ཡུག་རེན་གྱི་སྲིད་འཛིན་ཨ་རི་ལ་ཕེབས་འཆར་འདུག

ཟླ་འདིའི་ཚེས་༢༡ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཡུག་རེན་གྱི་སྲིད་འཛིན་རྫི་ལན་སི་ཀི་(Zelensky) ཨ་རི་ལ་ཕེབས་འཆར་ཡོད་པའི་གནས་ཚུལ་ཐོན་འདུག

ཟླ་འདིའི་ཚེས་༢༡ ཉིན་ཡུག་རེན་སྲིད་འཛིན་ཨ་རི་ལ་ཕེབས་ནས་ཨ་རིའི་ཕོ་བྲང་དཀར་པོའི་ནང་ཨ་རིའི་སྲིད་འཛིན་དང་མཇལ་འཕྲད་བྱེད་རྒྱུ་ཙམ་མ་ཟད། ཨ་རིིའི་གྲོས་ཚོགས་གོང་འོག་མཉམ་འབྲེལ་གྱི་གྲོས་ཚོགས་ཐོག་ལ་གཏམ་བཤད་གནང་རྒྱུ་རེད་འདུག  ལོ་འདིའི་ཕྱི་ཟླ་གཉིས་པའི་ནང་ཨུ་རུ་སུ་དང་ཡུག་རེན་བར་དམག་འཁྲུག་ལངས་འགོ་བཙུགས་ནས་བཟུང་། ཡུག་རེན་སྲིད་འཛིན་གྱིས་རྒྱལ་ཁབ་འདྲ་མིན་གྱི་དབུ་ཁྲིད་ཚོ་དང་ཁ་པར་དང་བརྙན་མོལ་(Video call) སོགས་བྱས་ནས་འབྲེལ་བ་བྱས་ཡོད་པ་མ་ཟད། དབྱིན་ཇིའི་སྲིད་བློན་སྔ་ཕྱི་གཉིས་དང་ཧྥ་རན་སིའི་སྲིད་འཛིན་སོགས་འཛམ་གླིང་ཐོག་གནད་ཡོད་མི་སྣ་མང་པོ་ཞིག་ཀྱང་ཡུག་རེན་ལ་གདན་འདྲེན་ཞུས་ཡོད་ན་ཡང་། ཨུ་རུ་སུ་དང་ཡུག་རེན་བར་དུ་དམག་འཁྲུག་ལངས་ནས་བཟུང་ཁོང་ཉིད་ཕྱི་བསྐྱོད་བྱེད་པ་དེ་རིང་ཐོག་མ་དེ་ཆགས་ཀྱི་ཡོད་འདུག

ཟླ་འདིའི་ཚེས་༡༡ ཉིན་ཨ་རི་དང་ཡུག་རེན་སྲིད་འཛིན་བར་དུ་ཁ་པར་བརྒྱུད་ནས་བཀའ་མོལ་གནང་ཡོད་པ་དང་། བདུན་ཕྲག་སྔོན་མའི་རེས་གཟའ་ལྷག་པའི་ཉིན་ཨ་རི་ཕོ་བྲང་དཀར་པོས་གཞུང་འབྲེལ་ཐོག་ཁོང་ཉིད་ལ་གདན་ཞུའི་ཡི་གེ་ཕུལ་རྗེས། རེས་གཟའ་པ་སངས་ཀྱི་ཉིན་ཡུག་རེན་སྲིད་འཛིན་གྱིས་ཁས་ལེན་བྱས་ཡོད་འདུག

ཐེངས་འདིའི་ཕྱོགས་བསྐྱོད་དང་འབྲེལ་ཨ་རི་སྲིད་འཛིན་གྱིས་ཡུག་རེན་ལ་བདེ་འཇགས་རོགས་སྐྱོར་གྱི་ཆེད་དུ་ཨ་སྒོར་ཐེ་འབུམ་གཉིས་ཀྱི་རོགས་རམ་བྱེད་རྒྱུ་ཡིན་པ་གསལ་བསྒྲགས་སྤེལ་རྒྱུ་རེད་འདུག་ལ། ཨ་རི་འཛིན་སྐྱོང་ལས་བྱེད་ཅིག་གིས་ཐེངས་འདི་ཡུག་རེན་གྱི་སྲིད་འཛིན་གདན་འདྲེན་ཞུས་པ་དེ་ཡིས་ཨ་རིའི་ཡུག་རེན་ལ་རྒྱབ་སྐྱོར་མུ་མཐུད་བྱེད་རྒྱུ་ཡིན་པ་མཚོན་གྱི་ཡོད་རབས་བརྗོད་ཡོད་འདུག

ཟླ་འདིའི་ཚེས་༢༡ ཉིན་ཡུག་རེན་སྲིད་འཛིན་གྱི་ཊུ་ཝེ་ཊར་ཐོག་ལ་ཁོང་ཉིད་ཨ་རི་ལ་ཕྱིན་ནས་ཡུག་རེན་གྱི་སྲུང་སྐྱོབ་ནུས་སྟོབས་གོང་མཐོ་རུ་གཏོང་རྒྱུ་དང་། ཨ་རི་དང་ཡུག་རེན་བར་གྱི་མཉམ་ལས་ཐོག་ལ་གྲོས་བསྡུར་བྱེད་རྒྱུ་ཡིན་ཞེས་བྲིས་ནས་སྤེལ་ཡོད་འདུག

ཨུ་རུ་སུས་ཡུག་རེན་ལ་བཙན་འཛུལ་བྱས་ནས་བཟུང་ཨ་རི་གཞུང་གིས་དམག་དོན་ཐོག་ལ་ཨ་སྒོར་ཐེ་འབུམ་$༡༨.༥༡ ཡིས་རོགས་རམ་བྱས་ཡོད་འདུག་ལ། ཇར་མན་ནི་ཡིས་ཨ་སྒོར་ཐེ་འབུམ་$༢.༣༤་དང་དབྱིན་ཡུལ་གྱིས་ཨ་སྒོར་ཐེ་འབུམ་$༡.༩་ཡིས་རོགས་རམ་བྱས་ཡོད་འདུག་པས་ད་བར་འཛམ་གླིང་ཐོག་ཡུག་རེན་ལ་དམག་དོན་ཐོག་རོགས་རམ་བྱེད་མཁན་ཨང་དང་པོ་ཨ་རི་དང་། ཨང་གཉིས་པ་ཇར་མན་ནི་དང་ཨང་གསུམ་པ་དབྱིན་ཡུལ་ཆགས་ཡོད་འདུག

ཉིན་ཁ་ཤས་ཀྱིས་སྔོན་དུ་ཡུག་རེན་སྲིད་འཛིན་གྱིས་རྒྱལ་ཁབ་ཁག་གི་རོགས་རམ་བྱེད་རྒྱུ་མང་དུ་གཏོང་བའི་རེ་བ་ཞུས་ཡོད་པ་དང་། ཁོང་གིས་ཡུག་རེན་སྲུང་སྐྱོབ་ཀྱི་དོན་དུ་ཟླ་བ་གཅིག་གི་རིང་ལ་ཨ་སྒོར་ཐེ་འབུམ་$༥ ཡིས་འགྲོ་སོང་འགྲོ་བཞིན་ཡོད་རབས་བརྗོད་ཡོད་འདུག་ལ། ཨུ་རུ་སུའི་སྲིད་འཛིན་གྱིས་ཀྱང་ལོ་འདིའི་ལོ་མཇུག་ཏུ་བདེ་སྲུང་གི་འགོ་ཁྲིད་ཚོ་དང་མཇའ་འཕྲད་ཀྱིས་ཡུག་རེན་གྱི་གནས་དོན་ཐོག་གྲོས་བསྡུར་བྱེད་རྒྱུ་ཡིན་རབས་ཀྱི་གནས་ཚུལ་ཐོན་འདུག།

གསར་འགོད་པ། བློ་བཟང་རྒྱ་མཚོ།