ཡུག་ཀེ་རན་གྱིས་ཨུ་རུ་སུ་ལ་གྲོས་མོལ་གྱི་རེ་སྐུལ་བྱས་འདུག

དེང་སྐབས་ཡུག་ཀེ་རེའི་ས་མཚམས་སུ་ཨུ་རུ་སུའི་དམག་མི་འབོར་ཆེན་ཞིག་བསླེབས་དང་སླེབས་མུས་ཡིན་པས། ཡུག་ཀེ་རན་གྱི་ངོས་ནས་ཨུ་རུ་སུ་ཡི་བྱ་སྤྱོད་འདིའི་དམིགས་ཡུལ་རྣམས་ཁ་གསལ་གཏིང་གསལ་གྱི་གྲོས་མོལ་ཞིག་དགོས་པའི་རེ་སྐུལ་བྱས་འདུག

ཟླ་༢ པའི་ཚེས་༡༤ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཨུ་རུ་སུས་ཡུག་ཀེ་རན་ནང་བཙན་འཛུལ་བྱེད་འཆར་མེད་པ་ནན་བརྗོད་བྱེད་བཞིན་ཡོད་ནའང་། ཉིན་ཤས་ནང་དམག་མི་འགྲེམས་འཇོག་བྱེད་སྟངས་ལ་བལྟས་ནས་ཨ་རི་ཚུད་པའི་ནུབ་ཕྱོགས་རྒྱལ་ཁབ་མང་པོ་ཞིག་ལ་ཨུ་རུ་སུས་ཡུག་ཀེ་རེ་ལ་བཙན་འཛུལ་བྱེད་པའི་སེམས་འཚབ་ཆེན་པོ་སྐྱེས་ནས་ཡུག་ཀེ་རེ་ལ་བརྡ་ལན་ཡང་མང་པོ་སྤྲད་ཡོད་འདུག

ཡུག་ཀེ་རན་ཕྱི་སྲིད་བློན་ཆེན་གྱིས་”ཨུ་རུ་སུ་ཕྱོགས་ནས་དེ་སྔོན་གྱི་གྲོས་མོལ་སྣང་མེད་དུ་བཏང་ཡང་། ད་ཐེངས་ཡང་བསྐྱར་ཡོང་རྒྱུར་ཆུ་ཚོད་༤༨ ནང་ཚུད་དུ་ཕྱི་གསལ་ནང་གསལ་གྱི་གྲོས་མོལ་ཞིག་ཡོང་ཐུབ་པའི་རེ་བ་བྱེད་ཀྱི་ཡོད་”ཅེས་བརྗོད་འདུག

ཁ་སྔོན་གཟའ་པ་སངས་ཉིན་སྲིད་བློན་གྱིས་བརྗོད་དོན་“ཡུག་ཀེ་རན་གྱི་ས་མཚམས་དཀའ་ངལ་ལ་དངངས་འཚབ་མི་ཡོང་བའི་ཆེད་ཨུ་རུ་སུ་ཚུད་པའི་ཡོ་རོབ་རྒྱལ་ཁབ་མང་པོ་ཞིག་གི་བཞག་པའི་གྲོས་དོན་ཡིག་ཆ་(Vienna Document) དེའི་དགོས་དོན་གཞིར་བཟུང་ཏེ་ཨུ་རུ་སུ་ཕྱོགས་ནས་དགོས་དོན་ཁག་ལ་གུས་བཀུར་ཡོད་ཚེ། ད་ཐེངས་ཞི་བའི་གྲོས་མོལ་གྱི་ལམ་ནས་དམག་གི་གནད་དོན་ཐད་ཕྱི་གསལ་ནང་གསལ་གྱི་ལན་འདེབས་ཤིག་ཡོང་བའི་རེ་བ་རྒྱག་གི་ཡོད་’’ཅེས་བརྗོད་འདུག

གྲོས་དོན་ཡིག་ཆ་འདི་༢༠༡༡ ནང་དབུས་ཨེ་ཤ་ཡ་དང་ཨུ་རུ་སུ་སོགས་ཁྱོན་སྡོམ་རྒྱལ་ཁབ་༥༧ གྱིས་ཡོ་རོབ་བདེ་འཇགས་དང་མཉམ་འབྲེལ་ཐད་གྲོས་ཆོད་བཞག་པ་ཞིག་ཡིན་ཞིང་། དེའི་དགོས་དོན་གཙོ་བོ་ནི་གོང་གསལ་རྒྱལ་ཁབ་ཕན་ཚུན་དམག་མི་འགྲེམས་འཇོག་ཐད་ཁ་གསལ་དང་ཕན་ཚུན་བདེ་འཇགས་ཐད་རོགས་རམ་བྱེད་རྒྱུའི་ཁས་ལེན་འོག་བཞག་པ་ཞིག་རེད་འདུག །

གསར་འགོད་པ་བདེ་སྒྲོན།