རེ་བ་བཟང་ས་ནས་བརྒྱབ་མེད།

(བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས་༡༠༡༧ ཆེད་བརྗོད།)

རྒྱ་དམར་དྲག་པོའི་གཞུང་གིས་བོད་ཡོངས་རྫོགས་ཧམ་བཟུང་བྱས་ཏེ་མི་ལོ་ཧྲིལ་པོ་༦༥ ལྷག་སོང་ཟིན་པ་དང་། བོད་དོན་འཐབ་རྩོད་ཀྱི་གནས་བབས་ཐོག་ནས་བཤད་ནའང་། བོད་རང་དབང་རང་བཙན་སླར་གསོ་དང་འབྲེལ་བའི་གོ་སྐབས་མང་པོ་ཡོད་པ་བཞིན། བཙན་བྱོལ་བོད་པའི་ངོས་ནས་འབད་བརྩོན་དང་སེམས་ཤུགས་གང་ཡང་མེད་པས། བོད་དོན་འཐབ་རྩོད་ནི་ཨ་རི་སོགས་སྟོབས་ཆེན་རྒྱལ་ཁབ་ཁག་གི་སེམས་ནང་དུ་གནས་སྐབས་འཁྲབ་སྟོན་བྱེད་པའི་འབག་མགོ་ཙམ་ལས་གསོན་ཤུགས་དང་ལྡན་པ་ཞིག་ཏུ་བརྩིས་མེད། ད་ལྟ་འཛམ་གླིང་སྟོབས་ཆེན་རྒྱལ་ཁབ་མང་དག་ཅིག་གིས་རྒྱ་ནག་ལ་གནོན་ཤུགས་ཆེན་པོ་སྤྲོད་རྒྱུའི་གྲ་སྒྲིག་བྱེད་བཞིན་པའི་སྐབས་འདིར། བོད་དོན་དང་འབྲེལ་བའི་ཐོག་ནས་གནོན་ཤུགས་ཆེན་པོ་སྤྲོད་པའི་ཁོར་ཡུག་ཕལ་ཆེར་མེད་པ་ལྟ་བུར་གྱུར་ཡོད། བོད་པའི་ངོས་ནས་རྒྱ་དམར་གཞུང་ལ་ཁ་གཏད་གདོང་ལེན་གྱི་སེམས་ཤུགས་དང་གྲ་སྒྲིག་ཡོད་ན། དེ་མཚུངས་བཞིན་རྒྱབ་སྐྱོར་བྱེད་ངེས་ཀྱང་བཙན་བྱོལ་བོད་གཞུང་ལ་རེ་བ་གྲ་སྒྲིག་གང་ཡང་མེད།

ཐའེ་ཝན་ལ་རྒྱ་དམར་གཞུང་གིས་གནོན་ཤུགས་དང་འཇིགས་སྐུལ་ཆེན་པོ་བྱེད་བཞིན་པའི་གནས་སྟངས་ལ་བརྟེན། འདས་པའི་ལོ་ཤས་རིང་ཨ་རིའི་སྲིད་གཞུང་གིས་རྒྱ་ནག་ལ་ཁ་གཏད་གདོང་ལེན་མང་པོ་བྱས་ཡོད་པ་དང་། ཉེ་ཆར་ཨ་རིའི་སྲིད་གཞུང་གིས་ཐའེ་ཝན་འགོག་སྲུང་ཆེད་ཨ་སྒོར་ས་ཡ་༥༦༧ སྤྲོད་རྒྱུ་ཡིན་འདུག་པ་དང་། ཤར་ཏུར་ཀི་སི་ཐན་གྱི་གནད་དོན་དང་འབྲེལ་ནས་ཨ་རིའི་སྲིད་དོན་ཚོགས་པ་ཐུན་མོང་ནས་རྒྱ་ནག་དམར་ཤོག་ཚོགས་པ་འགོག་ཐབས་ཀྱི་ཁྲིམས་འཆར་ཞེས་པ་གཏན་འབེབས་བྱས་ཡོད་ཅིང་། དེ་ནི་ཡོང་ལ་ཉེ་བའི་ཨ་རིའི་སྲིད་འཛིན་དང་གྲོས་ཚོགས་ཀྱི་འོས་བསྡུ་ལ་ཤུགས་རྐྱེན་ཡོད་པའི་ཁ་ཕྱོགས་ཤིག་ཏུ་བརྩི་བཞིན་ཡོད་འདུག ཨ་རིའི་སྲིད་གཞུང་དང་གྲོས་ཚོགས་ནས་བོད་དོན་ལ་རྒྱབ་སྐྱོར་མེད་པ་མིན་ཡང་། བཙན་བྱོལ་བོད་གཞུང་གི་ངོས་ནས་རྒྱ་དམར་གཞུང་གི་འོག་ཏུ་སྡོད་རྒྱུའི་འབོད་སྒྲ་དུས་ཡུན་རིང་པོ་ཞིག་ནས་མཚམས་ཆད་མྱོང་མེད་པས། ཆབ་སྲིད་ཀྱི་ཐོག་ནས་བོད་དོན་འཐབ་རྩོད་དེ་ཨ་རི་སོགས་ལ་བེད་སྤྱོད་དང་ཁེ་ཕན་གང་ཡང་མེད། 

ཨ་རི་དང་རྒྱ་གར་སོགས་སྟོབས་ཆེན་རྒྱལ་ཁབ་ཁག་གིས་བོད་དོན་ལ་རྒྱབ་སྐྱོར་ཡོད་ཀྱང་། གལ་སྲིད་དེ་རྒྱལ་ཁབ་སོ་སོའི་ཁེ་ཕན་དང་འགལ་ཟླ་ཆགས་ན་བོད་དོན་བློས་གཏོང་བྱ་རྒྱུར་ཐེ་ཚོམ་གང་ཡང་མེད། བོད་དོན་རྒྱབ་སྐྱོར་དེ་རྒྱལ་ཁབ་སོ་སོའི་ཁེ་ཕན་དང་འབྲེལ་བ་ཡོད་ན་རྒྱབ་སྐྱོར་མང་དུ་འགྲོ་རྒྱུ་ནི་ཆབ་སྲིད་ཀྱི་རང་བཞིན་ཡིན་པ་ལས། ལན་དང་རྣམ་སྨིན་ལ་རེ་བ་མེད་པའི་ཐེག་ཆེན་བྱང་ཆུབ་ཀྱི་སེམས་ལྟ་བུ་ཞིག་རྒྱལ་ཁབ་སུ་གང་གི་ཆབ་སྲིད་ཀྱི་ལམ་ལུགས་ནང་མེད། བོད་པས་ཀྱང་བོད་དོན་འཐབ་རྩོད་བྱེད་པའི་ཐབས་ལམ་ནང་། རྒྱལ་ཁབ་སོ་སོའི་ཁེ་ཕན་དང་འབྲེལ་ནས་གོ་སྐབས་ལེན་མ་ཐུབ་ན་ནུས་པ་གང་ཡང་མེད། འདས་པའི་མི་ལོ་༢༠ ལྷག་གི་སྔོན་ཨ་རི་དང་ཡུ་རོབ་སོགས་ཀྱིས་རྒྱ་ནག་དང་བཟང་འབྲེལ་གྱི་ཐོག་ནས་ཁེ་ཕན་ལེན་འཆར་བྱེད་སྐབས་བོད་རྒྱ་ནག་གི་ཆ་ཤས་སུ་སྡོད་རྒྱུར་རྒྱབ་སྐྱོར་བྱེད་སྲིད་ཀྱང་། ད་ལྟ་རྒྱ་ནག་ལ་ཁ་གཏད་གདོང་ལེན་བྱེད་བཞིན་པའི་སྐབས་འདིར་བོད་རང་བཙན་སླར་གསོའི་ལངས་ཕྱོགས་ལ་རྒྱབ་སྐྱོར་མི་བྱེད་ཀ་མེད་རེད།

ཨ་རི་དང་རྒྱ་གར་སོགས་ཀྱིས་བོད་དོན་རྒྱབ་སྐྱོར་བྱེད་པ་དང་། ལྷག་པར་དུ་ཨ་རིའི་གཞུང་གིས་བོད་དོན་དང་འབྲེལ་བའི་ཁྲིམས་ཡིག་གཏན་འབེབས་བྱས་པ་ཁག་ཏུ་གསལ་བའི་འཐབ་རྩོད་དང་འབྲེལ་བའི་གནད་དོན་ཁག་ལ་བོད་མིའི་སྒྲིག་འཛུགས་ཀྱིས་དེ་ཙམ་དོ་སྣང་དང་ལག་བསྟར་ཡོང་ཐབས་མི་བྱེད་པར། བཙན་བྱོལ་བོད་མིའི་འཚོ་ཐབས་དང་འཛིན་སྐྱོང་གཙོ་བོར་གྱུར་པའི་རོགས་རམ་ཁག་མུ་མཐུད་རག་ཐབས་དང་། མང་དུ་གཏོང་ཐབས་བྱ་རྒྱུ་ཁོ་ནར་འབད་བརྩོན་བྱས་ནས་བསྡད་ན་དོན་དམ་པའི་ཁེ་ཕན་གང་ཡང་རག་གི་མེད། སྙན་གྲགས་ཤིན་ཏུ་ཆེ་བའི་༧གོང་ས་གི་གདམས་ངག་ཁྱད་པར་ཅན་“རེ་བ་བཟང་ས་ནས་རྒྱོབས། གྲ་སྒྲིག་སྡུག་ས་ནས་གྱིས་”ཞེས་གསུངས་པ་དེ་བཙན་བྱོལ་བོད་པའི་སྤྱི་ཚོགས་ནས་ལག་ལེན་མགོ་མཇུག་ལྡོག་ནས་བྱེད་བཞིན་ཡོད། རྒྱ་དམར་གཞུང་གི་བཙན་བཟུང་ལས་ཡོངས་སུ་ཐར་རྒྱུའི་རེ་བ་བཟང་ས་ནས་བརྒྱབ་མེད་ལ། གནས་སྐབས་མ་བྱུང་ཡང་འཐབ་རྩོད་རྒྱུན་རིང་གནས་ཐུབ་པའི་འཐུས་སྒོ་ཚང་བའི་གྲ་སྒྲིག་སྡུག་ས་ནས་ཀྱང་བྱེད་ཐུབ་མེད།

མདོར་ན་འཐབ་རྩོད་ཀྱི་གོ་སྐབས་བོད་པ་རང་ཉིད་ཀྱིས་འཚོལ་དགོས་པ་ལས། བོད་པ་ལ་མི་དགོས་པའི་གོ་སྐབས་ཤིག་གཞན་གྱིས་སྤྲོད་མི་སྲིད་ལ། བོད་པའི་བསམ་བློའི་ནང་གྲ་སྒྲིག་གང་ཡང་མེད་ན་རྙེད་དཀའ་བའི་གོ་སྐབས་བཟང་པོ་ཞིག་མདུན་དུ་སླེབས་ཀྱང་དམ་འཛིན་བྱེད་མི་ཐུབ། ཤར་ཏུར་ཀི་སི་ཐན་དང་བསྡུར་ནས་བཙན་བྱོལ་བོད་པའི་སྒྲིག་འཛུགས་ཆེ་བ་དང་བརྟན་པ་ཡོད་ཅིང་། ཤར་ཏུར་ཀི་སི་ཐན་དང་བོད་གཉིས་རྒྱ་གཞུང་གི་དམ་དྲག་འོག་ཡོད་པའི་ཛ་དྲག་གནས་སྟངས་གཅིག་པ་ཡིན་ཡང་། བཙན་བྱོལ་དུ་ཡོད་པ་དག་གི་འཐབ་རྩོད་ཀྱི་བསམ་བློ་དང་འཆར་གཞིའི་ཐོག་ནས་ད་ལྟའི་ཆར་བོད་དོན་ལས་ཤར་ཏུར་ཀི་སི་ཐན་ལ་རང་བཞིན་གྱིས་རྒྱབ་སྐྱོར་ལྡབ་འགྱུར་གྱིས་མང་བ་ཡོད། བོད་པའི་ཁ་རྒྱུན་དུ་“འཆི་རན་ཡང་གསོན་གྱི་རེ་བཞག་”དང་། “རྒྱུ་མེད་ཀྱང་ཕྱུག་པོའི་འདུག་ཚུལ་”ཞེས་པ་བཞིན་སེམས་གཏིང་ནས་རེ་བ་ནམ་ཡང་བརླག་རྒྱུ་མེད། འདས་པའི་མི་ལོ་༢༠ ལྷག་གི་རིང་བཙན་བྱོལ་བོད་མིའི་འཐབ་རྩོད་ཀྱི་བསམ་བློ་ཉམས་ཆག་ཏུ་གྱུར་པ་དེ་སླར་གསོ་བྱ་རྒྱུ་ནི་གལ་ཆེ་ཤོས་སུ་མཐོང།།