རྒྱ་གར་གྱིས་གཞུང་འབྲེལ་མི་སྣ་པེ་ཅིང་རྩེད་འགྲན་ཐོག་མི་གཏོང་རྒྱུ་ཐག་གཅོད།

ཟླ་འདིའི་ཚེས་༣ ཉིན་རྒྱ་གར་གྱི་གསར་འགྱུར་བརྒྱུད་ལམ་Indian Express ནང་རྒྱ་གར་ཕྱི་འབྲེལ་ལས་ཁུངས་ཀྱི་མགྲིན་ཚབ་པས་པེ་ཅིང་དུ་ཨོ་ལིམ་ཕིག་རྩེད་འགྲན་ཐོག་གཞུང་འབྲེལ་མི་སྣ་གཏོང་རྒྱུ་མིན་པའི་གནས་ཚུལ་སྤེལ་འདུག

ཟླ་༢ པའི་ཚེས་༤ ཉིན་རྒྱ་ནག་གི་རྒྱལ་ས་པེ་ཅིང་དུ་དགུན་དུས་ཀྱི་ཨོ་རྩལ་འགྲན་ཚོགས་འགོ་འཛུགས་བྱེད་ཀྱི་ཡོད་ཅིང་། འདས་པའི་ཟླ་བ་ཁ་ཤས་ནང་ཨོ་སི་ཀྲོ་ལི་ཡ་དང་ཁེ་ན་ཌ། ཉི་ཧོང་། ལཱི་ཐུ་ནི་ཡ། ཨ་རི། དབྱིན་ཡུལ་སོགས་རྒྱ་ཁབ་མང་དག་ཅིག་གིས་པེ་ཅིང་ཨོ་ལིམ་ཕིག་རྩེད་འགྲན་ཐོག་གཞུང་འབྲེལ་མི་སྣ་གཏོང་རྒྱུ་མིན་པའི་གསལ་བསྒྲགས་བྱས་ཡོད་པ་རེད།

རྒྱ་ནག་གཞུང་གིས་ད་ཐེངས་གྷ་ཝན་གྱི་དམག་དཔོན་ཨོ་རྩལ་གྱི་དཔལ་འབར་འཁྱེར་མཁན་ལ་བདམས་པར་རྒྱ་གར་ཕྱི་འབྲེལ་ལས་ཁུངས་ཀྱི་འགྲིན་ཚབ་པས་རྒྱ་ནག་གཞུང་གིས་ཨོ་རྩལ་རྩེད་འགྲན་དེ་ཆབ་སྲིད་ཅན་དུ་བསྒྱུར་བཅུག་པ་དེ་ངོ་མ་བློ་ཕམ་དང་། རྒྱ་ནག་གཞུང་གྱིས་པེ་ཅིང་ཨོ་ལིམ་ཕིག་རྩེད་འགྲན་ཆེན་མོའི་དབུ་འབྱེད་དང་། མཇུག་བསྡུའི་མཛད་སྒོ་གཉིས་ཀར་རྒྱ་གར་གཞུང་འབྲེལ་སྐུ་ཚབ་མི་སྣ་གཅིག་ཀྱང་གཏོང་རྒྱུ་མིན་སྐོར་བསྒྲགས་འདུག

རྒྱ་གར་ཕྱི་འབྲེལ་ལས་ཁུངས་ཀྱི་འགྲིན་ཚབ་པ་ཨ་རིན་དམ་བྷག་ཆི་(Arindam Bagchi) ཀྱི་གསལ་བསྒྲགས་ཚར་བའི་རྗེས་རྒྱ་གར་རྒྱལ་སྤྱིའི་རྒྱང་བསྲིང་(Doordarshan) འགན་འཛིན་ཕར་སར་བྷར་ཏི་(Prasar Bharti) གྱིས་རྒྱ་ནག་གཞུང་གྱི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོའི་དབུ་འབྱེད་དང་། མཇུག་བསྡུའི་མཛད་སྒོ་གཉིས་ཀ་རྒྱ་གར་གྱི་རྒྱལ་སྤྱིའི་རྒྱང་བསྲིང་བརྒྱུད་ལམ་ཐོག་སྟོན་རྒྱུ་མིན་སྐོར་བརྗོད་འདུག །

གསར་འགོད་པ་བདེ་སྒྲོན།