རྒྱ་གར་གྱི་གྲོས་ཚོགས་ཚོགས་གཙོ་བྷི་ཇི་པིའི་ཆབ་སྲིད་ཚོགས་པའི་འོས་མི་ལ་རྒྱལ་ཁ་ཐོབ།

ཟླ་འདིའི་ཚེས་༢༦ ་ཉིན་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། རྒྱ་གར་གྱི་གྲོས་ཚོགས་ཀྱི་ཚོགས་གཙོ་གསར་པ་བྷི་ཇི་པིའི་ཆབ་སྲིད་ཚོགས་པའི་འོས་མི་ལ་རྒྱལ་ཁ་ཐོབ་འདུག

རྒྱ་གར་གྱི་སྐབས་བཅོ་བརྒྱད་པའི་གྲོས་ཚོགས་ཚོགས་དུས་དང་པོ་དེ་ཟླ་འདིའི་ཚེས་༢༤ ་ཉིན་དབུ་འཛུགས་གནང་ཞིང་། ཉིན་དེར་སྲིད་བློན་མོ་དྷིས་གཙོས་པའི་གསར་དུ་འདེམས་ཐོན་བྱུང་བའི་གྲོས་ཚོགས་འཐུས་མི་༢༨༠ དམ་འབུལ་ཞུས་ཡོད་འདུག དེ་རིང་གྲོས་ཚོགས་ཚོགས་དུས་ཉིན་གསུམ་པའི་སྐབས། གྲོས་ཚོགས་འཐུས་མི་༢༩༧ གྱིས་རྒྱ་གར་གྱི་གྲོས་ཚོགས་ཀྱི་ཚོགས་གཙོ་བྷི་ཇི་པིའི་ཆབ་སྲིད་ཚོགས་པའི་འོས་མི་ཨོམ་བྷེར་ལྰ་( Om Birla) ་ལ་རྒྱབ་སྐྱོར་བྱས་ནས་ཁོང་ལ་གྲོས་ཚོགས་ཀྱི་ཚོགས་གཙོའི་རྒྱལ་ཁ་ཐོབ་ཡོད་འདུག

ཁོང་ནི་ཕྱི་ལོ་༡༩༦༢ ལོར་སྐྱེས་ཞིང་ཕྱི་ལོ་༢༠༡༤ ནས་༢༠༡༩ བར་གྲོས་ཚོགས་ཀྱི་འཐུས་མི་དང་། ཕྱི་ལོ་༢༠༡༩ ནས་བཟུང་གྲོས་ཚོགས་ཀྱི་ཚོགས་གཙོའི་འགན་བཞེས་པར་བརྟེན། ཐེངས་འདིར་གྲོས་ཚོགས་ཀྱི་ཚོགས་གཙོར་བསྐོ་གཞག་གནང་བ་ཐེངས་གཉིས་པ་དེ་ཆགས་ཡོད་འདུག
སྲིད་བློན་མོ་དྷི་ཡིས་ཚོགས་གཙོ་གསར་པའི་འཛུམ་མདངས་ཀྱིས་གྲོས་ཚོགས་ཀྱི་འཐུས་མི་ཡོངས་ལ་སྤྲོ་སྣང་སྟེར་རྒྱུ་རེད་ཅེས་དང་ཁོང་ཉིད་ཚོགས་གཙོ་ལ་ཐེངས་གཉིས་པ་འདེམས་ཐོན་བྱུང་བ་ནི་གཟི་བརྗིད་གཅིག་རེད་ཅེས་བརྗོད་ནས་ཁོང་ལ་རྟེན་འབྲེལ་ཞུས་ཡོད་འདུག

ཕྱོགས་འགལ་ཚོགས་པའི་འགོ་ཁྲིད་རཱ་ཧུལ་གྷན་དྷི་ཡིས་ཕྱོགས་འགལ་ཆབ་སྲིད་ཚོགས་པའི་ཚབ་བྱས་ནས་གྲོས་ཚོགས་ཀྱི་ཚོགས་གཙོ་ཐེངས་གཉིས་པར་འདེམས་ཐོན་བྱུང་བར་འཚམས་འདྲི་ཞུས་པ་དང་སྦྲགས། གྲོས་ཚོགས་ཀྱིས་རྒྱ་གར་བ་ཡོངས་ཀྱི་འབོད་སྒྲ་མཚོན་གྱི་ཡོད་པ་དང་། ཕྱོགས་འགལ་ཆབ་སྲིད་ཚོགས་པས་ཀྱང་རྒྱ་གར་གྱི་མི་མང་སྔར་ལས་མང་བའི་སྐད་སྒྲ་མཚོན་གྱི་ཡོད་པར་བརྗོད་འདུག
ཚོགས་གཙོ་གསར་པས་གྲོས་ཚོགས་སུ་གསུང་བཤད་གནང་སྐབས། གྲོས་ཚོགས་ཀྱི་འཐུས་མི་ཚང་མས་རྒྱལ་ཁབ་ཀྱི་ཆེད་དུ་མཉམ་རུབ་བྱེད་དགོས་པ་དང་། འཐུས་མི་ཚང་མ་གྲོས་ཚོགས་སུ་ཡ་རབས་ཚུལ་མཐུན་དགོས་པའི་འབོད་སྐུལ་ཞུས་ཡོད་འདུག

རྒྱ་གར་གྱི་སྐབས་བཅོ་བརྒྱད་པའི་གྲོས་ཚོགས་ཚོགས་དུས་དང་པོ་དེ་ཟླ་འདིའི་ཚེས་༢༤ ཉིན་འགོ་བཙུགས་ཡོད་པ་དང་ཟླ་༧ ཚེས་༣ བར་འཚོག་རྒྱུ་རེད་འདུག་ལ། སང་ཉིན་ཚེས་༢༧ ་ཉིན་རྒྱ་གར་གྱི་སྲིད་འཛིན་གྱིས་གྲོས་ཚོགས་སུ་གཏམ་བཤད་སྤེལ་རྒྱུ་དང་ཟླ་བ་རྗེས་མའི་ཚེས་༢ ་ཉིན་སྲིད་བློན་མོ་དྷི་ཡིས་གྲོས་ཚོགས་སུ་གཏམ་བཤད་སྤེལ་རྒྱུ་རེད་འདུག
ཐེངས་འདིའི་གྲོས་ཚོགས་སུ་ཟ་འབྲུའི་རིན་གོང་འཕར་བཞིན་པ་དང་རྒྱལ་ཡོངས་ཀྱི་སློབ་ཕྲུག་ཚོའི་ཚུད་རྒྱུགས་དང་འབྲེལ་བའི་དྲི་ཤོག་ཕྱིར་གྱར་བ། ལས་མེད་ཀྱི་གྲངས་ཀ་འཕར་བཞིན་པའི་དཀའ་ངལ་སོགས་ཀྱི་ཐོག་གྲོས་བསྡུར་བྱེད་རྒྱུའི་ཚོད་དཔག་བྱེད་བཞིན་འདུག།

གསར་འགོད་པ། བློ་བཟང་རྒྱ་མཚོ།