རྒྱ་གར་གྱི་མེ་འཁོར་བརྡབ་སྐྱོན།

ཟླ་འདིའི་ཚེས་༢༠ ཉིན་རྒྱ་གར་བྱང་ཕྱོགས་གྱི་གྲོང་ཁྱེར་ཀན་པུར་ཉེ་འགྲམ་དུ། གྲོང་ཁྱེར་ཨིན་ཌོར་ནས་པ་ཊེ་ན་ལ་འགྲོ་བཞིན་པའི་མེ་འཁོར་ཞིག་ལམ་འཆུས་ཤོར་ནས། ཉུང་མཐར་ལ་མི་༡༣༣ ཡི་ཚེ་སྲོག་ཤོར་ཡོད་འདུག

དེ་ཡང་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། མེ་འཁོར་གྱི་ཁང་མིག་༡༤ ལམ་འཆུས་ཤོར་ནས། ཁང་མིག་དང་པོ་གཉིས་དེ་རྡུང་ཁ་བརྒྱབ་ནས། མི་མང་ཤོས་ཀྱི་ཚེ་སྲོག་དེ་གཉིས་ནང་ཤོར་ཡོད་པ་དང་། མི་༡༣༡ ཙམ་རྨས་སྐྱོན་ཕོག་པ་ལས། ༥༨ ཙམ་ལ་རྨས་སྐྱོན་ཚབས་ཆེན་ཕོག་ཡོད་འདུག ད་ལྟའི་ཆར་ཨ་ལོག་བརྒྱབ་པའི་མེ་འཁོར་ནང་འཁར་བའི་མི་སྐྱོབ་ཐབས་བྱེད་བཞིན་ཡོད་འདུག

སྤྱིར་རྒྱ་གར་ནང་མེ་འཁོར་རྡབ་སྐྱོན་དང་འབྲེལ་ནས་མིའི་སྲོག་ཤོར་བའི་གནས་ཚུལ་མང་པོ་འབྱུང་བཞིན་ཡོད་པས། ཕྱི་ལོ་༢༠༡༥ ནས་༢༠༡༦ ལོའི་རྒྱ་གར་གྱི་སྔོན་རྩིས་འཆར་གཞིའི་ནང་། མེ་འཁོར་གྱི་ཁང་མིག་རྙིང་པ་རྣམས་ཐོན་གསར་པ་ཞིག་ལ་བསྒྱུར་རྒྱུ་གཏན་འབེབས་བྱས་ཡོད་ཀྱང་། ད་ལྟའི་ཆར་རྒྱ་གར་ནང་མེ་འཁོར་ཁང་མིག་ཐོན་གསར་པ་དེ་༥༠༠༠ ནས་༨༠༠༠ བར་ཡོད་པ་དང་། རྙིང་པ་༥༥༠༠༠ ལྷག་ཙམ་བེད་སྤྱོད་བྱེད་བཞིན་ཡོད་འདུག དེ་ཡང་ཐོན་གསར་པ་དེ་མེ་འཁོར་ལམ་འཆུས་ཤོར་བ་སོགས་ཀྱི་གནད་དོན་འབྱུང་སྐབས། མེ་འཁོར་གྱི་ཁང་མིག་རྣམས་གཅིག་གི་སྒང་ལ་གཅིག་བརྩེགས་པའི་ཉེན་ཁ་མེད་པ་དང་། མིའི་ཚེ་སྲོག་ལ་ཉེན་ཁ་ཆུང་བ་ཡོད་འདུག དེ་བཞིན་ཁ་སང་གི་ལམ་འཆུས་ཤོར་བའི་མེ་འཁོར་དེའི་ཁང་མིག་རྣམས་རྙིང་པ་དེ་ཡིན་པས། མིའི་ཚེ་སྲོག་ཕོན་ཆེན་ཤོར་དགོས་པའི་རྒྱུ་མཚན་དེ་ཡིན་སྐོར་བརྗོད་འདུག

སྤྱིར་རྒྱ་གར་ནང་ཕྱི་ལོ་༢༠༢༠ སྔོན་དུ་མེ་འཁོར་གྱི་ཁང་མིག་ཚང་མ་ཐོན་གསར་པར་བསྒྱུར་ཚར་རྒྱུའི་འཆར་གཞི་ཡོད་འདུག་པ་དང་། ཁ་སང་གི་གནས་ཚུལ་དེ་བྱུང་རྗེས། གཞུང་ནང་འཆར་གཞི་དེ་ལོ་གཉིས་ཙམ་སྔོན་དུ་གཏོང་དགོས་པའི་བསམ་ཚུལ་ཡོང་བཞིན་ཡོད་འདུག །

གསར་འགོད་པ་སྐལ་བཟང་དོན་གྲུབ།