ཡུ་རོབ་མཉམ་འབྲེལ་གྲོས་ཚོགས་ཀྱི་ཚོགས་གཙོ་གསར་པར་༧གོང་ས་མཆོག་གིས་འཚམས་འཕྲིན།

༧གོང་ས་མཆོག་གིས་ལྕམ་རོ་བེར་ཊཱ་མེཊ་སོ་ལཱ་(Ms. Roberta Metsola) ཡུ་རོབ་མཉམ་འབྲེལ་གྲོས་ཚོགས་ཀྱི་ཚོགས་གཙོར་བསྐོ་བཞག་བྱུང་བར་འཚམས་འདྲི་གནང་བ་དང་འབྲེལ། ཡུ་རོབ་གྲོས་ཚོགས་ནས་བོད་མིར་རྒྱབ་སྐྱོར་བྱེད་བཞིན་པར་ཐུགས་རྗེ་ཆེ་ཞུས་གནང་འདུག

ཕྱི་ཟླ་༡ ཚེས་༢༠ ཉིན་སྐུ་སྒེར་དྲ་བའི་ཐོག་ཏུ་བཀོད་པའི་འཚམས་འདྲིའི་གསུང་འཕྲིན་དེའི་ནང་། ༧རིན་པོ་ཆེ་མཆོག་གིས་ཡུ་རོབ་མཉམ་འབྲེལ་གྲོས་ཚོགས་སུ་ཆིབས་སྒྱུར་ཐེངས་འགར་གནང་སྐབས་སྣེ་ལེན་གང་གཟབ་གནང་བ་དང་། བོད་དོན་ལ་རྒྱབ་སྐྱོར་གནང་བ་རྣམས་དྲན་གསོ་དང་ཐུགས་རྗེ་ཆེ་ཞུས་གནང་འདུག

ཚོགས་གཙོ་གསར་པ་ཁོང་ནི་ཡུ་རོབ་མཉམ་འབྲེལ་གྲོས་ཚོགས་ཀྱི་ལོ་ན་གཞོན་ཤོས་ཀྱི་ཚོགས་གཙོ་དང་། བུད་མེད་ཀྱི་ཚོགས་གཙོ་གསུམ་པ་དེ་ཆགས་ཀྱི་ཡོད་པའི་གནས་ཚུལ་དང་འབྲེལ་བའི་ཐད། ༧གོང་ས་མཆོག་གིས་“ངོས་ནས་བུད་མེད་ནི་སྐྱེས་པ་ལས་རང་བཞིན་ལྷན་སྐྱེས་ཀྱིས་གཞན་གྱི་བདེ་སྡུག་ལ་སེམས་ཁུར་ཆེ་བ་ཡོད་པའི་ཡིད་ཆེས་བྱེད་ཀྱི་ཡོད། དེར་བརྟེན་བུད་མེད་ཀྱིས་འཛམ་གླིང་འདི་སྔར་ལས་ཞི་བདེ་ལྡན་པ་ཞིག་ལ་འཁྲིད་ཐུབ་ངེས་རེད་”ཅེས་གསུངས་འདུག

ཡུ་རོབ་གྲོས་ཚོགས་ཀྱི་ཚོགས་གཙོ་གོང་མ་སྐུ་ཞབས་ཌེ་ཝི་ཌིས་སྭ་ལི་(David Sassoli) ཟླ་འདི་ཚེས་༡༡ ཉིན་དགུང་གྲངས་༦༥ ཐོག་སྐུ་གྲོངས་ཡོད་ཅིང་། སྐབས་དེར་ཡུ་རོབ་གྲོས་ཚོགས་ནས་རྒྱལ་དར་ཕྱེད་ཙམ་མར་ཕབ་ནས་ཁོང་ལ་མྱ་ངན་ཞུས་པ་མ་ཟད། ཡུ་རོབ་ཀྱི་རྒྱལ་ཁབ་རྣམས་ཀྱི་སྲིད་འཛིན་ཚོས་སེམས་ཚོར་དྲག་པོས་ཁོང་ལ་མྱ་ངན་དང་གུས་དུད་ཞུས་ཡོད།

༧གོང་ས་མཆོག་གི་གསུང་འཕྲིན་དེའི་ནང་། ཁོང་གིས་“ངོས་ནི་འཛམ་གླིང་གི་རྒྱལ་ཁབ་ཕན་ཚུན་དབར་རྒྱུས་ལོན་དང་། མཉམ་འབྲེལ། བརྩི་བཀུར་སྔར་ལྷག་དགོས་པར་མཐོང་མཁན་ཞིག་ཡིན་པའི་ཆ་ནས། རྒྱལ་ཁབ་ཕན་ཚུར་དབར་གཅིག་ཕན་གཅིག་གྲོགས་དང་། ཞི་བདེ་མཉམ་གནས་ཡོད་པའི་ཡུ་རོབ་མཉམ་འབྲེལ་ལ་ཧ་ཅང་ཡིད་སྨོན་བྱེད་ཀྱི་ཡོད་”ཅེས་གསུངས་པའི་ཐོག “རྒྱུ་མཚན་དེ་ལ་བརྟེན་ནས་ངོས་ནས་ཕྱི་ལོ་༡༩༨༨ ལོར་དངོས་སུ་ཡུ་རོབ་གྲོས་ཚོགས་ནང་དུ་བོད་རྒྱ་གཉིས་མོས་ཀྱི་ལམ་ནས་བོད་ཀྱི་གནད་དོན་སེལ་ཐབས་ཀྱི་གྲོས་འཆར་བཏོན་ཏེ། ཕྱོགས་ཚང་མ་འདོད་བློ་གང་བ་ཞིག་བྱུང་ན་མ་གཏོགས་དོན་དམ་གྱི་མཉམ་གནས་ཡོང་ཐབས་མེད་པ་གྲོས་འཆར་བཏོན་པ་ཡིན་”ཞེས་བསྣན་གནང་འདུག །

གསར་འགོད་པ་དཀོན་མཆོག་རབ་བརྟན།