རྒྱ་གར་གྱི་སྲིད་བློན་ཟུར་པ་དམར་གསོད་གཏོང་མཁན་ཞིག་གློད་གྲོལ་བཏང་འདུག 

ཟླ་༥ པའི་ཚེས་༡༨ ཉིན་རྒྱ་གར་གྱི་ཆེས་མཐོའི་ཁྲིམས་ཁང་གིས་རྒྱལ་ཁབ་དེའི་སྲིད་བློན་ཟུར་པ་རཱ་ཇི་ཝེ་གྷན་རྡི་དམར་གསོད་གཏོང་མཁན་གྱི་ཁོངས་སུ་ཡོད་མཁན་མི་ཞིག བཙོན་འཇུག་བྱས་ཏེ་ལོ་ངོ་༣༡ འཁོར་བའི་རྗེས་སུ་གློད་གྲོལ་གཏོང་རྒྱུ་ཐག་གཅོད་བྱས་འདུག 

དེ་ཡང་ཟླ་༣ པའི་ནང་ཆེས་མཐོའི་ཁྲིམས་ཁང་གིས་བཙོན་པ་དེའི་བཙོན་འཇུག་དུས་ཡུན་རིང་པོའི་རིང་ལ་བཟང་སྤྱོད་དང་། སྐབས་དེའི་རིང་ཁོང་ལ་ཤེས་ཡོན་སློབ་ཐོན་གྱི་ལག་ཁྱེར་མང་པོ་ཐོབ་པ། དེ་བཞིན་འཕྲོད་བསྟེན་གནས་སྟངས་ཡག་པོ་མེད་པ་སོགས་ལ་བརྟེན། གཏའ་དངུལ་ཐོག་གློད་གྲོལ་བཏང་ཡོད་པ་དང་། ཐེངས་འདིར་རྩ་ཁྲིམས་ནང་དུ་ཡོད་པའི་དམིགས་བསལ་དབང་ཚད་བེད་སྤྱོད་བྱས་ཏེ་གཏན་དུ་གློད་གྲོལ་གཏོང་རྒྱུ་ཐག་གཅོད་བྱས་འདུག 

ཕྱི་ལོ་༡༩༩༡ ལོའི་ཟླ་༥ པའི་ཚེས་༢༡ ཉིན་རྒྱ་གར་གྱི་སྲིད་བློན་ཟུར་པ་རཱ་ཇེ་ཝེ་གྷན་རྡི་ཡིས་ཏ་མིལ་ནཱ་རྡུ་མངའ་སྡེའི་ནང་དུ་འོས་བསྡུའི་དྲིལ་བསྒྲགས་ལས་འགུལ་སྤེལ་བཞིན་པའི་སྐབས་སུ། བུད་མེད་གཅིག་གིས་རང་གི་ལུས་པོར་འབར་རྫས་བཏགས་ནས་སྲིད་བློན་ཟུར་པའི་འགྲམ་དུ་སླེབས་མ་ཐག་འབར་རྫས་གཏོར་ནས་དམར་གསོད་བཏང་ཡོད་པ་རེད། དྲག་རྒོལ་བྱེད་མཁན་ནི་སིང་གྷ་ལའི་ནང་དུ་ཡོད་པའི་ཏ་མིལ་མི་རིགས་ལ་རང་བཙན་ལྡན་པའི་རྒྱལ་ཁབ་གཅིག་ཡོང་ཆེད་དུ་དྲག་པོའི་གྱེན་ལངས་བྱེད་མཁན་གྱི་ཚོགས་པ་ཞིག་ཡིན་འདུག ཕྱིས་སུ་སྲིད་བློན་ཟུར་པ་ཁོང་དམར་གསོད་བཏང་བའི་གནད་དོན་ལ་འབྲེལ་བ་ཡོད་མཁན་མི་སྣ་ཁག་ཅིག་འཛིན་བཟུང་བྱས་འདུག ཕྱི་ལོ་༡༩༨༤ ལོར་སྐབས་དེའི་སྲིད་བློན་ཨེན་རྡར་གྷན་རྡི་དམར་གསོད་བཏང་བའི་རྗེས་སུ། ཁོང་གི་བུ་རཱ་ཇི་ཝེ་གྷན་རྡི་སྲིད་བློན་ཆགས་ནས་ལོ་རྒྱུས་ནང་སྲིད་བློན་ལོ་ན་ཆུང་ཤོས་དེ་ཆགས་འདུག ད་ལྟའི་ཆར་སྲིད་བློན་ཟུར་པ་ཁོང་གི་བཟའ་ཟླ་ནི་རྒྱ་གར་གྱི་ཕྱོགས་འགལ་ཚོགས་པ་གཙོ་བོ་ཀོང་རེ་སའི་འགོ་ཁྲིད་ཡིན་པ་དང་། ཁོང་གི་བུ་ནི་ཚོགས་པ་དེའི་འོས་བསྡུའི་དྲིལ་བསྒྲགས་སྣེ་ཁྲིད་མཁན་ཞིག་ཡིན་ཁར། ཚོགས་པ་དེའི་སྲིད་བློན་འོས་མི་ཡང་བྱེད་མྱོང་བ་རེད།

ཐེངས་འདིར་གློད་གྲོལ་བཏང་བའི་བཙོན་པ་ཨེ་ཇཱི་པཱི་རཱ་རཱི་ཝི་ལན་ནི་སྐབས་དེར་རང་ལོ་༡༩ ཡིན་འདུག་པ་དང་། ཁོས་སྲིད་བློན་ཟུར་པ་དམར་གསོད་གཏོང་ཆེད་དུ་འབར་རྫས་ཆེད་དུ་གློག་རྫས་མཁོ་སྤྲོད་བྱས་པའི་ནག་ཉེས་འོག་ཕྱི་ལོ་༡༩༩༡ ལོར་འཛིན་བཟུང་བྱས་ཏེ། ཕྱི་ལོ་༡༩༩༨ ལོར་ཁོ་དང་འབྲེལ་བ་ཡོད་པའི་མི་སྣ་གཞན་དྲུག་སྲོག་ཐོག་ཁྲིམས་ཆད་བཏང་ཡང་། ཕྱི་ལོ་༢༠༠༠ ལོར་གནད་དོན་དེ་འབྲེལ་གྱིས་སྲོག་ཐོག་ཁྲིམས་ཆད་འཕོག་མཁན་བུད་མེད་གཅིག་པུ་དེའི་ཁྲིམས་ཆད་ཡང་དུ་བཏང་འདུག ཕྱིས་སུ་ཕྱི་ལོ་༢༠༡༤ ལོར་ཆེས་མཐོའི་ཁྲིམས་ཁང་གིས་ཁོ་ཚོ་ཚང་མའི་སྲོག་ཐོག་ཁྲིམས་ཆད་དེ་ཆག་ཡང་བཏང་ནས་ཚེ་བཙོན་ཁྲིམས་ཐག་བཅད་ཡོད་འདུག ད་ལྟའི་ཆར་མི་སྣ་དྲུག་ད་དུང་ཡང་ཚེ་བཙོན་འོག་ཏུ་ཡོད་པ་རེད་འདུག 

ཏ་མིལ་ན་རྡུ་མངའ་སྡེ་ནང་དུ་ཆེས་མཐོའི་ཁྲིམས་ཁང་གི་ཐག་གཅོད་དེར་རྒྱབ་སྐྱོར་བྱེད་མཁན་མང་པོ་ཡོད་འདུག་པ་དང་། མངའ་སྡེ་དེའི་སྤྱི་ཁྱབ་བློན་ཆེན་གྱིས་གློད་གྲོལ་ཐོབ་མཁན་ལ་དགའ་བསུ་དང་རེ་སྨོན་ཞུ་ཡི་ཡོད་སྐོར་བསྒྲགས་འདུག 

ཀོང་རེ་སེ་སྲིད་དོན་ཚོགས་པའི་མགྲིན་ཚབ་པ་ཞིག་གིས་ཆེས་མཐོའི་ཁྲིམས་ཁང་གི་ཐག་གཅོད་དེར་བློ་ཕམ་ཆེན་པོ་ཡོད་སྐོར་བརྗོད་འདུག །

གསར་འགོད་པ་སྐལ་བཟང་དོན་གྲུབ།