རྒྱ་གར་གྱི་ཕ་མ་གཉིས་ཀྱིས་ཏ་ལི་བྷན་ལ་ཁྲིམས་གཏུག་བྱས་འདུག
དམར་གསོད་བཏང་བའི་རྒྱ་གར་གྱི་གསར་འགོད་པ་གྲགས་ཅན་ཞིག་གི་ཕ་མ་གཉིས་ཀྱིས། རྒྱལ་སྤྱིའི་ཉེས་ཅན་ཁྲིམས་ཁང་དུ་ཏ་ལི་བྷན་གྱི་འགོ་ཁྲིད་མི་སྣ་༦ ལ་ཁྲིམས་གཏུག་བྱས་འདུག
ཟླ་༣ པའི་ཚེས་༢༣ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། རྒྱལ་སྤྱིའི་ནང་གསར་འགོད་པའི་གཟེངས་རྟགས་མང་པོ་ཐོབ་མྱོང་མཁན་རྒྱ་གར་གྱི་པར་ལེན་གསར་འགོད་པ་གྲགས་ཅན་ཌ་ནཱིཤ་སཱི་ཌིག་གིས་ཨབ་གྷ་ནི་སེ་ཐན་ནང་དུ་གསར་འགོད་ལས་རིགས་བྱེད་བཞིན་པའི་སྐབས་སུ། ཏ་ལི་བྷན་དྲག་སྤྱོད་རུ་ཁག་གིས་དམར་གསོད་བཏང་བའི་གནད་དོན་དང་འབྲེལ་ནས། ཉེ་ཆར་ཁོང་གི་ཕ་མ་གཉིས་ཀྱིས་རྒྱལ་སྤྱིའི་ཉེས་ཅན་ཁྲིམས་ཁང་དུ་ཏ་ལི་བྷན་གྱི་འགོ་ཁྲིད་མི་སྣ་༦ ཁྲིམས་གཏུག་བྱས་ཡོད་འདུག
དེ་ཡང་ཕྱི་ལོ་༢༠༢༡ ལོའི་ཟླ་༧ པའི་ནང་གསར་འགོད་པ་ཁོང་ཨབ་གྷ་ནི་སེ་ཐན་ནང་དུ། ཨ་རི་དང་མཐུན་ཕྱོགས་རྒྱལ་ཁབ་ཁག་གི་དམག་མི་རྣམས་ཕྱིར་འཐེན་བྱེད་བཞིན་པའི་སྐབས་དང་བསྟུན་ནས། ཏ་ལི་བྷན་གྱིས་དམག་འཁྲུག་རྒྱག་བཞིན་ཡོད་པ་དེར་པར་ལེན་ལས་དོན་བྱེད་སར་སླེབས་ཡོད་འདུག་པ་དང་། ཐོག་མར་ཟླ་༧ པའི་ཚེས་༡༦ ཉིན་ཕྱོགས་གཉིས་བར་དམག་འཐབ་བྱེད་བཞིན་པའི་སྐབས་སུ་ཁོང་ལ་མེ་མདའ་ཕོག་ནས་གྲོངས་ཡོད་པའི་གནས་ཚུལ་ཐོན་ཡང་། རྗེས་སུ་ཁོང་གྲོངས་མེད་ཁར་ཉེ་འགྲམ་གྱི་ཁ་ཆེ་ལྷ་ཁང་ཞིག་ཏུ་སྨན་བཅོས་བྱེད་ཆེད་དུ་ཁྲིད་ཡོད་པའི་གནས་ཚུལ་ཐོན་ཡོད་པ་རེད། དེའི་རྗེས་སུ་ག་རེ་བྱུང་བ་གསལ་པོ་མེད་ཀྱང་། རྒྱ་གར་དང་ཨབ་གྷན་གྱི་བདེ་སྲུང་མི་སྣ་ཚོས་བརྗོད་དོན་ལ། ཏ་ལི་བྷན་དྲག་སྤྱོད་རུ་ཁག་གིས་གསར་འགོད་པ་འཛིན་བཟུང་བཀག་ཉར་བྱས་ཏེ་དམར་གསོད་བཏང་ཡོད་པ་དང་། དེའི་རྗེས་ལུས་པོ་གཅོད་བྲེག་བྱས་ཡོད་སྐོར་བརྗོད་འདུག
ཏ་ལི་བྷན་དྲག་སྤྱོད་རུ་ཁག་གིས་གསར་འགོད་པའི་ལུས་པོ་གཅོད་བྲེག་བྱས་པའི་ཉེས་འཛུགས་ལ་ཁས་ལེན་བྱས་མེེད་ཁར། ཁོ་ཚོས་གསར་འགོད་པའི་ཤི་རོ་རྙེད་སྐབས་སྔོན་ཚུད་ནས་གཅོད་བྲེག་བྱས་ཟིན་ཡོད་པ་རྙེད་ཡོད་སྐོར་བརྗོད་འདུག
གསར་འགོད་པའི་ཕ་མ་གཉིས་ཀྱིས་ཏ་ལི་བྷན་གྱི་སྐད་ཆར་དགག་བྱ་བྱས་འདུག་པ་དང་། ཁོང་གཉིས་ཀྱི་ཁྲིམས་རྩོད་པས་བརྗོད་དོན་ལ། ཏ་ལི་བྷན་གྱིས་ཁོང་གཉིས་ཀྱི་བུ་དེ་གསར་འགོད་པ་དང་རྒྱ་གར་བ་ཞིག་ཡིན་རྐྱེན་དམར་གསོད་བཏང་ཡོད་པས། དེ་ནི་རྒྱལ་སྤྱིའི་ཐོག་ནས་ཉེས་ཅན་གྱི་བྱ་སྤྱོད་གཅིག་ཡིན་པ། ཏ་ལི་བྷན་གྱིས་གསར་འགོད་པ་དེ་དམར་གསོད་བཏང་རྗེས། ལུས་ཐོག་ཏུ་རླངས་འཁོར་ཆེན་པོ་དེ་འདྲ་བཏང་ཡོད་པ་དང་། ཡན་ལག་རྣམས་གཅོད་བྲེག་བྱས་ཡོད་པ། ཁོང་གི་ལུས་པོའི་ཐོག་ཏུ་གདུག་རྩུབ་ཅན་གྱི་མནར་གཅོད་བཏང་བའི་དཔང་རྟགས་དང་། མེ་མདའི་མདེའུ་༡༢ ཀྱི་ཤུལ་ཡོད་སྐོར་བརྗོད་འདུག
གསར་འགོད་པ་ཁོང་ནི་རྒྱ་གར་གྱི་གྲོང་ཁྱེར་མུམ་བྷེ་ནས་ཡིན་པ་དང་། ལོ་ངོ་བཅུ་ཕྲག་གཅིག་ལས་མང་བའི་རིང་རྒྱལ་སྤྱིའི་གསར་ཁང་རེའུ་ཊར་གྱི་པར་ལེན་གསར་འགོད་པའི་ལས་ཀ་བྱས་ཡོད་འདུག ཕྱི་ལོ་༢༠༡༨ ལོར་ཁོང་དང་ལས་རོགས་ཁག་ཅིག་གིས་འབར་མའི་གྲངས་ཉུང་མི་རིགས་རུང་གྷེ་ཡ་རྣམས་ཀྱིས་དྲག་སྤྱོད་མྱངས་བའི་ཐོག་པར་ཕྱོགས་བསྒྲིགས་བྱས་པས། ལས་དོན་དེར་རྒྱལ་སྤྱིའི་ནང་ཆེ་མཐོང་ལྡན་པའི་(Pulitzer Prize) ཐོབ་ཡོད་པ་དང་། དེ་བཞིན་ལོ་སྔོན་མར་རྒྱ་གར་ནང་དུ་ཏོག་དབྱིབས་གཉན་རིམས་གྱི་རྦ་རླབས་གཉིས་པའི་སྐབས་སུ། ཚེ་སྲོག་ཤོར་མཁན་མང་པོ་ཞིག་དུས་མཉམ་དུ་ཕུང་པོ་མེར་བསྲེགས་བཏང་བའི་པར་བླངས་པ་དེར། རྒྱལ་སྤྱིའི་ཐོག་ནས་ཆེ་མཐོང་ཆེན་པོ་ཐོབ་ཡོད་པ་རེད་འདུག །
གསར་འགོད་པ་སྐལ་བཟང་དོན་གྲུབ།
