རྐང་སྤོལ་རྩེད་མོ་བ་གྲགས་ཅན་ཞིག་གིས་རྒྱ་ནག་ལ་སྐྱོན་བརྗོད་བྱས་འདུག 

རྒྱལ་སྤྱིའི་ནང་རྐང་སྤོལ་རྩེད་མོ་བ་གྲགས་ཅན་ཨོ་ཛིལ་གྱིས། རྒྱ་ནག་གིས་ཡུ་གུར་ནང་དུ་ཁ་ཆེ་མི་རིགས་ལ་དྲག་གནོན་དང་དམར་གསོད་གཏོང་གི་ཡོད་ཀྱང་། ཁ་ཆེ་གཞན་ཚོས་གང་ཡང་བྱེད་ཀྱི་མེད་སྐོར་བརྗོད་པར་བརྟེན། རྒྱ་ནག་གིས་ཕར་རྒོལ་ཆེད་དུ་ཁོང་ཡོད་པའི་རྩེད་འགྲན་ཞིག་བརྙན་འཕྲིན་ནང་བཀག་འགོག་བྱས་འདུག 

ཟླ་༡༢ པའི་ཚེས་༡༣ ཉིན་དབྱིན་ཡུལ་གྱི་རྐང་སྤོལ་རུ་ཁག་ཨར་སི་ནལ་(Arsenal) གྱི་རྩེད་མོ་བ་གྲགས་ཅན་མཱི་སུཌ་ཨོ་ཛིལ་(Mesuit Ozil) གྱིས། སྤྱི་ཚོགས་དྲ་ལམ་ཊེའུ་ཊར་དང་དབྱིན་སེཌ་གྷེ་རམ་ཐོག་ཏུ། ཤར་ཏུར་ཀི་སི་ཐན་གྱི་རྒྱལ་དར་རྒྱབ་ལྗོངས་སུ་བཞག་ནས། ཁུལ་དེར་རྒྱ་ནག་གཞུང་གིས་ཁ་ཆེའི་དཔེ་ཆ་མེར་སྲེག་གཏོང་བ་དང་། ལྷ་ཁང་སྒོ་རྒྱག་པ། ཁ་ཆེའི་ཤེས་ཡོན་བསྟི་གནས་ཁང་རྣམས་བཀག་སྡོམ། ཆོས་ལུགས་ཤེས་ཡོན་པ་གཅིག་རྗེས་གཉིས་མཐུད་ཀྱིས་གསོད་བཞིན་པ་དང་། སྤུན་ཟླ་བུ་རྣམས་བཀག་ཉར་ཁང་དུ་བཙན་དབང་ཐོག་བཅུག་པ་དང་། ནང་དུ་ཁོ་ཚོའི་ཚབ་ཏུ་རྒྱ་རིགས་སྡོད་དུ་འཇུག་གི་ཡོད་པ། སྤུན་ཟླ་བུ་མོ་རྣམས་བཙན་དབང་ཐོག་ནས་རྒྱ་རིགས་དང་ཆང་ས་རྒྱག་འཇུག་གི་ཡོད་པ་དང་། ཡུ་གུར་དུ་ཡོད་པའི་ཁ་ཆེ་མི་རིགས་ཀྱི་དཀའ་སྡུག་སྐོར་ནུབ་ཕྱོགས་རྒྱལ་ཁབ་ཁག་གི་གསར་འགྱུར་བརྒྱུད་ལམ་ཁག་ཏུ་ཐོན་བཞིན་ཡོད་ཀྱང་། ཁ་ཆེའི་རྒྱལ་ཁབ་ཁག་དང་དེ་དག་གི་བརྒྱུད་ལམ་ཁག་གིས་གང་ཡང་བྱེད་ཀྱི་མེད་སྐོར་བྲིས་ཡོད་འདུག ཁོང་གི་ཊེའུ་ཊར་ཁ་བྱང་ལ་རྗེས་འཇུག་པ་ས་ཡ་༢༤.༥ ཡོད་པ་དང་། དབྱིན་སེཌ་གྷེ་རམ་ལ་རྗེས་འཇུག་པ་ས་ཡ་༢༡.༡ ཡོད་པས། ཁོང་གི་སྐད་ཆ་དེ་ཁྱབ་ཆེན་པོ་སོང་ཡོད་པ་རེད། 

ཁོང་གི་མི་རྒྱུད་ནི་ཏུར་ཀི་ཁ་ཆེ་མི་རིགས་ཡིན་པ་དང་། འཇར་མན་དུ་སྐྱེས་ནས་རྒྱལ་ཁབ་དེའི་རྐང་སྤོལ་རུ་ཁག་གི་རྩེད་མོ་བ་གྲགས་ཤོས་གྲས་ཡིན་ཁར། ཕྱི་ལོ་༢༠༡༤ ལོའི་འཛམ་གླིང་རྐང་སྤོལ་འགྲན་སྡུར་གྱི་མཐའ་མའི་རྒྱལ་ཁ་ཡང་བླངས་ཡོད་པ་རེད། འོན་ཀྱང་ཕྱི་ལོ་༢༠༡༨ ལོའི་འཛམ་གླིང་རྐང་སྤོལ་འགྲན་སྡུར་སྐབས་སུ་འཇར་མན་རུ་ཁག་ལ་ཕམ་ཁ་བྱུང་ནས། རྩེད་འགྲན་རིམ་པ་གཉིས་པར་འགྲོ་ཐུབ་མེད་པ་དང་། རྗེས་སུ་ཁོང་གིས་མི་རིགས་དབྱེ་འབྱེད་ལ་བརྟེན་ནས་འཇར་མན་རྒྱལ་ཁབ་ཀྱི་རུ་ཁག་ནས་དགོངས་པ་ཞུ་རྒྱུའི་གསལ་བསྒྲགས་བྱས་ཡོད་པ་རེད། 

ཁོང་གིས་སྤྱི་ཚོགས་དྲ་ལམ་ཏུ་རྒྱ་ནག་ལ་སྐྱོན་བརྗོད་མ་བྱས་པའི་སྔོན་ལ། རྒྱ་ནག་དབུས་བརྙན་འཕྲིན་ཁང་(CCTV) གིས་ཟླ་༡༢ པའི་ཚེས་༡༦ གི་སྔ་དྲོའི་ཆུ་ཚོད་༡༢:༣༠ ལ། ཁོང་རྐང་སྤེལ་རྩེད་བཞིན་པའི་རུ་ཁག་དེ་དང་རུ་ཁག་གཞན་ཞིག་གི་རྩེད་འགྲན་དེ། བརྙན་འཕྲིན་ཁང་དེའི་རྩེད་མོའི་བརྒྱུད་ལམ་ཐོག་ཏུ་ཐད་གཏོང་བྱེད་རྒྱུའི་ལས་རིམ་ཡོད་འདུག་ཀྱང་། དུས་ཚོད་དེར་རྩེད་འགྲན་གཞན་ཞིག་བསྟན་ཡོད་འདུག་པ་དང་། དེ་ལྟར་བྱེད་དགོས་པའི་གསལ་བཤད་གང་ཡང་བྱས་མེད་འདུག དེ་བཞིན་རྒྱ་ནག་ནང་རྩེད་འགྲན་རིགས་ཐད་གཏོང་བྱེད་མཁན་དྲ་ལམ་ཁག་ཅིག་གིས་ཀྱང་རྩེད་འགྲན་དེ་བསྟན་རྒྱུ་ཕྱིར་འཐེན་བྱས་འདུག དེ་ཡང་ཐད་གཏོང་དྲ་ལམ་གཅིག་གིས། ཨོ་ཛིལ་གྱི་སྐད་ཆས་རྒྱ་ནག་ནང་ཁོང་ལ་དགའ་པོ་བྱེད་མཁན་ཚོའི་སེམས་ཕམ་དུ་བཅུག་ཡོད་པ་དང་། སྐད་གྲགས་ཆེ་བའི་རྩེད་མོ་བ་ཞིག་ཡིན་རྐྱེན། རྒྱལ་ཁབ་ཀྱི་ཁེ་དབང་ལ་འབྲེལ་བའི་གནད་དོན་ལ་བསམ་ཚུལ་བརྗོད་རྒྱུའི་ཐོབ་ཐང་མེད། གནད་དོན་དེའི་ཐོག་ཁོང་གིས་གསལ་བཤད་བྱེད་དགོས་སྐོར་བརྗོད་འདུག དེ་བཞིན་དྲ་ལམ་གཞན་ཞིག་གིས་སྨྲ་བརྗོད་རང་དབང་ལ་ས་མཚམས་ཡོད་པ་དང་། དེ་རྒྱལ་ཁབ་གཞན་གྱི་བདག་དབང་ལ་གུས་བརྩི་བྱེད་པའི་ཐོག་ནས་བེད་སྤྱོད་བྱེད་དགོས་པ་ལས། རྒྱལ་ནང་གི་གནད་དོན་ལ་ཐེ་བྱུས་བྱེད་ཆེད་དུ་བེད་སྤྱོད་བྱེད་མི་རུང་སྐོར་བརྗོད་འདུག 

གནད་དོན་དེ་དང་འབྲེལ་ནས་ཟླ་༡༢ པའི་ཚེས་༡༥ ཉིན་ཨོ་ཛེལ་གྱི་རྐང་སྤོལ་རུ་ཁག་གི་འཛིན་སྐྱོང་ནས་བསྒྲགས་གཏམ་ཞིག་སྤེལ་ནས། རུ་ཁག་དུས་རྟག་ཏུ་ཆབ་སྲིད་ནང་མཉམ་ཞུགས་མི་བྱེད་མཁན་ཞིག་ཡིན་པ་དང་། རྩེད་མོ་བ་ཁོང་གིས་ག་རེ་བརྗོད་པ་དེ་སྒེར་གྱི་བསམ་ཚུལ་ཡིན་སྐོར་བརྗོད་འདུག དེ་བཞིན་རྒྱ་ནག་གི་རྐང་སྤོལ་ལྷན་ཚོགས་ཀྱི་མཐོ་རིམ་ལས་བྱེད་གཅིག་གིས། ཤར་ཏུ་ཀི་སི་ཐན་དེ་ནི་རྒྱལ་ཞེན་དང་ཆོས་ལུགས་ཀྱི་གནད་དོན་ཞིག་མིན་པར། ཁ་བྲལ་རིང་ལུགས་དང་འཇིགས་སྐུལ་རིང་ལུགས། ལྟ་བ་མཁྲེགས་འཛིན་རིང་ལུགས་ཀྱི་གནད་དོན་ཡིན་པས། གནད་དོན་དེ་རིགས་ལ་ཞི་བདེར་དགའ་ཞེན་བྱེད་མཁན་འཛམ་གླིང་མི་མང་གིས་རྒྱབ་སྐྱོར་བྱེད་ཀྱི་མེད་པས། ཨོ་ཛིལ་གྱི་སྐད་ཆས་རྒྱ་ནག་ནང་ཁོང་ལ་དགའ་པོ་བྱེད་མཁན་ཙམ་མིན་པར། རྒྱ་རིགས་མི་མང་གི་སེམས་ལ་ཕོག་ཐུག་བཏང་ཡོད་པས་དེ་ནི་ངོས་ལེན་བྱེད་ཐབས་བྲལ་བ་ཡིན་སྐོར་བརྗོད་འདུག 

རྒྱ་ནག་ནང་དུ་དྲ་ལམ་ཁག་ཏུ་རྐང་སྤོལ་ལ་དགའ་མཁན་ཁག་ཅིག་གིས། རྐང་སྤོལ་རྩེད་མོ་བ་ཁོང་གི་མིང་ཡོད་སྟོད་ཐུང་མེ་བརྒྱབ་པའི་བརྙན་ཐུང་ནང་འཇུག་བྱས་ཡོད་ཁར། རུ་ཁག་ནས་ཁོང་ཕྱིར་འབུད་གཏོང་དགོས་སྐོར་ཡང་བརྗོད་ཡོད་ཁར། རྒྱ་ནག་གཞུང་འབྲེལ་བརྒྱུད་ལམ་ཁག་གིས་རྐང་སྤོལ་རུ་ཁག་ལ་མཇུག་འབྲས་ཡག་པོ་ཡོང་རྒྱུ་མིན་པའི་ཉེན་བརྡ་ཡང་བཏང་ཡོད་འདུག རྒྱལ་སྤྱིའི་ནང་རྒྱ་ནག་གི་ཁྲོམ་རའི་སྟོབས་ཤུགས་ལ་བརྟེན་ནས། རྒྱ་ནག་ལ་སྐྱོན་བརྗོད་བྱེད་མཁན་རྩེད་མོ་བ་དང་གཞས་གཏོང་མཁན། ལྟད་མོ་བ། ཚོང་པ་སོགས་ལ་བཀག་འགོག་བྱེད་པ་དང་ཉེན་བརྡ་གཏོང་རྐྱང་བྱེད་ཀྱི་ཡོད་པ་རེད་ལ། མང་པོ་ཞིག་གིས་རྒྱ་ནག་ལ་དགོངས་སེལ་ཞུ་དགོས་ཁེལ་གྱི་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།