རྒྱ་གར་གྱིས་ཨ་རུ་ན་ཅལ་ནང་གཞུང་ལམ་གསར་པ་ཞིག་འཛུགས་སྐྲུན་བྱེད་འཆར་ཡོད་འདུག
ཟླ་བ་འདིའི་ཚེས ༡༩ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཟླ་འདིའི་ཚེས་༩ ཉིན་རྒྱ་ནག་གི་དམག་མིས་ཧིན་བོད་ས་མཚམས་ནས་ཧམ་འཛུལ་བྱས་ནས་རྒྱ་དཀར་ནག་གཉིས་ཀྱི་དམག་མི་བར་གདོང་ཐུག་བྱུང་བས་གནས་ཚུལ་ཐོན་ཡོད་པས་། རྒྱ་གར་གྱི་མ་འོངས་པར་དེ་ལྟ་བུའི་ས་མཚམས་ཀྱི་གནས་སྤོ་བ་རིགས་ཧམ་འཛུལ་བྱེད་མཁན་རྣམས་འགོག་ཆེད་དང་། དེ་བཞིན་འགོག་སྲུང་དམག་མི་རྣམས་ལ་ཕན་ཐོག་དང་། ས་མཚམས་ཁག་ལ་མཚོན་ཆ་མཁོ་སྒྲུབ་ཀྱི་བརྒྱུད་ལམ་སྟབས་བདེ་བར་ཡོང་ཆེད། རྒྱ་གར་གྱིས་ཨ་རུ་ན་ཅལ་ནང་ཀི་ལོ་མི་ཊར་ ༡༧༤༨ ཅན་གྱི་རྒྱ་ལམ་གསར་པ་གྲུ་ལམ་གཉིས་ཡོད་པ་ཞིག་འཛུགས་སྐྲུན་བྱེད་འཆར་ཡོད་འདུག
རྒྱ་གར་གྱིས་ཨ་རུ་ན་ཅལ་ནང་གཞུང་ལམ་གསར་པའི་འཛུགས་སྐྲུན་ལས་འཆར་དེ་ཡི་མིང་ལ་<Frontier Highway NH-913>ཟེར་ཞིང་། ལམ་ཆེན་དེ་ནི་རྒྱ་གར་དང་བོད། དེ་བཞིན་རྒྱ་ནག་དང་འབར་མ་ས་མཚམས་ཀྱི་ཉེ་འགྲམ་ལ་འཛུགས་སྐྲུན་བྱེད་འཆར་ཡོད་འདུག
འགྲིམ་འགྲུལ་བློན་ཆེན་<Nitin Gadkari>ཡིས། ཐེངས་དེའི་ལམ་བཟོའི་ལས་འཆར་དེ་ལ་འགྲོ་གྲོན་བྱེ་བ་སྟོང་ཕྲག་༢༧ ཙམ་གནས་ཀྱི་ཡོད་ཀྱང་། རྒྱ་གར་གཞུང་ནས་འགྲོ་གྲོན་དེ་ལས་ཉུང་ཙམ་གཏོང་རྒྱུའི་ཐབས་ལམ་འཚོལ་ཞིབ་བྱེད་བཞིན་ཡོད་ཅེས་བརྗོད་འདུག
གཞུང་ལམ་འཛུགས་སྐྲུན་གྱི་ལས་འཆར་དེ་ཐོག་མར་བྷོམ་དེ་ལ་ས་མཚམས་ནས་འགོ་བཙུགས་ཏེ་ནཱ་ཕ་ར་དང་ཧུ་རེ། དེ་བཞིན་བོད་དང་རྒྱ་གར་གྱི་ས་མཚམས་ཐག་ཉེ་ཤོས་མོ་ནི་གོང་བར་དང་། རྒྱ་ནག་དང་ས་མཚམས་ཐག་ཉེ་ཤོས་ཇཱི་དོ་དང་ཆི་ཁཱོན་ཊི། གཉིས་བར་འཛུགས་སྐྲུན་བྱེད་འཆར་ཡོད་ཅིང་། རྒྱ་ལམ་འཛུགས་སྐྲུན་དེ་རྒྱ་གར་གྱི་ས་མཚམས་མ་འབར་མ་དང་ཐག་ཉེ་བའི་<Vijaynagar> ས་མཚམས་བར་མཚམས་འཇོག་བྱེད་འཆར་ཡོད་པའི་གནས་ཚུལ་ཐོན་འདུག
རྒྱ་གར་གཞུང་གི་གཞུང་ལམ་གསར་རྒྱག་NH-913 དེ་བཞིན་ཀི་ལོ་མི་ཊར་ ༡༧༤༨ ཅན་གྱི་གཞུང་ལམ་གསར་རྒྱག་གྲུ་ལམ་གཉིས་ཅན་གྱི་འཛུགས་སྐྲུན་གྱི་ལས་འཆར་དེ་ལ་ལོ་གཉིས་ཙམ་འགོར་གྱི་ཡོད་རབས་བརྗོད་འདུག །
གསར་འགོད་པ་བདེ་སྒྲོན།
