ཡུག་རེན་ལ་རྒྱབ་སྐྱོར་བྱེད་མཁན་ཡང་ཇེ་ཉུང་དུ་འགྲོ་བཞིན་འདུག་ཟེར།

ཟླ་འདིའི་ཚེས་༥ ཉིན་TFIGlobal ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན། ཨུ་རུ་སུ་དང་ཡུག་རེན་བར་གྱི་དམག་འཁྲུག་དེ་ཐོག་མ་བྱུང་དུས་སུ་ནུབ་ཕྱོགས་པ་ཚོས་ཡུག་རེན་གྱིས་ཨུ་རུ་སུ་ཕམ་ཉེས་གཏོང་ཐུབ་རྒྱུ་ལ་རེ་བ་བྱས་ཡོད་ཀྱང་། ད་ལྟའི་ཆར་ཨུ་རུ་སུས་ཡུག་རེན་གྱི་ས་ཆ་ལྔ་ཆ་གཅིག་ཙམ་བདག་བཟུང་བྱས་ཟིན་པ་མ་ཟད། ཡུག་རེན་ལ་རྒྱབ་སྐྱོར་བྱེད་མཁན་ཡང་ཇེ་ཉུང་དུ་འགྲོ་བཞིན་ཡོད་པའི་གནས་ཚུལ་ཐོན་འདུག

ཐོག་མའི་དུས་སུ་ཨ་རི་སྲིད་འཛིན་བྷ་ཌན་གྱིས་ཡུག་རེན་ལ་དམག་གི་རྒྱལ་ཁ་ཐོབ་རྒྱུའི་ཡིད་ཆེད་བྱེད་ཀྱི་ཡོད་ཀྱང་། ད་ལྟའི་ཆར་ཡུག་རེན་ལ་རྒྱལ་ཁ་ཐོབ་རྒྱུ་ཁག་པོ་ཡིན་པ་ར་སྤྲོད་བྱུང་ཡོད་པའི་སྐོར་དང་། གཞན་ཡང་ཡུག་རེན་ནི་དམག་འཁྲུག་གི་ནང་དུ་ཞུགས་འཇུག་མཁན་དང་པོ་དེ་ཨ་རི་ཡིན་པ་དང་། ཨ་རིས་རང་ཉིད་ཀྱི་མཐུན་ཕྱོགས་རྒྱལ་ཁབ་ཚོར་ཡུག་རེན་ལ་རྒྱབ་སྐྱོར་བྱེད་དགོས་པའི་བསླབ་བྱ་བརྒྱབ་ཡོད་པ་མ་ཟད། ཨུ་རུ་སུ་ལ་ཉེས་ཆད་འགེལ་མཁན་ཐོག་མ་དེ་ཡང་ཨ་རི་ཆགས་ཡོད། དེ་བཞིན་ཨ་རི་གྲོས་ཚོགས་འོག་མའི་ཚོགས་གཙོ་ལྕམ་ནན་སི་ཕོོ་ལོ་སི་Nancy Pelosi གཙོས་པའི་མང་གཙོ་ཚོགས་པའི་འགོ་ཁྲིད་མང་པོ་ཡུག་རེན་དུ་ཡང་ཕེབས་ཡོད་སྐོར་དང་། ལྷག་པར་དུ་ཉེ་བའི་ཉི་མ་ཁ་ཤས་ཀྱི་སྔོན་དུ་ཨ་རིས་ཨ་སྒོར་ཐེ་འབུམ་$༤༠ ཞིག་ཡུག་རེན་གྱི་དམག་དོན་གྱི་ཆེད་དུ་སྤྲད་ཡོད་པ་དང་དེ་ལྟར་བྱེད་དགོས་པའི་དམིགས་ཡུལ་གཅིག་ཡོད་པ་ནི་ཨ་རིས་ཨུ་རུ་སུའི་དམག་སྟོབས་ཞན་དུ་གཏོང་རྒྱུ་དེ་ཡིན་སྐོར་གྱི་གནས་ཚུལ་སྤེལ་འདུག

ད་ལྟའི་ཆར་ཨུ་རུ་སུ་ཕམ་ཉེས་སུ་གཏོང་འདོད་བྱེད་མཁན་དང་ཡུག་རེན་ལ་རྒྱབ་སྐྱོར་ཤུགས་ཆེན་བྱེད་མཁན་གྱི་ཤོག་ཁག་དག་གི་བསམ་བློ་ལ་ཡང་འགྱུར་བ་འགྲོ་བཞིན་ཡོད་འདུག

ཟླ་བ་སྔོན་མའི་ནང་དུ་ཨ་རི་དང་བྱང་ཆིངས་རྩ་འཛུགས་ཀྱི་མཐུན་ཕྱོགས་རྒྱལ་ཁབ་ཨེ་ཊ་ལི་ཡིས་ཡུན་རེན་གྱི་དམག་འཁྲུག་མཚམས་འཇོག་ཆེད་དུ་དོན་ཚན་བཞི་ཅན་གྱི་ཞི་བའི་གྲོས་འཆར་ཞིག་མཉམ་འབྲེལ་རྒྱལ་ཚོགས་ཀྱི་དྲུང་ཆེའི་Antonio Guterres ལག་ཏུ་ཕུལ་ཡོད་འདུག   དེ་བཞིན་འཇར་མན་ནི་ཡིས་ཀྱང་ད་ལྟའི་དམག་འཁྲུག་ལས་ཁ་ཕྱིར་བསྐོར་ནས་རྒྱ་ནག་གི་ཐོག་ལ་དོ་སྣང་བྱེད་འགོ་བཙུགས་ཡོད་པ་རེད།  དེ་སྔ་ཧྥ་རན་སིའི་སྲིད་འཛིན་གྱིས་ཀྱང་ཨུ་རུ་སུ་ཕམ་ཉེས་སུ་འགྲོ་རྒྱུ་ལ་ཡིད་ཆེས་བྱས་མོད་ཀྱང་། ད་ལྟའི་ཆར་ཁོང་གིས་ཨུ་རུ་སུ་ལ་དམའ་འབེབས་བྱེད་རྒྱུ་མཚམས་འཇོག་དགོས་པ་དང་། དེ་ལྟར་བྱུང་ན་དམག་མཚམས་བཞག་རྗེས་ཨུ་རུ་སུ་དང་ནུབ་ཕྱོགས་རྒྱལ་ཁབ་བར་དུ་ཕྱི་འབྲེལ་ཡར་རྒྱས་སུ་གཏོང་ཐུབ་རྒྱུའི་བཀའ་མོལ་གནང་བཞིན་ཡོད་འདུག

གཞན་ཡང་ཟླ་འདིའི་ཚེས་༣ ཉིན་WIONཞེས་པའི་གསར་ཁང་གིས་གནས་ཚུལ་སྤེལ་གསལ་ལྟར་ན། ཨུ་རུ་སུ་དང་ཡུག་རེན་གཉིས་ཀྱི་བར་དུ་དམག་འཁྲུག་ལངས་ནས་ཉིན་བརྒྱ་ཕྱིན་ཡོད་པ་དང་། ཉིན་དེ་དག་གི་རིང་ཨུ་རུ་སུས་ཡུག་རེན་གྱི་མངའ་ཁོངས་བརྒྱ་ཆ་༢༠% བདག་བཟུང་བྱས་ཡོད་རབས་དང་། ཨ་རི་ཡིས་ཨབ་གྷན་དུ་མི་ལོ་ཉི་ཤུ་རིང་དམག་བཏང་ཡོད་ཀྱང་། ཏ་ལི་བྷན་(Taliban) ཕམ་ཉེས་སུ་གཏོང་ཐུབ་མེད་པས། ཨུ་རུ་སུའི་ཉིན་བརྒྱ་རིང་གི་རྒྱལ་ཁ་དེ་ནི་ཆུང་ཆུང་ཞིག་མིན་རབས་དང་། དམག་འཁྲུག་གི་ཉིན་བརྒྱའི་ནང་དུ་ཡུག་རེན་གྱི་གྲོང་ཁྱེར་མར་རེའུ་པོལ་གཅིག་པུའི་ནང་དུ་ཡུག་རེན་གྱི་མི་སེར་ཁྲི་གཉིས་ལྷག་(༢༡,༠༠༠) འདས་གྲོངས་སུ་ཕྱིན་ཡོད་པ་དང་། དམག་མི་༦,༠༠༠ ལྷག་འདས་གྲོངས་སུ་ཕྱིན་ཡོད་པ། ཨུ་རུ་སུས་གཞུང་གིས་ད་བར་དམག་མི་༡,༣༠༠ འདས་གྲོངས་སུ་ཕྱིན་ཡོད་སྐོར་བཤད་ཀྱང་། ཡུག་རེན་གྱིས་ད་བར་ཨུ་རུ་སུའི་དམག་མི་༣༠༠༠༠ བསད་ཡོད་སྐོར་བཤད་ཀྱི་ཡོད་འདུག

འཛུགས་བསྐྲུན་གྱི་ཐོག་ལ་བཤད་ན། ཡུག་རེན་གྱི་སྡོད་གནས་ཁང་པ་༣༨,༠༠༠ ལྷག་དང་སློབ་གྲྭ་༡,༩༠༠ དང་སྨན་ཁང་༥༠༠ དང་བཟོ་གྲྭ་༥༠༠ ལྷག་ལ་གཏོར་སྐྱོན་ཤོར་ཡོད་པ་ཡུག་རེན་གྱིས་ཕྱིར་བསྒྲགས་བྱས་ཡོད་འདུག

ད་ལྟའི་ཆར་ཨུ་རུ་སུའི་སྲིད་འཛིན་གྱི་མདུན་དུ་བདམས་ཁ་གཉིས་ཡོད་པ་དང་། གཅིག་ནི་ཡུག་རེན་ལ་ཡོངས་ཁྱབ་ཀྱིས་ཐོག་ནས་དམག་འཁྲུག་བྱེད་རྒྱུ་དང་གཉིས་ནི་རང་ཉིད་ཀྱི་དབང་ཆ་བེད་སྤྱོད་བྱས་ནས་གྲོས་མོལ་བྱེད་རྒྱུ་ཡིན་ཡང་། ད་ལྟའི་ཆར་ཨུ་རུ་སུའི་མི་མང་ལ་ཡང་དཔལ་འབྱོར་སོགས་ཀྱི་དཀའ་ངལ་ཆེན་པོ་འཕྲད་བཞིན་ཡོད་པས། ཁོས་བདམས་ཁ་དང་པོ་དེ་འདེམས་རྒྱུ་ཧ་ལམ་མི་སྲིད་པ་ལྟ་བུ་འགྱུར་ཡོད་པའི་གནས་ཚུལ་སྤེལ་འདུག །

གསར་འགོད་པ་བློ་བཟང་རྒྱ་མཚོ།