རྒྱ་གཞུང་གིས་བོད་མིའི་རིག་གཞུང་སིམ་ཡལ་གྱི་སྲིད་བྱུས་ལག་བསྟར་བྱེད་བཞིན་པའི་ཐད་ལན་འདེབས་དགོས་པའི་ཡི་གེ་ཤོག་གྲངས་༡༧ ཅན་ཞིག་ཕུལ་འདུག
མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་པ་བཞི་ཡིས་རྒྱ་ནག་གཞུང་གིས་བོད་ནང་བོད་མིའི་རིག་གཞུང་སིམ་ཡལ་གྱི་སྲིད་བྱུས་ལག་བསྟར་བྱེད་བཞིན་པའི་ཐད་ཐུགས་འཚབ་དང་། རྒྱ་ནག་གཞུང་གིས་གནད་དོན་དེའི་ཐད་ཉིན་གྲངས་ ༦༠ ནང་ལན་འདེབས་འབུལ་དགོས་པའི་ཡི་གེ་ཤོག་གྲངས་ ༡༧ ཅན་ཞིག་ཕུལ་ཡོད་འདུག
དེ་ཡང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་པ་ཕར་ནན་ཌི་ (Fernand de Varennes) དང་། ཨེ་ལེག་ཛན་ཌི་ར་ (Alexandra Xanthaki) ། ཞ་ཧེ་ཌི་ (Farida Shaheed) ། ནཱ་ཛི་ལ་ (Nazila Ghanea) ་བཅས་ཐུན་མོང་གིས་ཕྱི་ལོ་ ༢༠༢༢ ཟླ་ ༡༡ ཚེས་ ༡༡ ཉིན་རྒྱ་ནག་གཞུང་གིས་བོད་མིའི་རིག་གཞུང་དང་ཤེས་ཡོན་གྱི་ཐོབ་ཐང་ལ་རྩིས་མེད་རྡོག་རོལ་དང་། དེ་བཞིན་ཆོས་དད་རང་དབང་སོགས་ཀྱི་ཐོག་དྲག་གནོན་བྱེད་བཞིན་པར་ཐུགས་འཚབ་དང་། རྒྱ་ནག་གཞུང་ལ་ཤོག་གྲངས་ ༡༧ ཅན་གྱི་ཡི་གེ་ཞིག་ཕུལ་ཡོད་པ་མ་ཟད། ལྷག་པར་དུ་རྒྱ་ནག་གཞུང་གིས་ལས་གཞི་ཆེན་པོ་ཞིག་སྤེལ་ནས་བོད་པའི་ཕྲུ་གུ་རྣམས་གཏན་འཇགས་སློབ་གྲྭ་ཁག་ཏུ་བཏང་སྟེ་བོད་མིའི་རིག་གཞུང་དང་ཡུལ་སྲོལ་གོམས་གཤིས་སོགས་ཧན་མི་རིགས་ཀྱི་རིག་གཞུང་ཅན་དུ་སྒྱུར་བཞིན་པར་ཧ་ཅང་ཐུགས་འཚབ་ཡོད་པའི་སྐོར་ཉེ་ཆར་ཡོངས་ཁྱབ་ཀྱིས་གསལ་བསྒྲགས་གནང་ཡོད།
གཞན་ཡང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་པ་རྣམ་པས་རྒྱ་ནག་གཞུང་ལ་མཉམ་འབྲེལ་རྒྱལ་ཚོགས་ཚོགས་ནས་བོད་དོན་སྐོར་ཕྱི་ལོ་༡༩༥༩ ལོར་གྲོས་ཆོད་ཨང་ ༡༣༥༣ དང་། ཕྱི་ལོ་༡༩༦༡ ལོར་གྲོས་ཆོད་ཨང་ ༡༧༢༣ ནང་འཁོད་པ། དེ་བཞིན་ཕྱི་ལོ་ ༡༩༦༥ ལོར་གྲོས་ཆོད་ཨང་ ༢༠༧༩ ནང་འཁོད་པ་བཅས་དྲན་གསོ་གནང་ཡོད།
རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་པ་རྣམ་པས་རྒྱ་ནག་གཞུང་གིས་བོད་ནང་བོད་མིའི་རིག་གཞུང་དང་ཡུལ་སྲོལ་གོམས་གཤིས་སོགས་སིམ་ཡལ་གྱི་སྲིད་བྱུས་ལག་བསྟར་བྱེད་བཞིན་པར་ཐུགས་འཚབ་གནང་བར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ཀྱིས་ཐུགས་རྗེ་ཆེ་ཞུས་པ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་པ་རྣམ་པས་འབོད་སྐུལ་གནང་བ་ལྟར་རྒྱ་ནག་གཞུང་གིས་བོད་མིའི་རིག་གཞུང་སིམ་ཡལ་གྱི་སྲིད་བྱུས་སྐོར་ལན་འདེབས་རྒྱས་པ་ཞིག་ངེས་པར་འབུལ་དགོས་པའི་སྐོར་གསུངས་ཡོད།
གསར་འགོད་པ། བློ་བཟང་རྒྱ་མཚོ།
