རྒྱ་གཞུང་གིས་སྐུ་ཞབས་ཇིམ་མེག་གྷོ་ཝན་ལ་ཉེས་ཆད་བཀལ་བ་དེ་ཁོང་གིས་ཆེ་བསྟོད་ཅིག་ཏུ་ངོས་བཟུང་།

ཕྱི་ཟླ་༧ ཚེས་༣༡ ་ཉིན་རྒྱ་ནག་ཕྱི་སྲིད་ལས་ཁུངས་ཀྱིས་ཨ་རིའི་གྲོས་ཚོགས་འཐུས་མི་དང་ཨ་རིའི་གྲོས་ཚོགས་འོག་མའི་ཁྲིམས་སྒྲིག་ཚོགས་ཆུང་གི་ཚོགས་གཞོན། དེ་བཞིན་བོད་དོན་རྒྱབ་སྐྱོར་བ་སྐུ་ཞབས་ཇིམ་མེག་གྷོ་ཝན་(Jim McGovern) ལ་ཉེས་ཆད་བཀལ་བའི་གསལ་བསྒྲགས་ཤིག་སྤེལ་འདུག

གསལ་བསྒྲགས་དེའི་ནང་དུ་ཇིམ་མེག་གྷོ་ཝན་གྱིས་ཉེ་བའི་ལོ་ཤས་ནང་རྒྱ་ནག་གི་ནང་སྲིད་ལ་ཐེ་གཏོགས་བྱེད་པ་དང་། རྒྱ་ནག་གི་མངའ་ཁོངས་དང་། བདེ་འཇགས། འཕེལ་རྒྱས་བཅས་ལ་གནོད་སྐྱོན་བཟོ་བའི་བྱ་སྤྱོད་དང་གཏམ་བཤད་ཡང་ཡང་སྤེལ་བར་བརྟེན། རྒྱ་གཞུང་གིས་ཁོང་ལ་མཐའ་གཅིག་ཏུ་ཁ་གཏད་གཅོག་རྒྱུའི་ཐག་གཅོད་བྱས་ཡོད་པར་བརྗོད་འདུག 

རྒྱ་གཞུང་གིས་རྒྱ་ནག་གི་ནང་དུ་ཡོད་པའི་ཁོང་གི་རྒྱུ་ནོར་དང་ཁར་དབང་རྣམས་བཀག་སྡོམ་བྱ་རྒྱུ་དང་། རྒྱ་ནག་གི་ཚོགས་པའམ་མི་སྒེར་གང་རུང་གིས་ཁོང་དང་མཉམ་དུ་ཚོང་འབྲེལ་ལམ་ལས་དོན་སྤེལ་མི་ཆོག་པ། དེ་བཞིན་ཁོང་དང་ཁོང་གི་ནང་མི་རྣམས་ལ་རྒྱ་ནག་ཏུ་ཡོང་རྒྱུའི་མཐོང་མཆན་མི་སྤྲོད་པ་སོགས་ཀྱི་ཉེས་ཆད་བཅད་འདུག

རྒྱལ་སྤྱིའི་གསར་ཁང་ཁག་གིས་ཇིམ་མེག་གྷོ་ཝན་ལ་རྒྱ་ནག་ནང་དུ་རྒྱུ་དངོས་དང་ཚོང་འབྲེལ་གང་ཡང་མེད་པས། ཁོང་ལ་ཉེས་ཆད་བཅད་པ་ནི་མཚོན་དོན་ཙམ་ཞིག་ལས་ཤུགས་རྐྱེན་གང་ཡང་ཐེབས་མི་ཐུབ་པར་བརྗོད་འདུག རྒྱ་གཞུང་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཕྱི་ཕྱོགས་སུ་ངོ་རྒོལ་ཉེས་ཆད་བཅའ་ཁྲིམས་ཀྱི་དོན་ཚན་ཁག་ཅིག་གཞིར་བཟུང་ཐག་གཅོད་བྱས་ཡིན་པར་བསྒྲགས།

ཇིམ་མེག་གྷོ་ཝན་གྱིས་ཨེག་སི་དྲྭ་རྒྱའི་ཐོག རྒྱ་གཞུང་གི་དཔོན་རིགས་ཚོ་མི་མང་གིས་རྒྱ་གཞུང་གི་འཇིགས་སུ་རུང་བའི་འགྲོ་བ་མིའི་ཐོབ་ཐང་གི་ཟིན་ཐོ་ལ་སྐྱོན་བརྗོད་བྱེད་པར་མི་དགའ་ན། ཁོང་ཚོས་འཇིགས་སུ་རུང་བའི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས་པ་དང་། ཁོང་ཚོས་བོད་མི་ཚོར་གཉའ་གནོན་དང་ཞིན་ཅང་དུ་མི་རིགས་རྩ་མེད་གཏོང་བ། ཧོང་ཀོང་གི་མང་གཙོའི་ལས་འགུལ་ཐོག་དམ་བསྒྲགས་བྱས་པ་བཅས་མཚམས་འཇོག་བྱེད་རྒྱུ་ནས་འགོ་རྩོམ་དགོས་པ་རེད་ཅེས་དང་། དེ་བཞིན་ཁོང་གིས་དེ་རིང་ང་ལ་བཀལ་བའི་དོན་མེད་ཀྱི་ཉེས་ཆད་འདིས་པེ་ཅིན་གི་དཔོན་རིགས་ཚོ་རང་དབང་དང་གུ་ཡངས་ཀྱི་བགྲོ་གླེང་ལ་འཇིགས་པར་མཚོན་གྱི་ཡོད། ཁོང་ཚོས་རང་དང་མི་མཐུན་པ་རྣམས་ལ་ཉེས་ཆད་འགེལ་བ་དང་ཁ་འགེབས་ཐབས་བྱེད་ཀྱི་ཡོད། ཡིན་ཡང་། འཛམ་བུ་གླིང་གིས་ཁོང་ཚོའི་བྱ་སྤྱོད་ལ་ལྟ་བཞིན་ཡོད་པ་དང་འགྲོ་བ་མིའི་ཐོབ་ཐང་ལ་སེམས་ཁུར་བྱེད་མཁན་ཚོ་ཁ་རོག་སྡོད་ཀྱི་མ་རེད། རྒྱ་གཞུང་གིས་ང་ལ་བཀལ་བའི་ཉེས་ཆད་འདི་ངས་སྤོབས་པ་ཆེན་པོའི་ངང་དཔུང་རྟགས་སམ་རྟགས་མ་ཞིག་ཏུ་ངོས་འཛིན་བྱེད་རྒྱུ་ཡིན་ཞེས་བརྗོད་འདུག

རྒྱ་གཞུང་གིས་དེ་སྔར་ཨ་རིའི་གྲོས་ཚོགས་འཐུས་མི་ཁག་ཅིག་གིས་ཐའེ་ཝན་ལ་རྒྱབ་སྐྱོར་བྱས་པའི་ཉེས་མིང་འོག་ཉེས་ཆད་བཅད་མྱོང་ཡོད་འདུག་ལ། ཐེངས་འདིར་ཉེས་ཆད་བཅད་པའི་གྲོས་ཚོགས་འཐུས་མི་ཁོང་དང་གྲོས་ཚོགས་འཐུས་མི་མ་ཧི་ཧལ་མེག་ཀོལ་(Michael McCaul) ་གཉིས་ཀྱིས་དེ་སྔོན་ཨ་རིའི་གྲོས་ཚོགས་སུ་བོད་རྒྱ་དཀའ་རྙོག་སེལ་ཐབས་ཀྱི་ཁྲིམས་འཆར་ངོ་སྤྲོད་བྱས་པ་དེར། ལོ་འདིའི་ཕྱི་ཟླ་༧ པའི་ནང་ཨ་རིའི་སྲིད་འཛིན་བྷ་ཌན་གྱིས་མཚན་རྟགས་བཀོད་ནས་ཁྲིམས་ལུགས་སུ་གཏན་འབེབས་གནང་ཡོད་པ་སོགས། གྲོས་ཚོགས་འཐུས་མི་ཁོང་ནི་ནམ་རྒྱུན་བོད་དོན་འཐབ་རྩོད་ལ་རྒྱབ་སྐྱོར་ཤུགས་ཆེན་བྱེད་མཁན་ཞིག་ཆགས་ཡོད་པ་རེད། 

གསར་འགོད་པ། བློ་བཟང་རྒྱ་མཚོ།