ཡུ་རོབ་ཀྱི་སྐྱབས་བཅོལ་བའི་དཀའ་ངལ།

མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཀི་མོན་གྱིས་ཡུ་རོབ་ལུང་པ་ཁག་གིས་སྐྱབས་བཅོལ་བ་ཚོར། བདེ་འཇགས་ལྡན་པ་དང་ཁྲིམས་མཐུན་གྱི་འོག་ནས་སྐྱབས་བཅོལ་ཞུ་བར་ཡོང་སའི་བརྒྱུད་ལམ་ཞིག་བཟོ་རྒྱུ་གལ་ཆེན་ཡིན་སྐོར་བརྗོད་འདུག
རྒྱལ་སྤྱིའི་བརྒྱུད་ལམ་ཁག་གིས་གནས་ཚུལ་སྤེལ་གསལ་ལྟར་ན། ཟླ་འདིའི་ཚེས་༢༧ ཉིན་ལ་ཡུ་རོབ་རྒྱལ་ཁབ་ཨོ་སི་ཋོ་རི་ཡའི་རྒྱ་ལམ་དུ་དོལ་སྐྱེལ་རླངས་འཁོར་ཞིག་བསྐྱུར་བའི་ནང་སི་རི་ཡའི་སྐྱབས་བཅོལ་བ་༧༡ གི་ཕུང་པོ་རུལ་བ་རྙེད་ཡོད་པ་དང། དེ་བཞིན་ལི་བྷི་ཡའི་མཚོའི་ནང་དུ་གྲུ་གཟིངས་གཉིས་འཐིམ་སྟེ། སྐྱབས་བཅོལ་བ་༢༠༠ ལྷག་རྐྱེན་ལམ་དུ་ཕྱིན་ཡོད་པར་ཚོད་དཔག་བྱེད་ཀྱི་ཡོད་ཀྱང། ད་ལྟ་བར་དུ་མི་༡༠༠ ཡི་ཕུང་པོ་མ་གཏོགས་རྙེད་མེད་པ་རེད།

སྐུ་ཞབས་བྷན་གྱིས་ཡུ་རོབ་ཏུ་ཉེན་ཁ་ཆེན་པོའི་འོག་འགྲོ་སོང་འབོར་ཆེན་བཏང་སྟེ་སྐྱབས་བཅོལ་དུ་ཡོང་མཁན་མང་ཆེ་བ་ནི། སི་རི་ཡའི་ནང་འཁྲུག་གི་རྐྱེན་པས་བྲོས་བྱོལ་དུ་ཡོང་མཁན་དང་། ལྷིང་འཇགས་མེད་པའི་སྒང་ལ་དབུལ་ཕོངས་ཀྱིས་མནར་བའི་ཨ་ཧྥི་རི་ཀའི་གླིང་ཕྲན་གྱི་ལུང་པ་ཁག་གཙོས་ཨ་རབ་ཀྱི་ལུང་པ་ཁ་ཤས་ནས་ཀྱང་ཡོང་མཁན་ཡོད་པ་རེད་ཅེས་འགྲེལ་བརྗོད་བྱས་འདུག ཁོང་གིས་རྒྱལ་སྤྱིའི་རྒྱལ་ཁབ་ཁག་གིས་སྐྱབས་བཅོལ་བ་རྣམས་བཙན་ཤུགས་ཀྱིས་ཕྱིར་ལོག་བྱེད་མི་རུང་བ་དང། གདུང་སེམས་མཉམ་བསྐྱེད་དགོས་པར་ནན་སྐུལ་བྱས་འདུག

ཟླ་སྔོན་མའི་ནང་དུ་སྐྱབས་བཅོལ་བ་༡༠༧,༥༠༠ ཡུ་རོབ་ཏུ་འབྱོར་ཡོད་པས། དེ་ནི་ད་བར་དུ་ཟླ་གཅིག་ནང་སྐྱབས་བཅོལ་བ་སླེབས་མཁན་གྲངས་མང་ཤོས་ཆགས་ཡོད་པ་དང། མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་བའི་ལས་དོན་ཁང་གིས་ལོ་འདིའི་ནང་དུ། གཟའ་ཕུར་བ་ལ་གྲོངས་པའི་སྐྱབས་བཅོལ་བའི་གྲངས་མ་བརྩིས་ན། ད་བར་དུ་མི་གྲངས་༢༥༠༠ ཡུ་རུབ་ཏུ་སླེབས་ཐབས་བྱེད་རིང་ལམ་བར་དུ་གྲོངས་ཡོད་སྐོར་བརྗོད་འདུག
ཡུ་རོབ་ཀྱི་དཔལ་འབྱོར་སྲ་བརྟན་མེད་པའི་ཁར། སྐྱབས་བཅོལ་གྲངས་འབོར་ཆེན་པོ་དེ་འདྲ་ཡོང་སྐབས། སྐྱབས་བཅོལ་སྤྲད་དགོས་མིན་སྐོར་ལ་བསམ་ཚུལ་མཐུན་མིན་མང་པོ་བྱུང་བཞིན་ཡོད་པ་རེད་འདུག །
སྐལ་བཟང་དོན་གྲུབ།