རྒྱ་གཞུང་གིས་ཨ་རིའི་ཆོས་དཔོན་ཞིག་ལོ་ངོ་བཅུ་ཕྲག་གཉིས་ལ་ཉེ་བའི་རྗེས་སུ་གློད་བཀྲོལ་བཏང་འདུག

ཕྱི་ཟླ་༩པའི་ཚེས་༡༦ཉིན་སིས་ཨེན་ཨེན་གསར་ཁང་གིས་གནས་ཚུལ་སྤེལ་གསལ་ལྟར་ན། ཨ་རིའི་མི་སེར་ཆོས་དཔོན་ཡིན་པ་ཞིག་རྒྱ་ནག་གིས་ཉེས་མེད་སྐྱོན་འཛུགས་ཀྱིས་བཙོན་འཇུག་བྱས་ཏེ་ལོ་ངོ་བཅུ་ཕྲག་གཉིས་ལ་ཉེ་བའི་རྗེས་སུ་གློད་བཀྲོལ་བཏང་འདུག

ཨ་རིའི་ཕྱི་འབྲེལ་ལས་ཁུངས་ཀྱིས་སྲིད་འཛིན་བྷ་ཌན་གྱིས་པེ་ཅིང་དང་འབྲེལ་ལམ་བརྟན་པོར་བཟོ་བར་གལ་ཆེ་ཤོས་ཀྱི་གྱོད་གཞི་ཞིག་མཇུག་སྒྲིལ་ཡོད་པར་བརྗོད་འདུག ཌེ་ཝིཌ་ལིན། ལོ་ ༦༨ ཡིན་པའི་ཌེ་ཝིཌ་ལིན་ཞེས་པ་ཁོང་གིས་པེ་ཅིན་དུ་གསང་བའི་ཆོས་ཚོགས་ཤིག་ལ་འདུ་འཛོམས་བྱེད་སའི་ལྟེ་གནས་ཤིག་འཛུགས་རོགས་བྱས་པའི་རྐྱེན་གྱིས་རྒྱ་ནག་གཞུང་གིས་གཡོ་སྒྱུའི་ཉེས་འཛུགས་བྱས་ཏེ་༢༠༠༦ ལོར་ཚེ་བཙོན་གྱི་ཁྲིམས་ཐག་བཅད་ཡོད་འདུག ཨ་རིའི་གཞུང་གིས་དེ་ནི་ནོར་འཁྲུལ་ཅན་གྱི་ཉེས་འཛུགས་ཤིག་ཡིན་པར་བརྗོད་པ་དང་། ཁོང་གིས་ཀྱང་ཁྲིམས་བཅད་དེར་ངོས་ལེན་གནང་མི་འདུག།

ལིན་ནི་རྒྱ་ནག་གི་ཕྱི་སྲིད་ལས་ཁུངས་ཀྱི་ལྟ་རྟོག་འོག་ཡོད་པའི་ཨ་མི་རི་ཀའི་མི་སེར་མི་གསུམ་ལས་གཅིག་ཡིན་པ་དང་། རྒྱ་ནག་གིས་ཉེས་མེད་སྐྱོན་འཛུགས་ཀྱིས་བཙོན་འཇུག་འོག་ཏུ་བཅུག་ཡོད་འདུག

མ་ཟད་ཨ་རིའི་མི་སེར་ཚོང་ལས་བྱེད་མཁན་ཀེ་ལི་དང་།མཀ་སི་དན་གཉིས་ནི་གསང་ཉུལ་དང་བཟི་སྨན་སོགས་དང་འབྲེལ་བ་ཡོད་པའི་ཉེས་འཛུགས་འོག་ད་དུང་བཙོན་དུ་བཅུག་ཡོད་འདུག ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པས་རེས་གཟའ་ཉི་མའི་བསྒྲགས་གཏམ་ནང་། ང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བཙོན་ཁང་ནས་ཌེ་ཝིཌ་ལིན་གློད་བཀྲོལ་བྱུང་བར་དགའ་བསུ་ཞུ་གི་ཡོད།

ཁོང་རང་ཨ་རིའི་མངའ་སྡེ་རུ་ཕྱིར་ལོག་སྟེ་ལོ་ངོ་ཉི་ཤུ་ལ་ཉེ་བའི་རྗེས་སུ་རང་ཉིད་ཀྱི་ནང་མི་ཐེངས་དང་པོ་མཐོང་ཐུབ་པར་འཚམས་འདྲི་ཡོད་བཅས་དང་།
ཉེ་བའི་ལོ་ཤས་རིང་བྷ་ཌན་སྲིད་གཞུང་གིས་མི་གསུམ་དེ་གློད་བཀྲོལ་གཏོང་བའི་ཆེད་དུ་ཕྱི་འབྲེལ་གྱི་འབད་བརྩོན་ཤུགས་ཆེར་བྱས་ཡོད་པ་སོགས་བཀོད་འདུག

ཨ་རིའི་དཔོན་རིགས་ཚོས་རྒྱ་ནག་ལ་ལྟ་སྐོར་བྱེད་སྐབས་གནད་དོན་འདི་ཡང་ནས་བསྐྱར་དུ་གླེང་བ་དང་། དེ་ཡང་སྲིད་འཛིན་ཇོ་བྷ་ཌན་གྱིས་རྒྱ་ནག་དབུ་ཁྲིད་ཞི་ཅིན་ཕིང་དང་ལྷན་ལོ་སྔོན་མའི་སྤྱི་ཟླ་བཅུ་གཅིག་ནང་སན་ཧྥ་རན་སིས་ཀོར་དངོས་སུ་ཐུགས་འཕྲད་བྱུང་སྐབས་སུ་ཡང་ཁོང་གིས་གནད་དོན་དེ་གླེང་བ་མ་ཟད་ཁ་པར་བརྒྱུད་ནས་ཀྱང་འབྲེལ་བ་བྱས་ཡོད་འདུག

དེ་ཡང་ChinaAid ཞེས་པའི་སྙན་ཐོ་ལྟར་ན། ཁོང་ལ་ཕྱི་ལོ་༢༠༠༦ལོར་གསང་བའི་ཆོས་ཚོགས་ཤིག་ལ་མཆོད་ཁང་བཞེངས་རོགས་བྱས་པའི་ཉེས་མིང་འོག་བཙོན་འཇུག་བྱས་ཏེ་རྒྱལ་ཁབ་ནས་ཕྱིར་འགྲོ་མི་ཆོག་པར་བཟོས་པ་དང་། 

ཁོང་གིས་བཙོན་འཇུག་དེའི་རིང་བཙོན་རོགས་ཚོ་དང་ལྷན་དུ་རང་གི་ཆོས་ལུགས་བརྗེ་རེས་བྱེད་པའི་གོ་སྐབས་ཤིག་ཏུ་བརྩིས་ནས་སྨོན་ལམ་ཚོགས་པ་ཞིག་གསར་འཛུགས་བྱས། དེ་བཞིན་ཁོང་གིས་བཙོན་ཁང་དུ་བསྡད་པའི་རིང་ལ་ཆོས་ལུགས་ཀྱི་སློབ་སྦྱོང་དང་ཉམས་ལེན་ལ་ཤུགས་སྣོན་རྒྱག་རྒྱུའི་འདུན་པ་ཆེན་པོ་བཅངས་ཡོད་པར་བརྗོད་ཡོད་འདུག།

ཕྱི་ལོ་༢༠༠༩ ལོར་རྒྱ་ནག་གིས་གན་རྒྱའི་གཡོ་སྒྱུའི་ཉེས་མིང་འོག་ཚེ་བཙོན་འཇུག་རྒྱུའི་ཁྲིམས་ཐག་བཅད་འདུག ལིན་གློད་བཀྲོལ་བྱུང་བར་ཨ་རིའི་གཞུང་གི་སྐུ་ཚབ་རྣམ་པས་འཚམས་འདྲི་དང་དགའ་བསུ་ཞུས་ཤིང་། ཁོང་གིས་ད་དུང་རྒྱ་ནག་ཏུ་བཀག་ཉར་བྱས་པའི་ཨ་རི་བ་རྣམས་གློད་བཀྲོལ་གཏོང་དགོས་པའི་འབོད་སྐུལ་ཞུས་ཡོད་འདུག།

ད་ལྟ་རྒྱ་ནག་ཏུ་བཙོན་འཇུག་བྱས་པའི་ཨ་རིའི་མི་སེར་༢༠༠་ལྷག་ཡོད་པར་བརྗོད། 

གསར་འགོད་པ།བསྟན་འཛིན་ཆོས་དབྱངས།