རྒྱ་གར་ནང་ཏོག་དབྱིབས་ནད་དུག་གི་སྔོན་འགོག་སྨན་ཁབ་རྫུན་མའི་གནས་ཚུལ་ཐོན་ཡོད་འདུག 

འཛམ་གླིང་འཕྲོད་བསྟེན་ལྷན་ཚོགས་ཀྱིས་རྒྱ་གར་དང་ཨ་ཧྥེ་རི་ཀའི་རྒྱལ་ཁབ་ཁག་གི་ནང་དུ། ཏོག་དབྱིབས་ནད་དུག་གི་སྔོན་འགོག་སྨན་ཁབ་རྫུན་མ་ཡོད་པ་ངོས་འཛིན་ཐུབ་ཡོད་པས། འབྲེལ་ཡོད་གཞུང་ཁག་གིས་དོ་ནན་བྱས་ཏེ་དེ་དག་མི་མང་ནང་དུ་སླེབས་མི་ཐུབ་པ་བཟོ་དགོས་སྐོར་བརྗོད་འདུག 

ཟླ་༨ པའི་ཚེས་༡༩ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། འཛམ་གླིང་འཕྲོད་བསྟེན་ལྷན་ཚོགས་ཀྱིས་བརྗོད་དོན་ལྟར་ན། ཉེ་ཆར་ཟླ་༧ པ་དང་༨ པའི་ནང་དུ་རྒྱ་གར་དང་ཨ་ཧྥེ་རི་ཀའི་རྒྱལ་ཁབ་ཁག་གི་གཞུང་གིས། ཕྱོགས་སོ་སོའི་ནང་དུ་རྒྱ་གར་ནས་བཟོ་སྐྲུན་བྱས་པའི་སྔོན་འགོག་སྨན་ཁབ་(covidshield) རྫུན་མ་ལག་སོན་ཐུབ་པ་བྱུང་ཡོད་པས། དེ་དག་གིས་རྒྱལ་སྤྱིའི་མི་མང་གི་འཕྲོད་བསྟེན་ལ་ཉེན་ཚབས་ཆེན་པོ་བཟོ་ཡི་ཡོད་པས། དེའི་རིགས་སྔོན་འགོག་སྨན་ཁབ་ཀྱི་འགྲེམས་སྤེལ་བརྒྱུད་ལམ་ནང་ནས་མེད་པ་བཟོ་ཐུབ་དགོས་སྐོར་བརྗོད་འདུག 

སྔོན་འགོག་སྨན་ཁབ་དེ་བཟོ་མཁན་(Serum Institute of India) གྱིས་སྔོན་འགོག་སྨན་ཁབ་རྫུན་མ་ཐོན་ཡོད་པ་ཁས་ལེན་བྱས་འདུག་པ་དང་། རྒྱ་གར་དབུས་གཞུང་གིས་གནད་དོན་དེའི་ཐོག་གཞུང་འབྲེལ་ཐོག་ནས་གང་ཡང་ལན་འདེབས་བྱས་མེད་ཀྱང་། འཕྲོད་བསྟེན་ལས་ཁང་ནས་གནད་དོན་དེའི་ཐད་ཞིབ་འཇུག་བྱེད་བཞིན་ཡོད་འདུག 

དེ་སྔོན་ཟླ་༦ པའི་ཟླ་མཇུག་ཏུ་རྒྱ་གར་གྱི་གྲོང་ཁྱེར་མུམ་བྷེ་ནང་དུ་མི་མང་༢༠༤༠ ལ་ཏོག་དབྱིབས་ནད་དུག་གི་སྔོན་འགོག་སྨན་ཁབ་རྫུན་མ་བརྒྱབ་ཡོད་པའི་གནས་ཚུལ་ཡང་ཐོན་ཡོད་པ་རེད། 

སྔོན་འགོག་སྨན་ཁབ་དང་འབྲེལ་ནས་རྒྱ་གར་གྱི་སྔོན་འགོག་སྨན་ཁབ་བཟོ་མཁན་ཚོང་ལས་ཁང་(Serum Institute of India) གི་འགོ་འཛིན་གྱིས། སྔོན་འགོག་སྨན་ཁབ་ཐེངས་གཉིས་པ་དེ་བརྒྱབ་ནས་ཟླ་བ་དྲུག་གི་རྗེས་ལ། ལུས་ལ་སྔོན་འགོག་ནུས་པ་ཞན་པོ་ཡོད་མཁན་མི་མང་ཚོས་སྔོན་འགོག་སྨན་ཁབ་གསུམ་པ་ཞིག་བརྒྱབ་ན་ནུས་པ་ཆེན་པོ་ཐོན་རྒྱུ་ཡིན་པའི་སྐུལ་མ་བྱས་འདུག དེ་བཞིན་ཁོང་དང་ཚོང་ལས་ཁང་དེའི་ལས་བྱེད་མི་གྲངས་༧༠༠༠ ལྷག་གིས་སྔོན་འགོག་སྨན་ཁབ་གསུམ་པ་བརྒྱབ་ཟིན་སྐོར་བརྗོད་འདུག 

ད་ལྟའི་ཆར་རྒྱ་གར་ནང་མི་མང་བརྒྱ་ཆ་༡༣ ལ་སྔོན་འགོག་སྨན་ཁབ་ཐེངས་གཉིས་པ་དེ་བརྒྱབ་ཟིན་འདུག་པ་དང་། ཏོག་དབྱིབས་ནད་རླབས་གསུམ་པ་དེ་སླེབས་ལ་ཉེ་བའི་ཞེད་སྣང་འོག ཚེས་༡༧ ཉིན་རྒྱ་གར་གྱིས་སྔོན་འགོག་སྨན་ཁབ་ས་ཡ་༨.༨༡ བརྒྱབ་ནས་ད་བར་ཉིན་གཅིག་ནང་སྔོན་འགོག་སྨན་ཁབ་བརྒྱབ་པའི་གྲངས་ཀ་མཐོ་ཤོས་ཆགས་འདུག འཆར་གཞི་ལྟར་ན་ལོ་འདིའི་མཇུག་ཏུ་རྒྱ་གར་མི་མང་ཚང་མར་སྔོན་འགོག་སྨན་ཁབ་བརྒྱབ་ཟིན་པ་བྱེད་འཆར་འདུག་ཀྱང་། སྨན་ཁབ་འདང་མི་འདང་གི་དཀའ་ངལ་དང་མི་མང་ནས་སྨན་ཁབ་ལ་ཡིད་ཆེས་མེད་པའི་དཀའ་ངལ་བཅས་ལ་བརྟེན་ནས། མི་མང་ཚང་མར་སྔོན་འགོག་སྨན་ཁབ་བརྒྱབ་ཐུབ་རྒྱུ་ཁག་པོ་ཡིན་འདུག 

ད་ལྟའི་ཆར་ཉིན་རེར་ཆ་སྙོམས་སུ་མི་མང་ས་ཡ་༥ ལྷག་ལ་སྔོན་འགོག་སྨན་ཁབ་རྒྱག་བཞིན་ཡོད་འདུག་པ་དང་། གལ་ཏེ་ལོ་འདི་མ་རྫོགས་བའི་སྔོན་ནས་མི་མང་ཚང་མར་སྔོན་འགོག་སྨན་ཁབ་རྒྱག་ཐུབ་པ་བྱེད་རྒྱུ་ཡིན་ཚེ། ཉིན་རེར་མི་མང་ས་ཡ་༨ ནས་༩ ལ་སྨན་ཁབ་རྒྱག་དགོས་ཀྱི་ཡོད་འདུག །

གསར་འགོད་པ་སྐལ་བཟང་དོན་གྲུབ།