རྒྱ་གཞུང་གིས་བོད་ནང་དུ་ཁ་ཕྲལ་བར་རྡུང་རྡེག་གཏོང་རྒྱུ་ཟེར་བ་ཛ་དྲག་ཏུ་གཏོང་བཞིན་ཡོད་འདུག

རྒྱ་ནག་དམར་ཤོག་གཞུང་བཙུགས་ནས་ལོ་༧༥ འཁོར་ལ་ཉེ་བའི་སྐབས་འདིར། བོད་ནང་རྒྱ་ནག་གཞུང་གི་དམ་དྲག་དང་། ཁ་ཕྲལ་ལ་རྡུང་རྡེག་གཏོང་དགོས་ཚུལ་གྱི་ཁྱབ་བསྒྲགས་བྱས་ནས་དམ་དྲག་ཤུགས་ཆེར་བྱེད་བཞིན་ཡོད་འདུག

ཕྱི་ཚེས་༡༦ ཉིན་ལྷོ་རྒྱ་ནག་ཞོགས་པའི་ཆ་འཕྲིན་གྱིས་གནས་ཚུལ་སྤེལ་གསལ་ལྟར་ན། 

བདུན་ཕྲག་སྔོན་མར་རྒྱ་ནག་གི་བདེ་འཇགས་འགོ་ཁྲིད་ཀྱིས་བོད་ཀྱི་ས་ཁུལ་དུ་ལྟ་སྐོར་ཕྱིན་ཡོད་འདུག་པ་དང་། སྐབས་དེ་དུས་བོད་ནང་བདེ་འཇགས་མི་སྣ་ཚོས་བརྟན་ལྷིང་རྒྱུན་འཁྱོངས་བྱེད་རྒྱུ་དང་རང་བཙན་གྱི་བྱ་འགུལ་ལ་སྔོན་འགོག་བྱེད་རྒྱུ་ནི་གལ་ཆེ་ཤོས་ཀྱི་ལས་འགན་ཡིན་པར་བཤད་ཡོད་འདུག  ཏང་གི་བདེ་འཇགས་སྡེ་ཚན་གྱི་མགོ་ཁྲིད་དང་དབུས་ཆབ་སྲིད་དང་ཁྲིམས་ལུགས་ལས་དོན་ཨུ་ཡོན་ལྷན་ཁང་གི་འགན་འཛིན་(Chen Wenging )ཁྲེན་ཝིན་ཆིང་གིས། བདེ་འཇགས་སྲུང་སྐྱོབ་དམག་མི་ཡིས་ཁ་ཕྲལ་དང་གཏོར་བཤིག་གི་བྱ་འགུལ་ལ་སྔོན་འགོག་ནན་པོ་བྱེད་དགོས་པར་ནན་བརྗོད་བྱས་ཡོད་འདུག་ལ། ཁོས་ད་དུང་ཉེན་ཁ་སྔོན་འགོག་དང་ནག་ཉེས་ལ་རྡུང་རྡེག་གཏོང་བ། བརྟན་ལྷིང་རྒྱུན་འཁྱོངས་བཅས་ཀྱི་ཆེད་དུ་ཆོས་ལུགས་ཀྱི་ལས་དོན་ལ་དོ་དམ་ནན་པོ་བྱེད་དགོས་པ་དང་ཆབས་ཅིག རྒྱུན་ལྡན་གྱི་ཆོས་ལུགས་བྱེད་སྒོར་ཁག་ལ་ལྟ་རྟོགས་ནན་པོ་བྱེད་དགོས་ཞེས་བཤད་ཡོད་འདུག

ལྟ་སྐོར་འདི་ནི་ཟླ་བ་བདུན་པའི་ནང་ཚོགས་པའི་ཏང་གི་སྲིད་ཇུས་གཏན་འབེབས་བྱེད་པའི་གྲོས་ཚོགས་ཐེངས་གསུམ་པའི་རྗེས་སུ་ས་གནས་ལ་བྱས་པའི་ཞིབ་བཤེར་ཐེངས་དང་པོ་དེ་ཡིན་འདུག་པ་དང་། ཟླ་བ་བཅུ་པའི་ཚེས་གཅིག་གི་རྒྱལ་ཡོངས་དུས་ཆེན་གྱི་སྔོན་དུ་བྱུང་བ་ཡིན་འདུག  ལྟ་སྐོར་འདིའི་སྐབས་སུ་བོད་རང་སྐྱོང་ལྗོངས་ཟེར་བ་དེ་དང་སི་ཁྲོན་ཞིང་ཆེན་གྱི་དཀར་མཛེས་བོད་རིགས་རང་སྐྱོང་ཁུལ་བཅས་སུ་བསྐྱོད་འདུག​​​​​​​​​​​​​​​​ རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ནས་ལོ་ ༧༥ འཁོར་བའི་དུས་དྲན་སྲུང་བརྩི་བྱེད་རྒྱུའི་གྲ་སྒྲིག་བྱེད་བཞིན་ཡོད་པ་འདུག་པ་དང་། དུས་དྲན་དེའི་སྐབས་སུ་བོད་ནང་དོན་རྐྱེན་རིགས་མི་འབྱུང་བའི་ཆེད་དུ་བོད་ཀྱི་ས་ཁུལ་དུ་དམ་དྲག་ཤུགས་ཆེ་རུ་གཏོང་བཞིན་ཡོད་འདུག

ལྟ་སྐོར་དི་ནི་ཨ་རིའི་གཞུང་འབྲེལ་གནད་ཡོད་མི་སྣ་ཁག་ཅིག་གིས་ནིའུ་ཡོག་ཏུ་བོད་མིའི་དབུ་ཁྲིད་༧གོང་ས་སྐྱབས་མགོན་ཆེན་པོ་མཆོག་དང་མཇལ་འཕྲད་གནང་ནས་ཟླ་བ་གཅིག་མ་ཟིན་ཙམ་གྱི་ནང་བྱུང་བ་ཞིག་ཡིན་འདུག ཞིན་ཧྭ་གསར་འགྱུར་ཁང་ཟེར་བས། (Chen Wenging )ཁྲེན་ཝིན་ཆིང་གིས་བོད་ཀྱི་གྲོང་ཁྱེར་ལྷ་ས་དང་ཆབ་མདོ་རུ་ཡོད་པའི་བདེ་འཇགས་སྡེ་ཚན་ཁག་ལ་ལྟ་སྐོར་ཕྱིན་ཏེ་ས་གནས་དེའི་ལས་དོན་གྱི་གནས་སྟངས་སྐོར་ཤེས་རྟོགས་བྱུང་ཡོད་པར་བརྗོད་འདུག

དེ་བཞིན་གསར་ཁང་དེས། དཀར་མཛེས་སུ་ཁོས་ཁ་ཕྲལ་ལ་ངོ་རྒོལ་གྱི་ལས་དོན་སྐོར་གྱི་ཚོགས་འདུ་ཞིག་གཙོ་སྐྱོང་བྱས་ཡོད་འདུག་པ་དང་། བརྟན་ལྷིང་རྒྱུན་འཁྱོངས་བྱེད་ཕྱོགས་ཐད་བཀོད་སྒྲིག་བྱས་འདུག  དཀར་མཛེས་ཁུལ་གྱི་མི་འབོར་ས་ཡ་ ༡.༡ ཡོད་པའི་ནང་ནས་བརྒྱ་ཆ་བརྒྱད་བཅུ་ཙམ་བོད་པ་ཡིན་པ་དང་། འདི་ནི་རྒྱལ་ཡོངས་ཀྱི་བོད་པ་འདུས་སྡོད་ཆེ་ཤོས་གཉིས་པ་ཡིན་པར་བརྗོད་འདུག  བདེ་འཇགས་འགོ་ཁྲིད་ཁྲེན་ཝིན་ཆིང་གིས་ཉེ་བའི་ལོ་ཁ་ཤས་ནང་བོད་ཁུལ་གྱི་བདེ་འཇགས་དྲ་བ་ཟེར་བ་པར་རིས། གློག་མིག་(CCTV)སོགས་མང་དུ་བཏང་ནས་བདེ་འཇགས་ལས་བྱེད་ཚོར་མི་རིགས་ཁག་གི་མི་དམངས་ཀྱི་རྒྱལ་ཁབ་ཀྱི་ངོ་བོའི་འདུ་ཤེས་ཇེ་མཐོར་གཏོང་བའི་ཆེད་དྲིལ་བསྒྲགས་དང་། སློབ་གསོའི་ལས་འགུལ་མང་དུ་སྤེལ་དགོས་པའི་བཀའ་བཏང་ཡོད་པར་བཤད་འདུག​​​​​​​

བོད་རང་སྐྱོང་ལྗོངས་ཕུད། ཡུན་ནན་དང་། སི་ཁྲོན། ཀན་སུའུ། མཚོ་སྔོན་བཅས་ཀྱི་ནང་དུ་བོད་རིགས་འདུས་སྡོད་ཁུལ་བཅུ་ཡོད་པ་དང་། ཉེ་བའི་ལོ་ཁ་ཤས་ནང་བོད་རིགས་འདུས་སྡོད་མང་བའི་ས་ཁུལ་གཞན་ཚུད་པའི་ཁྱབ་ཁོངས་རྒྱ་ཆེ་རུ་བཏང་སྟེ་བོད་ཁུལ་གྱི་བདེ་འཇགས་དྲ་བ་རྒྱ་བསྐྱེད་བཏང་ཡོད་པར་བརྗོད་འདུག

རྒྱ་ནག་གི་ཁྲིམས་དཔོན་མཐོ་གྲས་དང་མི་དམངས་ཆེས་མཐོའི་ཁྲིམས་ཁང་གི་ཁྲིམས་དཔོན་(Zhang Jun) ཀྲང་ཅུན་གྱིས་བདུན་ཕྲག་སྔོན་མར་བོད་ནང་ཁྲིམས་ཁང་ཁག་ལ་ལྟ་སྐོར་བྱས་ཡོད་འདུག་པ་དང་། ཁོས་དྲག་སྤྱོད་པ་དང་། མི་རིགས་ཁ་ཕྲལ་རིང་ལུགས་པ། དེ་བཞིན་ནག་ཉེས་ཚབས་ཆེན་གཞན་དག་ལ་གནོན་ཤུགས་རྒྱུན་མཐུད་སྤྲོད་པའི་ཆེད་དུ་ཉེས་ཆད་ནན་པོ་གཏོང་དགོས་པའི་དགོས་མཁོ་ཡོད་ཚུལ་བཤད་ཡོད་འདུག མི་དམངས་ཆེས་མཐོའི་ཁྲིམས་ཞིབ་ཁང་གི་འགན་འཛིན་(Ying Yong)ཡིན་ཡོང་གིས་ཀྱང་ཟླ་བ་འདིའི་ནང་བོད་ཀྱི་མི་དམངས་ཁྲིམས་གཏུགས་ཁང་ཟེར་བ་ལ་ཁག་ལ་ཞིབ་བཤེར་བྱས་ཡོད་འདུག་པ་དང་། ཁོས་ཁྲིམས་ལུགས་དང་མཐུན་པའི་སྒོ་ནས། ཁ་ཕྲལ་རིང་ལུགས་ཀྱི་ཞུགས་ཐབས་དང་། གཏོར་བཤིག་གི་བྱ་སྤྱོད། དེ་བཞིན་རྒྱལ་ཁབ་བདེ་འཇགས་ལ་ཉེན་ཁ་བཟོ་བའི་ནག་ཉེས་རིགས་ཚང་མར་ནན་པོའི་སྒོ་ནས་རྡུང་རྡེག་གཏོང་དགོས་པའི་དགོས་མཁོ་ཡོད་པར་ནན་བཤད་བྱས་ཡོད་འདུག

གསར་འགོད་པ། བསོད་ནམས་ཕུན་ཚོགས།