རྒྱ་གཞུང་གིས་མི་མང་ཁྲོད་དུ་ཐའེ་ཝན་འགོ་ཁྲིད་དག་ལ་སྡང་ཟུག་ཇེ་ཆེར་གཏོང་ཐབས་བྱེད་ཀྱི་ཡོད་འདུག
རྒྱ་ནག་གིས་ཐའེ་ཝན་ནི་ཁ་བྲལ་ཐབས་མེད་པའི་རྒྱ་ནག་གི་ཆ་ཤས་ཡིན་པ་དང་། ཐའེ་ཝན་དེ་རྒྱ་ནག་ལས་ཁ་བྲལ་གཏོང་ཐབས་སུས་བྱེད་ཀྱི་ཡོད་ཀྱང་དགྲ་རུ་འཛིན་གྱི་ཡོད་པར་རྗོད་བཞིན་པ་ལྟར། ད་ཆར་ཐའེ་ཝན་གྱི་འགོ་ཁྲིད་མང་པོ་ཞིག་ལ་རྒྱ་ནག་གི་སྤྱི་ཚོགས་དྲྭ་ལམ་བརྒྱུད་ནས་སྐྱོན་བརྗོད་དང་དམའ་འབེབས། སྲོག་ཁྲིམས་ཕོག་ཡོད་ཚུལ་སོགས་ཀྱི་ལས་འགུལ་ཞིག་སྤེལ་ནས་རྒྱ་ནག་གི་མི་མང་ཁྲོད་འགོ་ཁྲིད་དེ་དག་ལ་སྡང་ཟུག་ཇེ་ཆེར་གཏོང་གི་ཡོད་འདུག
ཕྱི་ཚེས་༡༠ ཉིན་(firstpost)གསར་ཁང་གིས་གནས་ཚུལ་སྤེལ་གསལ་ལྟར་ན། བདུན་ཕྲག་སྔོན་མར་རྒྱ་ནག་གཞུང་གི་ཐའེ་ཝན་ལས་དོན་ཁང་དང་མི་མང་བདེ་འཇགས་ལྷན་ཁང་ཟེར་བས་རྒྱ་ནག་གི་སྤྱི་ཚོགས་ཁྲོད་དྲྭ་ཚིགས་མང་པོ་ཞིག་ཁྱབ་སྤེལ་བྱས་ཡོད་འདུག་པ་དང་། དྲྭ་ཚིགས་དེ་དག་གི་ཐོག་ཐའེ་ཝན་གྱི་འགོ་ཁྲིད་ཟུར་པ་དང་ད་ལྟའི་ལས་ཐོག་འགོ་ཁྲིད་བཅས་ཁྱོན་༡༠ ལ་ཐའེ་ཝན་རྒྱ་ནག་ལས་ཁ་བྲལ་གཏོང་ཐབས་བྱེད་མཁན་གྱི་གཏེ་དཔོན་དག་ཡིན་པས། ཁོང་ཚོ་ནི་འཆི་རྒྱུ་མེད་པའི་ཁ་བྲལ་བ་རེད་ཅེས་འབོད་བཞིན་རྒྱ་ནག་གི་སྤྱི་ཚོགས་དྲ་ལམ་བརྒྱུད་ནས་མི་མང་ཁྲོད་སྐྱོན་བརྗོད་དང་སྡང་ཟུག་བྱེད་རྒྱུར་ཁྱབ་སྤེལ་བྱས་ཡོད་འདུག
དེ་ལྟར་བྱེད་དགོས་དོན་ནི་ཐའེ་ཝ་དེ་རྒྱ་ནག་གི་མངའ་ཁོངས་འོག་ཏུ་འཇུག་ཐབས་ཆེད་དུ་མི་མང་ཁྲོད་ཆབ་སྲིད་ཀྱི་ལྟ་བ་སྤེལ་ཐབས་དང་། རྒྱ་ནག་གཞུང་གིས་གལ་སྲིད་ཐའེ་ཝན་དེ་རྒྱ་ནག་མངའ་ཁོངས་སུ་བཅུག་ན་མི་མང་ཁྲོད་ནས་རྒྱབ་སྐྱོར་རག་ཐབས་ཆེད་དུ་ཡིན་པར་རྗོད་ཀྱི་འདུག་ལ། གཞན་རྒྱ་ནག་མི་མང་གིས་ཐའེ་ཝན་གྱི་འགོ་ཁྲིད་དེ་དག་ལ་རྒོལ་རྡུང་གཏོང་ཐབས་ཀྱི་ལས་འགུལ་ཞིག་ཀྱང་ཡིན་འདུག མི་མང་གིས་དྲྭ་ཚིགས་དེ་དག་བརྒྱུད་ནས་ཐའེ་ཝན་གྱི་འགོ་ཁྲིད་དེ་དག་དང་གཞན་འགོ་ཁྲིད་སུས་ཐའེ་ཝན་གྱི་རང་བཙན་ལ་རྒྱབ་སྐྱོར་བྱེད་པ་དང་། རྩོད་ལེན་བྱེད་ཀྱི་ཡོད་ནའང་། རྒྱ་ནག་གི་ཐའེ་ཝན་ལས་དོན་ཁང་དང་མི་མང་བདེ་འཇགས་ལྷན་ཁང་ཟེར་བ་དང་རྒྱ་ནག་གཞུང་ལ་ཐད་ཀར་གནས་ཚུལ་མཁོ་སྤྲོད་ཐུབ་ཀྱི་ཡོད་འདུག
མིང་རྟགས་བཀོད་པའི་ཐའེ་ཝན་གྱི་འགོ་ཁྲིད་དག་གི་ཁྲོད་གཙོ་བོ་ད་ལྟའི་ལས་ཐོག་སྲིད་འཛིན་གཞོན་པ་(Hsiao BI-Khim)ཐའེ་ཝན་བདེ་འཇགས་ལྷན་ཁང་གི་དྲུང་ཆེ་(Joseph Wu Jaushieh) ཐའེ་ཝན་བདེ་འཇགས་ལྷན་ཁང་གི་དྲུང་ཆེ་གཞོན་པ་(Lin Fei -Fan)བཅས་གསུམ་ནི་ཐའེ་ཝན་རང་བཙན་རྩོད་མཁན་གཏེ་དཔོན་དག་ཡིན་པར་སྐྱོན་བརྗོད་བྱེད་ཀྱི་ཡོད་འདུག་ལ། ཁོང་ཚོ་རྒྱ་ནག་གི་ཁྲིམས་ཐོག་ནས་སྲོག་ཁྲིམས་ཀྱི་ཉེས་པ་ཕོག་ཡོད་ཚུལ་བརྗོད་ཡོད་འདུག
འདི་ལོའི་ཕྱི་ཟླ་༦ པའི་ནང་རྒྱ་ནག་གཞུང་གིས་ཁྲིམས་ཤིག་གཏན་འབེབས་བྱས་ཡོད་འདུག་པ་དང་། བདུན་ཕྲག་སྔོན་མའི་གཟའ་པ་སངས་ཉིན་ཐའེ་ཝན་རང་བཙན་རྩོད་མཁན་གྱི་ཁ་བྲལ་བ་འཆི་རྒྱུ་མེད་པའི་འགོ་ཁྲིད་དེ་དག་རྒྱ་ནག་གི་ཁྲིམས་ཐོག་ནས་སྲོག་ཐོག་གི་ཉེས་པ་བསགས་ཡོད་པར་བརྗོད་ཡོད་འདུག དེ་ལ་ལན་འདེབས་ཀྱི་ཚུལ་དུ་ཐའེ་ཝན་གྱིས་རྒྱ་ནག་གཞུང་གི་ཁྲིམས་ལུགས་ཀྱིས་ཐའེ་ཝན་གྱི་ས་ཁོངས་སུ་ཐེ་གཏོགས་བྱེད་རྒྱུའི་དབང་ཆ་ཡོད་མ་རེད་ཅེས་བརྗོད་ཡོད་འདུག་ལ། དེ་བཞིན་ཐའེ་ཝན་གྱི་མི་མང་ཚོ་རྒྱ་ནག་ནང་འགྲོ་རྒྱུར་གང་གཟབ་བྱེད་དགོས་པར་ཡང་བརྗོད་ཡོད་འདུག
གསར་འགོད་པ། བསོད་ནམས་ཕུན་ཚོགས།
