རྒྱ་གཞུང་གིས་བཙུགས་པའི་ཁྲིམས་འགལ་ལས་བྱེད་རུ་ཁག་གིས་ཉེན་རྟོག་པ་ཡིན་ཁུལ་གྱིས་དྲྭ་ཐོག་ནས་དངུལ་རྐུ་འཕྲོག་བྱེད་ཀྱི་ཡོད་འདུག
ནུབ་ཕྱོགས་རྒྱལ་ཁབ་ཁག་ནང་གི་གནས་སྡོད་རྒྱ་མི་རྣམས་ལ་དྲྭ་ཐོག་ནས་རྒྱ་ནག་ནང་ཡོད་པའི་ཉེན་རྟོག་པ་ཡིན་ཁུལ་བྱས་ནས་འཇིགས་སྐུལ་བྱེད་ཀྱི་ཡོད་འདུག་པ་དང་། ཉེན་རྟོག་པ་ལ་སྒོར་མོ་མ་སྤྲད་ཚེ་རྒྱ་ནག་ནང་ཡོད་པའི་ཁྱིམ་མི་རྣམས་བཙོན་འཇུག་དང་ཉེས་ཆད་གཅོད་རྒྱུའི་འཇིགས་སྐུལ་བྱས་ནས་དངུལ་འཕྲོག་བཅོམ་བྱེད་ཀྱི་ཡོད་འདུག
ཕྱི་ཚེས་༧ ཉིན་སྦི་སྦི་སི་གསར་ཁང་གིས་གནས་ཚུལ་སྤེལ་གསལ་ལ་ལྟར་ན། ཉེ་ཆར་དབྱིན་ཡུལ་ནང་གནས་སྡོད་རྒྱ་མི་རྣམས་ལ་དྲྭ་ཐོག་ནས་གློ་བུར་དུ་རྒྱ་མིའི་ཉེན་རྟོག་པ་ཡིན་པར་རྗོད་མཁན་ཞིག་གིས་བརྙན་ལམ་བརྒྱུད་ནས་སྐད་བཏང་ནས་བརྗོད་དོན་ལ། ཁོང་ཚོ་ནི་རྒྱ་ནག་ནང་དུ་ཡོད་པའི་ཉེན་རྟོག་པ་ཡིན་ཚུལ་དང་། ཕྱི་སྡོད་རྒྱ་མི་ཚོས་ཁྲིམས་འགལ་གྱི་བྱ་སྤྱོད་བྱེད་ཀྱི་ཡོད་མེད་ལྟ་མཁན་ཡིན་པས། ཁྱོད་རང་རྒྱ་གཞུང་གིས་འཛིན་བཟུང་བྱེད་རྒྱུའི་མིང་ཐོའི་ནང་ཡོད་པ་དང་། ད་ལྟ་ཞིབ་འཇུག་བྱེད་བཞིན་ཡོད། གལ་སྲིད་ཁྱོད་རང་དབྱིན་ཡུལ་ནང་མུ་མཐུད་ནས་གནས་སྡོད་བྱེད་འདོད་པ་དང་། རྒྱ་ནག་ནང་ཡོད་པའི་ཁྱིམ་མི་སྤུན་མཆེད་རྣམས་བདེ་ཐང་དུ་འཇོག་འདོད་ན་སྒོར་མོའི་ཚད་གཞི་དེ་འདྲ་ཞིག་སྤྲོད་དགོས་པའི་བཙན་བཀའ་བཏང་ནས་དངུལ་ཕོན་ཆེན་པོ་འཕྲོག་གི་ཡོད་འདུག དབྱིན་ཡུལ་ནང་གནས་སྡོད་རྒྱ་མིའི་བུད་མེད་ཀྱི་མིང་ལ་(Helen Young)་ཟེར་བ་ཞིག་ལ་གློ་བུར་དུ་བརྙན་ལམ་བརྒྱུད་ནས་རྒྱ་མིའི་ཉེན་རྟོག་པའི་ཆས་གོས་གྱོན་མཁན་ཞིག་གིས། ཁྱེད་རང་ད་ལྟ་རྒྱ་ནག་གི་ཉེན་རྟོག་པས་ཞིབ་འཇུག་བྱེད་བཞིན་ཡོད་པ་དང་།
ཁོང་ཚོ་ནི་(Shenzhen)ཧྲིན་ཀྲེང་གྲོང་ཁྱེར་གྱི་ཉེན་རྟོག་པ་(Officer Fang)ཟེར་བ་ཞིག་ཡིན་པ། ད་དུང་ཉེན་རྟོག་པ་ཡིན་ཟེར་མཁན་དེས་རྒྱ་ནག་གི་ཉེན་རྟོག་ལས་ཁུངས་ཀྱི་ལས་རྟགས་དང་། ལས་ཁུངས་སོགས་བུད་མེད་དེ་ལ་བསྟན་ནས་ཁྱོད་ཀྱིས་ཉེས་པ་འདྲ་མིན་བསགས་ཡོད་པས། རྒྱ་ནག་ནང་ཕྱིར་ལོག་བྱེད་དགོས་ཚུལ་སོགས་བརྗོད་དེ་འཇིགས་སྐུལ་ཧ་ཅང་བྱས་རྗེས་བུད་མེད་དེ་ཡིད་ཆེས་ནས། རང་ཉིད་རྒྱ་ནག་ནང་ཕྱིར་ལོག་བྱེད་མི་དགོས་པར་དབྱིན་ཡུལ་ནང་གནས་སྡོད་མུ་མཐུད་ནས་བྱེད་རྒྱུའི་ཆེད་དུ་རེ་ཞུ་ཐེངས་མང་བྱས་ཡོད་འདུག་ལ། དེ་བཞིན་རྒྱ་ནག་ནང་ཡོད་པའི་རང་ཉིད་ཀྱི་ཁྱིམ་མི་རྣམས་ལ་དཀའ་ངལ་མི་སྤྲོད་པའི་ཆེད་དུ་ཐབས་ཤེས་མང་པོ་བྱས་རྗེས། ཉེན་རྟོག་པ་རྫུན་མས་བུད་མེད་དེ་ལ་དབྱིན་ཡུལ་ནང་མུ་མཐུད་ནས་གནས་སྡོད་བྱེད་འདོད་ན་དངུལ་གྲངས་ཚད་ཅིག་སྤྲོད་པའི་བཙན་བཀའ་བཏང་ཞིང་། བུད་མེད་དེས་རང་ཉིད་ཀྱིས་ད་བར་བསགས་པའི་དངུལ་ཡོད་ཚད་དེ་དབྱིན་ཡུལ་གྱི་སྒོར་མོ་༢༩༠༠༠ སྤྲོད་དགོས་བྱུང་ཡོད་འདུག དེ་བཞིན་ཨ་རིའི་གྲོང་ཁྱེར་(Los Angeles)་ནང་རྒྱ་མིའི་བུད་མེད་གཅིག་གིས་ཁྱོན་ཨ་སྒོར་ས་ཡ་༣ ཙམ་གནད་དོན་དེ་དང་གཅིག་མཚུངས་ཤིག་བྱུང་ནས་ཤོར་ཡོད་འདུག ད་ཆར་རྒྱལ་སྤྱིའི་ས་ཆ་མང་པོའི་ནང་ཡོད་པའི་རྒྱ་མིའི་གཞུང་ཚབ་ཁང་གིས་ཕྱི་ཕྱོགས་སུ་ཡོད་པའི་རྒྱ་མི་རྣམས་ཀྱིས་གཟབ་གཟབ་བྱེད་དགོས་པའི་ཁྱབ་བསྒྲགས་བྱེད་ཀྱི་ཡོད་འདུག བུད་མེད་དེ་ལ་ཉེན་རྟོག་པ་ཡིན་ཟེར་མཁན་དེས་རྒྱ་ནག་གི་ཉེན་རྟོག་པས་འདྲི་རྩད་བྱས་བྱུང་ཞེས་སུ་གཅིག་ལ་ལབ་མི་ཆོག་པ་དང་། གལ་སྲིད་ལབ་ན་ཁོང་མོའི་མི་ཚེ་ལ་དཀའ་ངལ་ཆེན་པོ་འཕྲད་རྒྱུ་ཡིན་པ་མ་ཟད། ཁྱིམ་མི་རྣམས་ལ་ཡང་དཀའ་ངལ་འཕྲད་རྒྱུ་ཡིན་པར་བརྗོད་ཡོད་འདུག ད་དུང་བུད་མེད་དེ་ལ་མཉེན་ཆས་ཤིག་ཕབ་ལེན་བྱེད་དགོས་པའི་བཙན་བཀའ་བཏང་ཡོད་འདུག ཕྱིས་སུ་བུད་མེད་དེས་ཉེན་རྟོག་པ་དེ་རྫུན་མ་ཡིན་པ་དང་། དངུལ་འཕྲོག་བཅོམ་བྱེད་མཁན་ཡིན་པ་ཤེས་རྟོགས་བྱུང་ཡོད་འདུག
གནད་དོན་དེ་འདྲ་ནུབ་ཕྱོགས་རྒྱལ་ཁབ་ཁག་ནང་ཡོད་པའི་རྒྱ་མིའི་སློབ་ཕྲུག་མང་པོ་ལ་བྱུང་ཡོད་འདུག སློབ་ཕྲུག་འགའ་ཤས་ལ་དངུལ་མེད་ཀྱང་དངུལ་ཕོན་ཆེན་པོ་དེ་འདྲ་སྤྲོད་དགོས་པའི་བཙན་བཀའ་བཏང་ནས་དཀའ་ངལ་འཕྲད་མཁན་མང་པོ་བྱུང་ཡོད་འདུག་ལ། འགའ་ཤས་ཀྱི་སྤུན་མཆེད་དང་ཁྱིམ་མི་བཀག་ཉར་བྱས་ཡོད་པའི་བརྙན་རྫུན་མ་བཟོས་ནས་དངུལ་མ་སྤྲད་ན་ཚེ་སྲོག་ལ་ཉེན་ཁ་ཡོད་པ་སོགས་བརྗོད་ནས་འཇིགས་སྐུལ་བྱེད་ཀྱི་ཡོད་འདུག དཀའ་ངལ་དེ་འདྲ་འཕྲད་མྱོང་མཁན་མང་པོ་ཞིག་གིས་བརྗོད་དོན་ལ། དངུལ་འཕྲོག་བཅོམ་བྱེད་མཁན་དེ་དག་ནི་རྒྱ་ནག་གཞུང་གིས་བཙུགས་པའི་འབར་མ་དང་། ཀམ་བྷོ་ཌི་ཡ། ལའོ་སེ་སོགས་ཀྱི་ནང་དུ་ཡོད་པའི་ཁྲིམས་འགལ་གྱི་ལས་ཀ་བྱེད་མཁན་རུ་ཁག་ཞིག་ཡིན་པར་རྗོད་ཀྱི་ཡོད་འདུག དེ་བཞིན་སྦི་སྦི་སི་གསར་ཁང་གིས་ཉི་ཧོང་ནང་དུ་ཡོད་པའི་རྒྱ་མིའི་སློབ་ཕྲུག་འགའ་ཤས་ལ་འདྲི་དུས་གནད་དོན་དེ་དང་གཅིག་པ་བྱུང་མྱོང་མཁན་འགའ་ཤས་ཡོད་འདུག །
གསར་འགོད་པ། བསོད་ནམས་ཕུན་ཚོགས།
