། རྒྱ་ནག་གི་བདག་དབང་དང་མངའ་ཁོངས་ཆིག་སྒྲིལ་ལ་རྒྱབ་སྐྱོར། རྒྱ་ནང་མི་མང་གི་ཚོར་སྣང་ལ་གུས་བརྩི་བྱེད་ཀྱི་ཡོད་སྐོར་བརྗོད་འདུག བསྒྲགས་གཏམ་དེ་སྤེལ་རྗེས་རྒྱ་ནག་གི་དྲ་ལམ་ཁག་ཏུ་འཚོལ་ཞིབ་མང་ཤོས་བྱེད་ཡུལ་གྱི་གནད་དོན་གཉིས་པ་དེ་ཆགས་འདུག

ཉེ་བའི་ཆར་རྒྱལ་སྤྱིའི་ནང་གི་གྱོན་ཆས་བཟོ་ཚོང་ཁང་ཆེ་གྲས་གཉིས་ཀྱིས། གྱོན་ཆས་བཟོ་བཀོད་ཐོག་ཏུ་ཧོང་ཀོང་དང་མེ་ཁའོ། ཧོང་ཀོང་བཅས་རྒྱ་ནག་དང་ཐ་དད་ཀྱིཝ་རྒྱལ་ཁབ་གཞན་ཡིན་པ་ངོས་འཛིན་བྱས་ཡོད་པའི་རྒྱུ་མཚན་གྱིས། རྒྱ་ནག་གིས་སྐྱོན་བརྗོད་དྲག་པོ་བྱས་ཡོད་པ་དང་། ཚོང་ལས་ཁང་དེ་གཉིས་ཀྱིས་དགོངས་སེལ་ཞུ་དགོས་ཁེལ་ཡོད་པ་རེད། རྒྱ་ནག་གིས་བོད་དང་ཐའེ་ཝན། ཧོང་ཀོང་། མེ་ཁའོ་སོགས་ནི་བྲལ་ཐབས་མེད་པའི་རྒྱ་ནག་གི་མངའ་ཁོངས་ཡིན་པ་བསྒྲགས་བཞིན་ཡོད་པ་དང་། རྒྱལ་ཁབ་དང་ཚོང་ལས་ཁང་སུ་ཡིས་རྒྱ་ནག་དང་འབྲེལ་ལམ་འཛུགས་དགོས་ཚེ། རྒྱ་ནག་གཅིག་གྱུར་སྲིད་བྱུས་ལ་གུས་བརྩི་དང་རྒྱབ་སྐྱོར་གཡོ་བ་མེད་པ་བྱེད་དགོས་པ་དེ་ནི་རྨང་གཞིའི་ཆ་རྐྱེན་ཡིན་པ་རེད། སྐབས་རེ་རྒྱུ་མཚན་འདྲ་མིན་ལ་བརྟེན་ནས་ཚོང་ལས་ཁང་མང་པོ་ཞིག་གིས་རྒྱ་ནག་གཅིག་གྱུར་གྱི་སྲིད་བྱུས་དང་མི་མཐུན་པའི་ལས་དོན་སྤེལ་བ་བྱུང་སྐབས། རྒྱ་ནག་གཞུང་དང་མི་མང་ཚོས་ངོ་རྒོལ་དང་སྐྱོན་བརྗོད་ཆེན་པོ་བྱེད་ཀྱི་ཡོད་པ་དང་། ཚོང་ལས་ཁང་དེ་དག་གིས་ཚོང་ལ་གནོད་པ་མི་ཡོང་བའི་ཆེད་དུ། དགོངས་སེལ་ཞུ་དགོས་ཁེལ་གྱི་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།