རྒྱ་གཞུང་ལ་ག་རེ་བྱེད་རྒྱུ་ཡོད།

ཆེད་བརྗོད། 

དེ་རིང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་ཕེ་ལོ་སི་ཐའེ་ཝན་དུ་གཞུང་འབྲེལ་གྱིས་ཕེབས་ནས། ཐའེ་ཝན་གྱི་སྲིད་འཛིན་ལྕམ་ཚེ་དབྱིན་ཝིན་དང་མཇལ་འཕྲད་ཀྱིས་གཞུང་འབྲེལ་གྱི་མཛད་སྒོ་ཞིག་ཀྱང་འཚོགས་སོང། ཉེ་སྔོན་རྒྱ་དམར་གཞུང་གིས་གལ་སྲིད་ཨ་རིའི་གྲོས་ཚོགས་འོག་མའི་ཚོགས་གཙོ་ནེན་སི་ཕེ་ལོ་སི་ཐའེ་ཝན་དུ་སླེབས་ན་མེ་ལ་ལག་པ་འཆང་བ་དང་གཅིག་མཚུངས་ཡིན་པའི་འཇིགས་སྐུལ་བྱས་པ་དང། རྒྱ་ནག་གི་དམག་དཔུང་ཡང་རང་གར་སྡོད་མི་སྲིད་པ་སོགས་འཇིགས་སྐུལ་བྱས་ཡོད་ཀྱང། ཨ་རིའི་གཞུང་གི་ངོས་ནས་དེ་ལ་དོ་སྣང་གང་ཡང་མ་བྱས་པར་ཕྱི་ཟླ་༨ ཚེས་༢ ཀྱི་མཚན་མོ་ཆུ་ཚོད་༡༠ དང་ཕྱེད་ཙམ་གྱི་ཐོག་ཨ་རིའི་ཆེད་གཉེར་གནམ་གྲུར་བཞུགས་ནས་ལྕམ་ནེན་སི་ཕེ་ལོ་སི་ཐའེ་ཝན་དུ་འབྱོར་ཡོད་པ་རེད། ད་ལྟ་རྒྱ་གཞུང་གི་ངོས་ནས་དེ་ལ་ཡ་ལན་ཇི་ལྟར་སློག་མིན་ཐོག་གནས་ཚུལ་གསལ་པོ་གང་ཡང་མེད་པ་དང། ཁ་རྡུང་དང་སྡིགས་ར་སྐུལ་བ་ལས་དོན་དངོས་ལག་ལེན་གྱི་ཐོག་ནས་རྒྱ་གཞུང་གིས་ཨ་རི་ལ་ཁ་གཏད་གཅོག་རྒྱུའི་བློ་ཁོག་མེད་ངེས་རེད།

མང་གཙོ་དང་རང་དབང་གི་ཐོབ་ཐང་ལོངས་སུ་སྤྱོད་བཞིན་པའི་ཐའེ་ཝན་མི་མང་དང་སྲིད་གཞུང་ལ་དུས་རྒྱུན་རྒྱ་གཞུང་གིས་འཇིགས་སྐུལ་བྱེད་བཞིན་ཡོད་ཀྱང། ཨ་རིའི་སྲིད་གཞུང་གི་ངོས་ནས་ཐའེ་ཝན་ལ་རྒྱབ་སྐྱོར་མཐའ་གཅིག་ཏུ་བྱ་རྒྱུའི་ལངས་ཕྱོགས་དེ་རྒྱལ་སྤྱིའི་སྟེང་དུ་གསལ་སྟོན་བྱས་པ་ཞིག་རེད། ད་ལྟའི་དུས་འདིར་ཐའེ་ཝན་ལ་མཚོན་ན་རྒྱ་གཞུང་ལ་ཡིད་ཆེས་བྱེད་མཁན་གྱི་མི་སྣ་ཉུང་དུ་སོང་ཡོད་པ་དང། ཐའེ་ཝན་གོ་མིན་ཏང་ཚོགས་པའི་ངོས་ནས་རྒྱ་གཞུང་དང་འབྲེལ་ལམ་གྱི་ཐོག་ནས་ཞི་འགྲིག་ཡོང་རྒྱུའི་རེ་བ་རྒྱག་གི་ཡོད་ཀྱང། ཧོང་ཀོང་གི་གནས་སྟངས་སོགས་ལ་བརྟེན་ནས་ཐའེ་ཝན་མི་མང་གིས་རྒྱ་གཞུང་ལ་ཡིད་ཆེས་ཆུང་དུ་སོང་ཡོད་པ་ནི། ཐའེ་ཝན་རང་བཙན་གྱི་ལངས་ཕྱོགས་འཛིན་མཁན་མང་གཙོ་ཡར་ཐོན་ཚོགས་པར་རྒྱལ་ཁ་མུ་མཐུད་ཐོབ་བཞིན་པ་འདི་ལ་བརྟེན་ནས་ར་སྤྲོད་བྱུང་ཡོད། མ་འོངས་པར་ཡང་ཐའེ་ཝན་མི་མང་དང་སྲིད་གཞུང་གི་ངོས་ནས་ལངས་ཕྱོགས་ལ་འགྱུར་བ་མ་སོང་ན། ཐའེ་ཝན་རང་བཙན་གྱི་ངོ་བོ་དེ་མུ་མཐུད་གནས་ཐུབ་པ་ནི་སྨྲོས་མི་དགོས་པར་གྱུར་འདུག

ཐའེ་ཝན་ལ་མཚོན་ན་དཔལ་འབྱོར་དང་། དམག་དོན། ཚོང་ལས་སོགས་གང་ཐད་ནས་ཡར་ཐོན་ཅན་ཡིན་པ་དང། མི་མང་གིས་རང་དབང་མང་གཙོའི་གོ་སྐབས་ལོངས་སུ་སྤྱོད་བཞིན་པས་ཆབ་སྲིད་ཀྱི་ཐོག་ནས་ཀྱང་ཡར་ཐོན་དང་མིག་དཔེར་འོས་པའི་རྒྱལ་ཁབ་ཅིག་ཏུ་གྱུར་ཡོད། གལ་སྲིད་ཐའེ་ཝན་གྱི་ངོས་ནས་ཐའེ་ཝན་མི་མང་དང་རྒྱ་མི་རིགས་དང་གཅིག་པ་ཡིན་པ་དང། ཐའེ་ཝན་ལ་རང་བཙན་གྱི་དགོས་མཁོ་མེད་པར་རྒྱ་དམར་གཞུང་གི་འོག་རང་སྲིད་རང་སྐྱོང་གི་གནས་བབས་ཙམ་ཞིག་བྱུང་ན་འགྲིག་པའི་ལྟ་ཚུལ་འཛིན་བཞིན་ཡོད་ན། རྒྱལ་སྤྱིའི་ཐོག་ནས་ཀྱང་དེ་ལ་ཡ་ལན་དང་དོ་སྣང་ཆེན་པོའི་ཐོག་རྒྱབ་སྐྱོར་བྱེད་མི་སྲིད་པ་རེད། ཐའེ་ཝན་དེ་མཉམ་འབྲེལ་རྒྱལ་ཚོགས་ཀྱི་ངོས་ནས་རྒྱལ་ཁབ་ཅིག་ཏུ་ངོས་འཛིན་མེད་པ་ཙམ་ལས། དོན་དངོས་སུ་འཛམ་གླིང་གི་རྒྱལ་ཁབ་མང་པོ་ཞིག་ལས་ལྷག་པར་ཡར་ཐོན་ཅན་གྱི་རྒྱལ་ཁབ་ཀྱི་ངོ་བོར་གནས་ཡོད། མ་འོངས་མུ་མཐུད་ཐའེ་ཝན་གཞུང་དང་མི་མང་ལངས་ཕྱོགས་བརྟན་པོར་གནས་ན་ཨ་རི་སོགས་སྟོབས་ཆེན་རྒྱལ་ཁབ་ཁག་གི་རྒྱབ་སྐྱོར་འཐོབ་ངེས་རེད།

ཕྱི་ལོ་༢༠༠༨ ལོར་བོད་ནང་ནས་ས་བྱི་ཞི་རྒོལ་ཆེན་མོ་བྱེད་བཞིན་པའི་སྐབས་སུ་ཨ་རིའི་གྲོས་ཚོགས་ཀྱི་ཚོགས་གཙོ་ལྕམ་ནེན་སི་ཕེ་ལོ་སི་བཞུགས་སྒར་དྷ་རམ་ས་ལར་ཕེབས་ནས། བོད་པ་རྣམས་ལ་གདུང་སེམས་མཉམ་བསྐྱེད་གནང་ཡོད། སྐབས་དེར་བཙན་བྱོལ་བོད་གཞུང་གི་ངོས་ནས་ཀྱང་རྒྱ་གཞུང་ལ་ཁ་གཏད་གདོང་ལེན་གྱི་རྣམ་འགྱུར་ཤུགས་ཆེན་པོ་ཞིག་སྟོན་ཐུབ་ཡོད་ན། བོད་ནང་གི་མི་མང་དང་བཙན་བྱོལ་སྤྱི་ཚོགས་ཀྱི་ཆབ་སྲིད་གནས་སྟངས་སོགས་གང་ཐད་ནས་ད་ལྟ་དང་གཅིག་མཚུངས་མ་ཡིན་པར་འགྱུར་བ་ཆེན་པོ་ཞིག་སོང་ཡོད་ངེས་ཤིང། བཙན་བྱོལ་བོད་གཞུང་གི་ངོས་ནས་མུ་མཐུད་རྒྱ་གཞུང་གི་འགོ་འཁྲིད་དང་དམར་པོའི་ལམ་ལུགས་འོག་སྡོད་རྒྱུའི་ལངས་ཕྱོགས་བཟུང་ཡོད་པ་དང། ད་ལྟའི་ཆར་ཡང་མུ་མཐུད་ལངས་ཕྱོགས་དེར་འགྱུར་བ་གང་ཡང་སོང་མེད་པས། བོད་པའི་ལངས་ཕྱོགས་དང་སྲིད་བྱུས་འདི་རྒྱ་དམར་གཞུང་ལ་ཁ་གཏད་གཅོག་ཆེད་འཛམ་གླིང་གི་སྟོབས་ཆེན་རྒྱལ་ཁབ་སུ་གཅིག་ལ་བེད་སྤྱོད་མེད་པས། ད་ཆ་བོད་དོན་ལ་རྒྱལ་སྤྱིའི་སྟེང་ནས་རྒྱབ་སྐྱོར་གྱི་རྣམ་པ་ཉག་ཕྲ་རུ་གྱུར་ཡོད།

མདོར་ན་རྒྱ་དམར་གཞུང་གིས་ཨ་རིའི་གྲོས་ཚོགས་ཀྱི་ཚོགས་གཙོ་ཐའེ་ཝན་དུ་སོང་ན་ཛ་དྲག་ཆེན་པོ་ཞིག་བྱ་རྒྱུ་ཡོད་པའི་རྣམ་འགྱུར་བསྟན་ཡོད་པ་དང། ཨ་རིའི་གྲོས་ཚོགས་ཀྱི་ཚོགས་གཙོ་ཐའེ་ཝན་དུ་སླེབས་ཟིན་པ་མ་ཟད། ཐའེ་ཝན་གྱི་སྲིད་འཛིན་དང་ཐུག་འཕྲད་ཀྱང་གནང་ཟིན་པས་རྒྱ་གཞུང་གིས་ཁ་ཤོམ་དེ་དག་དོན་ལ་གནས་མིན་འཛམ་གླིང་མི་མང་གིས་གསལ་པོ་བལྟས་ཡོད་པ་རེད། དོན་དངོས་སུ་རྒྱ་གཞུང་ནི་ཨ་རི་དང་ཐུག་དུས་ཤོག་བུའི་སྟག་བཞིན་ཕྱི་རྫིག་ནང་སྟོང་ལས་ནུས་པ་གང་ཡང་མེད། ཨ་རི་མ་ཡིན་པའི་རྒྱལ་ཁབ་ཆུང་བ་ཞིག་ཡིན་ན་ད་ལྟའི་ཆར་རྒྱ་གཞུང་གིས་འཇིགས་འཇིགས་རྔམ་རྔམ་གྱིས་ཁ་གཏད་གཅོག་ངེས་པ་རེད། ད་ལན་ཨ་རི་ཙམ་མ་ཟད། ཐའེ་ཝན་ཡང་རྒྱ་གཞུང་གི་འཇིགས་སྐུལ་ལ་མགོ་མ་བསྒུར་བར་ལངས་ཕྱོགས་མཁྲེགས་པོ་བཟུང་བ་འདིས་མ་འོངས་པར་ཐའེ་ཝན་རྒྱལ་སྤྱིའི་སྟེང་ནས་ངོས་འཛིན་ཡོད་པའི་རྒྱལ་ཁབ་ཅིག་ཏུ་འགྱུར་རྒྱུའི་གཞི་རྩར་གྱུར་ཡོད་པ་དང། བོད་པའི་ངོས་ནས་ཀྱང་རྒྱ་གཞུང་ལ་མཁྲེགས་པོ་བྱེད་མ་ཐུབ་ན་བོད་དོན་འཆི་རྒྱུ་ཉག་གཅིག་ལས་རེ་བ་གང་ཡང་མེད།།