རྒྱ་གར་གྱི་མངའ་སྡེ་གལ་གནད་ཆེ་ཤོས་ནང་འོས་བསྡུ་འགོ་འཛུགས་བྱས་འདུག 

རྒྱ་གར་གྱི་བྱང་ཕྱོགས་མངའ་སྡེ་ཡུ་པཱི་ནང་དུ་མངའ་སྡེའི་གྲོས་ཚོགས་འོས་བསྡུ་འགོ་འཛུགས་བྱས་འདུག་པ་དང་། འོས་བསྡུ་དེའི་གྲུབ་དོན་དེས་ཕྱི་ལོ་༢༠༢༤ ལོའི་དབུས་གྲོས་ཚོགས་འོས་བསྡུར་ཡང་ཤུགས་རྐྱེན་སྤྲོད་སྲིད་འདུག་པས། མངའ་སྡེ་དེའི་མི་འབོར་དང་དབུས་གྲོས་ཚོགས་ནང་དུ་མངའ་སྡེ་དེ་ནས་རྐུབ་སྟེགས་ཀྱི་གྲངས་སོགས་ལ་བརྟེན་ནས་འོས་བསྡུ་དེ་ཤིན་ཏུ་གལ་ཆེན་དང་། ད་ཡོད་སྲིད་བློན་གྱི་ལས་དོན་ལ་རྒྱབ་སྐྱོར་ཡོད་མེད་ཀྱི་རྣམ་པ་སྟོན་པའི་སྡིངས་ཆ་གལ་ཆེན་ཞིག་ཡིན་འདུག 

ཟླ་༢ པའི་ཚེས་༡༠ ཉིན་མི་འབོར་ས་ཡ་༢༤༠ དང་འོས་ཤོག་འཕེན་མཁན་ས་ཡ་༡༥༠ ཡོད་པའི་རྒྱ་གར་གྱི་ཡུ་པཱི་མངའ་སྡེའི་གྲོས་ཚོགས་འོས་བསྡུའི་རིམ་པ་དང་པོ་དེ་དངོས་སུ་འགོ་བཙུགས་འདུག དེ་ཡང་མངའ་སྡེ་དེའི་ས་ཁྱོན་དང་མི་འབོར་ཤིན་ཏུ་ཆེན་པོ་ཡོད་པས། མངའ་སྡེའི་གྲོས་ཚོགས་འོས་བསྡུ་དེ་ཟླ་བ་གཅིག་རིང་རིམ་པ་བདུན་ལ་ཆ་བགོས་ཀྱིས་འོས་བསྡུ་བྱེད་རྒྱུ་ཡིན་འདུག་པ་དང་། འོས་ཤོག་རྩིས་བཤེར་དེ་ཟླ་༣ པའི་ཚེས་༡༠ ཉིན་བྱེད་འཆར་ཡོད་པ་རེད། 

ད་ལྟའི་ཆར་མངའ་སྡེ་དེའི་གཞུང་འཛིན་ཚོགས་པ་དེ་དབུས་གཞུང་འཛིན་ཚོགས་པ་བྷི་ཇེ་བྷི་ཡིན་པ་དང་། ཁ་གཏད་དུ་ས་གནས་རང་གི་སྲིད་དོན་ཚོགས་པ་ཤུགས་རྐྱེན་ལྡན་པ་ཁག་ཅིག་དང་། དེ་བཞིན་ད་ལྟའི་ཆར་ཤུགས་རྐྱེན་ཉམས་རྒུད་དུ་སོང་བའི་དབུས་ཕྱོགས་འགལ་སྲིད་དོན་ཚོགས་པ་གཙོ་བོ་ཀཱོང་རེ་སེ་ཡང་ཡོད་པ་རེད། 

རྒྱ་གར་གྱི་དབུས་གྲོས་ཚོགས་ནང་དུ་མངའ་སྡེ་དེར་འཐུས་མི་༨༠ ཡོད་པ་དང་། རྐུབ་སྟེགས་གྲངས་ཀ་དེ་ནི་མངའ་སྡེ་གཅིག་ནས་དབུས་གྲོས་ཚོགས་སུ་ཡོད་པའི་རྐུབ་སྟེགས་གྲངས་མཐོ་ཤོས་དེ་ཆགས་ཀྱི་ཡོད་པས། སྲིད་དོན་པ་ཚོས་བཤད་རྒྱུན་ལ་མངའ་སྡེ་དེ་ནས་དབུས་གྲོས་ཚོགས་འོས་བསྡུར་སུ་ལ་རྒྱལ་ཁ་ཐོབ་ན། རྒྱལ་ཡོངས་གྲོས་ཚོགས་འོས་བསྡུར་རྒྱལ་ཁ་ཐོབ་རྒྱུ་ཡིན་པ་དང་། སྲིད་དོན་ཚོགས་པ་དེའི་འགོ་ཁྲིད་སྲིད་བློན་ཆགས་རྒྱུ་རེད་ཅེས་བརྗོད་སྲོལ་ཡོད་པས། དབུས་གྲོས་ཚོགས་འོས་བསྡུར་རྒྱལ་ཁ་ཐོབ་པར་མངའ་སྡེ་དེའི་གྲོས་ཚོགས་འོས་བསྡུར་རྒྱལ་ཁ་ཐོབ་རྒྱུ་ཤིན་ཏུ་གལ་ཆེན་ཆགས་ཡོད་པ་རེད། 

ཕྱི་ལོ་༡༩༩༠ གོ་གྲངས་ནས་མངའ་སྡེའི་གྲོས་ཚོགས་འོས་བསྡུར་ས་གནས་ཀྱི་སྲིད་དོན་ཚོགས་པ་ཆེ་ཁག་གཉིས་ཀྱིས་གཞུང་འཛིན་བྱས་ཏེ་ཡོང་ཡོད་ཀྱང་། ཕྱི་ལོ་༢༠༡༧ ལོའི་མངའ་སྡེའི་གྲོས་ཚོགས་འོས་བསྡུར་དབུས་གཞུང་འཛིན་སྲིད་དོན་ཚོགས་པ་བྷི་ཇེ་བྷི་ལ་གྲོས་ཚོགས་ཀྱི་རྐུབ་སྟེགས་ཁྱོན་༤༠༣ ཡོད་པའི་ཁོངས་ནས་༣༡༢ ཐོབ་ནས་རྒྱལ་ཁ་ཆེན་པོ་ཐོབ་ཡོད་ཁར། བྷི་ཇི་བྷི་ནས་མངའ་སྡེ་དེའི་སྤྱི་ཁྱབ་བློན་ཆེན་ཡང་རྩོད་རྙོག་ཆེ་བའི་ཧིན་རྡུ་མི་རིགས་རིང་ལུགས་པ་ཆོས་དཔོན་ཞིག་བསྐོ་གཞག་བྱས་ཡོད་པ་རེད། འདས་པའི་ལོ་ལྔའི་ནང་ཏོག་དབྱིབས་དང་ཞིང་པའི་བདེ་སྡུག གཞོན་སྐྱེས་ལས་མེད་སོགས་ཀྱི་གནད་དོན་མང་པོ་ཞིག་ལ་བརྟེན་ནས། ཐེངས་འདིར་བྷི་ཇི་བྷི་ལ་རྒྱལ་ཁ་བསྐྱར་དུ་ཐོབ་རྒྱུ་ཡིན་མིན་ཤོད་ཚོད་དཀའ་ཡང་། ཕྱི་ལོ་༡༩༨༩ ལོ་ནས་མངའ་སྡེ་དེའི་ནང་ད་བར་སྲིད་དོན་ཚོགས་པ་གཅིག་ལ་རྒྱལ་ཁ་བསྟུད་མར་ཐེངས་གཉིས་ཐོབ་མྱོང་མེད་འདུག

དེ་བཞིན་མངའ་སྡེ་དེའི་ནང་ཤུགས་རྐྱེན་ལྡན་པའི་ས་གནས་སྲིད་དོན་ཚོགས་པ་(BSP) ཡིས་ས་གནས་ཀྱི་སྲིད་དོན་ཚོགས་པ་ཆུང་ཆུང་མང་པོ་ཞིག་དང་ཟླ་སྒྲིལ་གྱི་གྲོས་མཐུན་འཇོག་ཐུབ་ཡོད་པ་མ་ཟད། གལ་ཏེ་ཁོང་ལ་རྒྱལ་ཁ་ཐོབ་ཚེ། ཁྱིམ་ཚང་ཚང་མར་གློག་རིན་མེད་བཟོ་རྒྱུ་དང་། ཉམས་ཐག་བུད་མེད་རྣམས་ལ་རྒས་ཕོགས། ཞིང་པ་ཚོར་སྐྱེད་འབབ་མེད་པའི་བུན་གཡར་སོགས་ཀྱི་ཁས་ལེན་མང་པོ་ཞིག་བྱས་འདུག 

མངའ་སྡེ་དེའི་མི་འབོར་ཤུགས་ཏུ་ཆེན་པོ་ཡོད་རྐྱེན། གལ་ཏེ་མངའ་སྡེ་རྒྱལ་ཁབ་གཅིག་ཡིན་ཚེ་འཛམ་གླིང་ནང་མི་འབོར་མང་ཤོས་ཀྱི་རྒྱལ་ཁབ་༥ པ་དེ་ཆགས་རྒྱུ་ཡིན་འདུག དེ་བཞིན་ད་བར་རྒྱ་གར་གྱི་དབུས་སྲིད་དོན་ཁོར་ཡུག་ནང་ཤུགས་རྐྱེན་ཆེ་བའི་སྲིད་བློན་དང་། སྲིད་དོན་ཚོགས་པ་ཁག་གི་འགོ་ཁྲིད་སོགས་མང་པོ་ཞིག་མངའ་སྡེ་དེ་ནས་ལངས་ཀྱི་ཡོད་པ་རེད།

གསར་འགོད་པ་སྐལ་བཟང་དོན་གྲུབ།