རཱ་ཤི་ཡའི་སྲིད་འཛིན་གྱིས་ཁོ་རང་པེ་ཅིང་ཨོ་ལིམ་ཕིག་རྩེད་འགྲན་ལ་བཅར་རྒྱུའི་ཁས་ལེན་བྱས་འདུག
ཨ་རིས་སྣེ་ཁྲིད་པའི་མང་གཙོའི་རྒྱལ་ཁབ་རྣམས་ཀྱིས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་དང་། མི་རིགས་རྩ་མེད་ཀྱི་སྲིད་བྱུས་ལ་ངོ་རྒོལ་བྱེད་པའི་ཆེད་དུ་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་གཞུང་འབྲེལ་ཐོག་ནས་བཀག་སྡོམ་(Diplomatic boycott) བྱེད་བཞིན་པའི་སྐབས་འདིར། རཱ་ཤི་ཡའི་སྲིད་འཛིན་ཕུའུ་ཊིན་གྱིས་ཁོ་རང་རྒྱལ་སྤྱིའི་རྩེད་འགྲན་ཆེན་མོ་དེའི་མཛད་སྒོར་བཅར་རྒྱུ་ཡིན་པའི་ཁས་ལེན་བྱས་ཡོད་འདུག
ཨ་རིས་སྣེ་ཁྲིད་པའི་མང་གཙོའི་རྒྱལ་ཁབ་རྣམས་ཀྱིས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་དང་། མི་རིགས་རྩ་མེད་ཀྱི་སྲིད་བྱུས་ལ་ངོ་རྒོལ་བྱེད་པའི་ཆེད་དུ་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་གཞུང་འབྲེལ་ཐོག་ནས་བཀག་སྡོམ་(Diplomatic boycott) བྱེད་བཞིན་པའི་སྐབས་འདིར། རཱ་ཤི་ཡའི་སྲིད་འཛིན་ཕུའུ་ཊིན་གྱིས་ཁོ་རང་རྒྱལ་སྤྱིའི་རྩེད་འགྲན་ཆེན་མོ་དེའི་མཛད་སྒོར་བཅར་རྒྱུ་ཡིན་པའི་ཁས་ལེན་བྱས་ཡོད་འདུག
ཟླ་འདིའི་ཚེས་༡༦ ཉིན་རྒྱ་ནག་གི་འགོ་ཁྲིད་ཞི་ཅིན་ཕིང་དང་། རཱ་ཤི་ཡའི་སྲིད་འཛིན་ཕུའུ་ཊིན་གཉིས་ཀྱི་བར་དུ་དྲ་ཐོག་གི་གྲོས་མོལ་ཞིག་བྱས་འདུག་ཅིང་། དེའི་སྟེང་ལ་སྲིད་འཛིན་ཕུའུ་ཊིན་གྱིས་ཞི་ཅིན་ཕིང་ལ་ཁོ་རང་ལོ་རྗེས་མའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོར་བཅར་རྒྱུ་ཡིན་ཚུལ་བརྗོད་འདུག་པས། ཁོ་རང་པེ་ཅིང་གི་རྩེད་འགྲན་ཆེན་མོ་དེར་བཅར་རྒྱུའི་ཁས་ལེན་བྱེད་མཁན་གྱི་སྟོབས་ཆེན་རྒྱལ་ཁབ་ཀྱི་འགོ་ཁྲིད་ཐོག་མ་དེ་ཆགས་ཡོད་འདུག
གྲངས་ཉུང་མི་རིགས་རྣམས་རྩ་མེད་གཏོང་བའི་སྲིད་བྱུས་དང་། འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བ། ཧོང་ཀོང་གི་རང་སྲིད་རང་སྐྱོང་དང་“རྒྱལ་ཁབ་གཅིག་ལ་ལམ་ལུགས་གཉིས་”ཀྱི་སྲིད་བྱུས་རྩིས་མེད་བཏང་བ། ཐའེ་ཝན་ལ་དྲག་རྒོལ་བྱེད་རྒྱུའི་འཇིགས་སྐུལ་ལ་སོགས་པའི་རྒྱ་ནག་གི་བཙན་ཤེད་ཀྱི་བྱ་སྤྱོད་མང་པོ་ཞིག་ད་ལྟ་སྔར་སྲོལ་ལྟར་འཛམ་གླིང་གིས་སྣང་མེད་གཏོང་ཐབས་བྲལ་བའི་ཚད་དུ་ཐོན་ཡོད་པས། ཨ་རིས་སྣེ་ཁྲིད་པའི་མང་གཙོའི་རྒྱལ་ཁབ་རྣམས་ཀྱིས་དངོས་སུ་རྒྱ་ནག་ཁ་གཏད་གཅོག་པའི་སྲིད་བྱུས་འཐེན་འགོ་བརྩམས་ནས། ནུབ་ཕྱོགས་ཀྱི་རྒྱལ་ཁབ་མང་པོ་ཞིག་གིས་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་གཞུང་འབྲེལ་ཐོག་ནས་བཀག་སྡོམ་བྱས་ཟིན་འདུག
ཡིན་ན་ཡང་། རྒྱ་ནག་དང་མང་གཙོའི་འཛམ་གླིང་གི་འགལ་ཟླ་ཇེ་ཆེར་འགྱུར་བ་དང་ལྷན་དུ་རྒྱ་ནག་དང་རཱ་ཤི་ཡའི་འབྲེལ་ལམ་བཟང་དུ་འགྲོ་བཞིན་པའི་རྣམ་པ་ཡོད་ལ། མ་མཐར་ཡང་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོར་རྒྱབ་སྐྱོར་བྱེད་མཁན་གྱི་སྟོབས་ཆེན་རྒྱལ་ཁབ་ཐོག་མ་དེ་རཱ་ཤི་ཡ་ཆགས་ཡོད།
རྒྱ་ནག་གི་གཞུང་འབྲེལ་གསར་ཁང་གོ་ལའི་དུས་བབ་ཀྱིས་སྤེལ་བའི་གནས་ཚུལ་ལྟར་ན། རཱ་ཤི་ཡའི་སྲིད་འཛིན་ཕུའུ་ཊིན་གྱིས་“རྒྱལ་སྤྱིའི་རྩེད་འགྲན་ཆེན་མོ་ལ་ཐུག་དུས། ང་ཚོས་རྟག་ཏུ་ཕན་ཚུན་རྒྱབ་སྐྱོར་བྱེད་རེས་བྱེད་ཀྱི་ཡོད་ལ། དེའི་ནང་དུ་[མང་གཙོའི་རྒྱལ་ཁབ་ཁག་གིས་]ཨོ་ལིམ་ཕིག་རྩེད་འགྲན་ཆེན་མོ་ཆབ་སྲིད་ཀྱི་ངོ་བོར་སྒྱུར་བར་འབད་བརྩོན་བྱེད་བཞིན་པར་གདོང་ལེན་དང་ཁ་གཏད་གཅོག་རྒྱུའང་འདུས་ཡོད་”ཅེས་བརྗོད་དེ་རྒྱ་ནག་ལ་རྒྱབ་སྐྱོར་གྱི་རྣམ་པ་ཤུགས་ཆེན་བསྟན་ཡོད་འདུག
༢༠༢༢ ལོའི་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོ་དེ་ལོ་རྗེས་མའི་ཕྱི་ཟླ་༢ པའི་འགོ་སྟོད་དུ་རྒྱ་ནག་གི་རྒྱལ་ས་པེ་ཅིང་དུ་འཚོགས་གཏན་འཁེལ་ཡོད་ཅིང་། དེ་ནི་༢༠༠༨ ལོའི་དབྱར་ཁའི་ཨོ་ལིམ་ཕིག་རྩེད་འགྲན་ཆེན་མོའི་རྗེས་སུ་རྒྱ་ནག་ཏུ་འཚོགས་གཏན་འཁེལ་བའི་རྒྱལ་སྤྱིའི་རྩེད་མོའི་འགྲན་སྡུར་ཆེ་ཤོས་དེ་ཆགས་ཀྱི་ཡོད་འདུག
ཡིན་ན་ཡང་། ཨ་རིས་སྣེ་ཁྲིད་པའི་མང་གཙོའི་སྟོབས་ཆེན་རྒྱལ་ཁབ་མང་པོ་ཞིག་གིས་རྩེད་འགྲན་དེ་བཀག་སྡོམ་བྱས་ཟིན་པས། རྒྱལ་སྤྱིའི་རྩེད་མོའི་འགྲན་བསྡུར་ཆེན་པོ་དེ་རྒྱ་ནག་གི་སྟོབས་ཤུགས་དང་གཟི་བརྗིད་ངོམ་སའི་གར་སྟེགས་ཤིག་གི་ཚབ་ཏུ་རྒྱ་ནག་གི་སྐྱོན་ཆ་གླེང་མོལ་དང་ཐེར་འདོན་བྱེད་སའི་སྡིངས་ཆ་ཞིག་ཏུ་འགྱུར་བཞིན་ཡོད་འདུག །
གསར་འགོད་པ་དཀོན་མཆོག་རབ་བརྟན།
