རྒྱ་གར་བོད་དོན་རྒྱབ་སྐྱོར་བའི་ཚོགས་ཆེན་ཐོག་༧གོང་ས་མཆོག་གི་གསུང་འཕྲིན།

ཕྱི་ལོ་༢༠༡༥ ཟླ་༡༡ ཚེས་༢ ནས་༣ བར་ཉིན་གྲངས་གཉིས་རིང་རྒྱ་གར་བྱང་ཤར་མངའ་སྡེའི་ཨ་སམ་ཁུལ་གྱི་གྲོང་ཁྱེར་གོ་ཧ་ཊི་རུ་འཚོགས་པའི་རྒྱ་གར་རྒྱལ་ཡོང་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ལྔ་པའི་ཐོག ༸གོང་ས་མཆོག་གིས་གསུང་འཕྲིན་ཞིག་གནང་ཡོད་པ་རེད།

ཨ་སམ་ཁུལ་གྱི་གྲོང་ཁྱེར་གོ་ཧ་ཊིར་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ལྔ་པའི་ཐོག་མཉམ་ཞུགས་གནང་མཁན་ཚོགས་བཅར་བ་ཡོངས་ལ་འཚམས་འདྲི་ཞུ་རྒྱུ་ཡིན། ང་ཚོ་བཙན་བྱོལ་བ་ཆགས་ནས་མི་ལོ་༥༦ འགྲོ་བཞིན་ཡོད། མི་རིགས་གཅིག་གི་ལོ་རྒྱུས་ཐོག་ནས་བརྗོད་ན་དུས་ཚོད་ཐུང་ཐུང་ཞིག་ཡིན་ནའང་མི་གཅིག་གི་མི་ཚེ་ལ་མཚོན་ན་དུས་ཚོད་ཧ་ཅང་རིང་པོ་རེད། འོན་ཀྱང་གཞིས་ལུས་བོད་མི་ཚོས་དུས་ཚོད་དེའི་རིང་དཀའ་སྡུག་ཧ་ཅང་ཡོད་པ་དེར་གདོང་ལེན་བྱས་ནས་ད་བར་སྙིང་སྟོབས་མ་ཞུམ་པར་གནས་ཡོད། ས་མཚམས་ཐོག་ནས་འཕགས་བོད་གཉིས་ཁྱིམ་མཚེས་རྒྱལ་ཁབ་གཅིག་ཡིན་པ་ཙམ་དུ་མ་ཟད། གནའ་བོའི་སྲོལ་རྒྱུན་གྱི་རིག་གནས་ཐོག་ནས་བརྗོད་ནའང་འཕགས་བོད་གཉིས་འབྲེལ་ཐག་ཧ་ཅང་ཉེ་པོ་ཡོད།

ལྷག་པར་དུ་ཧི་མཱ་ལ་ཡི་རི་རྒྱུད་ཀྱི་རྒྱ་གར་ཡུལ་མི་ཚོས་དུས་ད་ལྟའི་བར་བོད་བརྒྱུད་ནང་བསྟན་གྱིས་གཙོས་བོད་མི་ཚོ་དང་རིག་གཞུང་འབྲེལ་ཐག་ཧ་ཅང་ཉེ་པོ་ཡོད། ལོ་རྒྱུས་ཐོག་ནས་ང་ཚོ་སློབ་མ་དང་རྒྱ་གར་བླ་མར་ངོས་འཛིན་ཞུ་བཞིན་ཡོད། འོན་ཀྱང་འདས་པའི་ལོ་ངོ་བརྒྱ་ཕྲག་རིང་རྒྱ་གར་ནང་དུ་དཔལ་ནཱ་ལེནྡྲའི་བཞེད་ སྲོལ་མི་ཉམས་རྒྱུན་འཛིན་བྱ་རྒྱུར་དཀའ་ངལ་མང་དག་གཅིག་འཕྲད་ཡོད། འོན་ཀྱང་དུས་སྐབས་དེའི་རིང་བོད་མི་ཚོས་བོད་ནང་དུ་དཔལ་ནཱ་ལེནྡྲའི་བཞེད་སྲོལ་དྲི་མ་མེད་པ་མི་ཉམས་རྒྱུན་འཛིན་གནང་ནས་ཉར་ཚགས་ཐུབ་པ་བྱུང་ཡོད། དེར་བརྟེན་ངོས་ཀྱིས་དུས་རྒྱུན་ང་ཚོ་སློབ་མ་ཚད་ཐུབ་ཅིག་ཡིན། ཞེས་བརྗོད་ཀྱི་ཡོད། བློའི་འགྲོ་སྟངས་དང་ཤེས་པ་ཕྲ་རགས་ཀྱི་རྣམ་གཞག་གི་སྐོར་དེ་དག་དཔལ་ནཱ་ལེནྡྲའི་བཞེད་སྲོལ་ཧ་ཅང་གཏིང་ཟབ་ཡོད་པ་དེ་དག་བོད་མི་ཚོས་འཆད་གཉེར་བྱེད་བཞིན་ཡོད། ལེགས་བཤད་དེ་དག་དཔལ་ནཱ་ལེནྡྲའི་མཁས་པ་ཚོ་ནས་བྱུང་བ་རེད། ལེགས་བཤད་དེ་དག་དེང་སྐབས་ཁྱབ་བརྡལ་ཐུབ་པ་ཡིན་ན། དེང་སྐབས་སེམས་ཁམས་རིག་པའི་སློབ་ཚན་ལ་ཞབས་འདེགས་ཧ་ཅང་ཞུ་ཐུབ་ངེས། ཧ་ཅང་འཇིགས་སླ་བའི་མཐོ་སྒང་བོད་ཀྱི་ཁོར་ཡུག་ཐོག་ང་ཚོ་ཚང་མས་སེམས་འཚབ་བྱེད་དགོས་པ་ཆགས་ཡོད། བོད་ཀྱི་རྩ་ཐང་དང་གཏེར་ཁ་སྔོག་འདོན་སོགས་ལག་བསྟར་བྱེད་ཕྱོགས་དེས་བོད་མིའི་འཚོ་གནས་ལ་དོ་ཕོགས་འགྲོ་བཞིན་ཡོད། འོན་ཀྱང་གངས་དང་འཁྱགས་རོམ།

དེ་བཞིན་བརྟན་ཆགས་འཁྱགས་རོམ་སོགས་ཉམས་ཆག་ཕྱིན་པའི་ཤུགས་རྐྱེན་དེས་ཁོར་ཡུག་ལ་གནོད་བཞིན་ཡོད་པ་མ་ཟད། འཛམ་གླིང་ལྷོ་བྱང་གི་སྣེ་གཉིས་དང་དོ་མཉམ་པའི་ཤུགས་རྐྱེན་འཐེབ་བཞིན་ཡོད། ཕྱོགས་མཚུངས་ཨེ་ཤི་ཡ་གླིང་ཆེན་གྱི་རྒྱུག་ཆུ་ཆེ་ཁག་དཔེར་ན། རྒྱ་གར་བྱང་ཕྱོགས་ས་ཁུལ་ཁག་ནང་རྒྱུག་བཞིན་པའི་རྒྱུག་ཆུ་དེ་དག་བོད་ནས་ཡོང་གི་ཡོད། རྒྱུག་ཆུ་དེ་དག་གིས་མི་དུང་ཕྱུར་མང་པོར་འཚོ་རྟེན་སྦྱིན་བཞིན་ཡོད། དེར་བརྟེན་བོད་ཀྱི་ཁོར་ཡུག་སྲུང་སྐྱོབ་བྱ་རྒྱུ་དེ་རྒྱལ་སྤྱིའི་གནད་དོན་ཞིག་ཆགས་ཡོད། དེང་སྐབས་བོད་ནང་དུ་འགྱུར་བ་འགྲོ་བཞིན་པའི་གནས་སྟངས་འགའ་ཤས་ལ་ངོས་རང་ཧ་ཅང་སེམས་འཚབ་ཡོང་བཞིན་འདུག བོད་ཀྱི་སྐད་དང་བོད་མིའི་ངོ་བོ་རིམ་བཞིན་ཡལ་འགྲོ་བཞིན་པ་བརྟེན་འཚེ་མེད་ཞི་བར་གཞི་བཅོལ་བའི་བོད་མིའི་སྲོལ་རྒྱུན་གོམས་གཤིས་བཟང་པོ་དེ་རིམ་བཞིན་ཉམས་ནས་ཡལ་འགྲོ་རྒྱུ་དེ་རེད། བོད་ནང་དུ་མཚོན་ན་རྒྱ་རིགས་སྤོ་ཞུས་མུ་མཐུད་ནས་བྱེད་ཀྱི་ཡོད་པ་མ་ཟད། གྲོང་གསེབ་མང་པོ་གྲོང་ཁྱེར་ཅན་དུ་འགྱུར་རྒྱུའི་ལས་འགུལ་སྤེལ་བཞིན་ཡོད། དེར་བརྟེན་བོད་མི་ཚོ་སོ་སོའི་ལུང་པའི་ནང་གྲངས་ཉུང་མི་རིགས་ཆགས་བཞིན་ཡོད། གནས་སྟངས་འདིའི་འོག་རྒྱལ་སྤྱི་དང་ལྷག་དོན་རྒྱ་གར་མང་ཚོགས་ཀྱིས་བོད་མི་ཚོར་སེམས་ཐག་ཉེ་པོས་རྒྱབ་སྐྱོར་གནང་རྒྱུ་འདི་ང་ཚོའི་འཐབ་རྩོད་ལ་ཧ་ཅང་གནད་འགག་ཆེན་པོ་ཆགས་ཡོད།

ལྷག་པར་དུ་ཨེ་ཤི་ཡའི་ཡུལ་གྲུ་ཕན་ཚུན་དབར་འདས་པའི་བྱུང་རབས་ཁྲོད་གནས་སྟངས་དང་ཕན་ཚུན་དབར་འབྲེལ་ལམ་ཇི་བྱུང་སོགས་ལ་ཉམས་ཞིབ་དང་བགྲོ་གླེང་ལྷན་ཚོགས་མང་ཙམ་ཚོགས་ཆེད་བརྒྱུད་སྐུལ་ཐུབ་ཚེ་འབྱུང་འགྱུར་ཡུལ་གྲུ་ཕན་ཚུན་མཐུན་སྒྲིལ་གྱི་རྨང་གཞི་སྲ་བརྟན་ཡག་པོ་ཞིག་འཛུགས་ཐུབ་རྒྱུ་ཡིན། བོད་མི་ཚོར་བདེན་པའི་རྒྱལ་ཁ་ཐོབ་རྒྱུར་ངོས་ལ་རེ་བ་དང་ཡིད་ཆེས་ཡོད། ང་ཚོས་ཆོད་སེམས་དང་སྙིང་སྟོབས་མ་ཞུམ་པར་གནས་དགོས། ཁྱེད་རྣམ་པས་རྒྱ་གར་བོད་བོད་རྒྱབ་སྐྱོར་ཚོགས་པའི་ཚོགས་ཆེན་ཐེངས་ལྔ་པར་བཅར་བ་དེས་ང་ཚོར་རྒྱབ་སྐྱོར་གྱི་རྣམ་པ་གསལ་པོར་མཚོན་ཞིང་ང་ཚོར་སྙིང་སྟོབས་སྐྱེ་གཞིར་གྱུར་ཡོད་སྟབས་ངོས་ཀྱིས་ཁྱེད་རྣམ་པ་ཚང་མར་བཀའ་དྲིན་ཆེ་ཞུ་རྒྱུ་ཡིན། །