ཡིག་ཆ་ཨང་༣༩ པ་གཙང་བཟོ་མ་བྱེད་བར་ལས་འགུལ་སྤེལ་རྒྱུ་ཡིན།

ཟླ་འདིའི་ཚེས་༡༦ ཉིན་ཉམས་པ་སླར་གསོའི་ལས་འགུལ་ཁང་གི་ཚོགས་མི་ཁག་གཅིག་གིས་དྷ་ས་གངས་སྐྱིད་སིལ་སྤོལ་ཐང་དུ་ཞུ་འབུལ་ལས་འགུལ་ཞིག་སྤེལ་སོང་། སྐབས་དེར་དྷ་ས་ས་གནས་ཉམས་པ་སླར་གསོའི་ལས་འགུལ་ཁང་གི་ཚོགས་གཙོ་རྡོ་རྗེ་རྒྱལ་མཚན་གྱིས་སྐབས་༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་༡༠ པའི་ཐོག་གྲོས་ཆོད་ཡིག་ཆ་ཨང་༣༩ པའི་དགོངས་དོན་བཞིན་སྤྱི་འཐུས་རྩ་འབོར་གསུམ་ཆ་གཉིས་ཡན་གྱི་རྒྱབ་སྐྱོར་ཐོག་ཁྲིམས་ཞིབ་པ་གསུམ་གནས་དབྱུང་བཏང་ཡོད་པ་དང་། སྐབས་དེར་ཁོང་རྣམ་པ་གསུམ་གྱིས་ཀྱང་དང་ལེན་བྱས་ཡོད་ན་ཡང་། ཟླ་བ་གཉིས་ཀྱི་རྗེས་སུ་ཁྲིམས་མཐུན་གྱི་བརྒྱུད་ལམ་གང་ཡང་མེད་པའི་ཐོག་སྔར་གྱི་ལས་གནས་སུ་ཕྱིར་ལོག་བྱས་ཡོད་པས། དེ་ནི་བཙན་བྱོལ་བོད་མིའི་བཅའ་ཁྲིམས་དང་འགལ་ཡོད་པས། ཁོང་རྣམ་པ་ལ་ངོས་ལེན་མེད་པ་དང་། སྤྱི་འཐུས་གྲོས་ཚོགས་ཀྱིས་ཡིག་ཆ་ཨང་༣༩ པ་དེ་ཉིད་གཙང་བཟོའམ་འཇུག་སྐྱོང་བྱེད་པའི་ཆེད་དུ་ལས་འགུལ་སྤེལ་བ་ཡིན་པའི་སྐོར་དང་། ཐེངས་འདི་ལས་འགུལ་གྱི་ནང་དུ་དྷ་ས་དང་བལ་ཡུལ། སྦིར་སོགས་ས་གནས་ཁག་བཞི་ལས་མི་མང་ཁྱོན་བསྡོམས་༡༣ མཉམ་ཞུགས་བྱས་ཡོད་པ་དང་། གྲོས་ཚོགས་ཀྱིས་ཡིག་ཆ་ཨང་༣༩ པ་ཐག་གཅོད་མ་བྱེད་ཀྱི་བར་དུ་ལས་འགུལ་མུ་མཐུད་ནས་སྤེལ་རྒྱུ་ཡིན་རབས་བརྗོད་སོང་།

ལས་འགུལ་སྤེལ་མཁན་ཚོས་སིལ་སྤོལ་ཐང་དུ་སྦྱར་ཡིག་དང་འཕྲེད་དར་འདྲ་མིན་སྦྱར་ཡོད་པའི་ནང་། “དྲང་བདེན་མེད་ན་ཡིད་ཆེས་མེད།། ཡིད་ཆེས་མེད་ན་མཐུན་སྒྲིལ་མེད།། མཐུན་སྒྲིལ་མེད་ན་འཐབ་རྩོད་མེད།། འཐབ་རྩོད་མེད་ན་བོད་པ་མེད།། ”ཅེས་དང་། “བཙན་བྱོལ་བོད་མིའི་བཅའ་ཁྲིམས་ལ་རྩིས་མེད་རྡོག་རོལ་ཏུ་གཏོང་མཁན་གྱི་ཁྲིམས་དཔོན་ཟུར་པ་གསུམ་པོ་འཕྲལ་དུ་ཁྲིམས་ཞིབ་ཁང་ནས་ཁ་བྲལ་ཏེ་མར་ཕེབས་རོགས།” ཞེས་འཁོད་འདུག

ས་གནས་ཉམས་པ་སླར་གསོའི་ལས་འགུལ་ཁང་གིས་སྐབས་༡༧ པའི་གྲོས་ཚོགས་ཚོགས་དུས་༤ པ་མ་ཚོགས་པའི་སྔོན་དུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་གཙོས་པའི་རྒྱུན་ལས་ཡོངས་ལ་ཞུ་བསྐུལ་སྙན་ཞུ་ཞིག་ཕུལ་ཡོད་པའི་ནང་དུ། ད་ཐེངས་སྐབས་༡༧ པའི་གྲོས་ཚོགས་ཚོགས་དུས་༤ པ་ཚོགས་པའི་སྐབས་སུ་གྲོས་ཚོགས་ནས་གྲོས་ཆོད་ཀྱི་ཡིག་ཆ་ཨང་༣༩ པ་གཙང་མ་བཟོ་ཆེད་དམ། འཇུག་སྐྱོང་བྱེད་རྒྱུའི་འབོད་སྐུལ་ཞུ་དོན། དེ་སྔོན་གྲོས་ཚོགས་ཀྱིས་བཞག་པའི་གྲོས་ཆོད་ཡིག་ཆ་ཨང་༣༩ པ་སྤྱི་འཐུས་རྒྱུན་ལས་ནས་གྲོས་ཚོགས་ནང་ལ་བསྣམས་ནས་ཕེབས་པ་དང་། གྲོས་ཚོགས་ཀྱི་གསུམ་ཆ་གཉིས་ཡན་གྱིས་བཞག་པའི་གྲོས་ཆོད་ཅིག་ཡིན་པས། དེ་གཙང་སེམ་བྱ་རྒྱུ་དང་། ཡང་ན་འཇུག་སྐྱོང་བྱེད་རྒྱུའི་འགན་འཁུར་སྐབས་༡༧ པའི་སྤྱི་འཐུས་རྒྱུན་ལས་ཡོངས་ལ་ཡོད། དེ་ངེས་པར་དུ་གྲོས་ཚོགས་ཚོགས་དུས་བཞི་པའི་ཐོག་ཏུ་གཙང་སེལ་ལམ། ཡང་ན་འཇུག་སྐྱོང་ཡོང་བ་ཞུ་བཞིན་ཡོད་ཅེས་དང་། གལ་ཏེ་སྐབས་༡༧ པའི་སྤྱི་འཐུས་རྒྱུན་ལས་ནས་གྲོས་ཆོད་དེ་འཇུག་སྐྱོང་བྱེད་མ་ཐུབ་པ་འམ། ཡང་ན་གཙང་སེལ་བྱེད་རྒྱུའི་གྲོས་འཆར་འཁུར་ནས་ཕེབས་མི་ཐུབ་ཚེ། མང་གཙོའི་འགྲོ་ལུགས་ལྟར་མི་མང་གི་ལག་ཏུ་འོས་བསྡུའི་ལམ་ནས་མཐའ་མའི་ཐག་གཅོད་བྱེད་པའི་དབང་ཆ་སྤྲོད་རོགས་ཞུ་རྒྱུའི་རེ་བ་ཞུ་བཞིན་ཡོད། རྒྱུ་མཚན་ནི། སྤྱི་འཐུས་ལྷན་ཚོགས་ཀྱིས་གྲོས་ཆོད་ཨང་༣༩ པ་གཙང་སེལ་ལམ། རྒྱུན་སྐྱོང་བྱེད་མ་ཐུབ་པ་ཡིན་ན། ད་ནི་མི་མང་གི་ཕྱག་ཏུ་འོས་བསྡུའི་ལམ་ནས་ཕུལ་རྒྱུ་ལས་ཐབས་ལམ་གཞན་མེད་པས་ཡིན། ཞེས་དང་། ང་ཚོས་སྙན་ཞུ་འདི་ལྟར་འབུལ་དགོས་དོན་གཙོ་བོ་ནི་བཙན་བྱོལ་བོད་མིའི་སྒྲིག་འཛུགས་འདི་བོད་མི་རིགས་ཀྱི་ཆེད་དུ་མུ་མཐུད་ནས་གནས་དགོས་རྒྱུ། དེའང་ཁྲིམས་དང་ལྡན་པའི་གཞུང་ཞིག་ཏུ་བསྒྱུར་དགོས་པ་ལས་གང་ཟག་གིས་དབང་དུ་མི་འགྲོ་བའི་ཐབས་ལམ་ལ་བསམ་ཞིབ་ངེས་པར་དུ་གནང་རོགས། གྲོས་ཆོད་ཨང་༣༩ པ་དེ་ཡར་འཇོག་མཁན་བོད་མི་མང་སྤྱི་འཐུས་ལྷན་ཚོགས་ཡིན་པ་དང་། མར་འཐེན་དགོས་བྱུང་བ་ཡིན་ན་བོད་མི་མང་སྤྱི་འཐུས་ལྷན་ཚོགས་ལ་མ་གཏོགས་སྐུ་དབང་མེད་པ་ཡིན་དུས་དྲང་བདེན་གྱིས་ཐག་གཅོད་གནང་ཐབས་ཡོང་བ་ཞུ་རྒྱུ་ཡིན། ཅེས་འཁོད་འདུག་ལ། དྷ་ས་ས་གནས་ཉམས་པ་སླར་གསོའི་ལས་འགུལ་ཁང་གི་ཚོགས་གཙོ་ཡིས་སྙན་ཞུ་དེ་ནི་བོད་མི་མང་སྤྱི་འཐུས་ཡོངས་ལ་སྤྲད་རྒྱུ་ཡིན་རབས་བརྗོད་སོང་།

གསར་འགོད་པ། བློ་བཟང་རྒྱ་མཚོ།