རྒྱ་གར་གྱི་མི་རིགས་ཤིག་དབྱིན་ཡུལ་གྱི་སྲིད་བློན་ཆགས་སྲིད་པ་རེད་འདུག 

དབྱིན་ཡུལ་གྱི་སྲིད་བློན་བྷེ་རེ་སི་རྗོན་སོན་ལས་གནས་ནས་རྩ་དགོངས་ཞུ་དགོས་པ་ཆགས་རྗེས། ད་ལྟའི་ཆར་སྲིད་བློན་གྱི་མཐའ་མའི་འོས་མི་གཉིས་ཀྱི་ཁོངས་སུ་འོས་མི་གཅིག་གི་མི་རྒྱུད་ནི་རྒྱ་གར་ཡིན་འདུག་པ་དང་། གལ་ཏེ་ཁོང་སྲིད་བློན་ཆགས་ཚེ་དབྱིན་ཡུལ་གྱི་ལོ་རྒྱུས་ནང་དུ་མི་རིགས་དཀར་པོ་མིན་མཁན་ཞིག་སྲིད་བློན་ཆགས་པ་ཐེངས་དང་པོ་རེད་འདུག 

ཟླ་༧ པའི་ཚེས་༢༠ ཉིན་དབྱིན་ཡུལ་གྱི་གཞུང་འཛིན་རྙིང་ཞེན་ཚོགས་པའི་གྲོས་ཚོགས་འཐུས་མི་ཚོས། སྲིད་དོན་ཚོགས་པ་དེའི་འགོ་ཁྲིད་ཀྱི་འོས་མི་འོས་འདེམས་བྱས་ཏེ། མཐའ་མའི་འོས་མི་གཉིས་འདེམས་ཐོན་བྱུང་བ་ཁོངས་ནས། ཨང་དང་པོ་རྒྱ་གར་གྱི་མི་རིགས་ཡིན་པ་དབྱིན་ཡུལ་གྱི་དཔལ་འབྱོར་བློན་ཆེན་ཟུར་པ་རཱི་ཤི་སུ་ནེག་ལ་འོས་གྲངས་༡༣༠ དང་། ཨང་གཉིས་པར་དབྱིན་ཡུལ་གྱི་ཕྱི་སྲིད་དྲུང་ཆེ་ལྕམ་ལཱི་ཛ་ཀྲེ་རུ་སཱེ་ལ་འོས་གྲངས་༡༡༣ ཐོབ་འདུག 

གཞུང་འཛིན་རྙིང་ཞེན་ཚོགས་པའི་འགོ་ཁྲིད་དུ་སུ་འདེམས་ཐོན་བྱུང་ན་དེ་དབྱིན་ཡུལ་གྱི་སྲིད་བློན་ཆགས་རྒྱུ་ཡིན་པ་དང་། ད་ལྟའི་ཆར་སྲིད་དོན་ཚོགས་པ་དེའི་གྲོས་ཚོགས་འཐུས་མི་ཚོས་འགོ་ཁྲིད་འོས་མི་མཐའ་མ་གཉིས་འོས་འདེམས་བྱས་ཟིན་པས། ཟླ་༨ པའི་ནང་སྲིད་དོན་ཚོགས་པ་དེའི་ཚོགས་མི་འབུམ་གཅིག་དང་ཁྲི་དྲུག་ལྷག་གིས། འོས་མི་དེ་གཉིས་ཁོངས་ནས་གཅིག་ལ་འོས་ཤོག་འཕེན་རྒྱུ་ཡིན་འདུག་པ་དང་། འོས་གྲངས་མང་ཤོས་སུ་ལ་ཐོབ་ན་དེ་སྲིད་དོན་ཚོགས་པའི་འགོ་ཁྲིད་དང་དབྱིན་ཡུལ་གྱི་སྲིད་བློན་ཆགས་རྒྱུ་རེད་འདུག 

ད་ལྟའི་ཆར་མཐའ་མའི་འོས་མི་གཉིས་ཀྱིས་དབྱིན་ཡུལ་གྱི་ས་གནས་འདྲ་མིན་ལ་བགྲོ་གླེང་མི་འདྲ་བ་༡༢ ནང་མཉམ་ཞུགས་བྱེད་རྒྱུ་ཡིན་འདུག་པ་དང་། རྙིང་ཞེན་ཚོགས་པའི་ཚོགས་མི་ཚོས་ཟླ་༨ པའི་ཚེས་༥ ཡི་སྔོན་དུ་རང་གི་འོས་ཤོག་དེ་དྲ་ཐོག་ནས་འཕེན་པའམ་ཡང་ན་སྦྲག་ཐོག་ནས་བསྐུར་རྒྱུ་ཡིན་ཁར། མཐའ་མའི་གྲུབ་འབྲས་དེ་ཟླ་༩ པའི་ཚེས་༥ ཉིན་གསལ་བསྒྲགས་བྱེད་རྒྱུ་རེད་འདུག 

རྙིང་ཞེན་ཚོགས་པའི་གྲོས་ཚོགས་འཐུས་མི་ཚོས་འོས་བསྡུ་རིམ་པ་ཁ་ཤས་བྱས་པའི་གྲུབ་དོན་དུ། དཔལ་འབྱོར་བློན་ཆེན་ཟུར་པ་རཱི་ཤི་སུ་ནེག་ལ་བསྟུད་མར་འོས་གྲངས་མཐོ་ཤོས་ཐོབ་ཡོད་ཀྱང་། མཐའ་མའི་འོས་བསྡུ་དེ་རྙིང་ཞེན་ཚོགས་པའི་ཚོགས་མི་ཚོས་བྱེད་ཀྱི་ཡོད་པས། ཚོགས་མི་དེ་དག་གི་ཁོངས་སུ་ཕལ་ཆེ་བ་མི་རིགས་དཀར་པོ་དང་དཔལ་འབྱོར་གནས་སྟངས་ཡག་པོ་ཡོད་མཁན་ཡིན་ཁར། རཱི་ཤི་སུ་ནེག་ལ་རྒྱབ་སྐྱོར་བྱེད་མཁན་ཉུང་ཉུང་ཡོད་པའི་ཚོད་དཔག་བྱེད་བཞིན་འདུག་ཀྱང་། འོས་བསྡུའི་བགྲོ་གླེང་ལས་རིམ་སོགས་ལ་བརྟེན་ནས་ཚོགས་མི་ཚོའི་བསམ་བློར་ཤུགས་རྐྱེན་འགྲོ་སྲིད་པ་ཡང་རེད་འདུག 

དཔལ་འབྱོར་བློན་ཆེན་ཟུར་པ་རཱི་ཤི་སུ་ནག་གི་མེས་པ་རྣམས་རྒྱ་གར་གྱི་མངའ་སྡེ་པན་ཇབ་ནས་ཡིན་འདུག་པ་དང་། ཁོང་དབྱིན་ཡུལ་དུ་སྐྱེས་ནས་སྙན་གྲགས་ཆེ་བའི་ཨོག་སེ་ཧྥོར་ཌ་གཙུག་ལག་སློབ་གཉེར་ཁང་སོགས་ལ་སློབ་གཉེར་བྱས་འདུག ཕྱི་ལོ་༢༠༡༥ དང་ཕྱི་ལོ་༢༠༡༧། ཕྱི་ལོ་༢༠༡༩ བཅས་ཀྱི་དབྱིན་ཡུལ་གྱི་གྲོས་ཚོགས་འོས་བསྡུར་རྒྱལ་ཁ་ཐོབ་ནས་གྲོས་ཚོགས་འཐུས་མིར་འདེམས་ཐོན་བྱུང་འདུག ཕྱི་ལོ་༢༠༢༠ ལོར་ཁོང་དབྱིན་ཡུལ་གྱི་དཔལ་འབྱོར་བློན་ཆེན་ལ་བསྐོ་གཞག་བྱས་འདུག 

ཕྱི་སྲིད་དྲུང་ཆེ་ལྕམ་ལཱི་ཛ་ཀྲེ་རུ་སཱེ་ཕྱི་ལོ་༢༠༡༠ ལོར་དབྱིན་ཡུལ་གྱི་གྲོས་ཚོགས་འཐུས་མིར་འདེམས་ཐོན་བྱུང་འདུག་པ་དང་། ད་བར་ཤེས་ཡོན་གྱི་བློན་ཆེན་གཞོན་པ་དང་།  ཁོར་ཡུག་དྲུང་ཆེ། ཁྲིམས་ཞིབ་དྲུང་ཆེ། དཔལ་འབྱོར་འདུ་འགོད་ཁང་གི་སྤྱི་ཁྱབ་དྲུང་ཆེ། རྒྱལ་སྤྱིའི་ཚོང་འབྲེལ་དྲུང་ཆེ་སོགས་ཀྱི་ལས་ཁུར་བཞེས་མྱོང་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།