ཡུ་རོབ་ཏུ་སོལ་རླངས་ཀྱི་གོང་ཚད་ལྡབ་བཅུ་འཕར་འདུག

ཟླ་འདིའི་ཚེས་༢༦ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ད་ལྟའི་ཆར་ཡུ་རོབ་ཀྱི་ནང་དུ་འདས་པའི་ལོ་ངོ་བཅུ་ཕྲག་གཅིག་གི་ནང་དུ་སོལ་རླངས་ཀྱི་ཆ་སྙོམ་གོང་ཚད་ལས་ལྡབ་བཅུ་འཕར་ཡོད་པའི་གནས་ཚུལ་ཐོན་འདུག

ཏོག་དབྱིབས་གཉན་རིམས་ཁྱབ་བརྡལ་དུ་ཕྱིན་པའི་རྒྱུ་མཚན་ལ་བརྟེན་ནས། རྒྱལ་ཁབ་མང་པོའི་ནང་དུ་ཚོང་ཁང་དང་བཟོ་ལས་ཁང་སོགས་ཧ་ལམ་དུས་གཅིག་ལ་སྒོ་བརྒྱབ་ཡོད་པ་ལྟར། ནད་ཡམས་ཁྱབ་བརྡལ་ཇེ་ཆུང་དུ་ཕྱིན་པ་དང་སྟབས་བསྟུན། བཟོ་ལས་ཁང་དང་ཚོང་ཁང་སོགས་ཀྱང་དུས་གཅིག་མཚུངས་སུ་སྒོ་ཕྱེ་ཡོད་པས། སྐབས་དེར་ནུས་ཤུགས་ཀྱི་(energy)དགོས་མཁོ་ཇེ་ཆེ་རུ་ཕྱིན་ཡོད་ཀྱང་། ནུས་ཤུགས་མཁོ་འདོན་བྱེད་མཁན་དག་གིས་ནུས་ཤུགས་མཁོ་སྤྲོད་བྱེད་མ་ཐུབ་པའི་དཀའ་ངལ་ཆེན་མོ་འཕྲད་འདུག

ཡུ་རོབ་ཀྱི་ནང་དུ་སོལ་རླངས་ཀྱི་བརྒྱ་ཆ་༤༠% ཨུ་རུ་སུའི་རྩ་ནས་ཉོ་ཡི་ཡོད་ཀྱང་། ལོ་འདིའི་སྤྱི་ཟླ་གཉིས་པའི་ནང་དུ་ཨུ་རུ་སུ་དང་ཡུག་རེན་གྱི་བར་དུ་དམག་འཁྲུག་འགོ་འཛུགས་བྱས་པ་དང་ལྷན་དུ་ཡུ་རོབ་ཀྱི་རྒྱལ་ཁབ་མང་པོས་ཨུ་རུ་སུའི་རྩ་ནས་ནུས་ཤུགས་ནང་འདྲེན་བྱེད་རྒྱུ་ཉུང་དུ་གཏོང་ཐབས་བྱས་ཡོད་པ་དང་། དེའི་སྟབས་ཀྱིས་ཡུ་རོབ་ཀྱི་ནང་དུ་སོལ་རླངས་ཀྱི་གོང་ཚད་འཕར་ཡོད་འདུག

ཡུ་རོབ་ཀྱིས་ཨུ་རུ་སུའི་སོལ་རླངས་ཀྱི་ཐོག་ལ་བརྟེན་རྒྱུ་ཉུང་དུ་གཏོང་རྒྱུ་ཁས་ལེན་བྱས་ཡོད་པ་དང་ལོ་འདིའི་སྤྱི་ཟླ་བདུན་པའི་ནང་དུ་ཨུ་རུ་སུའི་སོལ་རླངས་བཀོལ་སྤྱོད་བྱེད་ཚད་བརྒྱ་ཆ་༡༥% ཉུང་དུ་གཏོང་རྒྱུ་ཁས་ལེན་བྱས་ཡོད་འདུག དཔེར་ན། ཨ་རུ་སུས་ཡུག་རེན་ལ་བཙན་འཛུལ་མ་བྱེད་པའི་སྔོན་དུ་ཇར་མན་ནི་ཡི་སོལ་རླངས་ཀྱི་བརྒྱ་ཆ༥༥% ཨུ་རུ་སུའི་རྩ་ནས་ཉོ་ཡི་ཡོད་ཀྱང་ད་ལྟའི་ཆར་སོལ་རླངས་བརྒྱ་ཆ་༣༥% མ་གཏོགས་ཉོ་ཚོང་བྱེད་ཀྱི་མེད་པ་རེད་འདུག

ཇར་མན་ནི་ཡིས་ཡུག་རེན་ལ་དམག་རོགས་བྱེད་ཀྱི་ཡོད་པས་ཨུ་རུ་སུས་དེ་ལ་འཁོན་ལན་སློག་ཆེད་ཨ་རུ་སུས་སོལ་རླངས་བཙོང་མཚམས་འཇུག་སྲིད་པའི་ཐོག་ལ་ཇར་མན་ནི་ཡིས་ཞེད་སྣང་བྱེད་ཀྱི་ཡོད་འདུག

འདས་པའི་ཟླ་བ་ཁ་ཤས་ཀྱི་ནང་དུ་ཡུ་རོབ་རྒྱལ་ཁབ་མང་པོས་ཨུ་རུ་སུའི་ཡུལ་སྒོར་བེད་སྤྱོད་བྱས་ནས་ཨུ་རུ་སུའི་རྩ་ནས་སོལ་རླངས་མ་ཉོ་པའི་སྟབས་ཀྱིས་ཨུ་རུ་སུའི་བཟོ་ལས་ཁང་(Gazprom) གིས་པོ་ལན་ཊི་དང་ཧྤིན་ལན་ཊི། ཌན་མྰ་སོགས་རྒྱལ་ཁབ་ལྔ་ལ་སོལ་རླངས་བཙོང་རྒྱུ་ཕྱི་འགྱངས་བྱས་ཡོད་པས། ཨུ་རུ་སུའི་བཟོ་ལས་ཁང་གྷ་ཙི་ཕོ་རོམ་(Gazprom) ཞེས་པ་དེས་ཀྱང་ཇར་མན་ནི་ལ་གནོན་ཤུགས་སྤྲོད་བཞིན་ཡོད་པའི་གནས་ཚུལ་ཐོན་འདུག

འདས་པའི་ལོ་ཁ་ཤས་ཀྱི་ནང་དུ་ཡུ་རོབ་ཀྱི་རྒྱལ་ཁབ་ཁག་གཅིག་གིས་ཨ་རི་དང་ཁ་ཐར་(Qatar) རྒྱལ་ཁབ་ནས་རང་བྱུང་རླངས་རྫས་(Liquefied natural gas) ལྷག་འཕྲོ་དག་ཉོས་ནས་དགུན་ཁ་ལ་བེད་སྤྱོད་བྱེད་ཀྱི་ཡོད་ན་ཡང་། ལོ་འདིའི་ནང་དུ་རང་བྱུང་རླངས་རྫས་སྔོག་འདོན་མ་བྱས་པའི་སྔོན་ནས་ཨེ་ཤི་ཡི་རྒྱལ་ཁབ་མང་པོས་རང་བྱུང་གི་རླངས་རྫས་ཉོ་རྒྱུ་ཡི་གན་རྒྱ་བཞག་འདུག་ལ། དེ་དབང་གིས་རྒྱལ་སྤྱིའི་ཁྲོམ་རའི་ཁྲོད་དུ་རང་བྱུང་གི་རླངས་རྫས་དག་ཀྱང་ཚད་ཡོད་ཅིག་ཏུ་འགྱུར་ཡོད་པའི་གནས་ཚུལ་ཐོན་འདུག

ཨ་རི་དང་ཁ་ཐར། ཨོ་སི་ཁྲི་ལི་ཡ་བཅས་ཀྱིས་རང་བྱུང་རླངས་རྫས་མཁོ་འདོན་བྱེད་ཀྱི་ཡོད་པས་ད་ལྟའི་ཆར་རྒྱལ་ཁབ་དེ་དག་ལ་ཁེ་སང་ཆེན་མོ་རག་གི་ཡོད་འདུག

སོལ་རླངས་ནི་ཁྱིམ་དུ་ཆུ་ཚ་བོ་བཟོ་བ་དང་ཚོང་ལས།གློག་བཟོ་སྐྲུན་བྱེད་པར་དང་།ལྷག་པར་དུ་དགུན་དུས་སུ་དགོས་མཁོ་ཆེན་མོ་ཡོད་པའི་གནས་ཚུལ་ཐོན་འདུག །

གསར་འགོད་པ། བློ་བཟང་རྒྱ་མཚོ།