རྒྱ་གར་གྱི་དམག་མིར་བོད་ཡིག་སློབ་ཁྲིད་བྱེད་འགོ་བཙུགས་ཟིན་འདུག

 རྒྱ་གར་གྱི་དམག་མིའི་སྒྲིག་འཛུགས་ནས་རྒྱ་ནག་གི་དྲིལ་བསྒྲགས་དང་ཤུགས་རྐྱེན་རྒྱ་སྐྱེད་ལ་ཁ་གཏད་གཅོག་ཆེད་དུ། དམག་མི་རྣམས་ལ་བོད་ཀྱི་སྐད་ཡིག་དང་ལོ་རྒྱུས་སོགས་སློབ་ཁྲིད་བྱེད་འགོ་བཙུགས་ཟིན་ཡོད་འདུག 

ཟླ་༡༠ པའི་ཚེས་༢༠ ཉིན་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཉེ་ཆར་རྒྱ་གར་གྱི་དམག་གི་སྒྲིག་འཛུགས་ཀྱི་མཐོ་རིམ་དཔོན་རིག་ཤིག་གིས། དམག་གི་སྒྲིག་འཛུགས་ནས་ཨ་རུ་ན་ཅལ་མངའ་སྡེ་རུ་ཡོད་པའི་ཧི་མ་ལ་ཡའི་རིག་གཞུང་སློབ་གཉེར་ཁང་དང་། འབྲས་ལྗོངས་སུ་ཡོད་པའི་རྣམ་རྒྱལ་བོད་རིག་པའི་ལྟེ་གནས་ཁང་གཉིས་མཉམ་དུ་གན་རྒྱ་བཞག་ནས། དམག་མི་རྣམས་ལ་བོད་ཡིག་སློབ་ཁྲིད་བྱེད་འགོ་བཙུགས་ཡོད་ཁར། ཟླ་༣ པའི་ནང་དམག་མི་༡༥ ལ་སྔོན་འགྲོའི་སློབ་ཁྲིད་ཀྱི་ལས་རིམ་ཞིག་མཇུག་བསྒྲིལ་ཟིན་ཡོད་པ་དང་། ཟླ་༡༡ པའི་ནང་དང་བླངས་དམག་མི་༢༠ ལ་སློབ་ཁྲིད་བྱེད་རྒྱུ་ཡིན་སྐོར་བརྗོད་འདུག 

དེ་ཡང་ལོ་སྔོན་མའི་ཟླ་༡༠ པར་མཐོ་རིམ་དམག་དཔོན་གྱི་ཚོགས་ཆེན་ཞིག་གི་ཐོག་ཏུ་བོད་ཀྱི་སྐད་ཡིག་དང་ལོ་རྒྱུས་སོགས་ཀྱི་སློབ་ཚན་ཐོག་གླེང་སློང་བྱུང་བའི་རྗེས། སིམ་ལར་རྟེན་གཞི་བྱས་པའི་དམག་སྦྱོང་ལྟེ་གནས་ཁང་(Army Training Command) གིས་མུ་མཐུད་དེ་ལ་ཞིབ་འཇུག་དང་བགྲོ་གླེང་བྱས་ཡོད་འདུག

 རྒྱ་གར་གྱི་དམག་སྦྱོང་ལྟེ་གནས་ཁང་དེས་བོད་རིག་པ་སྦྱོབ་སྦྱོང་བྱེད་སའི་ཤེས་ཡོན་ལྟེ་གནས་ཁང་བདུན་ངོས་འཛིན་བྱས་འདུག་པའི་ནང་། ཝཱ་ར་ན་སིར་(Varanasi) རྟེན་གཞི་བྱས་པའི་ཝཱ་ན་དབུས་བོད་ཀྱི་གཙུག་ལག་སློབ་གཉེར་ཁང་དང་། རྒྱ་གར་ལྷོ་ཕྱོགས་བྷེང་ལོར་(Bengaluru) དུ་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་གཉིས་བཞག་འདུག་ཀྱང་། དངོས་སུ་དམག་གི་སྒྲིག་འཛུགས་དང་གན་རྒྱ་འཇོག་སྐབས་རྒྱ་གར་གྱི་ལྟེ་གནས་ཁང་གཉིས་དང་བཞག་ཡོད་པ་རེད།

ཧི་མ་ལ་ཡའི་རིག་གཞུང་སློབ་གཉེར་ཁང་གི་འགན་འཛིན་གཞོན་པ་ཀཱེ་མུ་པཱ་ཌུ་ཡིས། ཟླ་བ་དྲུག་རིང་གི་འཛིན་གྲྭ་དེ་ནི་དམག་གི་སྒྲིག་འཛུགས་ཀྱིས་ཞིབ་འཇུག་དང་ཁས་ལེན་བྱས་པ་ཞིག་ཡིན་པ་དང་། དེའི་ནང་དུ་བོད་ཀྱི་ལོ་རྒྱུས་དང་རིག་གཞུང་། ལྟ་གྲུབ། ཆབ་སྲིད། མི་འབོར་། མངའ་ཁོངས་ཆབ་སྲིད་སོགས་སློབ་ཁྲིད་བྱེད་ཀྱི་ཡོད་པ་དང་། དེའི་དམིགས་ཡུལ་ནི་ཐོག་མར་ས་མཚམས་ཁུལ་གྱི་དམག་དཔུང་རེ་ནས་དམག་མི་མཐོ་བ་(Officer) རེར་སློབ་ཁྲིད་བྱེད་རྒྱུ། ཕྱིས་སུ་རིམ་པས་དམག་མིའི་གོ་གནས་ཆུང་བ་དང་འབྲིང་བ་རྣམས་ལ་ཡང་སློབ་ཁྲིད་བྱེད་འཆར་ཡོད་སྐོར་བརྗོད་འདུག 

དེ་ཡང་མཐོ་རིམ་དམག་མི་ཞིག་གིས་སློབ་ཚན་དེའི་དགོས་དམིགས་གཙོ་བོ་ཞིག་ནི། དམག་མི་རྣམས་ཀྱིས་བོད་ཀྱི་སྐད་ཡིག་དང་རིག་གཞུང་ཤེས་པའི་ཐོག་ནས་རྒྱ་གར་གྱི་ས་ཁོངས་སུ་ཡོད་པའི་བོད་རིགས་དང་འབྲེལ་བ་བྱེད་ཐུབ་པ་ཆགས་ནས། རྒྱ་ནག་གི་དྲིལ་བསྒྲགས་དང་རྒྱ་སྐྱེད་ལས་དོན་ལ་ཁ་གཏད་གཅོག་ཐུབ་ཆེད་ཡིན་སྐོར་བརྗོད་འདུག །

གསར་འགོད་པ་སྐལ་བཟང་དོན་གྲུབ།