རྒྱ་གར་དབུས་གཞུང་གིས་རྩོད་རྙོག་ཆེ་བའི་ཞིང་ཁ་དང་འབྲེལ་བའི་ཁྲིམས་གསུམ་ནུས་མེད་བཟོ་རྒྱུ་རེད་འདུག

 རྒྱ་གར་གྱི་སྲིད་བློན་མཱོ་རྡི་ཡིས་རྩོད་རྙོག་ཆེ་བའི་ཞིང་པའི་ཐོན་སྐྱེད་ཉོ་ཚོང་དང་འབྲེལ་བའི་ཁྲིམས་གསུམ་པོ་དེ་ནུས་མེད་བཟོ་རྒྱུ་ཡིན་པའི་གསལ་བསྒྲགས་བྱས་འདུག་ཀྱང་། ཞིང་པ་ཚོས་ལས་དོན་དེ་གྲོས་ཚོགས་ནང་དུ་དངོས་སུ་ལག་བསྟར་མ་བྱས་བར་ངོ་རྒོལ་མཚམས་འཇོག་བྱེད་རྒྱུ་མིན་སྐོར་བསྒྲགས་འདུག 

ཟླ་༡༡ པའི་ཚེས་༡༩ ཉིན་ནི་རྒྱ་གར་གྱི་སེག་ཆོས་ལུགས་ཀྱི་སྟོན་པའི་འཁྲུངས་སྐར་ཡིན་པ་དང་བསྟུན། རྒྱ་གར་གྱི་སྲིད་བློན་མཱོ་རྡི་ཡིས་མང་ཚོགས་ལ་གཏམ་བཤད་གཅིག་སྤེལ་འདུག ཁོང་གིས་དེ་སྔོན་ཞིང་པ་མང་པོ་ཞིག་གིས་ཁོ་ཚོའི་བདེ་སྡུག་ཆེད་དུ་ཞིང་ཁའི་ཐོན་སྐྱེད་ཉོ་ཚོང་དང་འབྲེལ་བའི་ཁྲིམས་གསར་པ་གཏན་འབེབས་དགོས་པའི་འབོད་སྐུལ་མང་པོ་བྱས་རྐྱེན། དབུས་གཞུང་གིས་དེ་དང་འབྲེལ་བའི་ཁྲིམས་གསར་པ་གསུམ་གྲོས་ཚོགས་ནང་དུ་ཁྲིམས་འཆར་དུ་བཏོན་ནས་ཁྲིམས་སུ་གཏན་འབེབས་བྱུང་ཡོད། འོན་ཀྱང་ཞིང་པའི་སྡེ་ཚན་ཁག་ཅིག་གིས་ཁྲིམས་གསར་པ་དེ་དག་གི་ཁེ་ཕན་རྟོགས་མ་ཐུབ་པར་ངོ་རྒོལ་བསྟུད་མར་བྱེད་བཞིན་ཡོད་པ་དང་། འགྲེལ་བརྗོད་ག་ཚོད་བྱས་ཀྱང་གྲུབ་འབྲས་ཐོན་མེད་པས། དགུན་ཁའི་གྲོས་ཚོགས་ནང་ཁྲིམས་གསུམ་པོ་དེ་ནུས་མེད་བཟོ་རྒྱུ་ཡིན་པས། ཞིང་པ་རྣམས་རང་གནས་སུ་ཕྱིར་ལོག་བྱེད་པའི་རེ་སྐུལ་བྱས་འདུག 

དེ་ཡང་འདས་པའི་ལོ་ངོ་གཅིག་ཙམ་རིང་རྒྱ་གར་གྱི་ཞིང་པ་སྟོང་ཕྲག་མང་པོས་རྒྱལ་ས་ལྡི་ལིའི་ས་མཚམས་སུ་སྡོད་སྒར་བཙུགས་ནས་ངོ་རྒོལ་ལས་འགུལ་སྤེལ་བཞིན་ཡོད་པ་རེད། ཞིང་པ་ཚོས་ཁྲིམས་གསར་པ་གསུམ་དེས་སྒེར་གྱི་ཚོང་པ་རྣམས་ཀྱི་ཁེ་ཕན་ལ་རྒྱབ་སྐྱོར་བྱེད་ཀྱི་ཡོད་པ་ལས། ཞིང་པའི་བདེ་སྡུག་ལ་ཁེ་ཕན་མེད་སྐོར་བརྗོད་བཞིན་ཡོད་པ་རེད། 

ཐེངས་འདིར་རྒྱ་གར་དབུས་གཞུང་གིས་ཁྲིམས་གསར་པ་གསུམ་ནུས་མེད་བཟོ་རྒྱུའི་གློ་བུར་གྱི་གསལ་བསྒྲགས་དེར་དཔྱད་བརྗོད་པ་ཁག་ཅིག་གིས་བརྗོད་དོན་ལ། ཞིང་པ་མང་པོ་ཡོད་པའི་མངའ་སྡེ་པན་ཇབ་དང་ཡུ་པཱི། ཨུ་ཏར་ཁན་བཅས་ཀྱི་ནང་མངའ་སྡེའི་གྲོས་ཚོགས་ཀྱི་འོས་བསྡུ་སླེབས་ལ་ཉེ་བས། དབུས་གཞུང་གི་གཞུང་འཛིན་སྲིད་དོན་ཚོགས་པ་བྷི་ཇེ་པཱི་ཡིས་ཞིང་པ་དེ་དག་གི་འོས་ཤོག་ཐོབ་ཆེད་དུ། ཁྲིམས་གསུམ་པོ་དེ་ནུས་མེད་བཟོ་བའི་ཐག་གཅོད་བྱེད་དགོས་ཁེལ་བ་ཡིན་སྐོར་བརྗོད་བཞིན་འདུག 

ཞིང་པའི་མཐུན་ཚོགས་ཀྱིས་གྲོས་ཚོགས་ནང་དུ་དངོས་སུ་ཁྲིམས་གསུམ་པོ་དེ་དག་ནུས་མེད་མ་བཟོས་བར་དུ་ངོ་རྒོལ་མཚམས་འཇོག་བྱེད་རྒྱུ་མིན་པ་དང་། དེ་བཞིན་དབུས་གཞུང་གིས་ཞིང་པའི་མཐུན་ཚོགས་དང་མཉམ་དུ་ཞིང་ཁའི་ཐོན་སྐྱེད་རྣམས་ལ་ཉུང་མཐར་གྱི་རིན་གོང་ཚད་གཞིའི་སྐོར་གྲོས་མོལ་བྱེད་དགོས་སྐོར་བརྗོད་བཞིན་འདུག 

རྒྱ་གར་དབུས་གཞུང་གིས་ཞིང་པའི་མཐུན་ཚོགས་དང་གྲོས་མོལ་ཐེངས་ཁ་ཤས་བྱས་ཀྱང་གྲུབ་འབྲས་གང་ཡང་ཐོན་མེད་པས། ཕྱིས་སུ་ཡ་ལན་མ་བྱས་པར་ངོ་རྒོལ་ལས་འགུལ་གྱི་གནས་སྟངས་ལ་རྒྱང་ནས་རྟོག་ཞིབ་བྱས་ཏེ་བསྡད་ཡོད་པ་རེད། འོན་ཀྱང་ཟླ་༡༠ པའི་ནང་དབུས་གཞུང་གི་བློན་ཆེན་ཞིག་གི་བུ་ཡིས། ཡུ་པཱི་མངའ་སྡེའི་ནང་དུ་ངོ་རྒོལ་ལས་འགུལ་སྤེལ་མཁན་གྱི་ཞིང་པའི་ཁྲོད་དུ། ཆེད་དུ་མངགས་ནས་རླངས་འཁོར་བཏང་ནས་མི་ཁག་ཅིག་བསད་ཡོད་ཁར། མང་པོ་ཞིག་ལ་རྨས་སྐྱོན་བཟོས་ཡོད་པ་རེད། གནད་དོན་དེའི་བརྙན་ཐུང་དྲ་ཐོག་ཏུ་ཤུགས་ཆེན་ཁྱབ་ནས། མང་ཚོགས་ནས་སྐྱོན་བརྗོད་ཆེན་པོ་བྱས་རྐྱེན། མཐའ་མ་དེར་ཉེས་ཅན་པ་དེ་འཛིན་བཟུང་བྱས་ཡོད་པས། གནད་དོན་དེ་ལ་བརྟེན་ནས་མངའ་སྡེའི་གྲོས་ཚོགས་འོས་བསྡུ་ཁག་གི་ནང་དུ། བྷི་ཇེ་པཱིར་ཞིང་པ་ཚོས་འོས་ཤོག་མི་འཕེན་པའི་ཉེན་ཁ་ཡང་ཆགས་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།