རྒྱ་གར་ཉེན་རྟོག་པས་བོད་མི་ལས་འགུལ་བ་ཁག་ཅིག་བཀག་ཉར་བྱས་འདུག

ཟླ་འདིའི་ཚེས་༤ ཉིན་ཏེ། པེ་ཅིང་དུ་ཨོ་རྩལ་རྩེད་འགྲན་ཚོགས་ལ་ཉེ་བའི་སྔ་དྲོ་ལྡི་ལིའི་རྒྱ་ནག་གཞུང་ཚབ་ཏུ། བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་བ་དང་། ལས་འགུལ་བ་དྲུག་རྒྱ་གར་ཉེན་རྟོག་པས་བཀག་ཉར་བྱས་ཡོད་པ་རེད།

བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་ནག་པེ་ཅིང་དུ་རྩེད་འགྲན་ཚོགས་རྒྱུར་ངོ་རྒོལ་བྱེད་དགོས་དོན་ནི། རྒྱ་ནག་གིས་བོད་ལ་དབང་བསྒྱུར་བྱས་པ་དང་། དེ་བཞིན་རྒྱ་ནག་གི་བཙན་འོག་གི་མི་རིགས་མང་པོས་མནར་གཅོད་མྱོང་གི་ཡོད་པས། རྩེད་འགྲན་དེ་པེ་ཅིང་དུ་འཚོག་རྒྱུར་འོས་བབས་མེད་སྐོར་བརྗོད་ཡོད་པ་རེད།

ཐེངས་འདིའི་ལས་འགུལ་སྐབས་ཏོག་དབྱིབས་ནད་ཡམས་ཀྱི་རྐྱེན་གྱིས་ལྡི་ལིར་མི་མང་འབོར་ཆེན་འཛོམས་ཆོག་གི་མེད་ནའང་། རྒྱ་གར་གཞུང་གིས་དམིགས་བསལ་ཆོག་མཆན་སྤྲད་ནས། བོད་མི་ལས་འགུལ་བ་བརྒྱ་ལྷག་གིས་རྒྱ་ནག་གཞུང་ཚབ་ཀྱི་ཉེ་འཁྲིས་སུ་སྐད་འབོད་ངོ་རྒོལ་བྱས་པ་དང་། ལས་འགུལ་བ་ཁག་ཅིག་གིས་རྒྱ་ནག་གཞུང་ཚབ་ནང་མཆོང་ཐབས་བྱས་པར་བརྟེན་མི་དྲུག་རྒྱ་གར་ཉེན་རྟོག་པས་བཀག་ཉར་བྱས་ཡོད་པ་རེད། ཕྱི་དྲོ་གཞོན་ལྷན་གྱི་སྐུ་ཚབ་ཁག་ཅིག་ལྡི་ལིའི་རྒྱ་ནག་གཞུང་ཚབ་དང་། ལྡི་ལིའི་ཨོ་རྩལ་འགྲན་ཚོགས་གོ་སྒྲིག་ཚོགས་ཆུང་གི་ལས་ཁུངས་སུ་ལས་འགུལ་བའི་དགོས་འདུན་ཞུ་གཏུག་སྙན་ཞུ་ཕུལ་དུ་སོང་ཡོད་པ་རེད། དེ་བཞིན་“ཇི་སྲིད་བོད་རང་དབང་རང་བཙན་མ་ཐོབ་ཀྱི་བར་དེ་སྲིད་དུ་བོད་ཀྱི་གཞོན་ནུ་ལྷན་ཚོགས་ནས་རྒྱ་ནག་དམར་ཤོག་སྲིད་གཞུང་གི་གདུག་རྩུབ་ཅན་གྱི་སྲིད་ཇུས་ལ་ངོ་རྒོལ་སྐྱོན་བརྗོད་ཀྱི་ལས་འགུལ་མུ་མཐུད་ནས་སྤེལ་རྒྱུ་ཡིན་”ཞེས་བསྒྲགས་འདུག

ལས་འགུལ་དེའི་སྐོར་ལ་གཞོན་ལྷན་དྲུང་ཆེ་བསོད་ནམས་ཚེ་རིང་ལ་གནས་འདྲི་བྱས་པར། ཁོང་གིས། བོད་ཀྱི་གཞོན་ནུ་ལྷན་ཚོགས་ནས་ཨོ་རྩལ་འགྲན་ཚོགས་དེ་བཞིན་འགྲོ་བ་མིའི་ཐོབ་ཐང་དང་བཟང་སྤྱོད་ཀྱི་ཆ་ནས་རྒྱ་ནག་ནང་ཚོགས་པའི་འོས་བབ་གཏན་ནས་མེད་ཅེས་ངོ་རྒོལ་སྐྱོན་བརྗོད་མཐའ་གཅིག་ཏུ་བྱ་རྒྱུ་ཡིན་པ་དང་། འགྲོ་བ་མིའི་ཐོབ་ཐང་མེད་སར་རྩེད་འགྲན་དེ་ཚོགས་པས་རྩེད་འགྲན་གྱི་ཆེ་མཐོང་ལ་གནོད་པ་དང་། རྩེད་འགྲན་པ་རྣམས་ཀྱིས་ང་ཚོའི་བདེན་པའི་འཐབ་རྩོད་ལ་རྒྱབ་སྐྱོར་བྱེད་རོགས་ཞེས་འབོད་སྐོར་བྱེད་ཀྱི་ཡོད་སྐོར་གསུངས་སོང་།

གཞོན་ལྷན་གྱིས་༢༠༢༢ ལོའི་ཕྱི་ཟླ་༢ པའི་ཚེས་༤ འཁོད་པའི་གསལ་བསྒྲགས་ཤིག་སྤེལ་བའི་ནང་། བོད་ལ་རྒྱ་ནག་གིས་དབང་བསྒྱུར་སྐོར་འཁོད་པ་དང་། དེ་བཞིན་“རྒྱ་གཞུང་གིས་ཤིང་ཅང་དང་ཡུ་གུར། ཧོང་ཀོང་། ནང་སོག་དང་བཅས་མི་རིགས་ཁག་ལའང་སྡུག་སྦྱོང་མནར་གཅོད་བཏང་དང་གཏོང་མུས་ཡིན་པ་དང་། ཕྱི་ལོ་༢༠༢༢ ཟླ་༢ ཚེས་༤ ཉིན་རྒྱ་ནག་དམར་པོའི་སྲིད་གཞུང་ནས་དགུན་དུས་ཨོ་རྩལ་འགྲན་ཚོགས་དེ་བཞིན་རྒྱ་ནག་རྒྱལ་ས་པེ་ཅིང་དུ་འགོ་འཛུགས་བྱ་རྒྱུ་ཡིན་པར་བོད་ཀྱི་གཞོན་ནུ་ལྷན་ཚོགས་ནས་གོང་ཞུས་རྒྱ་གཞུང་གི་བྱས་ཉེས་དེ་དག་ལ་བརྟེན་ནས་དགུན་དུས་ཨོ་རྩལ་འགྲན་ཚོགས་དེ་བཞིན་འགྲོ་བ་མིའི་ཐོབ་ཐང་དང་བཟང་སྤྱོད་ཀྱི་ཆ་ནས་རྒྱ་ནག་ནང་ཚོགས་པའི་འོས་བབ་གཏན་ནས་མེད་ཅེས་ངོ་རྒོལ་སྐྱོན་བརྗོད་མཐའ་གཅིག་ཏུ་བྱ་རྒྱུ་ཡིན་”ཞེས་འཁོད་འདུག

གསལ་བསྒྲགས་དེའི་ནང་། “འཛམ་གླིང་ནང་གི་ཞི་བདེ་དང་རང་དབང་ལ་དགའ་བ། འགྲོ་བ་མིའི་ཐོབ་ཐང་ལ་བརྩི་མཐོང་ཆེ་བ། བཙན་གནོན་འོག་ཏུ་སྡུག་སྦྱོང་མནར་གཅོད་མྱོང་བཞིན་པའི་མི་རིགས་ཁག་གི་བདེ་སྡུག་ལ་སེམས་འཁུར་ཆེ་བའི་རྒྱལ་ཁབ་ཁག་ནས་རྒྱ་གཞུང་གི་དགུན་དུས་ཨོ་རྩལ་འགྲན་ཚོགས་ལ་གཞུང་འབྲེལ་སྐུ་ཚབ་མི་སྣ་མངགས་གཏོང་མི་བྱ་རྒྱུའི་ཐག་གཅོད་བྱུང་ཟིན་པ་དག་ལ་རྒྱ་གཞུང་གི་བཙན་གནོན་དམ་དྲག་འོག་མྱང་དང་མྱོང་བཞིན་པའི་རྒྱལ་ཁབ་དང་མི་རིགས་ཁག་གི་ཚབ་ཞུས་ཏེ་སྙིང་དབུས་ནས་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་རྒྱ་གཞུང་གི་དགུན་དུས་ཨོ་རྩལ་འགྲན་ཚོགས་ལ་མཉམ་ཞུགས་གནང་མཁན་གྱི་རྒྱལ་སྤྱིའི་རྩེད་འགྲན་པ་ཡོངས་ནས་རྒྱ་གཞུང་གི་ལྐོག་གཡོ་ངན་བྱུས་དང་བྱས་ཉེས། འགྲོ་བ་མིའི་ཐོབ་ཐང་ལ་བརྩིས་མེད་རྡོག་རོལ་གཏོང་བཞིན་པ་སོགས་ངོས་འཛིན་ཐུབ་པའི་ཐོག་འགྲོ་བ་མིའི་ཐོབ་ཐང་དང་བཟང་སྤྱོད་ལ་གུས་བརྩི། དྲང་བདེན་ལ་རྒྱབ་སྐྱོར་གྱིས་མིའི་ཟུང་ཁྲག་གིས་ཚོས་པའི་རྒྱ་གཞུང་གི་རྟགས་མ་དེ་དག་མི་ལེན་རྒྱུར་དྲན་སྐུལ་དང་འབོད་སྐུལ་ཞུ་རྒྱུ་ཡིན་”ཞེས་འཁོད་འདུག །

གསར་འགོད་པ་ཆོས་ཉིད་འོད་ཟེར།