ཡུག་རེན་ཤར་ཕྱོགས་ཀྱི་དམག་འཁྲུག་མཚམས་འཇོག་ལ་གྲོས་འཆམ་བྱུང་།

ཁ་སང་ཨུ་རུ་སུའི་སྲིད་འཛིན་པུ་ཌིན་དང་ཡུག་རེན་གྱི་སྲིད་འཛིན་ཕོར་ཧྲན་ཁོ་གཉིས་ཀྱིས་ཁ་པར་བརྒྱུད་ཡུག་རེན་གྱི་ཤར་ཕྱོགས་སུ་དམག་འཁྲུག་གཏན་དུ་མཚམས་འཇོག་བྱ་རྒྱུར་མོས་མཐུན་བྱུང་འདུག

རྒྱལ་སྤྱིའི་བརྒྱུད་ལམ་ཁག་ཏུ་ཟླ་འདིའི་ཕྱི་ཚེས་༢ ཉིན་སྤེལ་བའི་གནས་ཚུལ་ནང་། ཡུག་རེན་སྲིད་འཛིན་ལས་ཁུངས་ཀྱིས་ཕྱིར་བསྒྲགས་བྱས་པ་ལྟར་ན། ཕྱི་ཚེས་༢ ཉིན་སྲིད་འཛིན་ཕོར་ཧྲན་ཁོ་(Poroshenko) ཡིས་པུ་ཌིན་(Putin) དང་ལྷན་དུ་ཁ་པར་བརྒྱུད་གླེང་མོལ་བྱས་ཏེ། ཕྱོགས་གཉིས་ཀྱིས་ཡུག་རེན་གྱི་ཤར་ཕྱོགས་ཌོན་བྷ་སི་(Donbas) ས་ཁུལ་གྱི་དམག་འཁྲུག་གཏན་དུ་མཚམས་འཇོག་ལ་གྲོས་འཆམ་བྱུང་ཡོད་འདུག

དེའི་སྔོན་ཨུ་རུ་སུའི་སྲིད་འཛིན་པུ་ཌིན་གྱི་མགྲིན་ཚབ་པ་ཕེ་སི་ཁོབ་(Dmitry Peskov) ཀྱིས་བརྗོད་པ་ལྟར་ན། པུ་ཌིན་དང་ཡུག་རེན་གྱི་སྲིད་འཛིན་ཕོར་ཧྲན་ཁོ་གཉིས་ཀྱིས་ཡུག་རེན་ཤར་ཕྱོགས་ཀྱི་གནས་སྟངས་ཐད་ཞི་བའི་ཐག་གཅོད་བྱེད་ཐབས་ལ་གྲོས་བསྡུར་བྱས་ཡོད་པ་དང་། པུ་ཌིན་དང་ཕོར་ཧྲན་ཁོ་གཉིས་ཀར་གཅིག་མཚུངས་སུ་ཚད་ངེས་ཅན་ཞིག་གི་ཐོག་ནས་ཕྱོགས་གཉིས་ཀའི་ལྟ་ཚུལ་གཅིག་པ་ཡིན་པའི་ངེས་ཤེས་རྙེད་ཡོད་འདུག

འཐབ་འཁྲུག་བྱུང་བཞིན་པའི་ཡུག་རེན་ཤར་ཕྱོགས་ཀྱི་ཌོན་ནེ་ཚི་ཁི་(Donetsk) ཡི་ཨུ་རུ་སུའི་ཕྱོགས་གཏོགས་ཤོག་ཁག་གིས་ཀྱང་ཁེའེ་ཝི་(Kiev) (ཡུག་རེན)་སྲིད་གཞུང་དང་ཞི་བའི་ཆབ་སྲིད་ཐག་གཅོད་ལ་གྲ་སྒྲིག་བྱེད་བཞིན་ཡོད་ཀྱང་། ཁོང་ཚོས་བརྗོད་པ་ལྟར་ན། ཡུག་རེན་སྲིད་གཞུང་དང་དམག་འཁྲུག་མཚམས་འཇོག་བྱེད་པར་སྔོན་འགྲོའི་ཆ་རྐྱེན་ཡོད་པ་རེད།

དམག་འཁྲུག་མཚམས་འཇོག་གི་གནས་ཚུལ་ཕྱིར་བསྒྲགས་བྱས་པའི་རྗེས། ཨུ་རུ་སུའི་མ་རྐང་ཁྲོམ་ར་བརྒྱ་ཆ་3.0% ལ་ཡར་འཕར་ཡོད་པ་དང་། ཡུག་རེན་གྱི་མ་རྐང་ཁྲོམ་ར་ཡང་བརྒྱ་ཆ་1.9% ལ་འཕར་ཡོད་འདུག

པུ་ཌིན་དང་ཕོར་ཧྲན་ཁོ་གཉིས་ཀྱིས་ཕྱི་ཟླ་༨ པའི་ཚེས་༢༦ ཉིན་གྱི་དགོང་མོར། བྷེ་ལར་རུ་སི་(Belarus) ཡི་རྒྱལ་ས་མན་སི་ཁི་(Minsk) རུ་ཕྱོགས་གཉིས་བར་གྲོས་མོལ་བྱས་ཡོད་ཀྱང་། ཕྱོགས་གཉིས་ཀས་ཡུག་རེན་ཤར་ཕྱོགས་ཀྱི་འཐབ་འཁྲུག་ལ་ཐོལ་བརྒལ་རང་བཞིན་གྱི་ཐབས་ལམ་ཞིག་སྐབས་དེར་རྙེད་མེད་པ་རེད།།